བོད་ཀྱི་སྒྲ་སྒྱུར་དང་ཉམས་ཞིབ་ཁང་གིས་རྒྱལ་སྤྱིའི་དཔེ་དེབ་ཁྲོམ་འདུས་ཐོག་༧གོང་ས་རྒྱལ་བ་རིན་པོ་ཆེ་མཆོག་གི་གསུང་རྩོམ་དཔེ་དེབ་ཁག་དང་ཐུགས་བསྐྱེད་དམ་བཅའ་བཞིའི་སྐོར་སོགས་ངོ་སྤྲོད་གནང་གི་འདུག
ཟླ་འདིའི་ཕྱི་ཚེས་ ༡༨ ནས་ཉིན་ལྔའི་རིང་འཇར་མན་ཧྥ་རན་ཁི་ཧྥུར་ཌིར་(Frankfurt) གྲོང་ཁྱེར་དུ། འཇར་མན་དཔེ་ཚོང་དང་དཔེ་སྐྲུན་མཐུན་ཚོགས་ཀྱི་གོ་སྒྲིག་འོག ཧྥ་རན་ཁི་ཧྥུར་(Frankfurter Buchmesse ) རྒྱལ་སྤྱིའི་དཔེ་དེབ་ཁྲོམ་འདུས་ཐེངས་ ༧༥ པ་འཚོགས་བཞིན་ཡོད་ཅིང་། ཐེངས་འདིའི་དཔེ་དེབ་ཁྲོམ་འདུས་ཐོག་འཛམ་གླིང་གི་རྒྱལ་ཁབ་འདྲ་མིན་གྱི་དཔེ་སྐྲུན་ཁང་དང་། རྩོམ་པ་པོ། ལོ་ཙཱ་བ། དཔེ་དེབ་དང་འབྲེལ་བའི་ཚོགས་སྡེ་མང་པོ་འཛོམས་ཏེ་འགྲེམས་སྟོན་བྱེད་བཞིན་ཡོད་པ་དང་། བོད་ཀྱི་སྒྲ་སྒྱུར་དང་ཉམས་ཞིབ་ལྷན་ཁང་གི་འབྲེལ་མཐུད་པ་བསོད་འཕེལ་དང་ནམ་མཁའ་བསྟན་འཛིན་གཉིས་མཉམ་ཞུགས་བྱེད་བཞིན་ཡོད་པ་མ་ཟད། ༧གོང་ས་རྒྱལ་བ་རིན་པོ་ཆེ་མཆོག་གི་གསུང་རྩོམ་ཁག་དང་ཐུགས་བསྐྱེད་དམ་བཅའ་བཞིའི་སྐོར་ངོ་སྤྲོད་བྱེད་མུས་ཡིན་འདུག ཐེངས་འདི་ནི་བོད་ཀྱི་སྒྲ་སྒྱུར་དང་ཉམས་ཞིབ་ལྷན་ཁང་ཧྥ་རན་ཁི་ཧྥུར་རྒྱལ་སྤྱིའི་དཔེ་དེབ་ཁྲོམ་འདུས་ཐོག་མཉམ་ཞུགས་བྱས་པ་ཐེངས་གཉིས་པ་དེ་ཆགས་ཀྱི་ཡོད་འདུག
བོད་ཀྱི་སྒྲ་སྒྱུར་དང་ཉམས་ཞིབ་ཁང་གི་འགན་འཛིན་ལུང་རྟོགས་དགེ་འདུན་ལགས་ཀྱིས། ༧གོང་ས་རྒྱལ་བ་རིན་པོ་མཆོག་ནི་འཛམ་བུ་གླིང་གི་གསུང་རྩོམ་ཆེས་མང་ཤོས་ཀྱི་གྲས་ཡིན་པ་དང་། གསུང་རྩོམ་ཁག་སྐད་ཡིག་འདྲ་མིན་ ༤༩ ཐོག་ཏུ་ཡོད་ཅིང་། ཐེངས་འདིའི་དཔེ་དེབ་ཁྲོམ་འདུས་སྟེང་དུ་འཛམ་གླིང་གི་རྒྱལ་ཁབ་དང་མི་རིགས་མང་པོ་མཉམ་ཞུགས་བྱེད་བཞིན་ཡོད་པས། བོད་དོན་ངོ་སྤྲོད་བྱེད་པའི་གོ་སྐབས་ཤིག་ཡིན་པ་མ་ཟད། བོད་ཀྱི་སྒྲ་སྒྱུར་དང་ཉམས་ཞིབ་ལྷན་ཁང་གིས་༧གོང་ས་རྒྱལ་བ་རིན་པོ་ཆེ་སྐུ་ཕྲེང་བཅུ་བཞི་པ་ཆེན་པོ་མཆོག་གི་གསུང་རྩོམ་ཅི་ཡོད་དང་། དེ་དག་གི་བརྗོད་བྱ་དང་བསྟན་དོན་གཙོ་བོ་གང་ཡིན། ད་དུང་སྐད་རིགས་ག་ཚོད་ཅིག་ལ་བསྒྱུར་ཡོད་ཁག་དང་། ཁོང་གི་ཐུགས་བསྐྱེད་དམ་བཅའ་བཞི་བཅས་ངོ་སྤྲོད་གནང་རྒྱུ་དེ་གལ་ཆེན་དོན་ཆེན་དུ་བཟུང་ཡོད། སྔོན་མ་ང་ཚོས་ཧྥ་རན་ཧྥར་ཌིའི་རྒྱལ་སྤྱིའི་དཔེ་དེབ་ཁྲོམ་འདུས་མཐུན་ཚོགས་ལ་འབྲེལ་བ་བྱས་ཏེ་དཔེ་དེབ་འགྲེམས་སྟོན་བྱས་ཡོད་ཀྱང་། ད་ལོ་དཔེ་དེབ་ཁྲོམ་འདུས་ཀྱི་མཐུན་ཚོགས་ཀྱི་ངོས་ནས་འཛམ་གླིང་གི་མི་སྣ་གལ་ཆེན་མང་པོ་ཡོད་པའི་དཀྱིལ་དུ་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་པར་དང་དཔེ་དེབ་སོགས་ཁྱབ་བསྒྲགས་གནང་ཡོད་པ་རེད། དེས་ཧྥ་རན་ཧྥུར་ཌིའི་དཔེ་དེབ་ཁྲོམ་འདུས་མཐུན་ཚོགས་ཀྱིས་༧གོང་ས་མཆོག་རྒྱལ་བ་རིན་པོ་ཆེ་མཆོག་ཧ་ཅང་གལ་ཆེན་པོ་བརྩི་བཞིན་ཡོད་པ་ཚོར་སོང་། ཐེངས་འདིའི་དཔེ་དེབ་ཁྲོམ་འདུས་ཡུལ་དངོས་སུ་འགྲེམས་སྟོན་བྱེད་བཞིན་པའི་འབྲེལ་མཐུད་པ་བསོད་འཕེལ་དང་། དགེ་འདུན་བཟང་པོ། ནམ་མཁའ་བསྟན་འཛིན་གཙོས་རམ་འདེགས་གནང་མཁན་ཚང་མར་ཐུགས་རྗེ་ཆེ་ཞུ་རྒྱུ་ཡིན། ཞེས་འགྲེལ་བརྗོད་གནང་སོང་།
ཧྥ་རན་ཧྥོར་ཌི་དཔེ་དེབ་ཁྲོམ་འདུས་ནི་དུས་རབས་ ༡༧ པའི་མཇུག་ཏུ་ཡུ་རོབ་གླིང་གི་དཔེ་དེབ་ཁྲོམ་འདུས་ཧ་ཅང་གལ་ཆེན་ཞིག་ཡིན་པ་དང་། འཛམ་གླིང་དམག་འཁྲུག་གཉིས་པའི་རྗེས་སུ་བསྐྱར་གསོ་བྱས་ཏེ། ཕྱི་ལོ་ ༡༩༤༩ ལོར་ཐེངས་དང་པོ་སྒོ་འབྱེད་བྱས་ཡོད་ཅིང་། ད་ལྟའི་ཆར་འཛམ་གླིང་སྟེང་གི་དཔེ་དེབ་ཁྲོམ་འདུས་ཆེ་ཤོས་ཤིག་ཡིན་པ་མ་ཟད། དཔེ་དེབ་ཁྲོམ་འདུས་ཐོག་འཛམ་གླིང་གི་རྒྱལ་ཁབ་ ༡༠༠ ཡི་དཔེ་དེབ་འགྲེམས་སྟོན་བྱེད་མཁན་ ༧༣༠༠ ལྷག་མཉམ་ཞུགས་བྱེད་བཞིན་ཡོད་པ་དང་། དཔེ་དེབ་ཁྲོམ་འདུས་སྐབས་སུ་ལྟད་མོ་བ་འབུམ་གསུམ་ཙམ་ཕེབས་བཞིན་ཡོད་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། སྐལ་བཟང་སྦྱིན་པ།
