རྒྱ་ནག་གཞུང་འབྲེལ་གྱི་གསར་ལམ་ཁག་གིས་གནས་ཚུལ་སྤེལ་བ་ལྟར་ན། འདི་ལོའི་ཕྱི་ཟླ་ ༨ པའི་ཟླ་མཇུག་ཙམ་ནས་གར་སོང་ཆ་མེད་དུ་གྱུར་བའི་རྒྱ་ནག་གི་རྒྱལ་སྲུང་བློན་ཆེན་ལི་ཧྲན་ཧྥོའུ་ད་ལྟ་ཡོངས་གྲགས་ཀྱི་ཐོག་ནས་རྒྱལ་སྲུང་བློན་ཆེན་གྱི་གོ་གནས་ནས་གནས་དབྱུང་བཏང་བ་ཁྱབ་བསྒྲགས་བྱས་འདུག
ད་རེས་རྒྱ་ནག་གཞུང་གིས་ལི་ཧྲན་ཧྥོའུ་རྒྱལ་སྲུང་བློན་ཆེན་གྱི་གོ་གནས་ཙམ་དུ་མ་ཟད། རྒྱ་ནག་གི་དམག་དོན་སྒྲིག་འཛུགས་ཀྱི་ཁོངས་ནས་ཀྱང་ཕྱིར་ཕུད་དང་། འདི་ལོའི་ཕྱི་ཟླ་ ༦ ནང་མཐོང་ཐོས་མེད་པར་གྱུར་བའི་ཕྱི་སྲིད་བློན་ཆེན་ཟུར་བ་ཆིན་གང་དང་ལི་ཧྲན་ཧྥོའུ་གཉིས་ཀྱི་བཀའ་བློན་རིམ་པའི་གོ་གནས་ཀྱང་མེད་པར་བཟོས་ཡོད་འདུག་ལ། རྒྱ་ནག་གི་དམག་སྲིད་ཀྱི་དཔོན་རིགས་གཉིས་གནས་དབྱུང་བཏང་བའི་བརྡ་ཁྱབ་དེར་ཞི་ཅིན་ཕིན་གྱིས་དངོས་སུ་མིང་རྟགས་བཀོད་ནས་བྱུང་བ་ཞིག་ཡིན་པ་བརྗོད་འདུག
རྒྱ་ནག་གཞུང་འབྲེལ་གྱི་གནས་ཚུལ་དེའི་ནང་། རྒྱ་ནག་གཞུང་གིས་ལི་ཧྲན་ཧྥོའུ་རྒྱལ་སྲུང་བློན་ཆེན་གྱི་གོ་གནས་ནས་གནས་དབྱུང་གཏོང་དགོས་པའི་རྒྱུ་མཚན་དང་ཚབ་ཏུ་སུ་ཞིག་བསྐོ་གཞག་བྱ་རྒྱུ་ཡིན་མིན་སོགས་གསལ་བཤད་གང་ཡང་བྱས་མི་འདུག་མོད། ལོའུ་ཧྲའོ་ཡན་ (Liu Shaoyun)ཟེར་བ་ཞིག་རྒྱ་ནག་དམག་མིའི་ཁྲིམས་ཁང་གི་མགོ་འཁྲིད་ལ་བསྐོས་ཡོད་པ་དང་། ཁོ་བསྐོ་གཞག་བྱས་པ་དེ་ལི་ཧྲན་ཧྥོའུ་གནས་དབྱུང་བཏང་བ་དང་འབྲེལ་བ་ཡོད་མེད་ད་ལྟ་བཤད་ཚོད་ཐིག་གི་མེད་པ་རེད།
རྒྱ་ནག་ལྷོ་རྒྱུད་ཞོགས་པའི་ཆ་འཕྲིན་གྱི་གནས་ཚུལ་ནང་། ད་ལྟ་རྒྱ་ནག་དམར་ཤོག་ཚོགས་པའི་དམག་སྲིད་ལ་དེ་སྔ་ལོ་རྒྱུས་ནང་བྱུང་མྱོང་མེད་པའི་འགྱུར་ལྡོག་ཤུགས་ཆེན་བྱུང་གི་ཡོད་པ་དང་། ལི་ཧྲན་ཧྥོའུ་རྒྱལ་སྲིད་བློན་ནས་གནས་དབྱུང་བཏང་བ་དེས་རྒྱ་ནག་གི་དམག་དོན་སྒྲིག་འཛུགས་ལ་སྔར་ལྷག་གིས་འཁྲུག་ཆ་ཐེབས་སྲིད་སྐོར་དང་། ཕྱི་ལོ་ ༢༠༤༩ བར་ཞི་ཅིན་ཕིན་གྱིས་རྒྱ་ནག་གི་དམག་སྲིད་ཀྱི་སྟོབས་ཤུགས་འཛམ་གླིང་ནང་འགྲན་ཟླ་བྲལ་བ་ཞིག་ཏུ་བསྒྱུར་ཐབས་ཀྱི་སྲིད་ཇུས་བཟུང་ཡོད་སྐོར་སོགས་བརྗོད་འདུག
ཡང་འདི་ལོའི་ཕྱི་ཟླ་ ༨ ནང་ལི་ཧྲན་ཧྥོའུ་མཐོང་ཐོས་མེད་པར་གྱུར་བའི་གནད་དོན་དེ། རྒྱ་ནག་མི་དམངས་བཅིངས་གྲོལ་དམག་གི་མགོ་འཁྲིད་ཁག་ཅིག་ལ་ལྐོག་ཟ་རུལ་སུངས་ཀྱི་ཞིབ་དཔྱོད་བྱས་པའི་རྒྱུ་རྐྱེན་ལ་བརྟེན་ནས་བྱུང་བ་དབྱེ་ཞིབ་པས་བརྗོད་ཡོད་པ་དང་། དེ་ཡང་འདི་ལོའི་ཕྱི་ཟླ་ ༨ ཚེས་ ༡ ཉིན་མེ་ཤུགས་འཕུར་མདའི་དམག་སྤྱི་ལི་ (Li Yuchao) དང་དམག་སྤྱི་གཞོན་པ་ཀྲང་ཀྲན་ཀྲོང་(Zhang Zhenzhong)། དེ་བཞིན་འབྲེལ་ཡོད་ལིའུ་(Liu Guangbin)བཅས་ལ་དབུས་སྒྲིག་ཁྲིམས་ཞིབ་བཤེར་ཁང་གིས་ལྐོག་ཟ་རུལ་སུངས་ཀྱི་དོགས་གཞིའི་འོག་འདྲི་གཅོད་བྱེད་བཞིན་ཡོད་སྐོར་བསྒྲགས་ཡོད་པ་རེད།
ལི་ཧྲན་ཧྥོའུ་ནི་ད་ལྟ་རང་ལོ་ ༦༥ ཡིན་ཞིང་། རྒྱ་ནག་སི་ཁྲོན་ཞིང་ཆེན་ཁྲི་ཏུའུ་ནས་ཡིན། འདི་ལོའི་ཕྱི་ཟླ་ ༣ ནང་རྒྱ་ནག་གི་རྒྱལ་སྲུང་བློན་ཆེན་དུ་བསྐོ་གཞག་བྱས། ཁོས་འདས་པའི་ལོ་ངོ་ ༣༡ རིང་རྒྱ་ནག་གི་འཁོར་སྐར་ཞིབ་འཇུག་ལྟེ་གནས་ཁང་དུ་དང་གཞན་ཡང་དབུས་དམག་སྲིད་ལྷན་ཁང་། དེ་བཞིན་མི་དམངས་བཅིངས་གྲོལ་དམག་ཁོངས་སོགས་སུ་ལས་ཀ་བྱས་མྱོང་འདུག
གསར་འགོད་པ། སྐལ་བཟང་སྦྱིན་པ།
