བོད་མི་མང་སྤྱི་འཐུས་ཚོགས་གཙོ་སྦྲེལ་པོས་ཉི་ཧོང་ཛིན་ནང་བསྟན་གྱི་སྐུ་ཚབ་ཚོགས་ཆུང་ཞིག་དང་ཐའེ་ཝན་གྱི་སྐུ་ཚབ་ཚོགས་ཆུང་ཞིག་ལ་མཇལ་འཕྲད་གནང་འདུག
ཁ་སང་ཕྱི་ཚེས་ ༡༤ ཉིན་བོད་མི་མང་སྤྱི་འཐུས་ལྷན་ཁང་དུ། བོད་མི་མང་སྤྱི་འཐུས་ཚོགས་གཙོ་སྦྲེལ་པོས་ཉི་ཧོང་གི་དགེ་འདུན་པ་ཧཱ་ཡཱ་་ཤི་སིན་སི་ (Hayashi Shuei) ལགས་ཀྱིས་སྣེ་ཁྲིད་པའི་ཉི་ཧོང་སོ་ཏོ་ཤུ་ཛེན་ནང་པའི་ཆོས་ཚོགས་ཀྱི་ཚོགས་མི་ཁག་ཅིག་དང་མཇལ་འཕྲད་གནང་སྟེ། འདི་ལོའི་ཕྱི་ཟླ་ ༩ ཚེས་ ༡༢ ཉིན་ཉི་ཧོང་གི་དགོན་པ་དགུའི་སྐུ་ཚབ་རྣམས་ཉི་ཧོང་བོད་ཀྱི་སྐུ་ཚབ་དོན་གཅོད་ཁང་དུ་ཆེད་བཅར་གྱིས། དོན་གཅོད་ཨརྱ་ཚེ་དབང་རྒྱལ་པོ་ལགས་ཀྱི་དབུས་ཚང་མ་ལྷན་འཛོམས་ཐོག རྒྱ་ནག་གཞུང་གིས་བོད་ནང་གི་འགྲོ་བ་མིའི་ཐོབ་ཐང་དང་ཆོས་དད་རང་མོས་ལ་རྩིས་མེད་རྡོག་རོལ་གཏོང་བཞིན་ཡོད་པ་འཕྲལ་དུ་མཚམས་འཇོག་དགོས་པ་དང་། རྒྱ་གཞུང་གིས་༧གོང་ས་རྒྱལ་བ་རིན་པོ་ཆེ་མཆོག་གི་དབུས་བོད་ཀྱི་བླ་སྤྲུལ་རྣམས་ཀྱི་ཡང་སྲིད་ངོས་འཛིན་བྱེད་ཕྱོགས་ལ་མཐའ་གཅིག་ཏུ་ངོ་རྒོལ་ཡོད་པ་སོགས་ཀྱི་དོན་ཚན་བདུན་ཅན་གྱི་བསྒྲགས་གཏམ་ཞིག་སྤེལ་ཡོད་པ་དེའི་ངོ་བཤུས་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་ལ་ཕུལ་ཡོད་འདུག
སྤྱི་འཐུས་ཚོགས་གཙོ་མཆོག་ནས་བོད་མི་མང་སྤྱི་འཐུས་ལྷན་ཚོགས་ཀྱི་ལས་དོན་སྐོར་ངོ་སྤྲོད་དང་། ཉི་ཧོང་དང་བོད་ཀྱི་ཆོས་ཕྱོགས་ཀྱི་འབྲེལ་བའི་སྐོར། བོད་ནང་གི་ཛ་དྲག་གི་གནས་སྟངས་སོགས་ཀྱི་ཐོག་མཇལ་མོལ་གནང་འདུག ཚོགས་གཞོན་མཆོག་གིས་ཉི་ཧོང་གི་ཛིན་ནང་པའི་ཆོས་བརྒྱུད་འཛིན་པའི་དགོན་སྡེ་ཁག་དགུའི་འཐུས་མི་རྣམ་པས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་འབྲེལ་བའི་དོན་ཚན་བདུན་འཁོད་པའི་བོད་དོན་རྒྱབ་སྐྱོར་གྱི་བསྒྲགས་གཏམ་ཞིག་སྤེལ་བར་ཐུགས་རྗེ་ཆེ་ཞུས་པ་དང་། དེ་བཞིན་ཁོང་རྣམ་པས་བོད་མིའི་འཚེ་མེད་ཞི་བའི་འཐབ་རྩོད་ལ་ཡིད་ཆེས་གནང་བར་བསྔགས་བརྗོད་ཞུས་ཡོད་འདུག
ཡང་ཕྱི་ཚེས་ ༡༤ ཉིན་གྱི་སྔ་དྲོར་གངས་ཅན་སྐྱིད་གཤོངས་ཀྱི་བོད་མི་མང་སྤྱི་འཐུས་ལྷན་ཁང་དུ། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། ཚོགས་གཞོན་སྒྲོལ་མ་ཚེ་རིང་མཆོག་རྣམ་གཉིས་ཀྱིས་ཐའེ་ཝན་གྱི་སྐུ་ཚབ་ཚོགས་ཆུང་ཞིག་དང་མཇལ་འཕྲད་གནང་ཡོད་ཅིང་། ཚོགས་ཆུང་དེའི་ནང་དུ་བོད་དང་ཐའེ་ཝན་གྱི་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་ཚོགས་གཙོ་ཝུའུ་ཧའོ་ཅི་(WU Hao Jee) ལགས་དང་། སྤྱི་ཁྱབ་དྲུང་ཆེ་བཀྲ་ཤིས་ཚེ་རིང་ལགས། ལས་བྱེད་ལིན་ཞིན་ཡིས་ (Lin Hsin-yi) ལགས། ཐའེ་ཝན་ནང་ཡོད་པའི་ཧོང་ཀོང་གཞོན་སྐྱེས་ཚོགས་པ་ (Hongkong outlanders) གསར་འཛུགས་གནང་མཁན་ཧྥིན་ཐིན་ཡུས་(Sky FUNG) ལགས། ཐའེ་ཝན་ནང་གི་ཁྲིམས་དོན་དང་འབྲེལ་བའི་གཞུང་འབྲེལ་མིན་པའི་ཚོགས་པའི་རྒྱུན་ལས་ཚའེ་མིན་ཙི་ (TSAI Meng-z) ལགས་ལ་མཇལ་འཕྲད་གནང་ཡོད་འདུག
བོད་མི་མང་སྤྱི་འཐུས་ཚོགས་གཙོ་མཆོག་ནས། བོད་མི་རྣམས་རྒྱ་གར་ནང་སྐྱབས་བཅོལ་འབྱོར་ནས་མི་ལོ་ ༦༤ ལྷག་འགྲོ་བཞིན་ཡོད་ཀྱང་། ༧གོང་ས་རྒྱལ་བ་རིན་པོ་ཆེ་མཆོག་དང་། རྒྱ་གར་གཞུང་མང་གཉིས་ཀྱིས་བཀའ་དྲིན་ལ་བརྟེན་ཏེ། བོད་དོན་འཐབ་རྩོད་རྒྱུན་གནས་ཐུབ་ཡོད་པ་མ་ཟད། བོད་ཀྱི་སྐད་ཡིག་རིག་གཞུང་བཅས་པ་མི་ཉམས་རྒྱུན་འཛིན་བྱེད་བཞིན་ཡོད་ཅིང་། ཐའེ་ཝན་གཞུང་མང་གཉིས་ནས་ཀྱང་བོད་ཀྱི་ཆོས་དང་རིག་གཞུང་ཐོག་མཐུན་འགྱུར་རྒྱབ་སྐྱོར་ཤུགས་ཆེན་གནང་ཡོད་པར་དགེ་ཕན་ཆེན་པོ་བྱུང་ཡོད་པ་དང་། ཆབ་སྲིད་ཀྱི་ཐོག་ནས་རྒྱ་ནག་གཞུང་གིས་བོད་དང་ཐའེ་ཝན་གཉིས་ལ་ཤུགས་རྐྱེན་སྤྲོད་བཞིན་ཡོད་པས། རྒྱ་གཞུང་གིས་བོད་ནང་གི་ཆོས་དད་རང་དབང་དང་འགྲོ་བ་མིའི་ཐོབ་ཐང་སོགས་ཀྱི་ཐད་འཁྱོག་བརྗོད་ཀྱི་དྲིལ་བསྒྲགས་ཤུགས་ཆེན་བྱེད་མུས་ཡིན་པ་དེར། ཐའེ་ཝན་གྱིས་རྒྱ་ནག་མི་མང་ནང་དུ་དངོས་ཡོད་གནས་ཚུལ་གོ་རྟོགས་སྤེལ་རྒྱུ་གལ་ཆེན་ཡིན་སྐོར་སོགས་གསུངས་འདུག
ཚོགས་གཞོན་སྒྲོལ་མ་ཚེ་རིང་མཆོག་ནས་བོད་ཀྱི་རང་བྱུང་ཁོར་ཡུག་གི་གལ་གནད་སྐོར་དང་། རྒྱ་གཞུང་གིས་བོད་ནས་འབབ་བཞིན་པའི་རྒྱུག་ཆུ་ཁག་ལ་ཆུ་མཛོད་བརྒྱབ་སྟེ། ཁྱིམ་མཚེས་རྒྱལ་ཁབ་ཁག་ལ་ཉེན་ཁ་བཟོ་བཞིན་ཡོད་པ་དང་། འཛམ་གླིང་ནང་དུ་ཞི་བདེ་ངང་གནས་ཐབས་སུ་གཙོ་བོ་རྒྱ་གཞུང་གི་བྱ་སྤྱོད་རྣམས་འགན་ཁུར་ལྡན་པ་བཟོ་དགོས་སྐོར་དང་། རྒྱལ་ཚོགས་ཀྱིས་ཚན་རིག་དང་མཐུན་པའི་ཐོག་ནས་བོད་ཀྱི་རང་བྱུང་ཁོར་ཡུག་གི་གལ་གནད་ཐོག་ཞིབ་འཇུག་ཚད་ལྡན་གནང་དགོས་སྐོར། བོད་པ་དང་། ཐའེ་ཝན། ཧོང་ཀོང་། ཡུ་གུར། ནང་སོག་བཅས་ཀྱི་མཛའ་འབྲེལ་གོང་མཐོར་བཏང་སྟེ། མཉམ་རུབ་ཐོག་རྒྱ་གཞུང་ལ་གདོང་ལེན་བྱེད་དགོས་སྐོར་སོགས་གསུངས་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
