བཞུགས་སྒར་དྷ་སའི་ཁུལ་དུ་དེ་རིང་ནས་ཉིན་གྲངས་ལྔའི་རིང་བོད་ཀྱི་མ་འོངས་པའི་མདུན་ལམ་འཚོལ་ཞིབ་ཅེས་པའི་བོད་དོན་ཐད་ཀྱི་བཞུགས་མོལ་ལྷན་ཚོགས་ཐེངས་བཞི་པ་དེ་ཚོགས་མགོ་བཙུགས་སོང་།
བོད་ཀྱི་མ་འོངས་པའི་མདུན་ལམ་འཚོལ་ཞིབ་ཅེས་པའི་བཞུངགས་མོལ་ཚོགས་འདུ་སྐོང་ཚོགས་གནང་། ༢༠༢༣། ༡༡། ༦ བོད་ཀྱི་དུས་བབ་ཀྱི་པར།
བོད་ཀྱི་ལས་འགུལ་གྱིས་གོ་སྒྲིག་འོག དེ་རིང་ཕྱི་ཚེས་ ༦ ནས་ཟླ་འདིའི་ཕྱི་ཚེས་ ༡༠ བར་ཉིན་གྲངས་ལྔ་རིང་བཞུགས་སྒར་དྷ་རམ་ས་ལའི་ཉེ་འདབས་སུ་ཆགས་པའི་ཨིམ་པི་རིལ་གསོལ་མགྲོན་ཁང་དུ། བོད་ཀྱི་མ་འོངས་པའི་མདུན་ལམ་འཚོལ་ཞིབ་ཅེས་པའི་བཞུགས་མོལ་ཐེངས་བཞི་པ་དེ་དངོས་སུ་སྐོང་ཚོགས་གནང་མགོ་བཙུགས་སོང་། ད་ལན་གྱི་བཞུགས་མོལ་འདིའི་སྟེང་རྒྱ་གར་གཙོས་ཨ་རི་དང་ཡུ་རོབ་ཀྱི་རྒྱལ་ཁབ་ཁག་ཅིག་ནས་བོད་པའི་ན་གཞོན་ཕོ་མོ་གྲངས་ ༩༠ ཙམ་གྱིས་མཉམ་ཞུགས་གནང་སྟེ། རྒྱལ་སྤྱིའི་ཆབ་སྲིད་ཀྱི་འགྱུར་འགྲོས་དང་བསྟུན། བོད་ཀྱི་མ་འོངས་པའི་སྲིད་འབྱོར་རིག་གསུམ་གྱི་གནད་དོན་སོགས་ཀྱི་ཐད་ལ་གྲོས་མོལ་གནང་གི་ཡོད་འདུག
དབུ་འབྱེད་མཛད་སྒོའི་སྐུ་མགྲོན་གཙོ་བོ་སྐུ་ཚབ་ཟུར་བ་སྐལ་བཟང་རྒྱལ་མཚན་ལགས་ཀྱིས། ད་ལན་གྱི་ཚོགས་འདུ་འདི་བརྒྱུད་མཉམ་རུབ་ཀྱི་ཐོག་ནས་ལས་དོན་མཐའ་དག་ལ་གོ་བསྡུར་དང་། མཉམ་ལས་གོང་མཐོར་གཏང་རྒྱུའི་་ཐོག་ལ་ཧུར་བརྩོན་བྱ་དགོས་ཤིང་། རྒྱལ་སྤྱིའི་ཆབ་སྲིད་ཀྱི་ཁོར་ཡུག་ལ་འཕོ་འགྱུར་ཆེན་པོ་ཐེབས་མུས་ཡིན་པའི་དུས་ཚིགས་ཤིག་གི་སྐབས་འདིར་བོད་མིའི་རང་དབང་འཐབ་རྩོད་ཀྱི་ཐད་ལ་གདོང་ལེན་དང་གོ་སྐབས་གསར་པ་དེ་དག་གི་ཐོག་ལ་དཔྱད་གླེང་བྱ་འདོད་ཡོད་སྐོར་དང་། སྤྱིར་རྒྱ་ནག་གཞུང་གིས་བོད་ནང་གི་བོད་མི་གཙོས་བོད་མི་རྣམས་ལ་དངོས་ཤུགས་བརྒྱུད་གསུམ་སོགས་ནས་མནར་གཅོད་གཏོང་མུས་ཡིན་སྟབས། བོད་མི་རྣམས་གཙོས་བོད་པའི་ན་གཞོན་རྣམས་ཀྱི་ལས་འགན་གཙོ་བོ་ནི་བོད་མིའི་རང་དབང་འཐབ་རྩོད་དང་། ད་ལྟའི་བོད་པའི་སྤྱི་ཚོགས་ཀྱི་གནད་དོན་ཆུང་ཆུང་རིགས་ལ་མགོ་འཁོར་ནས་མ་བསྡད་པར། བོད་མིའི་རང་དབང་འཐབ་རྩོད་ཀྱི་ལས་དོན་སོགས་ཀྱི་ཁྲོད་དུ་མཉམ་ཞུགས་དང་བོད་ཀྱི་མ་འོངས་པའི་གནད་དོན་སོགས་ཀྱི་ཐད་ལ་གོ་བསྡུར་བྱ་རྒྱུ་ཧ་ཅང་གལ་ཆེན་པོ་ཡིན་སྐོར་སོགས་འགྲེལ་བརྗོད་གནང་སོང་།
ལྷན་ཚོགས་དེའི་གོ་སྒྲིག་ཚོགས་ཆུང་གི་ཚོགས་མི་བཀྲ་ཤིས་ལམ་བཟང་ལགས་ཀྱིས། ད་ལན་དྷ་སར་གོ་སྒྲིག་བྱས་པའི་བཞུགས་མོལ་འདི་ནི་བོད་པ་གཅིག་པུར་དམིགས་པའི་ཚོགས་འདུ་ཐེངས་དང་པོ་དེ་ཡིན་ཞིང་། ད་ལན་གྱི་བཞུགས་མོལ་འདིའི་ཐོག་རྒྱ་གར་གཙོས་ཡུ་རོབ་ཀྱི་རྒྱལ་ཁབ་ཁག་ཅིག་ནས་བོད་པའི་ན་གཞོན་ཕོ་མོ་གྲངས་ ༨༨ ཀྱིས་མཉམ་ཞུགས་བྱས་ཡོད་ཅིང་། བོད་ཀྱི་མདུན་ལམ་ཞེས་པ་ནི་ཆོལ་ཁ་ཆོས་ལུགས་དང་ཆབ་སྲིད་ཀྱི་རྒྱབ་ལྗོངས་སོགས་གང་ལའང་མ་ལྟོས་པར་མཉམ་རུབ་ཀྱི་ཐོག་ནས་བོད་ཀྱི་ཆབ་དཔལ་རིག་གསུམ་གཙོས་བོད་དོན་གླེང་སློང་བྱ་སའི་རང་དབང་གི་གར་སྟེགས་ཤིག་ཡིན་སྐོར་དང་། ད་ལན་གྱི་ལྷན་ཚོགས་འདི་བརྒྱུད་ནས་བོད་ཀྱི་ཆབ་སྲིད་དང་བོད་མིར་འཕྲད་སྲིད་པའི་དཀའ་ངལ་ཁག་གི་ཐད་ལ་བགྲོ་གླེང་བྱས་ཏེ། མ་འོངས་པའི་གནད་དོན་དེ་དག་གི་ཐོག་ལ་གདོང་ལེན་དང་གྲ་སྒྲིག་བྱ་དགོས་སྐོར་དང་། དེ་བཞིན་མ་འོངས་པར་རྒྱ་གར་དང་རྒྱལ་སྤྱིའི་ཆབ་སྲིད་ཀྱི་འགྱུར་འགྲོས་བསྟུན་བོད་མི་ཚོས་གྲ་སྒྲིག་བྱ་དགོས་པའི་གནད་དོན་སོགས་ཀྱི་ཐད་ལ་གླེང་སློང་གནང་གི་ཡོད་སྐོར་སོགས་འགྲེལ་བརྗོད་གནང་སོང་།
བོད་ཀྱི་མདུན་ལམ་ཞེས་པ་ནི་རྒྱ་གར་དང་། ཡུ་རོབ། ཨ་རི་སོགས་སུ་སློབ་གཉེར་བྱེད་མུས་ཡིན་པའི་བོད་ཀྱི་ན་གཞོན་ཤེས་ལྡན་པ་ཁག་ཅིག་གིས་གྲུབ་པའི་དང་བླངས་ཀྱི་རུ་ཁག་ཅིག་ཡིན་ཞིང་། བོད་ཀྱི་མདུན་ལམ་ཞེས་པའི་ལས་འགུལ་དེ་ཐོག་མར་ཕྱི་ལོ་ ༢༠༢༢ ཟླ་ ༤ ཚེས་ ༩ དང་ ༡༠ ཉིན་གྲངས་གཉིས་རིང་ཨ་རིར་འཚོགས་ཡོད་པ་དང་། ཕྱི་ལོ་ ༢༠༢༢ ཟླ་ ༡༡ ཚེས་༢༥ ནས་ཉིན་གྲངས་གསུམ་རིང་ཧྥ་རན་སིའི་རྒྱལ་ས་པེ་རི་སིར་འཚོགས། དེ་བཞིན་ཟླ་འདིའི་ཕྱི་ཚེས་ ༣ ཉིན་རྒྱ་གར་གྱི་རྒྱལ་ས་ལྡི་ལི་བཅས་སུ་སྐོང་ཚོགས་གནང་ཡོད་འདུག
གསར་འགོད་པ། དཔལ་ལྡན།
རྩོམ་སྒྲིག་པ། སྐལ་བཟང་སྦྱིན་པ།
