རྒྱ་ནག་གཞུང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་ཀྱི་ཁོངས་སུ་ཞུགས་པར་དགག་བྱ་འདོན་དགོས་པའི་འབོད་སྐུལ་གནང་།

རྒྱལ་སྤྱིའི་བོད་དོན་ལས་འགུལ་ཁང་གཙོ་བྱས་པའི་བོད་དོན་རྒྱབ་སྐྱོར་གྱི་ཚོགས་པ་ ༡༤༣ ནས་རྒྱ་ནག་དེ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་ཀྱི་ཁོངས་སུ་འོས་འདེམས་མི་བྱེད་པའི་འབོད་སྐུལ་ཞུ་ཡིག་ཕུལ་ཡོད་འདུག

སང་ཉིན་ཕྱི་ཚེས་ ༡༡ ནས་ ༡༣ བར་ཉིན་གཉིས་རིང་ཡུ་རོབ་རྒྱལ་ཁབ་སིད་སུའི་ཇི་ནེ་ཝ་མཉམ་འབྲེལ་རྒྱལ་ཚོགས་ཀྱི་དབུས་སྤྱི་ཁྱབ་ལྷན་ཁང་དུ། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་སྐབས་ ༥༤ པ་འཚོག་གཏན་ཁེལ་ཡོད་པ་དང་། ཚོགས་ཐོག་ཏུ་ད་ལྟའི་རྒྱལ་ཚོགས་ཀྱི་འཐུས་མི་རྒྱལ་ཁབ་ ༡༩༣ གྱིས། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་འཐུས་མི་རྒྱལ་ཁབ་ཁྱོན་ ༤༧ ཐད་ཀར་དང་གསང་བའི་ལམ་ནས་འོས་འདེམས་བྱ་རྒྱུ་ཡིན་པ་ལྟར།  ཁ་སང་ཕྱི་ཚེས་ ༩ ཉིན་རྒྱལ་སྤྱིའི་བོད་དོན་ལས་འགུལ་ཁང་གིས་གཙོས་བོད་དང་འབྲེལ་བའི་རྒྱལ་སྤྱིའི་ཚོགས་སྡེ་ཁག་ ༡༤༣ གྱིས།  འཚོག་ལ་ཉེ་བའི་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་སྐབས་ ༥༤ སྟེང་། རྒྱ་ནག་དེ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཁོངས་སུ་འོས་འདེམས་མི་བྱེད་པའི་འབོད་སྐུལ་ཞུ་ཡིག་ཕུལ་ཡོད་འདུག

རྒྱལ་སྤྱིའི་བོད་ལས་འགུལ་ཁང་གིས་སྣེ་འཁྲིད་པའི་བོད་པའི་ཚོགས་སྡེ་ཁག་ ༡༤༣ ཐུན་མོང་གིས། འདི་ལོའི་ཕྱི་ཟླ་ ༩ སྟེ། ཟླ་སྔོན་མ་ནས་བཟུང་མཉམ་འབྲེལ་རྒྱལ་ཚོགས་ཀྱི་ཚོགས་མི་རྒྱལ་ཁབ་ཁག་གི་ཕྱི་སྲིད་བློན་ཆེན་རྣམས་འབོད་སྐུལ་ཞུ་ཡིག་དེ་ཕུལ་ཡོད་ཅིང་། ཁོང་ཚོའི་ཞུ་ཡིག་ནང་། རྒྱ་ནག་གཞུང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཁོངས་སུ་མ་འདེམས་རོགས། ང་ཚོས་རྒྱལ་ཚོགས་ཀྱི་ཚོགས་མི་རྒྱལ་ཁབ་ཁག་ནས་རྒྱ་ནག་འགྲོ་བ་མིའི་ཐོབ་ཐང་གི་ལྷན་ཚོགས་ཁོངས་སུ་ཞུགས་པར་དགག་བྱ་འདོན་རོགས་ཞུ་རྒྱུ་ཡིན། རྒྱ་ནག་གཞུང་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་མིར་བདམས་ཏེ་རྐུབ་འཀྱག་ཅིག་གི་བྱ་དགའ་སྤྲོད་རྒྱུའི་ཚབ་ཏུ། རྒྱ་ནག་གཞུང་གིས་འགྲོ་བ་མིའི་ཐོབ་ཐང་ལ་རྡོག་རོལ་ཚབས་ཆེན་བཏང་དང་གཏོང་བཞིན་པར་འགན་ལེན་འཁུར་དུ་འཇུག་དགོས་པ་མ་ཟད། རྒྱ་ནག་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཁོངས་སུ་བཅུག་རྒྱུ་ནི། ལྷན་ཚོགས་དེའི་ཆེ་མཐོང་དང་མཚན་སྙན་སོགས་དང་འབྲེལ་བའི་གནད་དོན་ཞིག་ཀྱང་ཆགས་ཡོད། ཅེས་བརྗོད་འདུག

ཡང་ཞུ་ཡིག་ནང་། མཉམ་འབྲེལ་རྒྱལ་ཚོགས་ཀྱི་རྒྱལ་སྤྱིའི་སྤྱི་ཚོགས་དབྱེ་ཞིབ་ལྷན་ཚོགས་(UN Social Committee)དང་ཆེད་མཁས་ལྷན་ཚོགས། རྒྱལ་ཚོགས་ཀྱི་དམིགས་བསལ་རྟོག་ཞིབ་ལྷན་ཚོགས་སོགས་རྒྱལ་ཚོགས་ཀྱི་ལྷན་ཚོགས་མི་འདྲ་བ་མང་པོས། རྒྱ་ནག་གཞུང་གིས་བོད་ནང་གི་བོད་མིའི་འགྲོ་བ་མིའི་ཐོབ་ཐང་ལ་རྡོག་རོལ་བཏང་དང་གཏོང་བཞིན་པའི་གནད་དོན་ཐེར་འདོན་གནང་ཡོད་པ་མ་ཟད། བོད་པའི་བྱིས་པ་ས་ཡ་གཅིག་ལྷག་བཅའ་སྡོད་སློབ་གྲྭའི་སྲིད་ཇུས་འོག་རྒྱ་བསྒྱུར་བྱེད་བཞིན་པ་དང་། ངལ་རྩོལ་ལས་གཞིའི་སྲིད་ཇུས་སོགས་ལག་བསྟར་བྱས་ཏེ་བོད་མིའི་ཆོས་དང་རིག་གཞུང་། སྐད་ཡིག ཁོར་ཡུག་སོགས་གཏོར་སྐྱོན་གཏོང་གི་ཡོད་པར་རྒྱ་ནག་གཞུང་ལ་སྐྱོན་བརྗོད་བྱས་ཡོད་སྐོར་སོགས་བརྗོད་འདུག

རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་མི་ལོ་གསུམ་རེའི་མཚམས་སུ་འོས་འདེམས་བྱེད་སྲོལ་ཡོད་ཅིང་། ཕྱི་ལོ་ ༢༠༢༠ ལོའི་འོས་བསྡུའི་ཁྲོད། རྒྱ་ནག་གཞུང་ལ་རྒྱལ་ཚོགས་ཀྱི་ཚོགས་མི་འཛམ་གླིང་རྒྱལ་ཁབ་ ༡༩༡ གི་ནང་ནས་རྒྱལ་ཁབ་ ༡༣༩ ཡི་རྒྱབ་སྐྱོར་ཐོབ་སྟེ། འགྲོ་བ་མིའི་ཐོབ་ཐང་གི་ལྷན་ཚོགས་ཀྱི་ཁོངས་སུ་བདམས་ཐོན་བྱུང་ཡོད་པ་དང་། དེ་ནི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཁོངས་ནས་ཁ་གཏད་འོས་ལངས་བྱེད་མཁན་རྒྱལ་ཁབ་གཅིག་ཀྱང་མེད་པའི་ཐོག་ནས་འོས་འདེམས་བྱུང་བ་ཞིག་ཡིན་འདུག

ཕྱི་ལོ་ ༡༩༧༡ ལོར་མཉམ་འབྲེལ་རྒྱལ་ཚོགས་ཀྱི་ལོ་འཁོར་ཚོགས་ཆེན་སྟེང་། གྲོས་ཆོད་ཅིག་བཏོན་པ་བརྒྱུད་འོས་བསྡུའི་ལམ་ནས་རྒྱ་ནག་སྤྱི་མཐུན་རྒྱལ་ཁབ་འབོད་པའི་ཐའེ་ཝན་རྒྱལ་ཚོགས་ཀྱི་ཁོངས་ནས་ཕྱིར་ཕུད་དང་། རྒྱ་ནག་དམར་ཤོག་ཚོགས་པས་སྣེ་འཁྲིད་པའི་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་གཞུང་དེ་དངོས་སུ་མཉམ་འབྲེལ་རྒྱལ་ཚོགས་ཀྱི་ཚོགས་ཁོངས་སུ་ཞུགས་ཐུབ་ཡོད་པར་གྲགས། དེ་ཡང་གཙོ་བོ་ལོ་དེར་ཨ་རིའི་རྒྱལ་སྲིད་བློན་ཆེན་(Henry Kissinger) རྒྱ་ནག་ཏུ་བསྐྱོད་དེ་ཨ་རྒྱའི་འབྲེལ་ལམ་གསར་པ་ཞིག་སྒོ་འབྱེད་བྱས་པ་ནས་བྱུང་བ་ཞིག་ཡིན་པ་རེད། དེ་མིན། འཛམ་གླིང་དམག་ཆེན་གཉིས་པ་མཇུག་སྒྲིལ་རྗེས། ཕྱི་ལོ་ ༡༩༤༥ ལོར་འཛམ་གླིང་རྒྱལ་ཁབ་ཁག་གིས་མཉམ་འབྲེལ་རྒྱལ་ཚོགས་ཐོག་མར་གསར་འཛུགས་གནང་སྐབས། ད་ལྟའི་ཐའེ་ཝན་ཏེ། གུང་མན་ཏང་ངམ་རྒྱ་ནག་སྤྱི་མཐུན་རྒྱལ་ཁབ་རྒྱལ་ཚོགས་ཀྱི་ཁོངས་སུ་ཡོངས་གྲགས་ངོས་འཛིན་ཐོག་མཉམ་ཞུགས་བྱས་ཡོད་འདུག

ད་ལྟ་རྒྱ་ནག་དམར་ཤོག་ཚོགས་པའི་གཞུང་ནི་མཉམ་འབྲེལ་ཚོགས་བདེ་འཇགས་ལྷན་ཚོགས་ཀྱི་གཏན་འཇགས་ཚོགས་མི་རྒྱལ་ཁབ་ལྔའི་གྲས་ཡིན་པ་དང་། མཉམ་འབྲེལ་རྒྱལ་ཚོགས་ཀྱི་ཐག་གཅོད་ཆེ་མ་ཆུང་གསུམ་ཚང་མར་ཇུས་གཏོགས་བྱེད་པའི་དབང་ཚད་ཡོད་ཁར། རྒྱལ་ཚོགས་ཀྱི་སྡིངས་ཆ་བེད་སྤྱད་ཀྱིས། རྒྱ་ནག་གཞུང་གི་ཁ་གཏད་དུ་ལངས་མཁན་གཞུང་དང་གཞུང་འབྲེལ་མིན་པའི་རྒྱལ་སྤྱིའི་ཚོགས་སྡེ་ཁག་མང་པོ་ཞིག་ལ་དངོས་ཤུགས་བརྒྱུད་གསུམ་གྱི་ཐོག་ནས་གནོན་ཤུགས་སྤྲོད་ཐབས་དང་། མཐའ་ན་མཉམ་འབྲེལ་རྒྱལ་ཚོགས་ཀྱི་སྒྲོམ་གཞི་ཡིན་ཕྱིར་རྒྱ་ནག་གི་མངོན་འདོད་དང་མཐུན་པ་ཞིག་ཏུ་བསྒྱུར་ཐབས་བྱེད་ཀྱི་ཡོད་པ་དབྱེ་ཞིབ་པས་བརྗོད་འདུག

གསར་འགོད་པ། སྐལ་བཟང་སྦྱིན་པ།