ཁེ་ན་ཌས་དྲ་རྒྱའི་བདེ་འཇགས་ལ་ཉེན་ཁ་ཡོད་པའི་གནས་སྟངས་འོག་ནས་རྒྱ་ནག་གི་སྐད་འཕྲིན་བཀག་སྡོམ་བྱས་འདུག
སི་ཨན་ཨན་གསར་ཁང་གིས་གནས་ཚུལ་སྤེལ་བ་ལྟར་ན། དེ་རིང་བྱང་ཨ་མེ་རི་ཁའི་རྒྱལ་ཁབ་ཁེ་ན་ཌ་གཞུང་གིས། ཁེ་ན་ཌ་རྒྱལ་ཡོངས་ཀྱི་གཞུང་འབྲེལ་ཁ་པར་དང་གློག་ཀླད་སོགས་འཕྲུལ་རིགས་ཀྱི་ནང་དུ་རྒྱ་ནག་གི་སྐད་འཕྲིན་མཉེན་ཆས་བཀག་སྡོམ་གྱི་གསལ་བསྒྲགས་སྤེལ་ཡོད་ཅིང་། སྐད་འཕྲིན་བཀག་སྡོམ་གྱི་སྲིད་ཇུས་དེ་གསལ་བསྒྲགས་སྤེལ་བ་ནས་བཟུང་ལག་བསྟར་བྱེད་མགོ་བརྩམས་ཡོད་འདུག་ལ། ཁེ་ན་ཌས་སྐད་འཕྲིན་མཉེན་ཆས་བཀག་སྡོམ་བྱེད་དོན་ནི་དྲ་རྒྱའི་བདེ་འཇགས་དམིགས་ལ་ཡོད་ཀྱང་། ད་བར་སྐད་འཕྲིན་གྱིས་ཁེ་ན་ཌའི་གཞུང་འབྲེལ་གྱི་གནས་ཚུལ་རྐུ་འཁྱེར་བྱས་མེད་སྐོར་བསྒྲགས་འདུག
ཁེ་ན་ཌའི་སྤྱི་གཉེར་སློབ་སྟོན་ལྷན་ཁང་གི་འགན་འཛིན་ཨ་ནེ་ཏ་ (Anita Anand) ལགས་ཀྱིས། རྒྱ་ནག་གི་ཊུ་སན་ཊི་ (Tencent) བཟོ་གྲྭའི་སྐད་འཕྲིན་དང་ཨུ་རུ་སུའི་དྲ་རྒྱའི་བདེ་འཇགས་སྲུང་སྐྱོབ་བྱེད་པའི་མཉེན་ཆེས་ (Kaspersky) གཉིས་ལ་ངོས་ལེན་བྱེད་ཐབས་བྲལ་བའི་མི་སྒེར་གྱི་གསང་བ་དང་བདེ་འཇགས་ཐད་ནས་ཉེན་ཁ་ཆེ་བས། ང་ཚོས་མཉེན་ཆས་དེ་དག་གཞུང་འབྲེལ་གྱི་ཁ་པར་སོགས་ནས་མེད་པར་བཟོས་ཏེ། དྲ་རྒྱའི་བདེ་འཇགས་སྲུང་སྐྱོབ་བྱེད་ཀྱི་ཡོད་ཅེས་བརྗོད་འདུག
དྲ་རྒྱའི་བདེ་འཇགས་ཆེད་མཁས་བ་མང་པོ་ཞིག་གིས། སྐད་འཕྲིན་བེད་སྤྱོད་གཏོང་བར་ཉེན་ཁ་ཆེ་སྐོར་ཡོངས་གྲགས་བཟོས་ཟིན་པ་དང་། ཐེངས་འདིར་ཁེ་ན་ཌ་གཞུང་གིས་སྐད་འཕྲིན་དང་ལྷན་དུ་ཨུ་རུ་སུའི་ (Kaspersky)ཞེས་པའི་དྲ་རྒྱའི་བདེ་འཇགས་དང་འབྲེལ་བའི་མཉེན་ཆས་ཤིག་ཀྱང་བཀག་སྡོམ་བྱས་ཡོད་འདུག
ཡང་ཕྱི་ལོ་ ༢༠༢༠ ལོར་ཨ་རིའི་སྲིད་འཛིན་ཌོ་ནལ་ཊི་རུམ་ཕིད་ཀྱིས་བཀོད་ཁྱབ་ཅིག་བཏང་སྟེ་ཨ་རིའི་ནང་རྒྱ་ནག་གི་སྐད་འཕྲིན་བེད་སྤྱོད་གཏོང་མཚམས་འཇོག་ཐབས་བྱས་ཡོད་ཀྱང་གཏན་འགོག་བྱེད་མ་ཐུབ་པ་རེད། དེ་བཞིན། ཕྱི་ལོ ༢༠༢༢ ལོའི་ཟླ་ ༢ ནང་རྒྱ་དཀར་ནག་གཉིས་བར་ས་མཚམས་རྩོད་རྙོག་གི་གཙོས་ཚོང་འབྲེལ་སོགས་ཀྱི་འགལ་ཟླ་བྱུང་སྟབས། རྒྱ་གར་གྱིས་རྒྱའི་སྐད་འཕྲིན་མཉེན་ཆས་གཙོ་བྱས་པའི་རྒྱ་ནག་གི་མཉེན་ཆས་ཁྱོན་ ༥༤ དུས་ཡུན་ངེས་མེད་རིང་གཏན་འགོག་བྱས་ཡོད་པ་རེད།
རྒྱ་ནག་གི་མཉེན་ཆས་སྐད་འཕྲིན་ནམ་ (微信)ཟེར་བ་ཕྱི་ལོ་ ༢༠༡༡ ལོར་ཐོག་མར་གསར་དུ་བཟོས་ཤིང་། རྒྱ་རིགས་རྣམས་གཙོ་བྱས་པའི་རྒྱ་ནག་གི་དབང་སྒྱུར་འོག་གནས་པའི་བོད་མི་རྣམས་ལ་མཚོན་ན། སྐད་འཕྲིན་ནི་བེད་སྤྱོད་མི་གཏོང་ཐབས་མེད་ཀྱི་གནས་སྟངས་འོག་བེད་སྤྱོད་གཏོང་མཁན་མང་པོ་བྱུང་ཞིང་། བར་སྐབས་ཤིག་ལ་བོད་ཕྱི་ནང་གཉིས་ཀྱི་བོད་མིའི་འབྲེལ་ཐག་བྱེད་སྤྱད་གཙོ་གྲས་ཤིག་ཀྱང་ཆགས་པ་རེད། རྒྱལ་སྤྱིའི་སྤྱི་ཚོགས་དྲ་རྒྱ་དང་འབྲེལ་མཉེན་ཆས་ཁག་ལ་ཞིབ་འཇུག་བྱེད་མཁན་ (statista.com)དྲ་རྒྱའི་གནས་ཚུལ་ལྟར་ན། ད་ལྟ་རྒྱལ་སྤྱིའི་སྟེང་སྐད་འཕྲིན་བེད་སྤྱོད་གཏོང་མཁན་གྱི་མི་འབོར་འཕེལ་བཞིན་པ་དང་ཟླ་རེར་སྐད་འཕྲིན་བེད་སྤྱོད་གཏོང་མཁན་གྱི་མི་གྲངས་ཐེར་འབུམ་ ༡།༣ ཙམ་ཡོད་འདུག
གསར་འགོད་པ། སྐལ་བཟང་སྦྱིན་པ།
