རྒྱ་ནག་གཞུང་གིས་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་བདུན་པ་ཟེར་བའི་ཐག་གཅོད་ལྟར་བོད་ལ་ངེས་པར་དུ་དགོས་པ་བཅུ་ཟེར་བ་གཞི་རྩར་བཟུང་ནས་དུས་རབས་གསར་པའི་ཏང་གི་བོད་སྐྱོང་སྲིད་ཇུས་ལག་བསྟར་དང་ལོ་རྒྱུས་རང་བཞིན་གྱི་གྲུབ་འབྲས་ཟེར་བའི་རྒྱབ་ཤ་དཀར་པོའི་དེབ་ཅིག་ཡོངས་བསྒྲགས་བྱས་འདུག
དེ་རིང་ཕྱི་ཚེས་ ༡༠ ཉིན་གྱི་ཞོགས་པར་རྒྱ་ནག་རྒྱལ་སྲིད་སྤྱི་ཁྱབ་ཁང་གསར་འགྱུར་ལས་སྒྲུབ་ཁང་ཟེར་བ་དེས། དུས་རབས་གསར་པའི་ཏང་གི་བོད་སྐྱོང་སྲིད་ཇུས་ལག་བསྟར་དང་ལོ་རྒྱུས་རང་བཞིན་གྱི་གྲུབ་འབྲས་ཞེས་པའི་དོན་ཚན་ཆེན་པོ་དྲུག་ཡོད་པའི་རྒྱབ་ཤ་དཀར་པོའི་དེབ་ཅིག་བཏོན་ཏེ། རྒྱལ་སྤྱིའི་ཐོག་ནས་རྒྱ་ནག་གཞུང་གིས་བོད་སྐད་ཡིག་བཀོལ་སྤྱོད་བཀག་སྡོམ་དང་། དགོན་པ་སོགས་ཆོས་ལུགས་ཀྱི་བྱེད་སྒོ་སྤེལ་ཡུལ་དུ་དམ་དྲག་ཆེན་པོ་བྱེད་བཞིན་པ། བོད་ཀྱི་ཁོར་ཡུག་ལ་འབག་བཙོག་དང་གནོད་སྐྱོན་ཚབས་ཆེན་ཐེབས་བཞིན་པའི་གནད་དོན་བཅས་ཐེར་འདོན་བྱེད་བཞིན་པ་རྣམས་ལ་ཁ་གཏད་གཅོག་ཐབས་དང་མངོན་ཆུང་དུ་བཟོ་ཐབས་བྱས་འདུག
རྒྱབ་ཤ་དཀར་པོའི་དེབ་དེའི་སྔོན་གླེང་ནང་དུ། དམར་ཤོག་ཚོགས་ཆེན་ཐེངས་ ༡༨ པ་འཚོགས་པ་ནས་བཟུང་བོད་དུའང་རྒྱལ་ཡོངས་ལམ་བུ་གཅིག་གི་སྲིད་ཇུས་ལག་བསྟར་བྱས་ཏེ་ཁྱོན་ཡོངས་ནས་འཕེལ་རྒྱས་སུ་འགྲོ་བར་དོ་ནན་བྱས་ཡོད་སྐོར་དང་། བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་དྲུག་པ་དང་བདུན་པའི་ཐོག བོད་ཀྱི་ལས་དོན་ལ་སྣེ་འཁྲིད་ཀྱི་བསམ་བློ་ལེགས་པོར་བསྒྲུབ་དགོས་པ་དང་། རེ་འདོད་དང་ལས་འགན་ཕྱོགས་གཅིག་ཏུ་བསྡུས་ཏེ། བོད་ལྗོངས་ཀྱི་མི་རིགས་ཚོས་མཛེས་སྡུག་ལྡན་པའི་འཚོ་བར་བཅངས་བའི་རེ་འདོད་མངོན་འགྱུར་ཡོང་ཐབས་དང་། སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པར་ཁ་ཕྱོགས་གསལ་སྟོན་སོགས་བྱེད་དགོས་པའི་བསམ་ཚུལ་བཏོན་སྐོར་བཀོད་འདུག
ལྷག་པར་དུ་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་བདུན་པའི་ཐོག་དུས་རབས་གསར་པའི་ཏང་གི་བོད་སྐྱོང་སྲིད་ཇུས་ཟེར་བ་གཏན་འབེབ་བྱས་ཡོད་པ་མ་ཟད། ངེས་པར་དུ་དགོས་པ་བཅུ་ཞེས་པ་ཞིག་གཏན་འབེབ་བྱས་པའི་ནང་། ངེས་པར་དུ་བོད་ཀྱི་ལས་དོན་ཐོག་རྒྱ་ནག་དམག་ཤོག་ཚོགས་པས་མགོ་འཁྲིད་རྒྱུན་འཁྱོངས་དགོས་པ་དང་། རྒྱ་ནག་གི་ཐུན་མོང་མ་ཡིན་པའི་སྤྱི་ཚོགས་རིང་ལུགས་ཀྱི་ལམ་ལུགས་རྒྱུན་འཁྱོངས། མི་རིགས་རང་སྐྱོང་ས་ཁུལ་གྱི་ལམ་ལུགས་རྒྱུན་འཁྱོངས། ངེས་པར་དུ་རྒྱལ་ཁབ་སྐྱོང་བར་ཐོག་མར་མཐའ་མཚམས་སྐྱོང་བ་དང་། མཐའ་མཚམས་སྐྱོང་བར་ཐོག་མར་བོད་བརྟན་བརླིང་གི་འཐབ་ཇུས་ཀྱི་བསམ་བློ་རྒྱུན་འཁྱོངས་དགོས་པ། དེ་བཞིན་མེས་རྒྱལ་གཅིག་གྱུར་ལ་སྲུང་སྐྱོབ་རྒྱུན་འཁྱོངས། མི་རིགས་མཐུན་སྒྲིལ་ཡར་སྐུལ་ནི་བོད་ཀྱི་ལས་དོན་གྱི་ཤུགས་གནོན་རྒྱག་ས་ལྟེ་བ་དང་། ངེས་པར་དུ་ཁྲིམས་ལྟར་བོད་སྐྱོང་བྱ་བ་གཉེར་ཏེ་དམངས་སེམས་འགུག་པ་དང་ཕྱུག་འགྱུར་གྱི་ལམ་དུ་སྐྱོད་ཐབས་རྒྱུན་འཁྱོངས། བོད་བརྒྱུད་ནང་བསྟན་རྒྱ་ནག་ཅན་དུ་ཁ་ཕྱོགས་པ་རྒྱུན་འཁྱོངས་དང་། ཁྲིམས་ལྟར་ཆོས་ལུགས་བྱ་བར་དོ་དམ་ནན་པོ་བྱེད་དགོས་པ་སོགས་བཀོད་ཡོད་པ་རེད།
རྒྱབ་ཤ་དཀར་པོའི་དེབ་ཀྱི་དོན་ཚན་གཉིས་པ་བསམ་བློའི་དཔལ་འབྱོར་འཛུགས་སྐྲུན་གྱི་གྲུབ་འབྲས་མངོན་གསལ་ཟེར་བའི་ནང་དུ། བོད་སྐད་ཡིག་སློབ་སྦྱོང་དང་བཀོལ་སྤྱོད་བྱེད་པར་ཁྲིམས་ལྟར་སྲུང་སྐྱོབ་བྱེད་ཀྱི་ཡོད་སྐོར་བཀོད་དེ། སྦྲག་སྲིད་དང་ཆ་འཕྲིན། འགྲིམ་འགྲུལ། མ་རྐང་། ཚན་རྩལ་སོགས་སུ་རྒྱ་ཡིག་དང་ལྷན་དུ་བོད་ཡིག་སྤྱོད་ཀྱི་ཡོད་ལུགས་དང་། སློབ་གྲྭ་ཆུང་འབྲིང་དུ་རྒྱལ་ཁབ་ཀྱི་སྤྱི་སྤྱོད་སྐད་དང་བོད་སྐད་ཡིག་བེད་སྤྱོད་གཏོང་གི་ཡོད་ཚུལ་བཀོད་དེ། བོད་ནང་དུ་ལག་བསྟར་བྱེད་བཞིན་པའི་རྒྱ་བསྒྱུར་སྲིད་ཇུས་མངོན་ཆུང་དུ་བཟོ་ཐབས་བྱས་འདུག་པ་མ་ཟད། ཕྱི་ལོ་ ༢༠༢༢ ལོ་མཇུག་བར་དུ་བོད་ལྗོངས་སུ་ཡོངས་གྲགས་ཐོག་བོད་ཡིག་དུས་དེབ་མི་འདྲ་བ་ ༡༧ དང་། བོད་ཡིག་ཚགས་པར་ ༡༡། བོད་ཡིག་དེབ་གྲངས་ཁྲི་ ༤༥༠༡ ལྷག་བཏོན་ཡོད་ཚུལ་སོགས་ཀྱང་བཀོད་འདུག
ཡང་དོན་ཚན་གསུམ་པ་མི་རིགས་ཆོས་ལུགས་ཀྱི་ལས་དོན་བརྟན་གནས་ཡར་སྐུལ་ཟེར་བའི་ནང་དུ། ཆོས་ལུགས་བྱེད་སྒོ་གོ་རིམ་ལྡན་པའི་ཐོག་ནས་འཕེལ་རྒྱས་སུ་འགྲོ་བཞིན་ཡོད་ལ། ད་ལྟ་བོད་ལྗོངས་སུ་བོད་བརྒྱུད་ནང་བསྟན་གྱི་བྱེད་སྒོ་སྤེལ་ཡུལ་ཟེར་བ་ ༡༧༠༠ ལྷག་ཡོད་པ་དང་། གྲྭ་བཙུན་ཁྲི་ ༤.༦ ཙམ་དང་། ཁ་ཆེའི་ལྷ་ཁང་ ༤། ཡེ་ཤུ་ཆོས་ལུགས་པ་ཁྲི་༡.༢ ལྷག་དང་། གནམ་བདག་ཆོས་ལུགས་ཀྱི་ལྷ་ཁང་ ༡ དང་། རྗེས་འཇུག་པ་ ༧༠༠ ལྷག་ཡོད་སྐོར་སོགས་བཀོད་འདུག་ལ། ཕྱི་ལོ་ ༢༠༡༦ ལོར་བོད་བརྒྱུད་ནང་བསྟན་གྱི་སྤྲུལ་སྐུ་འཚོལ་བཤེར་མ་ལག་བཏང་ཏེ་ཕྱི་ལོ་ ༢༠༢༢ ལོ་མཇུག་བར་དུ། བོད་བརྒྱུད་ནང་བསྟན་གྱི་སྤྲུལ་སྐུ་ ༩༣ ལ་ངོས་འཛིན་དཔང་ཡིག་ཐོབ་ཡོད་སྐོར་དང་། ཕྱི་ལོ་ ༢༠༢༢ ལོ་མཇུག་བར་དུ། དགེ་འདུན་པ་གྲངས་ ༡༦༤ དགེ་བཤེས་ལྷ་རམས་པ་ཐོན་པ་དང་། དགེ་འདུན་པ་གྲངས་ ༢༧༣ ལ་བོད་བརྒྱུད་ནང་བསྟན་གྱི་ཆེས་མཐོའི་བསླབ་གནས་མཐོ་རིམ་རབ་འབྱམས་པ་ཟེར་བ་ཐོན་ཡོད་སྐོར་སོགས་བཀོད་འདུག
དེ་བཞིན་དེབ་དེའི་ནང་ཕྱི་ལོ་ ༡༩༩༤ ནས་ ༢༠༢༢ བར་དུ། སྔ་གཞུག་ཏུ་བོད་སྐྱོར་ལས་བྱེད་པ་ཟེར་བའི་མིང་ཐོག་ནས་མི་གྲངས་ ༡༡༩༠༠ བོད་ཁུལ་དུ་ཡོང་ནས་ལས་ཀ་བྱེད་པར་ཆོག་མཆན་སྤྲད་ཡོད་པ་དང་། ལོ་ལྔ་ཚན་བཅུ་གསུམ་པའི་ནང་རྒྱ་ནག་གི་ཞིང་ཆེན་གྲོང་ཁྱེར་ཁག་ ༡༧ ནས་ལས་གཞི་ཁག་ ༡༢༦༠ ལྷག་བོད་ཁུལ་དུ་ལག་བསྟར་བྱས་ཡོད་ལུགས་དང་། རྒྱལ་སྤྱི་རྒྱལ་ནང་གི་གྲོང་ཁྱེར་ ༧༠ ལྷག་ལ་བོད་ལྗོངས་ཀྱི་མཁའ་ལམ་མཐུད་དེ་ཕྱི་ལོ་ ༢༠༢༢ ལོར་བོད་ཁུལ་དུ་ཡུལ་སྐོར་བ་དང་འགྲུལ་བ་ཁྲི་ ༣༣༤ ལྷག་སྐྱེལ་འདྲེན་བྱས་ཡོད་ཚུལ་བཀོད་འདུག
