ཨ་རིའི་སྲིད་འཛིན་མཆོག་གིས་ཞི་ཅིན་ཕིང་ལ་བོད་དོན་གླེང་སློང་གནང་ཡོད་འདུག 

ཨ་རིའི་སྲིད་འཛིན་སྐུ་ཞབས་བྷའེ་ཌིན་མཆོག་དང་རྒྱ་ནག་གི་མགོ་འཁྲིད་ཞི་ཅིན་ཕིང་གཉིས་ཐུག་འཕྲད་སྐབས་བོད་དང་ཡུ་གུར་སོགས་ཀྱི་འགྲོ་བ་མིའི་ཐོབ་ཐང་གི་གནད་དོན་ཐོག་སེམས་འཚབ་ཡོད་སྐོར་གསུངས་ཡོད་འདུག

ཟླ་འདིའི་ཕྱི་ཚེས་ ༡༡ ནས་དེ་རིང་ ༡༧ བར་ཉིན་གྲངས་བདུན་རིང་ཨ་རིའི་སཱན་ཧྥི་རན་སི་སི་ཁོ་ (San Francisco) རུ། ཨེ་ཤ་ཡ་དང་ཞི་བདེ་རྒྱ་མཚོའི་ཁུལ་གྱི་མཉམ་ལས་དཔལ་འབྱོར་གླེང་སྟེགས་ཐེངས་ ༣༠ པ་འཚོག་བཞིན་ཡོད་པ་མ་ཟད། ཟླ་འདིའི་ཕྱི་ཚེས་ ༡༥ ཉིན་ཨ་རིའི་སྲིད་འཛིན་སྐུ་ཞབས་རྗོ་བྷའེ་ཌིན་དང་རྒྱ་ནག་གི་མགོ་ཁྲིད་ཞི་ཅིན་ཕིང་གཉིས་ཐུག་འཕྲད་གནང་སྟེ། རྒྱ་ནག་གི་བཙན་གནོན་འོག་ཡོད་པའི་བོད་གཙོས་ཡུ་གུར་དང་། ཧོང་ཀོང་སོགས་ཀྱི་འགྲོ་བ་མིའི་ཐོབ་ཐང་དང་། ཨ་རྒྱ་གཉིས་ཀྱི་དམག་དོན་གྱི་འབྲེལ་ལམ་གོང་མཐོར་གཏོང་ཐབས་སོགས་ཀྱི་གྲོས་མོལ་གནང་ཡོད་འདུག

དེའི་ཐད་ཨ་རིའི་ཕོ་བྲང་དཀར་པོས་མགོ་ཁྲིད་གཉིས་ཀྱི་ཐུག་འཕྲད་དང་འབྲེལ་བའི་གསལ་བསྒྲགས་ཤིག་གནང་བའི་ནང་། ད་ལན་ཨ་རྒྱ་གཉིས་ཀྱི་མགོ་ཁྲིད་ཀྱི་ཐུག་འཕྲད་སྐབས། ཨ་རྒྱ་གཉིས་ཀྱི་འབྲེལ་ལམ་སྲ་བརྟན་དང་། ཚོང་དོན་འབྲེལ་ལམ། དམག་དོན་སོགས་ཀྱི་ཐད་ལ་གྲོས་མོལ་གནང་ཡོད་པའི་ཁར། ད་ལྟ་རྒྱ་ནག་གཞུང་གི་བཙན་གནོན་འོག་ཏུ་ཡོད་པའི་བོད་དང་། ཡུ་གུར། ཧོང་ཀོང་། ཐའེ་ཝན་སོགས་ཀྱི་འགྲོ་བའི་ཐོབ་ཐང་གི་གནད་དོན་ཐོག་སེམས་ཁུར་བྱེད་བཞིན་པའི་སྐོར་དང་། རྒྱལ་ཁབ་ཚང་མས་འགྲོ་བ་མིའི་ཐོབ་ཐང་ལ་བརྩི་འཇོག་དང་གུས་བཀུར་བྱ་དགོས་པའི་སྐུལ་མ་གནང་ཡོད་སྐོར་སོགས་གསལ་འདུག

དེ་བཞིན་བྷི་བྷི་སི་གསར་ཁང་གིས་དེའི་སྐོར་གནས་ཚུལ་སྤེལ་བ་ལྟར་ན། མགོ་ཁྲིད་གཉིས་ཐུག་འཕྲད་སྐབས་ཨ་རྒྱ་གཉིས་ཀྱི་ཚོང་དོན་གོང་འཕེལ་དང་། གོ་ལའི་གནམ་གཤིས་འགྱུར་ལྡོག དེང་རབས་ཀྱི་ཚན་རྩལ་དར་རྒྱས་གོང་འཕེལ་གྱི་སྐོར། དཀྱིལ་ཤར་ཨེ་ཤ་ཡའི་ནང་འབྱུང་མུས་ཡིན་པའི་དམག་འཁྲུག་གི་སྐོར། ཨུ་རུ་སུས་ཡུ་ཁེ་རིན་ལ་བཙན་འཛུལ་བྱེད་མུས་ཡིན་པའི་གནད་དོན་སོགས་ཀྱི་ཐད་ལ་གླེང་སློང་གནང་ཡོད་སྐོར་དང་། ལྷག་དོན་རྒྱ་ནག་གིས་ཨེ་ཤ་ཡའི་མཚོ་གླིང་རྒྱལ་ཁབ་ཁག་ཚུད་པའི་རྒྱ་ནག་ཞི་བདེ་རྒྱ་མཚོ་ཟེར་བ་སོགས་ཀྱི་ཁོངས་སུ་སུན་གཙེར་དང་དབང་ཤུགས་རྒྱ་སྐྱེད་བྱེད་མུས་ཡིན་པ་སོགས་ཀྱི་གནད་དོན་གླེང་སློང་གནང་ཡོད་སྐོར་སོགས་གསལ་འདུག

དེ་བཞིན་རྒྱ་ནག་གོ་ལའི་དུས་བབ་ཀྱིས་སྤེལ་བའི་གནས་ཚུལ་ནང་། ཨ་རྒྱ་གཉིས་ཀྱི་མགོ་ཁྲིད་ཐུག་འཕྲད་སྐབས། ཕྱོགས་གཉིས་ཀྱི་མཉམ་འབྲེལ་ནུས་པ་གོང་མཐོ་དང་། དམག་དོན་ཚུད་པའི་རྒྱལ་ཁབ་གཉིས་ཀྱི་གཞི་རྩའི་བརྩི་མཐོང་ཟེར་བ་ཞིག་གི་འོག་ནས་ཞིང་ལས་དང་། ཚན་རྩལ། ཨ་རྒྱ་གཉིས་ཀྱི་ལོ་རྒྱུས་རང་བཞིན་ལྡན་པའི་འབྲེལ་ལམ་གསར་པ་ཟེར་བ་ཞིག་བཙུགས་ཡོད་སྐོར་གསལ་འདུག་ལ། ཕྱི་ཚེས་ ༡༥ ཉིན་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་མའོ་ཉིང་(Mao Ning) གིས་རྒྱུན་ལྡན་གྱི་གསར་འགོད་གསལ་བསྒྲགས་ཤིག་གི་སྟེང་།  རྒྱ་ནག་གཞུང་གིས་རྒྱུན་དུ་ནས་ཨ་རི་དང་དམག་དོན་གྱི་ཐོག་ནས་མཉམ་འབྲེལ་བྱ་འདོད་ཡོད་པས། ཨ་རྒྱ་གཉིས་ཀྱི་བདེ་འཇགས་ཀྱི་མཉམ་ལས་ཟེར་བ་ཞིག་གི་ཐོག་ནས། མགོ་ཁྲིད་ཞི་ཅིན་ཕིང་གིས་ད་ལན་ཨ་རྒྱ་གཉིས་ཀྱི་དམག་དོན་མཉམ་ལས་བྱ་རྒྱུའི་ཐད་སྐད་ཆ་བཤད་ཡོད་ཅིང་། ཨ་རྒྱ་མཉམ་ལས་གོང་འཕེལ་སླད་ཐའེ་ཝན་སོགས་རང་བཙན་རྒྱལ་ཁབ་ཏུ་ངོས་འཛིན་བྱས་པ་ནི་གཏན་ནས་ཡོང་ཐབས་མེད་ལུགས་སོགས་བཤད་འདུག

འདས་ལོའི་ཕྱི་ཟླ་ ༡༡ ནང་ཨིན་ཌོ་ནེ་ཤི་ཡཱ་ (Indonesia) ཡི་ཞིང་ཆེན་བྷ་ལི་ (Bali) རུ་ཨ་རི་དང་རྒྱ་ནག་ཚུད་པའི་སྟོབས་ཆེན་རྒྱལ་ཁབ་ ༢༠ ཡི་ལྷན་ཚོགས་ཐེངས་ ༡༧ པའི་ཐོག  ཨ་རྒྱའི་སྲིད་འཛིན་གཉིས་དངོས་སུ་ཐུག་འཕྲད་བྱས་ཏེ་ཆུ་ཚོད་གསུམ་རིང་རྒྱལ་ཁབ་གཉིས་ཀྱི་འབྲེལ་ལམ་ཡར་རྒྱས་གཏོང་ཐབས་སྐོར་ལ་གླེང་སློང་གནང་ཡོད་ཀྱང་། ཨ་རྒྱ་གཉིས་ཀྱི་བར་མུ་མཐུད་ཚོང་འབྲེལ་དང་འཕྲུལ་རིག་རྐུ་འཁྱེར། དྲ་ལམ་འཇབ་རྒོལ། ལྷོ་རྒྱ་ནག་རྒྱ་མཚོ་དང་རྒྱ་གར་ཞི་བདེ་རྒྱ་མཚོ་ཟེར་བའི་ཁུལ་གྱི་བདེ་འཇགས་སོགས་ཀྱི་གནད་དོན་ཐད་ལ་འགལ་ཟླ་དང་གདོང་ཐུག་འབྱུང་མུས་ཡིན་ཞིང་། འདི་ལོའི་ཕྱི་ཟླ་ ༢ ཚེས་ ༥ ནས་ ༦ བར་ཉིན་གྲངས་གཉིས་རིང་ཨ་རིའི་རྒྱལ་སྲིད་བློན་ཆེན་རྒྱ་ནག་གི་རྒྱལ་ས་པེ་ཅིན་དུ་ཕྱིན་ནས་རྒྱ་ནག་གི་མགོ་ཁྲིད་ཞི་ཅིན་ཕིང་དང་ཕྱི་འབྲེལ་མི་སྣ་སོགས་སུ་ཐུག་འཕྲད་གནང་རྩིས་ཡོད་ཀྱང་། ཟླ་དེའི་ཕྱི་ཚེས་ ༢ ཉིན་ཨ་རིའི་རྒྱལ་སྲུང་ལྷན་ཁང་གིས་རྒྱ་ནག་གཞུང་གི་མྱུལ་ཞིབ་ལྒང་ཕུག་ (surveillance balloon) ཅིག་ཨ་རིའི་མཁའ་ཁུལ་དུ་ཆེད་གཏོང་གིས་གསང་བའི་ལྟ་ཞིབ་བྱེད་ཀྱི་ཡོད་པའི་གནས་ཚུལ་བསྒྲགས་རྗེས།  གཞུང་འབྲེལ་ཕྱོགས་སྐྱོད་དེ་གློ་བུར་དུ་ཕྱིར་འགྱངས་གནང་ཡོད་ཀྱང་། འདི་ལོའི་ཕྱི་ཟླ ༦ ཚེས་ ༡༩ ཉིན་ཕྱི་འབྲེལ་བློན་ཆེན་མཆོག་གིས་རྒྱ་ནག་དམར་ཤོག་གཞུང་གི་མགོ་ཁྲིད་ཞི་ཅིན་ཕིང་དང་ཕྱི་འབྲེལ་བློན་ཆེན་ཆིན་ཀང་གི་གཙོས་གནད་ཡོད་མི་སྣ་ཁག་ཅིག་དང་ཐུག་འཕྲད་གནང་ཡོད་པ་རེད།

འདི་ལོའི་ཨེ་ཤ་ཡ་དང་ཞི་བདེ་རྒྱ་མཚོའི་ཁུལ་གྱི་དཔལ་འབྱོར་མཉམ་ལས་ཀྱི་ལྷན་ཚོགས་ཐེངས་ ༣༠ པའི་སྟེང་། ཨ་རི་དང་། ཨོ་གླིང་། ཁེ་ན་ཌ། ཉི་ཧོང་། ལྷོ་ཀོ་རི་ཡ། རྒྱ་ནག་སོགས་རྒྱལ་ཁབ་ ༢༡ གི་མགོ་ཁྲིད་མཉམ་ཞུགས་གནང་སྟེ། ཨ་རི་དང་རྒྱ་ནག་གི་འབྲེལ་ལམ་དང་། འཛམ་གླིང་གནམ་གཤིས་འགྱུར་ལྡོག་གི་གནས་སྟངས། ཚོང་འབྲེལ་གྱི་དཀའ་ངལ། ཨི་ཛི་རེལ་གྱི་དམག་འཁྲུག་སོགས་རྒྱལ་སྤྱིའི་གནད་དོན་ཁག་ཅིག་ཐོག་གླེང་སློང་གནང་ཡོད་འདུག

གསར་འགོད་པ། དཔལ་ལྡན།

རྩོམ་སྒྲིག་པ། པདྨ་མཚོ།