རྒྱ་གར་ནུབ་བྱང་གི་ཐར་(Thar Desert) བྱེ་ཐང་ཆེན་མོ་དང་ཡུ་གུར་གྱི་ཊག་ལ་མ་ཀན་(Taklamakan Desert) བྱེ་ཐང་གཉིས་ཀྱི་བྱེ་རྡུལ་གྱིས་བོད་ཀྱི་འཁྱམ་རོམ་ལ་གནོད་འཚེ་ཆེན་པོ་གཏོང་གིན་ཡོད་འདུག
དེ་རིང་རྒྱ་གར་གྱི་གསར་འགྱུར་བརྒྱུད་ལམ་ཁག་གིས་གནས་ཚུལ་སྤེལ་བ་ལྟར་ན། རྒྱ་ནག་གི་ནུབ་བྱང་རང་བྱུང་ཁོར་ཡུག་དང་ཐོན་ཁུངས་གཙུག་ལག་སློབ་གཉེར་ཁང་(Northwest Institute of Eco-Environment and Resources )གིས་ཞིབ་འཇུག་བྱས་པ་བརྒྱུད། རྒྱ་གར་ནུབ་བྱང་གི་ཐར་བྱེ་ཐང་ཆེན་མོ་དང་ཡུ་གུར་གྱི་ཊག་ལ་མ་ཀན་བྱེ་ཐང་གཉིས་ཀྱི་ས་བབ་ཆགས་ཚུལ་དང་ནུབ་ཕྱོགས་ནས་ལྡང་བའི་རླུང་བུས་དེད་པའི་ཐལ་རྡུལ་དག་གིས་བོད་མཐོ་སྒང་གི་འཁྱག་རོམ་ལ་གནོད་སྐྱོན་ཚབས་ཆེན་གཏོང་གི་ཡོད་པའི་གྲུབ་དོན་རྙེད་ཡོད་ཅིང་། ཐལ་རྡུལ་དེ་དག་བོད་མཐོ་སྒང་གི་འཁྱག་རོམ་ངོས་སུ་འབྱར་བ་དེས། འཁྱམ་རོམ་ལ་གནོད་འཚེ་ཐེབས་ནས་ཞུ་ཚད་ཇེ་མགྱོགས་དང་རྒྱལ་སྤྱིའི་གནམ་གཤིས་འགྱུར་ལྡོག་ལའང་འགྱུར་བ་ཆེན་པོ་ཐེབས་ཉེན་ཡོད་འདུག
ཆེད་མཁས་པ་རྣམས་ཀྱིས་བོད་མཐོ་སྒང་གི་འཁྱག་རོམ་ངོས་སུ་འབྱར་བའི་ཐལ་རྡུལ་དེ་དག་གི་འབྱུང་ཁུངས་ཤེས་པ་བྱ་རྒྱུ་དེ། ཁུལ་དེའི་གནམ་གཤིས་དང་འཁྱག་རོམ་གྱི་གནས་བབ་ཞིབ་འཇུག་བྱེད་པར་གནད་འགག་ཅིག་ཏུ་གྱུར་ཡོད་པ་ཤེས་རྟོགས་བྱུང་རྗེས། ཕྱི་ལོ་ ༢༠༡༦ ལོར་བོད་མཐོ་སྒང་གི་འཁྱག་རོམ་མི་འདྲ་བ་གསུམ་གྱི་ངོས་སུ་ཆགས་པའི་ཐལ་རྡུལ་ལ་ཞིབ་འཇུག་བྱས་པ་བརྒྱུད། བོད་ཀྱི་འཁྱམ་རོམ་ངོས་སུ་འབྱར་བའི་ཐལ་རྡུལ་མང་ཆེ་བའི་འབྱུང་ཁུངས་ནི་རྒྱ་གར་གྱི་ཐར་བྱེ་ཐང་ཆེན་མོ་དང་། ཡུ་གུར་གྱི་ཊག་ལ་མ་ཀན་བྱེ་ཐང་གཉིས་ཡིན་པ་རྟོགས་བྱུང་ཡོད་འདུག
དེའི་ཐད་ཆེད་མཁས་པ་ཞིག་གིས། བོད་མཐོ་སྒང་གི་དབུས་དང་ལྷོ་ཕྱོགས་ཀྱི་འཁྱམ་རོམ་མང་དག་ཅིག་ཏུ་ས་བབ་ཆགས་ཚུལ་དང་ནུབ་རླུང་ལྡང་བ་ལ་བརྟེན་ནས། རྒྱ་གར་གྱི་ཐར་བྱེ་ཐང་ཆེན་མོ་དང་ཡུ་གུར་གྱི་ཊག་ལ་མ་ཀན་གཉིས་ཀྱི་ཐལ་རྡུལ་ཆགས་ནས་གནོད་འཚེ་ཚབས་ཆེན་ཐེབས་ཡོད་ཅིང་། རྒྱ་གར་གྱི་ཐར་བྱེ་ཐང་ཆེན་པོའི་ཐལ་རྡུལ་དག་རྒྱ་གར་གྱི་ནུབ་བྱང་ནས་རླུང་བུས་དེད་ཡོད་པ་དང་། དེ་ནས་འཛམ་གླིང་གི་འཕྲེད་ཐིག་འོག་ཏུ་ཡོད་པའི་རླུང་བུས་དེད་དེ། བོད་ཀྱི་ལྷོ་ཕྱོགས་ཀྱི་འཁྱམ་རོམ་དག་ལ་གནོད་འཚེ་ཚབས་ཆེན་བཏང་ཡོད་སྐོར་བརྗོད་འདུག
འཛམ་གླིང་གི་སྣེ་མོ་གསུམ་པར་འབོད་པའི་བོད་ནི་འཛམ་གླིང་གི་གཙང་པོ་ཆེ་ཁག་གི་མགོ་ཁུངས་ཡིན་ཡང་། འདས་པའི་ལོ་ཤས་རིང་རྒྱ་ནག་གཞུང་གིས་བོད་ནང་གི་ས་གནས་མང་དག་ཅིག་ཏུ་ཆུ་རགས་གསར་རྒྱག་དང་། འཛུགས་སྐྲུན་གྱི་ལས་གཞི་མང་དག་ཅིག་སྤེལ་རྐྱེན། བོད་ནང་དུ་ཚ་དྲོད་འཕེལ་ནས། གངས་རི་དང་འཁྱག་རོམ་མགྱོགས་པོ་ཞུ་ཡི་ཡོད་པ་མ་ཟད། ད་ལྟ་བོད་ནང་དུ་ཚ་ཚད་ལྡབ་འགྱུར་གྱིས་འཕར་ཡོད་སྟབས། བོད་དུ་འཁྱག་རོམ་ཞུ་བ་དང་ཚ་ཚད་འཕར་བ་དེས། འཛམ་གླིང་ཁྱོན་ཡོངས་ཀྱི་ཚ་ཚད་འཕེལ་ཉེན་ཡོད་པ་མ་ཟད། ལྷག་པར་ཨེ་ཤ་ཡ་དང་ཁྱིམ་མཚེས་རྒྱལ་ཁབ་ཏུའང་ཆུའི་གནོད་འཚེ་ཡོང་ཉེན་ཡོད་འདུག
གཞན་ཡང་། འདི་ལོའི་ཕྱི་ཟླ་ ༥ ཚེས་ ༡༧ ཉིན་རྒྱལ་ཚོགས་ཀྱི་འཛམ་གླིང་གནམ་གཤིས་རིག་པའི་ལྷན་ཚོགས་(World Meteorological Organization) ཀྱིས་བཏོན་པའི་གོ་ལའི་གནམ་གཤིས་སྐོར་གྱི་སྙན་ཐོའི་ནང་། སྤྱིར་འཛམ་གླིང་གི་བྱང་དང་ལྷོ་སྣེ་གཉིས་ཀྱི་མཚམས་སུ་གནས་པའི་ས་ཁུལ་མང་པོ་ཞིག་ཏུ་ལོ་ལྟར་གངས་མཐུག་པོ་བབས་ནས། དགུན་དུས་ནས་དབྱར་མགོར་གངས་ཞུ་མི་ཐུབ་ཀྱང་། གོ་ལའི་ཚ་དྲོད་འཕར་ནས་སྣེ་གཉིས་ཀྱི་གངས་རི་དང་འཁྱག་རོམ་དག་ཀྱང་མགྱོགས་པོར་ཞུ་མུས་ཡིན་པ་མ་ཟད། དེང་སྐབས་ས་ཕྱོགས་མང་དག་ཅིག་ཏུ་དབྱར་དུས་སུ་བཟོད་དཀའ་བའི་ཚ་དྲོད་རྒྱས་པ་དང་། དགུན་དུས་གྲང་ལྷགས་ཀྱིས་བསྡམས་ཡོད་སྐོར་དང་། ཚ་ཚད་འཕེལ་ནས་དྲག་ཆར་འབབ་པ་དང་། ཆུ་ལོག་རྒྱུག་པ། མཚོ་རླབས་འཕྱུར་བ་སོགས་ཀྱི་དཀའ་ངལ་མང་པོ་ཞིག་འབྱུང་མུས་ཡིན་སྟབས། དེས་མི་རྣམས་ཀྱི་འཚོ་གནས་ལ་དོ་ཕོག་ཆེན་པོ་བཟོས་ཏེ། ཚ་གྲང་དང་རང་བྱུང་གོད་ཆག་སོགས་ཀྱིས་མི་མང་པོའི་ཚེ་སྲོག་ཤོར་གྱི་ཡོད་སྐོར་སོགས་གསལ་འདུག
གསར་འགོད་པ། དཔལ་ལྡན།
