བོད་ནང་གི་རྩོམ་པ་པོ་སྒོ་ཤེས་རབ་རྒྱ་མཚོ་ལགས་འདི་ལོའི་རྒྱལ་སྤྱིའི་པེན་གྱི་ཚབ་མཚོན་རང་བཞིན་གྱི་བཙོན་འོག་རྩོམ་པ་པོ་བཞིའི་ནང་དུ་བདམས་འདུག
དེ་རིང་ཉིན་རྒྱབ་ཆུ་ཚོད་ ༢ །༠༠ ཐོག་ས་རཱ་མཐོ་སློབ་ཀྱི་ཚོགས་ཁང་དུ། པེན་བོད་ཀྱི་རྩོམ་པ་པོའི་མཐུན་ཚོགས་ཀྱི་གོ་སྒྲིག་འོག ཕྱི་ལོ་ ༢༠༢༣ ལོའི་རྒྱལ་སྤྱིའི་བཙོན་འོག་གི་རྩོམ་པ་པོའི་ཉིན་མོ་སྲུང་གཙི་གནང་སོང་བ་དང་། འདི་ལོའི་རྒྱལ་སྤྱིའི་པེན་རྩོམ་པ་པོའི་མཐུན་ཚོགས་ཀྱིས་ཡུ་ཁུ་རིན་གྱི་འཐབ་རྩོད་པ་ཨི་རེ་ནཱ་(Iryna Danylovych) ལགས་དང་། བོད་ནང་གི་རྩོམ་པ་པོ་སྒོ་ཤེས་རབ་རྒྱ་མཚོ་ལགས། མོ་རོ་ཁོའི་གསར་འགོད་པ་སུའུ་ལའེ་མན་ (Soulaiman Raissouni)ལགས། ཁུ་བྷའི་རང་དབང་འཐབ་རྩོད་པ་མཱ་རེ་ཡ་(Maria Cristina Garrido Rodriguez) བཅས་འདི་ལོའི་རྒྱལ་སྤྱིའི་བཙོན་འོག་གི་རྩོམ་པ་པོའི་ཚབ་མཚོན་དུ་མིང་འདོན་གནང་འདུག
རྒྱལ་སྤྱིའི་བཙོན་འོག་གི་རྩོམ་པ་པོའི་ཉིན་མོའི་གལ་གནད་སྐོར་ལ་པེན་བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་མི་སྨིན་སྣང་མཛེས་ལགས་ཀྱིས། པེན་བོད་ཀྱི་རྩོམ་པ་པོའི་མཐུན་ཚོགས་ཀྱིས་ལོ་རྟག་པར་རྒྱལ་སྤྱིའི་བཙོན་འོག་གི་ཉིན་མོ་སྲུང་གཙི་བྱེད་བཞིན་ཡོད་ཅིང་། བོད་ནང་དུ་རྩོམ་པ་པོ་མང་པོས་གདུག་རྩུབ་མནར་གཅོད་འོག་ཏུ་དཀའ་ངལ་མྱོང་བཞིན་ཡོད་པས། རྒྱལ་སྤྱིའི་སྟེང་དུ་བོད་ནང་གི་རྩོམ་པ་པོའི་གནས་སྟངས་སྐོར་ལ་གོ་རྟོགས་སྤེལ་དགོས་པ་མ་ཟད། བོད་མི་རྣམས་ཀྱིས་ཉིན་མོ་འདི་གཙི་སྲུང་བྱ་རྒྱུ་གལ་ཆེན་པོ་རེད། ཅེས་བརྗོད་སོང་།
ཡང་ཁོང་མོས། པེན་བོད་ཀྱི་རྩོམ་པ་པོ་མཐུན་ཚོགས་ཀྱིས་རྒྱལ་སྤྱིའི་པེན་རྩོམ་པ་པོའི་མཐུན་ཚོགས་དང་འབྲེལ་ལམ་ཡག་པོ་བྱུང་སྟེ། བོད་ནང་གི་རྩོམ་པ་པོའི་གནས་སྟངས་སྐོར་ལ་གོ་རྟོགས་སྤེལ་བཞིན་ཡོད་པ་མུ་མཐུད་དུ་ཡར་རྒྱས་གཏོང་དགོས་པ་མ་ཟད། བཙན་བྱོལ་ནང་དུ་འཚར་ལོངས་བྱུང་བཞིན་པའི་རྩོམ་པ་པོ་རྣམས་ཀྱིས་ཀྱང་མི་རབས་རྒན་པར་མིག་དཔེ་བལྟས་ཏེ། མི་རབས་ནས་མི་རབས་བར་དུ་གནས་ཐུབ་པའི་སྨྱུ་གུའི་རྩལ་ལ་བརྟེན་ནས་བོད་དོན་འཐབ་རྩོད་བྱ་རྒྱུ་གལ་ཆེན་པོ་རེད། ཅེས་བརྗོད་སོང་།
ས་རཱ་མཐོ་སློབ་ལོ་རྒྱུས་སློབ་དཔོན་ཡེ་ཤེས་བསམ་འགྲུབ་ལགས་ཀྱིས། རྒྱལ་སྤྱིའི་རྩོམ་པོ་པོའི་མཐུན་ཚོགས་ཀྱིས་བཙོན་ཁང་དུ་ཡོད་པའི་རྩོམ་པ་པོ་རྣམས་ཀློད་གྲོལ་ཐོབ་པ་དང་རང་དབང་དགོས་པའི་དམིགས་ཡུལ་ཐོག་ལས་འགུལ་སྤེལ་གྱི་ཡོད་པ་ལྟར། པེན་བོད་ཀྱི་རྩོམ་པ་པོའི་མཐུན་ཚོགས་ཀྱིས་རྒྱ་གཞུང་གི་མནར་གཅོད་འོག་ཏུ་ཡོད་པའི་བོད་ཀྱི་རྩོམ་པ་པོ་རྣམས་ལ་ཞིབ་འཇུག་བྱས་ཏེ། རྒྱལ་སྤྱིའི་པེན་རྩོམ་པ་པོའི་མཐུན་ཚོགས་སུ་སྙན་ཐོ་འབུལ་བཞིན་ཡོད་ཅིང་། ད་ལོ་རྒྱལ་སྤྱིའི་རྩོམ་པ་པོའི་ཚབ་མཚོན་དུ་བོད་ནང་གི་རྩོམ་པ་པོ་སྒོ་ཤེས་རབ་རྒྱ་མཚོ་ཚུད་ཡོད་སྐོར་བརྗོད་སོང་ལ། དུས་བབ་ཀྱི་སྤྱི་ཁྱབ་རྩོམ་སྒྲིག་པ་པདྨ་མཚོས་བཙོན་འོག་ཏུ་ཡོད་པའི་བོད་ཀྱི་རྩོམ་པ་པོ་ཁག་ཅིག་གི་ལོ་རྒྱུས་མདོར་བསྡུས་ངོ་སྤྲོད་གནང་སོང་།
རྒྱལ་སྤྱིའི་བཙོན་འོག་གི་རྩོམ་པ་པོའི་ཉིན་མོ་སྲུང་གཙི་བྱེད་དགོས་པའི་གལ་གནད་སྐོར་ལ་ས་རཱ་མཐོ་སློབ་ཀྱི་ཞིབ་འཇུག་སློབ་དཔོན་རྡོ་རྗེ་ཚེ་རིང་ལགས་ཀྱིས། བཙོན་འོག་གི་རྩོམ་པ་པོའི་ཉིན་མོ་སྲུང་གཙི་བྱེད་དགོས་པ་དེ་གལ་ཆེན་པོ་རེད་བསམ་གྱི་འདུག རྒྱལ་སྤྱིའི་པེན་ཚོགས་པའི་ནང་འཛམ་གླིང་ནང་གི་རང་བཙན་ཡོད་པའི་རྒྱལ་ཁབ་ཁོ་ན་བཞུགས་ཀྱི་འདུག དེར་བརྟེན་པེན་བོད་ཀྱི་མཐུན་ཚོགས་ལ་ངོས་འཛིན་ཐོབ་ནས། གཙོ་བོ་བོད་ནང་གི་གནས་སྟངས་སྐོར་ལ་ཤུགས་རྒྱག་གི་ཡོད་པ་རེད། རྒྱུ་མཚན་ནི་རྩོམ་པ་པོའི་གནས་སྟངས་ལབ་དུས་ཕལ་ཆེར་བོད་མི་མང་སྤྱིའི་གནས་སྟངས་མཚོན་ཐུབ་པ་འདྲ་བོ་ཞིག་ཡོད་རེད། རྩོམ་པ་པོས་སོ་སོའི་ཁེ་ཕན་ཆེད་དུ་མིན་པར་མི་མང་གི་གནས་སྟངས་སྐོར་ལ་འབྲི་ཡི་ཡོད་པ་རེད། སྤྱིར་རྩོམ་པ་པོ་ནི་སྤྱི་ཚོགས་དང་མི་མང་གི་ཆེད་དུ་ལས་ཀ་བྱེད་མཁན་གྱི་ཤེས་ཡོན་པའི་སྡེ་ཞིག་རེད། ད་ལྟ་བོད་ནང་ལ་རྒྱ་ནག་གིས་བཙོན་ཁང་དུ་བཅུག་པའི་རྩོམ་པ་པོ་རྣམས་ཀྱིས་བོད་ནང་གི་གནས་སྟངས་སྐོར་དང་། བོད་ནང་དུ་རྒྱ་ནག་གི་སྲིད་ཇུས་ལག་བསྟར་བྱས་པ་དེ་དག་གིས་བོད་མི་རྣམས་ལ་དཀའ་ངལ་ག་རེ་འཕྲད་ཀྱི་ཡོད་པའི་སྐོར། དེ་བཞིན་བོད་མིའི་སེམས་ཀྱི་མངོན་འདོད་སོགས་ཀྱི་སྐོར་ལ་འབྲི་ཡི་ཡོད་པ་རེད། དེར་བརྟེན་འདིའི་བརྒྱུད་ནས་རྩོམ་པ་པོའི་གནས་སྟངས་ཙམ་མིན་པར་བོད་ནང་གི་དངོས་ཡོད་ཀྱི་གནས་སྟངས་གང་ཡིན་པ་རྣམས་རྒྱལ་སྤྱིའི་སྤྱི་ཚོགས་ལ་གོ་རྟོགས་སྤེལ་བ་དང་འགྲེམས་སྤེལ་བྱེད་ཀྱི་ཡོད་རེད། ད་དུང་རྒྱལ་སྤྱིའི་པེན་དེ་ནུས་པ་གང་ལ་གང་འཚམ་ཡོད་པའི་ཚོགས་པ་ཞིག་རེད་ལ། འཛམ་གླིང་སྤྱི་ལ་ཡོད་པའི་ཚོགས་པ་ཞིག་རེད། ད་ལོ་རྒྱལ་སྤྱིའི་པེན་ཚོགས་པས་སྒོ་ཤེས་རབ་རྒྱ་མཚོའི་སྐོར་ལ་མཉམ་འབྲེལ་རྒྱལ་ཚོགས་དང་རྒྱ་ནག་གཞུང་སོགས་ལ་ཞུ་གཏུག་བརྒྱག་གི་ཡོད་པ་རེད། དེར་བརྟེན། བོད་མི་རྣམས་ཀྱི་སྐད་ཙམ་མིན་པར་རྒྱལ་སྤྱིའི་རང་བཞིན་གྱི་ཐོག་ནས་རྒྱལ་སྤྱིའི་སྡིངས་ཆའི་སྟེང་བོད་ནང་གི་རྩོམ་པ་པོའི་གནས་སྟངས་དང་རྒྱ་ནག་གི་སྲིད་ཇུས་ལ་སོགས་པ་མང་པོ་ཞིག་སྒྲོགས་སྦྱངས་བྱ་རྒྱུའི་གོ་སྐབས་རག་གི་ཡོད་པར་བརྟེན། ཉིན་མོ་འདི་སྲུང་གཙི་བྱ་རྒྱུ་གལ་ཆེན་པོ་ཡིན་སྐོར་དང་། དེང་རབས་ཀྱི་ཤེས་ཡོན་པ་ཚད་ལྡན་ཞིག་ཡིན་ཚེ། སྤྱི་ཚོགས་ཀྱི་སྣེ་ཁྲིད་པའི་སྐབས་ལོ་རྒྱུས་དང་ཆབ་སྲིད་ཀྱི་དགོས་མཁོ་བསྐོང་ཐུབ་པའི་རིག་གནས་བསྐྲུན་རྒྱུ་གལ་ཆེན་རེད། ཅེས་སོགས་འགྲེལ་བརྗོད་གནང་སོང་།
གསར་འགོད་པ། བསྟན་འཛིན་ཕུར་བུ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
