༧སྐུའི་གོ་སྟོན་གྱི་ལོ་དེ་ཞི་བདེའི་ལོ་ཞིག་ཏུ་སྲུང་གཙི་ཞུ་རྒྱུ་ཡིན་འདུག

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༠ ཕེབས་པའི་སྐུའི་གོ་སྟོན་གྱི་ལོ་དེ་ཞི་བདེའི་ལོ་ཞིག་ཏུ་སྲུང་གཙི་ཞུ་རྒྱུ་ཡིན་པའི་གསལ་བསྒྲགས་གནང་འདུག

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས་ཨ་མེ་རི་ཁའི་གཞུང་འབྲེལ་འཚམས་གཟིགས་དང་བསྟུན། ཟླ་འདིའི་ཕྱི་ཚེས་ ༢༡ ཉིན་ནེའུ་ཡོག་གི་ས་གནས་མང་ཚོགས་ལ་གསུང་བཤད་དང་། ཁུལ་དེའི་ཆོས་ཚོགས་ཁག་གི་ཚོགས་འདུའི་ཐོག་བོད་ཀྱི་ཆོས་རིག་རྒྱུན་འཛིན་དང་། ༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༠ ཕེབས་པའི་སྐུའི་འཁྲུངས་སྐར་དེ་ཞི་བདེའི་ལོ་ (Year of Peace) ཞེས་པར་སྲུང་གཙི་ཞུ་རྒྱུ་ཡིན་སྐོར་གསུངས་འདུག 

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ནེའུ་ཡོག་གི་ཕུན་ཚོགས་སྡེ་བཞིའི་ཚོགས་ཁང་དུ། ཕྱི་ལོ་ ༢༠༢༥ ཟླ་ ༧ ཚེས་ ༦ ཉིན་ནི་ཕྱི་ལུགས་ལྟར་༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༠ ལ་ཕེབས་པའི་གོ་སྟོན་དང་བསྟུན། བཞུགས་སྒར་དྷ་སར་གཞི་རྒྱ་ཆེ་བའི་གོ་སྟོན་ཞིག་འཚོག་འཆར་ཡོད་པ་མ་ཟད། རྒྱལ་སྤྱིའི་བོད་དོན་ལས་འགུལ་ཁང་གི་བསམ་ཚུལ་བཞིན། ༧མགོན་པོ་གང་ཉིད་དགུང་གྲངས་ ༩༠ ཕེབས་པའི་ལོ་དེ་ཞི་བདེའི་ལོ་ཞེས་པར་སྲུང་གཙི་ཞུས་ཏེ། སྐུའི་མཛད་འཕྲིན་དང་དགོངས་བཞེད་རྣམས་ཁྱབ་སྤེལ་གཏང་རྒྱུའི་འཆར་གཞི་ཡོད་པ་མ་ཟད། བོད་བརྒྱུད་ནང་བསྟན་གྱི་ཆོས་ཚོགས་ཁག་གཙོས་ནང་པ་སུ་ལའང་༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་ཡང་སྲིད་ལ་ཐག་གཅོད་བྱ་རྒྱུའི་དབང་ཆ་མེད་ཅིང་། དེའི་སྐུ་དབང་མཐའ་དག་༧མགོན་པོ་གང་ཉིད་ཁོ་ནར་ཡོད་པའི་གྲོས་ཆོད་ཅིག་གཞག་ཐུབ་ན། མ་འོངས་པར་བོད་བརྒྱུད་ནང་བསྟན་གྱི་རྗེས་འབྲངས་པ་རྣམས་ཀྱིས་༧རྒྱལ་བའི་ཡང་སྲིད་དང་འབྲེལ་བའི་བསམ་ཚུལ་དང་། ལངས་ཕྱོགས་གཅིག་མཚུངས་སུ་འགྱུར་བར་ཕན་ཐོགས་ཆེན་པོ་ཡོད་སྐོར་སོགས་གསུངས་འདུག

ཡང་སྲིད་སྐྱོང་མཆོག་གིས། རྒྱ་ནག་གཞུང་གིས་མི་ལོ་ཉི་ཤུ་ཙམ་གྱི་སྔོན་ནས་བཀའ་ཁྱབ་ལྔ་ཞེས་པ་གཏན་འབེབས་བྱས་ཏེ། བོད་ཀྱི་སྤྲུལ་སྐུའི་ཡང་སྲིད་ངོས་འཛིན་བྱེད་ཕྱོགས་ཀྱི་རྩ་འཛིན་སྲིད་ཇུས་ཟེར་བ་བཟུང་སྟེ་ཆབ་སྲིད་ཀྱི་ལག་ཆར་བེད་སྤྱོད་བྱས་དང་བྱེད་མུས་ཡིན་པ་མ་ཟད། ༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་ཡང་སྲིད་ལའང་ཐེ་ཇུས་བྱ་རྒྱུའི་གྲ་སྒྲིག་བྱེད་མུས་ཡིན་ཡང་། ད་ལྟ་དབུས་བོད་མིའི་སྒྲིག་འཛུགས་གི་༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་ཡང་སྲིད་དང་འབྲེལ་བའི་ཡིག་ཆ་དེ་ཕྱི་ལོ་ ༢༠༡༡ ཟླ་ ༩ ནང་བཞག་པའི་ཡིག་ཆ་དེ་རེད། ཡིག་ཆ་དེར་སྐུའི་ཡང་སྲིད་ཀྱི་གནད་དོན་དེ་༧མགོན་པོ་མཆོག་ནས་དགུང་གྲངས་ ༩༠ བཞེས་སྐབས་གོ་བསྡུར་བྱས་ཏེ་ཐག་གཅོད་བྱ་རྒྱུ་ཡིན་པ་གསལ་ཡོད་སྐོར་གསུངས་འདུག 

ཁོང་གིས། ད་ལྟ་༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༩༠ ཕེབས་པར་ལོ་གཅིག་དང་ཕྱེད་ཀ་ཙམ་ལས་མེད་པས། བཀའ་ཤག་གིས་འདས་ལོའི་ཕྱི་ཟླ་ ༡༠ ནང་སྐུའི་ཡང་སྲིད་དང་འབྲེལ་བའི་དོན་ཚན་དྲུག་ཅན་གྱི་གསལ་བསྒྲགས་ཤིག་སྤེལ་ཡོད་ཅིང་། དེའི་ནང་གཙོ་བོ་༧མགོན་པོ་གང་ཉིད་ཀྱིས་དགུང་གྲངས་ ༡༡༣ བར་བཞུགས་རྒྱུའི་ཞལ་བཞེས་བཟང་པོ་ཐོབ་ཡོད་པས། དེ་བཀའ་ཤག་སྐབས་བཅུ་དྲུག་པའི་སྐབས་སུ་བྱུང་མི་ཐུབ་ལ། དེ་ནི་མ་འོངས་པའི་ལོ་བཅུ་ཕྲག་གཉིས་ཀྱི་རྗེས་ཀྱི་གནས་སྟངས་ལ་དཔག་ནས་གཞུང་གིས་གྲ་སྒྲིག་བྱ་དགོས་ཀྱི་ཡོད་སྟབས། བོད་མིའི་སྒྲིག་འཛུགས་ཀྱིས་འགན་ཁུར་དགོས་པ་དག་ཁུར་ནས་ཚོགས་ཆུང་བསྐོ་འཛུགས་སོགས་ཀྱི་ལས་དོན་གྱི་ཐད་ལ་ལས་དོན་གཉེར་དང་གཉེར་མུས་ཡིན་སྐོར་སོགས་གསུངས་འདུག 

འདི་ལོའི་ཕྱི་ཟླ་ ༩ ཚེས་ ༢༦ ཉིན་དབུས་བོད་མིའི་སྒྲིག་འཛུགས་བཀའ་ཤག་སྐབས་བཅུ་དྲུག་པས་༧སྐུའི་ཡང་སྲིད་དང་འབྲེལ་བའི་དོན་ཚན་དྲུག་ཅན་གྱི་ཡིག་ཆ་ཞིག་འགྲེམས་སྤེལ་གནང་བའི་ཁྲོད། བླ་སྤྲུལ་ཡང་སྲིད་ངོས་འཛིན་ནི་བོད་ཀྱི་ཐུན་མོང་མ་ཡིན་པའི་ཆོས་ཕྱོགས་ཀྱི་ལམ་སྲོལ་ཞིག་ཡིན་ཞིང་། ཡང་སྲིད་ངོས་འཛིན་གྱི་གཞི་རྩའི་ལྟ་གྲུབ་ནི་སྐྱེ་བ་སྔ་ཕྱི་ཁས་བླངས་པ་ཞིག་ངེས་པར་དུ་དགོས་པ་དང་། ཆོས་ཕྱོགས་ཀྱི་བྱ་བ་འདིའི་ཐད་ལ་༧རྒྱལ་བ་རིན་པོ་ཆེ་མཆོག་ནས་སུ་ཞིག་ལ་འགན་བསྐུར་བ་ཇི་བཞིན་གནང་བ་བཞིན། དེའི་བརྒྱུད་རིམ་ནས་འགྲོ་དགོས་པ་ཞིག་ཡིན་ལ། བོད་མིའི་སྒྲིག་འཛུགས་ལ་ལས་འགན་གང་བསྐུར་སྐབས་དུས་སོ་སོའི་འབྲེལ་ཡོད་ནས་ཁུར་ངེས་ཡིན་པར་ཡིད་ཆེས་ཡོད། ཅེས་སོགས་འཁོད་འདུག  

ཕྱི་ལོ་ ༢༠༡༡ ཟླ་ ༩ ཚེས་ ༢༤ ཉིན་དགའ་ལྡན་ཕོ་བྲང་ཡིག་ཚང་ནས་༧གོང་ས་རྒྱལ་བ་རིན་པོ་ཆེ་མཆོག་གི་ཡང་སྲིད་དང་འབྲེལ་བའི་ཡོངས་ཁྱབ་གསལ་བསྒྲགས་ཤིག་སྤེལ་གནང་བའི་ནང་། ༧རྒྱལ་དབང་སྐུ་ཕྲེང་རྒྱུན་མཐུད་དགོས་པ་དང༌། སྐུ་ཕྲེང་བཅོ་ལྔ་པའི་ཡང་སྲིད་ངོས་འཛིན་བྱ་དགོས་ཀྱི་དུས་སྐབས་ཤིག་ཤར་ཚེ་དེའི་བྱེད་སྒོའི་འགན་ཁུར་གཙོ་བོ་ཏཱ་ལའི་བླ་མའི་བླ་བྲང་དགའ་ལྡན་ཕོ་བྲང་ཡིད་ཆེས་དགེ་རྩའི་དབང་ལྡན་འགན་འཛིན་རྣམས་ལ་ཡོད་པ་དང༌། ཁོ་ཚོས་བོད་བརྒྱུད་ནང་བསྟན་ཆོས་བརྒྱུད་ཁག་གི་དབུ་ཁྲིད་བླ་ཆེན་རྣམ་པ་དང༌། ༧རྒྱལ་དབང་སྐུ་ཕྲེང་ན་རིམ་དང་ལུས་དང་གྲིབ་བཞིན་འགྲོགས་པའི་དམ་ལྡན་ཆོས་སྲུང་ཁག་ལ་སྐབས་བསྟུན་ལམ་སྟོན་ཞུས་ཏེ་ཡང་སྤྲུལ་རྩད་གཅོད་ངོས་འཛིན་སྔོན་སྲོལ་བཞིན་བྱེད་དགོས་པ་དང༌། ངོས་ནས་ཀྱང་བྱེད་ཕྱོགས་དེ་དག་ལམ་སྟོན་གསལ་བཀོད་ཀྱི་ཡིག་འཇོག་བྱ་རྒྱུ་ཡིན་ཞིང༌། དེ་ལྟར་ཚུལ་མཐུན་རྩད་གཅོད་ངོས་འཛིན་བྱུང་བའི་ཡང་སྤྲུལ་ཞིག་ལས་གཞན་དུ་སྲིད་དོན་གྱི་དགོས་མཁོ་ལ་བརྟེན་ནས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆབ་སྲིད་དབང་འཛིན་པས་མཚོན། སྲིད་དབང་འཛིན་པ་སུ་ཞིག་གིས་ཡང་སྤྲུལ་འདེམས་སྒྲུག་བྱས་པ་བྱུང་ཚེ་དེ་ལ་སུས་ཀྱང་༧རྒྱལ་བའི་ཡང་སྤྲུལ་དུ་ངོས་འཛིན་དང་དད་མོས་བྱེད་མི་དགོས་པ་ཡིད་འཇགས་དགོས། ཞེས་འཁོད་ཡོད་པ་རེད་ལ། ཡོངས་ཁྱབ་གསལ་བསྒྲགས་འདི་ནི་མ་འོངས་སྐུའི་ཡང་སྲིད་སྐོར་གྱི་རྩ་འཛིན་ཆགས་ཡོད་པ་རེད།  

གསར་འགོད་པ། དཔལ་ལྡན། 

རྩིམ་སྒྲིག་པ། པདྨ་མཚོ།