ཨ་རི་ནས་ཞི་ཅིན་ཕིན་ལ་ངོ་རྒོལ་ལས་འགུལ་ཤུགས་ཆེན་སྤེལ་འདུག

ཁ་རས་གྱོན་པའི་རྒྱ་མི་ཉི་ཤུ་ཙམ་གྱིས་བོད་རིགས་གཞོན་སྐྱེས་ངོ་རྒོལ་བའི་ལག་ནས་བོད་ཀྱི་རྒྱལ་དར་དང་འཕྲེད་དར་བཙན་འཕྲོག་བྱས་ཡོད་པ་མ་ཟད་བོད་རིགས་གཞོན་སྐྱེས་ལས་འགུལ་བ་འགའ་ཤས་ལ་ཉེས་རྡུང་བཏང་ཡོད་འདུག

ཟླ་འདིའི་ཕྱི་ཚེས་ ༡༡ ནས་ ༡༧ བར་ཉིན་གྲངས་བདུན་རིང་ཨ་རིའི་སཱན་ཧྥི་རན་སི་སི་ཁོ་ (San Francisco) རུ། ཨེ་ཤ་ཡ་དང་ཞི་བདེ་རྒྱ་མཚོའི་ཁུལ་གྱི་མཉམ་ལས་དཔལ་འབྱོར་གླེང་སྟེགས་ཐེངས་ ༣༠ པ་འཚོག་བཞིན་ཡོད་ཅིང་། ཨ་རིའི་སྲིད་འཛིན་རྗོ་བྷའེ་ཌན་མཆོག་དང་རྒྱ་ནག་གི་མགོ་ཁྲིད་ཞི་ཅིན་ཕིན་གཉིས་གླེང་སྟེགས་ཀྱི་ཟུར་ནས་ཐུག་འཕྲད་བྱས་ཡོད་པ་མ་ཟད། ཁ་སང་ཕྱི་ཚེས་ ༡༥ ཉིན་སཱན་ཧྥི་རན་སི་སི་ཁོ་གྲོང་ཁྱེར་གྱི་(Hyatt Regency Downtown SOMA) གསོལ་མགྲོན་ཁང་དུ་ཞི་ཅིན་ཕིན་གྱིས་ཨ་རིའི་ཚོང་དོན་མི་སྣ་ཁག་ཅིག་དང་ཐུག་འཕྲད་བྱས་ཡོད་པ་ལྟར། ཁུལ་དེར་བོད་རང་བཙན་སློབ་ཕྲུག་ཚོགས་པ་སོགས་ཀྱིས་སྣེ་ཁྲིད་པའི་བོད་མི་གཙོས། ཡུ་གུར་བ་དང་། ཧོང་བ་སོགས་ཀྱིས་ངོ་རྒོལ་སྐད་འབོད་བྱས་འདུག

དེའི་ཐད་ཁ་སང་ཕྱི་ཚེས་ ༡༥ ཉིན་བོད་རང་བཙན་སློབ་ཕྲུག་ཚོགས་པས་བསྒྲགས་གཏམ་ཞིག་སྤེལ་བའི་ནང་། རྒྱ་ནག་གཞུང་གིས་བོད་ནང་དུ་མི་རིགས་རྩ་མེད་གཏོང་བ་སོགས་ཀྱི་སྲིད་ཇུས་ཡང་ཡང་སྤེལ་མུས་ཡིན་པས། དེ་རིང་བོད་རང་བཙན་སློབ་ཕྲུག་ཚོགས་པས་རྒྱ་ནག་གི་མགོ་ཁྲིད་ཞི་ཅིན་ཕིན་ལ་ངོ་རྒོལ་བྱེད་ཀྱི་ཡོད་ཅིང་། ངོ་རྒོལ་སྐད་འབོད་དེའི་ཁྲོད་བོད་མི་གཙོས། ཡུ་གུར་བ་དང། ཧོང་ཀོང་བ་སོགས་མི་གྲངས་བརྒྱ་ལྷག་གིས་ཆ་ཤས་བླངས་ཡོད་སྐོར་དང་། ངོ་རྒོལ་སྐད་འབོད་དེ་བརྒྱུད། བོད་ཕྲུག་ས་ཡ་གཅིག་ལྷག་བཅའ་སྡོད་སློབ་གྲྭར་བཅུག་ཡོད་པ་དང་། ཡུ་གུར་དང་ཤར་ཊུ་ཀི་སི་ཐན་གྱི་ཁ་ཆེའི་བཙོན་པ་གཙོས། རྒྱ་ནག་གི་བཙན་གནོན་འོག་ཏུ་ཡོད་པའི་རྒྱལ་ཁབ་ཁག་དང་ཧོང་ཀོང་སོགས་སུ་མང་གཙོ་དང་། རབ་དབང་མེད་པའི་སྐོར་སོགས་གསལ་འདུག

དེ་རིང་དྲ་ལམ་དུ་བོད་རང་བཙན་སློབ་ཕྲུག་ཚོགས་པའི་ལས་འགུལ་བ་ཚེ་ལྷ་ལགས་ཀྱིས་རྒྱ་ནག་གི་མགོ་ཁྲིད་ཞི་དང་ཨ་རིའི་ཚོང་དོན་གནད་ཡོད་མི་སྣ་དག་ཐུག་འཕྲད་བྱ་སའི་གསོལ་མགྲོན་ཁང་མདུན་དུ་ཡོད་པའི་ལྕགས་སྡོང་དེར་འཛེགས་ཏེ། བོད་ཀྱི་རྒྱལ་དར་མཁའ་དབྱིངས་སུ་འཕྱར་ནས་ངོ་རྒོལ་སྐད་འབོད་བྱས་ཡོད་པའི་བརྙན་རིས་ཤིག་མཐོང་རྒྱུ་ཡོད་ཅིང་། ངོ་དེབ་གཙོས་སྤྱི་ཚོགས་དྲ་ལམ་ཁག་ཏུ་ལོ་ན་ཉི་ཤུར་སོན་པའི་བོད་རིགས་བུ་མོ་དེ་ལ་བསྔགས་བརྗོད་དང་ཡི་རངས་ཞུ་བཞིན་འདུག

དེ་བཞིན་སྤྱི་ཚོགས་དྲ་ལམ་ཁག་ཏུ་ཁ་རས་གྱོན་པའི་རྒྱ་མི་ཉི་ཤུ་ཙམ་གྱིས་བོད་རིགས་གཞོན་སྐྱེས་ངོ་རྒོལ་བ་དག་གི་ལག་ནས་བོད་ཀྱི་རྒྱལ་དར་དང་འཕྲེད་དར་བཙན་འཕྲོག་བྱས་ཡོད་པ་མ་ཟད། བོད་རིགས་གཞོན་སྐྱེས་ལས་འགུལ་བ་ཁ་ཤས་ལ་ཉེས་རྡུང་བཏང་ཡོད་པའི་བརྙན་རིས་ཁག་ཅིག་མཐོང་རྒྱུ་འདུག དེ་བཞིན་ཁ་སང་ཕྱི་ཚེས་ ༡༥ ཞོགས་པར་བོད་པ་གཙོས་ལས་འགུལ་བ་སུམ་བརྒྱ་ཙམ་གྱིས་རྒྱ་ནག་གཞུང་ཚབ་ཁང་གི་མདུན་ཐང་དུ་ངོ་རྒོལ་ལས་འགུལ་སྤེལ་རྗེས། དེ་ནས་ཨེ་ཤ་ཡ་དང་ཞི་བདེ་རྒྱ་མཚོའི་ཁུལ་གྱི་མཉམ་ལས་དཔལ་འབྱོར་གླེང་སྟེགས་ཚོགས་ཡུལ་མི་སོ་ཁོན་(Moscone) བར་ངོ་རྒོལ་གོམ་བགྲོད་ཀྱིས་ལས་འགུལ་སྤེལ་འདུག

ཟླ་འདིའི་ཕྱི་ཚེས་ ༡༡ ནས་ ༡༧ བར་ཉིན་གྲངས་བདུན་རིང་ཨ་རིའི་སཱན་ཧྥི་རན་སི་སི་ཁོ་ (San Francisco) རུ། ཨེ་ཤ་ཡ་དང་ཞི་བདེ་རྒྱ་མཚོའི་ཁུལ་གྱི་དཔལ་འབྱོར་མཉམ་ལས་ཀྱི་ལྷན་ཚོགས་ཐེངས་ ༣༠ པ་འཚོག་བཞིན་ཡོད་ཅིང་། ཐེངས་འདིའི་ཚོགས་ཆེན་དུ་ཨ་རི་དང་། ཨོ་གླིང་། ཁེ་ན་ཌ། ཉི་ཧོང་། ཐའེ་ཝན། ལྷོ་ཀོ་རི་ཡ། རྒྱ་ནག་སོགས་རྒྱལ་ཁབ་ ༢༡ གི་མགོ་ཁྲིད་མཉམ་ཞུགས་གནང་སྟེ། ཨ་རི་དང་རྒྱ་ནག་གི་འབྲེལ་ལམ་དང་། འཛམ་གླིང་གནམ་གཤིས་འགྱུར་ལྡོག་གི་གནས་སྟངས། ཚོང་འབྲེལ་གྱི་དཀའ་ངལ། ཨི་ཛི་རེལ་གྱི་དམག་འཁྲུག་སོགས་རྒྱལ་སྤྱིའི་གནད་དོན་ཁག་ཅིག་ཐོག་གླེང་སློང་གནང་གི་ཡོད་འདུག

གསར་འགོད་པ། དཔལ་ལྡན།

རྩོམ་སྒྲིག་པ། སྐལ་བཟང་སྦྱིན་པ།