ལྷ་ས་ཉེན་རྟོག་པས་བོད་ཀྱི་ཆབ་སྲིད་བཙོན་ཟུར་དབང་ཆེན་ལགས་ལ་ཡིག་ཆ་མེད་ལ་གོང་རིམ་ལའང་བཀའ་འཁྲོལ་མ་ཞུས་པར་ས་གནས་གཞན་དུ་ཕྱིན་པ་སོགས་ཀྱི་ཉེས་མིང་འོག་གཅར་རྡུང་བཏང་སྟེ་ཕོ་བའི་ནང་རྨས་སྐྱོན་ཆེན་པོ་བཟོས་སྟབས་ལྷ་སའི་དམག་གི་སྨན་ཁང་ཞིག་ཏུ་སྨན་བཅོས་བྱེད་བཞིན་འདུག
བོད་ཀྱི་ཆབ་སྲིད་བཙོན་ཟུར་གཞོན་ནུ་དབང་ཆེན་ལགས། པར་བོད་ནས་འདི་གར་མཁོ་སྤྲོད་བྱས།
བོད་དཀར་མཛེས་ཁུལ་སེར་ཤུལ་རྫོང་ཁོངས་ནས་ཡིན་པའི་ཆབ་སྲིད་བཙོན་ཟུར་གཞོན་ནུ་དབང་ཆེན་ལགས་ནང་མི་དང་བཅས་ལྷ་སར་གནས་སྐོར་དུ་ཕྱིན་ཏེ་སྤྱི་ཚོགས་དྲ་ལམ་དུ་འདྲ་པར་མང་པོ་སྤེལ་བ་དང་། གོང་རིམ་གྱི་བཀའ་འཁྲོལ་མེད་ལ་ཐོབ་ཐང་དཔང་ཡིག་སོགས་མེད་པར་ས་གནས་གཞན་དུ་སོང་བར་བསྙད་དེ་འདྲི་རྩད་གཅར་རྡུང་མང་པོ་བཏང་བའི་རྐྱེན་གྱིས། ཁོང་གི་གྲོད་ཁོག་སོགས་བསྐྲངས་ནས་ད་ལྟའི་ཆར་སེ་རའི་གཤམ་འོག་གི་དམག་གི་སྨན་ཁང་དེར་སྨན་བཅོས་བྱེད་བཞིན་ཡོད་འདུག
དེའི་ཐད་བོད་ནང་གི་འབྲེལ་ཡོད་གནས་ཚུལ་མཁོ་སྤྲོད་པ་ཞིག་གིས་འདི་གའི་གསར་འགོད་པར། སྤྱིར་རྒྱ་ནག་གཞུང་གིས་དབང་ཆེན་ལགས་ཀྱི་ཐོབ་ཐང་དཔང་ཡིག་དང་། ཡིག་ཆ་གཞན་རྣམས་ཡར་བསྡུས་ཟིན་པས་ཁོང་ལ་ས་གནས་གཞན་དུ་འགྲོ་སྐྱོད་བྱེད་པའི་ཡིག་ཆ་གང་ཡང་མེད་ཀྱང་། འདི་ལོའི་ཕྱི་ཟླ ༦ པའི་ནང་ནང་མི་དང་ལྷན་དུ་ལྷ་སར་གནས་སྐོར་དུ་ཕྱིན་སྐབས། ལྷ་ས་ནས་ཉེན་རྟོག་པས་འཛིན་བཟུང་བྱས་ཏེ་གཅར་རྡུང་མང་པོ་བཏང་རྗེས། ཕྱིར་ཕ་ཡུལ་དུ་འཁྲིད་རྩིས་བྱས་ཏེ་གནམ་ཐང་དུ་འབྱོར་སྐབས། ཁོང་གི་ཕོ་བར་ན་ཟུག་ཆེན་པོ་ལངས་བ་དང་། མཁའ་འགྲུལ་ཁང་གི་བདེ་འཇགས་མི་སྣས་སྨན་པའི་ཡིག་ཆ་མེད་པར་གནམ་གྲུའི་ནང་ཕྱིན་ཏེ་ཤི་བ་ཡིན་ནའང་འགན་ཁུར་ལེན་གྱི་མེད་སྐོར་བརྗོད་པར་བརྟེན། ཉེན་རྟོག་པས་ཁོང་སེར་ཤུལ་དུ་འཁྲིད་ཐུབ་མེད་པ་དང་། ཐད་ཀར་སྨན་ཁང་དུ་འཁྲིད་ནས་བརྟག་དཔྱད་བྱེད་སྐབས་ཕོ་བའི་ནང་རྨས་སྐྱོན་ཆེན་པོ་བཟོས་ཡོད་པ་ཤེས་རྟོགས་བྱུང་ཡོད་སྐོར་འགྲེལ་བརྗོད་གནང་བྱུང་།
ཕྱི་ལོ ༢༠༡༩ ལོར་རྒྱ་ནག་གཞུང་གིས་བོད་དཀར་མཛེས་ཁུལ་སེལ་ཤུལ་རྫོང་ཁོངས་ནས་ཡིན་པའི་གཞོན་སྐྱེས་དབང་ཆེན་ལགས་དང་། ཁོའི་རོགས་པ་བློ་བཟང་ལགས་དང་ཡོན་ཏན་ལགས། ལྐུགས་པ་ཞིག་བཅས་གཞོན་སྐྱེས་བཞི་རི་ལ་བསང་གསོལ་གཏོང་སྐབས། ༧པཎ་ཆེན་ཡང་སྲིད་རིན་པོ་ཆེ་ཀློད་གྲོལ་དགོས་པ་དང་༧རྒྱལ་བ་པཎ་ཆེན་རྣམ་གཉིས་བོད་ནང་ཞལ་འཛོམས་དགོས་སྐོར་སྐད་འབོད་བྱས་ཡོད་པའི་ཉེས་མིང་འོག་ལྐུགས་པ་དེ་ཕུད་པའི་གཞན་གསུམ་འཛིན་བཟུང་བྱས་ཡོད་པ་དང་། ཟླ་དྲུག་གི་རྗེས་སུ་བློ་བཟང་དང་ཡོན་ཏན་གཉིས་ཀློད་གྲོལ་བཏང་ཡོད་ཀྱང་། དབང་ཆེན་ལགས་ལོ་བཞིར་བཙོན་འཇུག་བྱས་ཏེ་འདི་ལོའི་ཕྱི་ཟླ་ ༤ པའི་ནང་ཀློད་གྲོལ་བཏང་ཡོད་འདུག
ཆབ་སྲིད་བཙོན་ཟུར་སྒྲོལ་དཀར་ལགས་བཙོན་གྲོལ་ཐོབ་ནས་རང་ཁྱིམ་དུ་འབྱོར་སྐབས་ཀྱི་པར། པར་བོད་ནས་འདི་གར་མཁོ་སྤྲོད་བྱས། ༢༠༢༠།༠༨།༡༥
དབང་ཆེན་ལགས་ཀྱི་ཨ་ནེ་སྒྲོལ་དཀར་ལགས་ཀྱིས་ཁོང་ཚོ་གསུམ་འཛིན་བཟུང་བྱས་པའི་གནས་ཚུལ་ཕྱི་རུ་བཏང་སྟེ་སྤྱི་ཚོགས་དཀྲུག་པའི་ཉེས་མིང་འོག ཕྱི་ལོ་ ༢༠༡༩ ཟླ་ ༥ པའི་མགོ་སྟོད་ཙམ་ལ་ཉེན་རྟོག་པས་འཛིན་བཟུང་བྱས་ཏེ་ལོ་གཅིག་དང་ཟླ་གསུམ་གྱི་བཙོན་འཇུག་ཁྲིམས་ཐག་བཅད་དེ་ར་རྔ་ཁའི་བཙོན་ཁང་བཅུག ཕྱི་ལོ་ ༢༠༢༠ ཟླ་ ༨ ཚེས་ ༡༥ ཉིན་གྱི་ཕྱི་དྲོར་སྔོན་བརྡ་གང་ཡང་མ་བཏང་བར་རང་ཁྱིམ་དུ་བསྐྱལ་ཡོད་ཀྱང་། བཙོན་ཁང་དུ་ས་བརྐོ་རྡོ་སློག་སོགས་ཀྱི་ངལ་རྩོལ་ཤུགས་ཆེན་བྱས་རྐྱེན་ཁོང་མོའི་གཟུགས་གཞིའི་གནས་སྟངས་ཧ་ཅང་སྐྱོ་བོ་ཆགས་ཡོད་པ་མ་ཟད། རྐང་ལག་བཞི་ནད་པར་གྱུར་ཏེ་འགྲོ་སྐྱོད་ཁག་པའི་གནས་སྟངས་ཆགས་ཡོད་པའི་གནས་ཚུལ་ཐོན་ཡོད་པ་རེད།
དབང་ཆེན་ལགས་ཀྱི་ཁྱིམ་དུ་ཁོང་གི་ཨ་མ་དང་སྤུན་མཆེད་བུ་མོ་གཉིས་ཡོད་འདུག་ལ། ཁོང་ཆུང་དུས་ནས་སློབ་གྲྭར་འགྲོ་མྱོང་མེད་པ་དང་། རྟ་རྒྱུགས་ལ་ཤིན་ཏུ་དགའ་ཞིང་སྡེ་བའི་ནང་རྟ་རྒྱུགས་མཁན་རྩེ་གྲས་ཤིག་ཡིན་སྟབས། སེར་ཤུལ་དང་རྫ་སྟོད། མགོ་ལོག་དང་སྐྱེ་རྒྱུ་སོགས་ཀྱི་རྟ་རྒྱུགས་འགྲན་སྡུར་ནང་ཐེངས་མང་ཞུགས་ཡོད་པ་མ་ཟད། བྱ་དགའ་ཡང་མང་པོ་ཐོབ་ཡོད་འདུག
