རྒྱ་ནག་གཞུང་གིས་རྒྱལ་གཅེས་རིང་ལུགས་ཀྱི་སློབ་གསོ་ཟེར་བ་དང་འབྲེལ་བའི་བཅའ་ཁྲིམས་གསར་པ་ཞིག་གཏན་འབེབས་བྱས་ཏེ་ལོ་རྗེས་མའི་ཕྱི་ཟླ་ ༡ ཚེས་ ༡ ཉིན་ནས་དངོས་སུ་ལག་བསྟར་བྱ་རྒྱུ་ཡིན་འདུག
ཟླ་འདིའི་ཕྱི་ཚེས་ ༢༤ ཉིན་རྒྱ་ནག་རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་ཟེར་བའི་སྐབས་ ༡༤ པའི་གྲོས་ཚོགས་ཚོགས་ཐེངས་ ༦ པའི་ཐོག་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྒྱལ་གཅེས་རིང་ལུགས་ཀྱི་སློབ་གསོའི་བཅའ་ཁྲིམས་ཟེར་བའི་དོན་ཚན་ ༤༠ ཡོད་པའི་བཅའ་ཁྲིམས་ཤིག་གཏན་འབེབས་བྱས་ཏེ། ཕྱི་ལོ་ ༢༠༢༤ ཟླ་ ༡ ཚེས་ ༡ ནས་དངོས་སུ་ལག་བསྟར་བྱ་རྒྱུ་ཡིན་ལུགས་བསྒྲགས་འདུག་ལ། བཅའ་ཁྲིམས་དེ་སློབ་གྲྭ་དང་ཁྱིམ་ཚང་། གཞུང་ཞབས་པ། ལས་བཟོ་བ། གྲོང་ཚོ་དང་སྡེ་ཁུལ་གྱི་གྲོང་མི། ཐའེ་ཝན། ཧོང་ཀོང་། ཕྱིར་སྡོད་རང་མི་ཟེར་བ་སོགས་ལ་དམིགས་པ་ཞིག་ཡིན་འདུག
དེ་རིང་འདི་གའི་གསར་འགོད་པས་ཁ་པར་བརྒྱུད་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་སུ་བཅའ་ཁྲིམས་གསར་པ་དེས་མ་འོངས་པར་བོད་ནང་ཤུགས་རྐྱེན་ངན་པ་གང་འདྲ་ཐེབས་མིན་དྲིས་པར་ཁོང་གིས། བོད་མི་རྣམས་ལ་དཀའ་ངལ་མང་པོ་འཕྲད་སྲིད་པ་ཞིག་རེད་འདུག སྤྱིར་བཏང་རྒྱ་ནག་གཞུང་གིས་ཁ་བྲལ་རིང་ལུགས་པ་ཟེར་དུས་བོད་པས་རང་ཉིད་ཀྱི་མི་རིགས་ལ་བརྩེ་བ་ཡོད་པ་དང་། བོད་ཀྱི་སྐད་ཡིག་དང་རིག་གཞུང་སློབ་སྦྱོང་བྱེད་པ་རྣམས་ཁ་བྲལ་རིང་ལུགས་པའི་ཉེས་མིང་ལ་རྩི་ཡི་ཡོད་པ་ལྟར། བོད་པས་རྒྱ་ནག་གི་དུས་ཆེན་ཁག་སྲུང་གཙི་བྱེད་ཀྱི་མེད་པ་དང་། རྒྱ་ནག་གི་རྒྱལ་གླུ་སོགས་ལ་བརྩི་བཀུར་ཞུ་ཡི་མེད་པར་བརྟེན། ཐེངས་འདིའི་ཁྲིམས་གཞི་གསར་པ་དེ་བརྒྱུད་ནས་རྒྱ་ནག་གི་དུས་ཆེན་ཁག་སྲུང་གཙི་མི་བྱེད་པ་དང་། རྒྱ་སྐད་དང་རྒྱ་ནག་གི་རིག་གཞུང་། ལོ་རྒྱུས་སོགས་མ་ཤེས་ན་རྒྱལ་གཅེས་རིང་ལུགས་ཀྱི་སློབ་གསོ་དང་འབྲེལ་བའི་ཁྲིམས་གཞི་དང་འགལ་གྱི་ཡོད་པ་ལྟ་བུ་རེད་འདུག དེར་བརྟེན་བོད་པས་སོ་སོའི་ཆོས་དང་རིག་གཞུང་སོགས་ལ་བརྩེ་བ་བསྟན་པ་ཡིན་ན་ཁ་བྲལ་རིང་ལུགས་ཀྱི་ཁྲིམས་ཀྱི་ཐོག་ནས་འགལ་འཇུག་པ་དང་། རྒྱ་ནག་གི་དུས་ཆེན་དང་རིག་གཞུང་སོགས་ལ་བརྩེ་བ་མེད་པའི་རྣམ་འགྱུར་བསྟན་ཚེ། རྒྱལ་གཅེས་རིང་ལུགས་ཀྱི་སློབ་གསོ་དང་འབྲེལ་བའི་ཁྲིམས་དེའི་ཐོག་ནས་འགལ་བསྡད་པ་ལྟ་བུ། བོད་པས་ག་རེ་བྱས་ནའང་མ་འགྲིག་པའི་དཀའ་ངལ་འཕྲད་ཉེན་ཡོད་པ་དང་། ཁྲིམས་དེ་དང་འབྲེལ་བའི་ཡིག་ཆ་ཁག་གི་ནང་དོན་ཁ་གསལ་མེད་པར་བརྟེན། རྒྱ་ནག་གིས་བོད་མི་རྣམས་འཛིན་བཟུང་དང་བཙོན་འཇུག་བྱེད་ཆོག་ཆོག་ཡོད་སྲིད་པའི་ཉེན་ཁ་མཐོང་གི་འདུག ཅེས་བརྗོད་གནང་བྱུང་།
གསར་དུ་གཏན་འབེབས་བྱས་པའི་ཁྲིམས་དེའི་ནང་། རྒྱལ་གཅེས་རིང་ལུགས་ཀྱི་སློབ་གསོར་ཤུགས་སྣོན་རྒྱག་པ་དང་། རྒྱལ་གཅེས་རིང་ལུགས་ཀྱི་སྙིང་སྟོབས་རྒྱུན་འཛིན་དང་དར་སྤེལ་གཏང་རྒྱུ་དམིགས་དོན་དུ་འཛིན་པའི་ཐོག སྤྱིའི་རྩ་དོན་དང་འགན་འཁྲི། ལས་འགན། ལག་བསྟར་བྱ་ཐབས། རྒྱབ་སྐྱོར་དང་འགན་སྲུང་སོགས་ཚུད་འདུག དེ་ཡང་། རྒྱལ་གཅེས་རིང་ལུགས་གཙོ་བོར་བཟུང་བའི་ཐོག་ནས་རྒྱལ་གཅེས་རིང་ལུགས་ཐོག་ངེས་ཤེས་བརླག་མཁན་རྣམས་ལ་སློབ་གསོ་སྤེལ་ཏེ་རྒྱལ་གཅེས་རིང་ལུགས་ཀྱི་བསམ་བློ་གོང་འཕེལ་གཏོང་ཐབས་དང་། ཡུལ་དེའི་ལོ་རྒྱུས་དང་རིག་གཞུང་སོགས་བརྩི་སྲུང་ཞུས་ཏེ། ཡུལ་དེའི་རིག་གཞུང་དར་ཁྱབ་གཏོང་རྒྱུ། གཞན་ཡང་། རྒྱལ་ཁབ་ཀྱི་རྩ་ཁྲིམས་དང་ཁྲིམས་ལུགས་སོགས་ལ་བརྩི་སྲུང་དང་ལག་བསྟར་བྱ་རྒྱུའི་འགན་ཡོད་ཚུལ་སོགས་བཀོད་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
