ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་ཀྱིས་ཐེངས་འདིའི་ཚོགས་ཆེན་ནང་དུ་གྲོས་གཞི་ཁག་ ༡༠ དང་། ས་གནས་མགོ་འཛིན་རྣམས་ལ་གོ་རྟོགས་སྤེལ་བའི་དོན་ཚན་ ༥ བཅས་ཀྱི་ཐད་བགྲོ་གླེང་དང་གྲོས་འཆར་གཏན་འབེབས་བྱ་རྒྱུ་ཡིན་སྐོར་འགྲེལ་བརྗོད་གནང་སོང་།
དེ་རིང་སྔ་དྲོ་ཆུ་ཚོད་ ༩ བའི་སྟེང་གངས་སྐྱིད་ལས་བྱེད་སྤྱི་ཐབ་ཡང་སྟེང་ཚོགས་ཁང་དུ། བོད་མིའི་སྒྲིག་འཛུགས་ཀྱི་ནང་སྲིད་ལས་ཁུངས་ཀྱི་གོ་སྒྲིག་འོག ཉིན་བཞི་རིང་ནང་སྲིད་ལས་ཁུངས་ཀྱི་ཁྱབ་ཁོངས་ས་གནས་མགོ་འཛིན་རྣམས་ཀྱི་འཛིན་སྐྱོང་ཚོགས་ཆེན་ཐེངས་ ༡༥ པ་འཚོག་མགོ་ཚུགས་ཡོད་ཅིང་། ཚོགས་ཐོག་ཏུ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གི་དབུས། བདེ་སྲུང་བཀའ་བློན་རྒྱ་རི་སྒྲོལ་མ་མཆོག ནང་སྲིད་དྲུང་ཆེ་དཔལ་ལྡན་དོན་གྲུབ་ལགས། ཆོས་རིག་དྲུང་ཆེ་འཆི་མེད་ཚེ་དབྱངས་ལགས། བཀའ་དྲུང་ཆུ་སྐྱ་སྦྲ་གཉིས་ཚེ་རྒྱལ་ལགས་བཅས་ས་གནས་མགོ་འཛིན་ ༤༥ མཉམ་ཞུགས་གནང་ཡོད།
འདི་གའི་གསར་འགོད་པས་ནང་སྲིད་དྲུང་ཆེ་དཔལ་ལྡན་དོན་གྲུབ་ལགས་སུ་ཐེངས་འདིའི་ཚོགས་འདུའི་སྐོར་དྲིས་སྐབས། བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ཁྱབ་ཁོངས་སུ་རྒྱ་བལ་འབྲུག་གསུམ་གྱི་ས་གནས་མགོ་འཛིན་ ༤༥ ཡོད་ཅིང་། ལོ་གཉིས་རེའི་མཚམས་སུ་དབུས་ས་གཉིས་ཀྱི་ལས་དོན་བྱེད་ཕྱོགས་དང་འབྲེལ་བའི་དཀའ་ངལ་དང་། འཐུས་ཤོར་ལེགས་བཅོས་བྱེད་སླད་ཚོགས་འདུ་འཚོག་བཞིན་ཡོད། ཕྱི་ལོ་ ༢༠༠༢ ལོར་སྐྱབས་རྗེ་ཟམ་གདོང་རིན་པོ་ཆེས་བཀའ་བློན་ཁྲི་བའི་འགན་བཞེས་པའི་སྐབས་སུ། ས་གནས་མགོ་འཛིན་གྱི་འཛིན་སྐྱོང་ཚོགས་ཆེན་གྱི་ལམ་སྲོལ་ཞིག་གཏོད་དེ་མུ་མཐུད་དུ་འགྲོ་བཞིན་འདུག ཐེངས་འདིའི་ཚོགས་ཆེན་ཐོག་བལ་ཡུལ་གྱི་ས་གནས་མགོ་འཛིན་གཅིག་ལས་ཀ་གལ་ཆེན་ཞིག་གི་དབང་གིས་མཉམ་ཞུགས་གནང་ཐུབ་མེད། དེའི་ཚབ་ཏུ་ར་ཝང་ལའི་ས་གནས་མགོ་འཛིན་གསར་བ་ཞིག་བཅར་ཡོད་པ་བཅས་ཁྱོན་བསྡོམས་ས་གནས་མགོ་འཛིན་ ༤༥ མཉམ་ཞུགས་གནང་ཐུབ་ཡོད། ཟླ་འདིའི་ཕྱི་ཚེས་ ༩ བར་དུ་ཚོགས་ཆེན་ནང་དུ་གྲོས་གཞི་ཁག་ ༡༠ དང་། ས་གནས་མགོ་འཛིན་རྣམས་ལ་གོ་རྟོགས་སྤེལ་བའི་དོན་ཚན་ ༥ བཅས་ཀྱི་ཐད་བགྲོ་གླེང་དང་གྲོས་འཆར་གཏན་འབེབས་བྱ་རྒྱུ་ཡིན། ཞེས་བརྗོད་སོང་།
གྲོས་གཞི་ཁག་བཅུའི་གལ་གནད་སྐོར་ལ་དྲིས་པར་ཁོང་གིས། གལ་ཆེ་ཤོས་ས་གནས་མགོ་འཛིན་གྱི་ཉིན་རེའི་ལས་དོན་བྱེད་ཕྱོགས་རེད། ཚོགས་ཆེན་ཐོག་ས་གནས་མགོ་འཛིན་གསར་བ་མང་པོ་ཕེབས་ཡོད་ལ། བོད་དུ་སྐྱེས་ཏེ་ས་གནས་མགོ་འཛིན་བྱེད་མཁན་རེ་ཟུང་མ་གཏོགས་མེད། ད་ལྟའི་ས་གནས་མགོ་འཛིན་རྣམས་རྒྱ་གར་དང་བལ་ཡུལ་ནས་འཚར་ལོངས་བྱུང་སྟེ་བསླབ་པ་མཐར་སོན་པ་རེད། སློབ་སྦྱོང་གི་གནས་ཚད་ཀྱང་མི་རབས་རྒན་པ་ལས་ཡག་པོ་ཡོད་ཀྱང་། ལྷག་བསམ་དང་ཧུར་བརྩོན་གྱི་ལས་དོན་བྱེད་ཕྱོགས་ཐད་ཅུང་ཙམ་ཞན་ཆ་ཡོད་པས། དེ་དག་གི་ཐོག་ཏུ་བགྲོ་གླེང་བྱ་རྒྱུ་ཡིན། དེ་བཞིན་འཛིན་སྐྱོང་དང་། ས་ཁང་སྒྲིག་གཞི་བསྐྱར་བཅོས། མི་འབོར་ཞིབ་བཤེར་སོགས་ཚང་མ་གལ་ཆེན་ཆགས་ཡོད། ཅེས་བརྗོད་སོང་།
སྐབས་སྔོན་མའི་གྲོས་གཞི་ཁག་གི་སྐོར་དྲིས་པར་ཁོང་གིས། སྐབས་སྔོན་མའི་ཚོགས་ཆེན་སྐབས་སུ་གཏན་འབེབས་བྱས་པ་དེ་བཀའ་བློན་ལས་ཁུངས་བདུན་དང་འབྲེལ་བ་ཡོད་པ་སོ་སོའི་ལས་ཁུངས་སུ་ཕུལ་དུས། ལན་སླེབས་པ་དང་མ་སླེབས་པ་སོགས་ཅི་རིགས་བྱུང་ཡོད། ད་ལོ་ལག་ལེན་ཏུ་མ་འཁེལ་བའི་གྲོས་གཞི་རྣམས་ཚོགས་ཐེངས་རྗེས་མ་སྙན་སྒྲོན་ཞུ་དགོས་ཀྱི་ཡོད་པ་རེད། ས་གནས་མགོ་འཛིན་རྣམས་ཀྱིས་ས་གནས་སོ་སོའི་ལས་དོན་བྱེད་ཕྱོགས་ལེགས་འགྲུབ་བྱུང་ཐུབ་མེད་ཚེ། གྲོས་བསྡུར་བྱས་ཏེ་ཡར་སྙན་སྒྲོན་ཞུ་དགོས་ཀྱི་ཡོད་པ་རེད། ཅེས་བརྗོད་སོང་།
གཞོན་སྐྱེས་ས་གནས་མགོ་འཛིན་རྣམས་ལ་རེ་བ་གང་འདྲ་ཡོད་མིན་ཐད་ཁོང་གིས། ང་ཚོ་བོད་པ་ཡིན་པའི་ཆ་ནས། དམིགས་ཡུལ་གཉིས་ཏེ་གཞིས་བྱེས་ལྷན་འཛོམས་དང་། བཙན་བྱོལ་དུ་བསྡད་པའི་རིང་མི་མང་ལ་ལྟ་རྟོག་བྱ་རྒྱུ་རེད། ས་གནས་མགོ་འཛིན་བྱས་ཚེ་དབུ་ཁྲིད་བྱེད་པར་དཀའ་ངལ་ཡོང་གི་མ་རེད། ས་གནས་མགོ་འཛིན་ནང་དུ་གཞོན་སྐྱེས་མང་པོ་སླེབས་ཡོད་པ་དང་། དམིགས་བསལ་ཐེངས་འདིར་ས་གནས་མགོ་འཛིན་བུད་མེད་བདུན་འདུག ༧གོང་ས་རྒྱལ་བ་རིན་པོ་མཆོག་གི་ཐུགས་རེ་བཞིན་བོད་མིའི་སྒྲིག་འཛུགས་ཀྱིས་ཤེས་ཡོན་སྤྲད་པ་ལྟར། སྤྱི་ཚོགས་ནང་དུ་ཕན་ཐོགས་མཁན་གྱི་མི་ཞིག་ཆགས་ཡོད། སྤྱི་ཚོགས་ཀྱི་མགོ་ཁྲིད་མཁན་གྱི་མི་སྣ་སླེབས་ཡོད་པས། དེ་ནི་ང་ཚོ་ཚང་མ་དགའ་དགོས་པ་རེད། ཁ་ཤས་མི་མང་གི་ནང་དུ་སྤོབས་པ་དང་ལྡན་པའི་ཐོག་ནས་བཤད་མི་ཐུབ་མཁན་དེ་འདྲ་ཡོད་ཀྱང་། ཚོགས་འདུ་དང་ཟབ་སྦྱོང་མང་པོའི་ཁྲོད་ནས་གཞོན་སྐྱེས་རྣམས་ལ་སྡིངས་ཆ་ཡག་པོ་ཞིག་ཐོབ་ཀྱི་རེད། ཅེས་འགྲེལ་བརྗོད་གནང་སོང་།
དེ་བཞིན་ཐེངས་འདིའི་ཚོགས་ཆེན་སྐོར་ལ་ཨོ་རི་ས་ས་གནས་མགོ་འཛིན་མཁན་པདྨ་བསྟན་འཕེལ་ལགས་ཀྱིས་གསར་འགོད་པར། འདི་ནི་དབུས་བོད་མིའི་སྒྲིག་འཛུགས་ཀྱི་ས་གནས་མགོ་འཛིན་གྱི་ཚོགས་ཆེན་ཐེངས་ ༡༥ པ་ཆགས་ཀྱི་ཡོད་པ་རེད། ཚོགས་ཐོག་ཏུ་ས་གནས་མགོ་འཛིན་གྱིས་ས་གནས་སོ་སོའི་ལས་དོན་ལག་བསྟར་བྱེད་ཕྱོགས་དང་། མི་མང་གི་བདེ་སྡུག་སོགས་དབུས་ནང་སྲིད་ལས་ཁུངས་དང་འབྲེལ་ཡོད་ལྷན་ཁང་ལ་ཞུ་ཕྱོགས་དང་། འཐུས་ཤོར་ལ་ཡོ་བསྲངས་བྱེད་ཕྱོགས། མཉམ་དུ་བགྲོ་གླེང་བྱས་ཏེ་གཞི་གཅིག་ཏུ་ཕབ་ཚེ། མ་འོངས་བའི་ལས་དོན་བྱེད་ཕྱོགས་ཐད་དགོངས་འཆར་གཅིག་ཏུ་སྤུངས་ཐུབ་པའི་དགེ་མཚན་ཆེན་པོ་ཡོད། ཅེས་བརྗོད་སོང་།
ཐེངས་འདིའི་ཚོགས་ཆེན་གྱི་སྐོར་ལ་སྲིད་སྐྱོང་དང་ནང་སྲིད་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་གིས། ས་གནས་མགོ་འཛིན་རྣམས་ཀྱིས་སོ་སོའི་ས་གནས་མི་མང་གི་ནང་དུ་༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་རྗེ་བཀའ་དྲིན་དུས་ནས་དུས་སུ་དྲན་སྐུལ་བྱ་རྒྱུ་གལ་ཆེན་པོ་ཡིན་པ་མ་ཟད། བོད་མི་རིགས་ཀྱི་ཆོས་དང་རིག་གཞུང་དང་བཅས་པ་སྲ་བརྟན་གནས་ཐུབ་པ་ནི་མི་རབས་རྒན་པ་རྣམས་ཀྱི་ལྷག་བསམ་རྣམ་དག་གི་བཀའ་དྲིན་ལས་བྱུང་བ་ཤ་སྟག་ཡིན་པས། ཁོང་རྣམ་པའི་མི་ཚེ་གཅིག་རིང་སྐུ་ངལ་བསྐྱོན་པའི་བཀའ་དྲིན་དྲན་པའི་ཐོག་ནས་ལྟ་སྐྱོང་གནང་དགོས་པའི་གལ་གནད་དང་། བཀའ་ཤག་དང་འཛིན་སྐྱོང་གི་ལས་བྱེད་རྣམས་འཕྲུལ་འཁོར་གཅིག་ནང་བཞིན་ནུས་པ་མཉམ་སྤུངས་ཀྱིས་བོད་དོན་ཆབ་སྲིད་དང་། བཙན་བྱོལ་བོད་མིའི་བདེ་སྡུག་ལྟ་སྐྱོང་གནང་རྒྱུར་ཕྱག་ལས་གནང་དགོས་སྐོར་གསུངས་སོང་།
དེ་བཞིན་ཁོང་གིས། བཀའ་ཤག་སྐབས་བཅུ་དྲུག་པའི་ངོས་ནས་མ་འོངས་བོད་ཀྱི་འགན་སྲུང་ཞེས་པའི་ཕུགས་དམིགས་ཡིག་ཆ་ཞིག་འདོན་སྤེལ་གནང་ཡོད་པ་ལྟར། ས་གནས་མགོ་འཛིན་དང་ལས་བྱེད་རྣམས་ནས་བཀའ་ཤག་གི་འཆར་གཞི་དང་ལས་དོན་གནང་ཕྱོགས། དེ་འབྲེལ་ལས་རིམ་སྒྲིག་སྟངས་སོགས་ཀྱི་སྐོར་རྒྱུས་ལོན་ཡོང་ཐབས་སུ་ཡིག་ཆ་དེར་ལྟ་ཀློག་བྱ་དགོས་ཤིང་། དམིགས་བསལ་དེའི་ནང་དུ་གསལ་བའི་ལས་དོན་བྱེད་ཕྱོགས་མང་པོ་ཞིག་མི་མང་གི་དགོས་མཁོ་དང་ཐད་ཀར་འབྲེལ་བ་ཡོད་པས། ས་གནས་འགོ་འཛིན་རྣམས་ཀྱིས་ཡིག་ཆ་དེའི་ནང་དོན་གོ་རྟོགས་ཡག་པོ་དགོས་རྒྱུ་གལ་གནད་ཆེན་པོ་ཡིན་སྐོར་གསུངས་སོང་།
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། སྐལ་བཟང་སྦྱིན་པ།
བཀའ་ཁྲི་ཟབ་གདོང་རིན་པོ་ཆེ་མཆོག་ནས་་དབུ་འཕྲིད་པའི་བཀའ་ཤག་སྐབས་ ༡༢ པའི་སྐབས་ཕྱི་ལོ་༢༠༠༢ ནང་བོད་མིའི་ས་གནས་འགོ་འཛིན་གྱི་འཛིན་སྐྱོང་ཚོགས་ཐེངས་དང་པོ་འཚོག་རྒྱུའི་གསལ་བསྒྲགས་དེ་མཇལ་སོང་། འཛིན་སྐྱོང་ཚོགས་ཐེངས་དང་པོ་ཅེས་ཀློག་སྐབས་སེམས་ནང་བདེ་མིན་བྱུང་། དེ་སྐབས་ང་རང་གཞུང་ཞབས་ཞིག་ཡིན་པའི་ཆ་ནས་ནང་སྲིད་ས་གནས་འགོ་འཛིན་གྱི་ཚོགས་འདུ་དེའི་སྔོན་དུའང་འཚོགས་པ་གོ་མྱོང་ལ་ཚོགས་མི་ངོ་ཤེས་པའང་ཡོད་པའི་མཇལ་དུས་བྱུང་།
སེམས་བདེ་མིན་གྱི་གནས་དེ་ཚོགས་ཐེངས་དང་པོ་དེ་ལས་བྱུང་། འཚོག་ལམ་འདྲ་མིན་ཞིག་བྱུང་ཡོད་གཤས་ལས་ཕྱི་ལོ་ ༦༠ ནང་མུ་འཐུད་ཀྱི་ས་གནས་འགོ་འཛིན་གམ་གཞི་འགོ སྐབས་རེ་གཞིས་སྒར་འཐུས་མི་དང་གཞི་འགོ་སོགས་མཉམ་དུའང་བྱུང་ཡང་ཡོད་ཉེ། གང་ལྟར་ཚོགས་ཐེངས་དང་པ་མིན། བཀའ་ཤག་སྐབས་ ༡༢ པའི་ས་འགོའི་ཚོགས་ཆེན་དང་པོ་ཞུས་ན་རྩོད་པ་ཆུང་། ངའི་རྒྱུ་རྐྱེན་གཙོ་བོ་ནི་གང་ཟག་ལས་ཆོས་དེ་དངོས་དོན་དུ་མུ་འཐུད་བྱུང་ན་ཕན་རན་ཆེ་པའི་ཆེད་ཡིན། དཔེ་ན་གཞིས་ཆགས་ཁག་ཐབས་སྐྱོའི་ངང་གནས་པའི་དབང་དུ་བྱས། ཕྱི་བྱུང་བོད་མི་རབས་དང་དེ་མིན་བོད་གནས་ལ་དོ་དབྱིངས་པ་ཚོས་ཞིབ་དུས་ ༢༠༠༢ ལ་གནས་འགོའི་ཚོགས་འདུ་དང་པོ་འཚོགས་འདུག དེ་བར་མི་ལོ་ ༤༠ རིང་གཞིས་ཆགས་ཁག་ཐབས་སྐྱོའི་གནས་ནས་གྲོལ་ཐབས་ཀྱི་བསམ་ཞིབ་ཆེད་དམའ་མཐར་ཚོགས་འདུ་ཞིག་ཀྱང་བྱས་མིན་འདུག་བསམ་སྲིད། དོན་དུ་དངོས་གནས་མ་རེད་པ། དེ་མིན་ཚོགས་ཐེངས་ ༡༥ སོགས་ཐད་བསམ་བསྡུར་ཞུ་རྒྱུ་འདུག་ཀྱང་འདིར་ཞུ་ཡི་མིན།
གཙོ་དོན་དེ་ཕྱི་བྱུང་གང་གབ་ཏུ་གཅིག་མཇུག་གཉིས་མཐུད་བྱུང་ན་མི་རྒྱུ་གཉིས་ཐད་ནས་མཐོན་འཕེལ་གྲོན་ཆུང་མེད་དམ་སྙམ་པའི་སྤྱི་དོན་དུ་གཉེར་ལགས།།