རྒྱ་ནག་གི་སྲིད་བློན་ཟུར་བ་ལི་ཁུ་ཆང་གློ་བུར་དུ་སྙིང་རྩ་འགག་ནས་འདས་གྲོངས་སུ་ཕྱིན་ཡོད་འདུག
རྒྱ་ནག་གཞུང་འབྲེལ་གོ་ལའི་དུས་བབ་སོགས་ཀྱིས་གནས་ཚུལ་སྤེལ་བ་ལྟར་ན། ཁ་སང་ཉིན་རྒྱབ་ཙམ་ལ་རྒྱ་ནག་གི་སྲིད་བློན་ཟུར་བ་ལི་ཁུ་ཆང་ལ་གློ་བུར་དུ་སྙིང་ནད་བྱུང་སྟེ་ཧྲང་ཧེ་གྲོང་ཁྱེར་གྱི་སྨན་ཁང་ཞིག་ཏུ་སྨན་བཅོས་བྱེད་ཐབས་བྱས་ཡོད་ཀྱང་། མདང་དགོང་མཚན་དཀྱིལ་ཆུ་ཚོད་ ༡༢ ཡོལ་ཙམ་གྱི་སྟེང་ལི་ཁུ་ཆང་སྙིང་རྩ་འགག་ནས་འདས་གྲོངས་སུ་ཕྱིན་ཡོད་སྐོར་བསྒྲགས་འདུག
ད་ལྟ་གསར་འགྱུར་བརྒྱུད་ལམ་ཁག་ཏུ་ལི་ཁུ་ཆང་གྲོངས་རྐྱེན་སྙིང་ནད་ཡིན་པ་ཙམ་ལས་རྒྱུ་རྐྱེན་གཞན་ཡོད་མེད་ཁ་གསལ་མེད་པ་དང་། རྒྱ་ནག་ལ་ཉམས་ཞིབ་བྱེད་མཁན་ཚོས། ལི་ཁུ་ཆང་དང་ཞི་ཅིན་ཕིན་གཉིས་སྟག་སེང་ཁ་སྤྲོད་ཡིན་པ་དང་། ཞི་ཅིན་ཕིན་གྱི་དབང་ཤུགས་རྒྱ་སྐྱེད་དུ་ཕྱིན་པ་ལ་བརྟེན་ནས་ལི་ཁུ་ཆང་དང་ཁོའི་ཕྱོགས་གཏོགས་ཕམ་ཉེས་བྱུང་བར་ངོས་འཛིན་བྱེད་བཞིན་པ་མ་ཟད། ད་ལྟ་ལི་ཁུ་ཆང་གྲོངས་རྐྱེན་ཡང་ཞི་ཅིན་ཕིན་དང་འབྲེལ་བ་ཡོད་པར་དོགས་སློང་བྱེད་ཀྱིན་འདུག
རྒྱ་ནག་དམར་ཤོག་ཚོགས་པའི་དཔོན་རིགས་ཁག་ལ་གཞུང་འབྲེལ་རྗེས་དྲན་ཞུ་སྲོལ་ཡོད་པ་ལྟར། རྒྱ་ནག་གཞུང་འབྲེལ་གྱི་དྲ་ལམ་ཁག་ཏུ། ལི་ཁུ་ཆང་འདས་གྲོངས་སུ་ཕྱིན་ཡོད་པ་དང་རྗེས་དྲན་ཕྱིས་སུ་བྱ་རྒྱུ་ཡིན་ཞེས་བཀོད་འདུག་ནའང་། ད་ལྟ་ད་དུང་ཡང་རྒྱ་ནག་གཞུང་འབྲེལ་གྱི་གསར་ལམ་ཁག་ཏུ་རྗེས་དྲན་དང་འབྲེལ་བའི་གནས་ཚུལ་གང་ཡང་སྤེལ་མི་འདུག རྒྱ་ནག་གི་ཝེ་པོད་དྲ་ཚིགས་ཀྱི་སྟེང་དུ་ལི་ཁུ་ཆང་འདས་གྲོངས་སུ་ཕྱིན་པའི་གནས་ཚུལ་སྤེལ་བར་ལྟ་ཀློག་བྱེད་མཁན་མི་གྲངས་ས་ཡ་ ༧༠༠ ལྷག་བྱུང་ཡོད་འདུག
ལི་ཁུ་ཆང་ད་ལྟ་རང་ལོ་ ༦༨ ཡིན་པ་དང་ཞི་ཅིན་ཕིན་ལས་ལོ་གཉིས་ཀྱི་ཆུང་ཞིང་། འདི་ལོའི་ཕྱི་ཟླ་ ༣ པའི་རྒྱལ་ཡོངས་མི་དམངས་འཐུས་མི་ཚོགས་ཆེན་གྱི་སྟེང་དུ། རྒྱ་ནག་གི་མགོ་འཁྲིད་མཐོ་ཤོས་ཨང་གཉིས་པ་སྟེ། ལི་ཁུ་ཆང་གིས་སྲིད་བློན་གྱི་ཆེས་མཐའ་མཇུག་གི་ལས་བསྡོམས་སྙན་སྒྲོན་དང་རང་ཉིད་སྐབས་གཉིས་རིང་སྲིད་བློན་དུ་བསྡད་པའི་ལོ་ངོ་བཅུའི་རིང་གི་སྲིད་བློན་གྱི་གོ་གནས་ལ་མཇུག་སྡོམ་བརྒྱབ་ཡོད།
ཕྱི་ལོ་ ༢༠༡༣ ལོར་ལི་ཁུ་ཆང་རྒྱ་ནག་གི་སྲིད་བློན་དུ་བསྡད་པ་ནས་བཟུང་། རྒྱ་ནག་གཞུང་གི་བུ་ལོན་གྱི་དཀའ་ངལ་དང་། ཨ་རྒྱའི་ཚོང་འབྲེལ། ཏོག་དབྱིབས་གཉན་རིམས་ཀྱི་དཀའ་ངལ་སོགས་རྒྱ་ནག་གི་དཔལ་འབྱོར་ལ་ཆེས་དཀའ་ངལ་འཕྲད་བཞིན་པའི་བརྒྱུད་རིམ་ལ་གདོང་ལེན་བྱས་ཡོད་ཅིང་། ད་ལྟ་ལི་ནི་ཁྲོམ་རའི་རང་དབང་གུ་ཡངས་གཏོང་མཁན་ཞིག་དང་དབུལ་ཕོངས་མི་མང་སེམས་ལ་བཅིང་མཁན་ཞིག་ཏུ་ངོས་འཛིན་བྱེད་པ་དང་། ཡང་ཞི་ཅིན་ཕིན་གྱི་སྲིད་དབང་སྒེར་གཅོད་འོག་ནས་ཟུར་ཕུད་བྱས་པའི་དམར་ཤོག་དཔོན་རིགས་ཤིག་ཏུའང་ངོས་འཛིན་བྱེད་ཀྱི་ཡོད་འདུག
སྤྱིར་རྒྱ་ནག་དམར་ཤོག་ཚོགས་པའི་དཔོན་རིགས་ནང་ཁུལ་གྱིས་སྲིད་དབང་འཐབ་རྩོད་བྱས་ཏེ་འདས་གྲོངས་སུ་འགྲོ་ཡི་ཡོད་པ་མངོན་གསལ་ཡིན་པ་དང་། དམིགས་བསལ་གྱིས་མིང་གྲགས་ཆེ་བའི་དཔོན་རིགས་གང་མང་ཞིག་གློ་བུར་གློ་བུར་དུ་སྙིང་ནད་སོགས་ཕོག་ནས་འདས་གྲོངས་སུ་འགྲོ་ཡི་ཡོད། དེ་ཡང་མའོ་ཙེ་ཏུང་སྙིང་ནད་རྐྱེན་གྱིས་འདས་གྲོངས་སུ་ཕྱིན་པ་དང་ཏིན་ཞའོ་ཕིན་གློ་བའི་ནད་གཞིས་གྲོངས། ཅང་ཙི་མན་འབྲས་སྐྲན་རྐྱེན་གྱིས་གྲོངས། ད་ལྟ་ལི་ཁུ་ཆང་སྙིང་རྩ་འགག་ནས་འདས་གྲོངས་སུ་ཕྱིན་པ་སོགས་བྱུང་མྱོང་བ་རེད།
ལི་ཁུ་ཆང་ཕྱི་ལོ་ ༡༩༥༥ ལོར་རྒྱ་ནག་ཨན་ཧྥེ་ཞིང་ཆེན་གྱི་རྒྱལ་ས་ཧི་ཧྥེ་རུ་སྐྱེས། ཕྱི་ལོ་ ༡༩༧༤ ལོར་ཧི་ཧྥེ་མཐོ་རིམ་སློབ་གྲྭ་ ༨ པ་ཟེར་བ་ནས་སློབ་མཐར་ཕྱིན། ཕྱི་ལོ་ ༡༩༨༢ ལོར་པེ་ཅིན་གཙུག་ལག་སློབ་ཆེན་(北京大学法学院)ནས་ཁྲིམས་ལུགས་རིག་པའི་ཐོག་ཉེ་བའི་གཙུག་ལག་རབ་འབྱམས་པ་ཐོན། ཕྱི་ལོ་ ༡༩༩༥ ལོར་སློབ་ཆེན་དེ་ནས་ཚོང་ལས་ཐོག་གཙུག་ལག་རབ་འབྱམས་པ་དང་ལྟ་གྲུབ་ཐོག་འབུམ་རམས་པ་བཅས་ཐོན། ཕྱི་ལོ་ ༡༩༧༦ ལོར་ལི་ཁུ་ཆང་ན་གཞོན་དམར་ཤོག་ཚོགས་པའི་མཐུན་ཚོགས་ཀྱི་ཁོངས་སུ་ཞུགས་པ་ནི་ཐོག་མར་དམར་ཤོག་ཚོགས་ཁོངས་སུ་ཞུགས་པ་ཡིན། ཕྱི་ལོ་ ༡༩༩༨ ནས་ ༢༠༠༤ བར་ཧེ་ནཱན་(河南)ཞིང་ཆེན་གྱི་དམར་ཤོག་དྲུང་ཆེ་དང་སྲིད་འཛིན་པར་བསྡད། ཕྱི་ལོ་ ༢༠༠༤ ནས་ ༢༠༠༧ བར་ལེའོ་ནཱེ་(辽宁)ཞིང་ཆེན་གྱི་དམར་ཤོག་དྲུང་ཆེ་བྱས། ཕྱི་ལོ་ ༢༠༠༨ ནས་ ༢༠༡༣ བར་དམར་ཤོག་ཚོགས་པའི་རིམ་པ་དང་པོའི་སྲིད་བློན་གཞོན་པ་བྱས། ཕྱི་ལོ་ ༢༠༡༣ ནས་ ༢༠༢༣ བར་རྒྱ་ནག་དམར་ཤོག་ཚོགས་པའི་སྲིད་དབང་མཐོ་ཤོས་ཀྱི་མི་སྣ་ཨང་གཉིས་པ་སྟེ། རྒྱ་ནག་གི་སྲིད་བློན་ཆགས་ཡོད་པ་རེད།
གསར་འགོད་པ། སྐལ་བཟང་སྦྱིན་པ།
