གཏན་འཇགས་ཐབས་བྱུས་འཆར་འགོད་ཚོགས་ཆུང་གི་ཚོགས་འདུ་ཐེངས་ལྔ་པ་དབུ་ཚུགས་སོང་།

བཀའ་ཤག་སྐབས་ ༡༦ པའི་གཏན་འཇགས་ཐབས་བྱུས་འཆར་འགོད་ཚོགས་ཆུང་གི་ཚོགས་འདུ་ཐེངས་ལྔ་བ་ཉིན་གྲངས་གསུམ་རིང་སཱ་ར་མཐོ་སློབ་ཏུ་འཚོག་བཞིན་འདུག

དེ་རིང་སྔ་དྲོ་ཆུ་ཚོད་ ༩ སྟེང་སྲིད་སྐྱོང་སྤེན་པ་ཚེ་རིང་མཆོག་གིས་སྣེ་འཁྲིད་པའི་བོད་མིའི་སྒྲིག་འཛུགས་ཀྱི་གཏན་འཇགས་ཐབས་བྱུས་ཚོགས་ཆུང་གི་ཚོགས་འདུ་ཐེངས་ལྔ་པ་དེ་སཱ་ར་བོད་ཀྱི་མཐོ་རིམ་སློབ་གཉེར་ཁང་དུ་དབུ་འཛུགས་གནང་སོང་བ་དང་། ཚོགས་འདུའི་ཐོག་གཏན་འཇགས་ཐབས་བྱུས་འཆར་འགོད་ཚོགས་ཆུང་གི་སློབ་སྟོན་པ་རྣམ་པ་དང་ཚོགས་མི་རྣམ་པ་བཅས་འཛོམས་འདུག་ལ། དེ་རིང་ཕྱི་ཚེས་ ༨ ནས་ ༡༠ བར་ཉིན་གྲངས་གསུམ་རིང་འཚོག་གི་ཡོད་ཅིང་། བོད་དོན་དང་འབྲེལ་ནས་རྒྱ་ནག་དང་རྒྱལ་སྤྱིའི་གནས་ཚུལ་སོགས་ཀྱི་སྐོར་ནས་གླེང་སློང་གནང་འཆར་འདུག

ཚོགས་ཆུང་གི་སློབ་སྟོན་པའི་ཁོངས་སུ་བཀའ་ཟུར་བསྟན་པ་ཚེ་རིང་མཆོག་དང་བཀའ་ཟུར་འབྲོང་ཆུང་དངོས་གྲུབ་མཆོག  དགའ་ལྡན་ཕོ་བྲང་གི་དྲུང་ཆེ་རྔ་བ་ཚེ་རྒྱམ་མཆོག ༧གོང་ས་མཆོག་གི་དམིགས་བསལ་སྐུ་ཚབ་ཟུར་པ་སྐལ་བཟང་རྒྱལ་མཚན་མཆོག་བཅས་དང་། ཚོགས་མིའི་ཁོངས་སུ་སྲིད་སྐྱོང་སྤེན་པ་ཚེ་རིང་མཆོག་དང་བདེ་སྲུང་དྲུང་ཆེ་ཀརྨ་རིན་ཆེན་མཆོག ཆབ་སྲིད་དྲུང་ཆེ་བཀྲ་ཤིས་རྒྱ་མཚོ་མཆོག ཕྱི་དྲིལ་དྲུང་ཆེ་ཀརྨ་ཆོས་དབྱིངས་མཆོག  བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་མཆོག་བཅས་ཀྱིས་ཚོགས་འདུར་མཉམ་ཞུགས་གནང་འདུག་པ་མ་ཟད། ད་རེས་ཀྱི་ཚོགས་འདུ་ཐེངས་ལྔ་བའི་སྟེང་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་དང་ཕྱི་དྲིལ་བཀའ་བློན་ནོར་སྒྲོལ་མ་མཆོག་རྣམ་གཉིས་ཀྱང་མཉམ་ཞུགས་གནང་འདུག

ཕྱི་ལོ་ ༢༠༢༡ ཟླ་ ༨ ཚེས་ ༡༣ ཉིན་བཀའ་ཤག་སྐབས་ ༡༦ པས་དེ་སྔ་ནས་ཡོད་པའི་བོད་རྒྱ་འབྲེལ་མོལ་ལས་དོན་ཚོགས་ཆུང་ཕྱིར་བསྡུ་དང་སྦྲགས་གཏན་འཇགས་ཐབས་བྱུས་འཆར་འགོད་ཚོགས་ཆུང་ཞིག་ཆེད་འཛུགས་གནང་སྟེ། བཀའ་ཤག་སྐབས་བཅུ་དྲུག་པའི་གཏན་འཇགས་ཐབས་བྱུས་འཆར་འགོད་ཚོགས་ཆུང་གི་ཚོགས་འདུ་ཐེངས་དང་པོ་དེ་ཕྱི་ལོ་ ༢༠༢༡ ཟླ་ ༡༡ ཚེས་ ༡༦ ནས་ ༡༨ བར་ཉིན་གྲངས་གསུམ་རིང་ ནོར་གླིང་ཉེ་འཁྲིས་རྒྱ་གར་གྱི་ (Imperial Heights) གསོལ་མགྲོན་ཁང་དུ་འཚོགས། ཐེངས་གཉིས་པ་དེ་ཕྱི་ལོ་ ༢༠༢༢ ཟླ་ ༧  ཚེས་ ༢༧ ནས་ ༢༩ བར་ཉིན་གསུམ་རིང་བཞུགས་སྒར་དྷ་སར་ཡོད་པའི་ཨེ་ཤ་ཡའི་གསོལ་མགྲོན་ཁང་ (Asia Health Resort)དུ་འཚོགས། ཚོགས་ཐེངས་གསུམ་པ་དེ་ ཕྱི་ལོ་ ༢༠༢༢ ཟླ་ ༡༡ ཚེས་ ༢༥ ནས་ ༢༧ བར་ཉིན་གྲངས་གསུམ་རིང་དང་ཚོགས་ཐེངས་བཞི་པ་ཕྱི་ལོ་ ༢༠༢༣ ཟླ་ ༤ ཚེས་ ༦ ནས་ ༨ བར་ཉིན་གསུམ་རིང་བཅས་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་ཚོགས་ཁང་དུ་འཚོགས་ཡོད་པ་རེད།

གསར་འགོད་པ། སྐལ་བཟང་སྦྱིན་པ།