ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གཞུང་འབྲེལ་འཚམས་གཟིགས་ཕེབས་བཞིན་འདུག

བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་ཉིན་དྲུག་རིང་ཨོ་གླིང་དང་ནེའུ་ཛི་ལན་ཌི་རུ་གཞུང་འབྲེལ་འཚམས་གཟིགས་ཕེབས་བཞིན་འདུག

Kalon with the former representatives of Office of Tibet, Canberra and leaders of the Canberra Tibetan community

ཟླ་འདིའི་ཕྱི་ཚེས་ ༡༤ ནས་ ༢༠ བར་ཉིན་གྲངས་དྲུག་གི་རིང་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་ཨོ་གླིང་དང་ནེའུ་ཛི་ལན་ཌི་ (New Zealand) རྒྱལ་ཁབ་ཏུ་གཞུང་འབྲེལ་ཕྱོགས་ཕེབས་གནང་མུས་ཡིན་པ་དང་། ཕྱི་ཚེས་ ༡༤ ཉིན་ཨོ་གླིང་གི་གྲོང་ཁྱེར་སི་ཌི་ནི་རུ་ཕེབས་འབྱོར་བྱུང་ཡོད་འདུག་ལ། ཐེངས་འདིར་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་བཀའ་བློན་གྱི་ལས་འཁུར་བཞེས་ནས་ཨོ་གླིང་དུ་གཞུང་འབྲེལ་འཚམས་གཟིགས་སུ་ཕེབས་པ་ཐོག་མ་ཆགས་ཀྱི་ཡོད་འདུག

དེ་རིང་དང་སང་ཉིན་ཉིན་གཉིས་རིང་ཕྱི་དྲིལ་ལས་ཁུངས་དང་ཨོ་གླིང་གི་རྒྱལ་ས་ཁེན་བྷེ་ར་ཡོད་པའི་བོད་ཀྱི་དོན་གཅོད་ཁང་གཉིས་ཀྱི་གོ་སྒྲིག་འོག ཁེན་བྷེ་ར་རུ་ཨོ་གླིང་གི་དང་བླངས་བོད་དོན་ཞུ་གཏུག་ལས་འགུལ་སྤེལ་ཕྱོགས་ཀྱི་ཐབས་བྱུས་ཚོགས་འདུ་དང་ཟབ་སྦྱོང་ (V-TAG Australia Strategy Meeting and Advocacy Training) འཚོག་མུས་ཡིན་པ་ལྟར། ཚོགས་འདུ་དེའི་དབུ་འབྱེད་མཛད་སྒོའི་སྟེང་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་ཆེད་བཅར་ཞུས་ཡོད་འདུག

ཁ་སང་ཕྱི་ཚེས་ ༡༦ ཉིན་བཀའ་བློན་ནོར་འཛིན་སྒྲོལ་མ་མཆོག་ཨོ་གླིང་གི་ཕྱི་སྲིད་ལས་དོན་དང་འབྲེལ་བའི་ཕྱོགས་འགལ་ཚོགས་པའི་བློན་ཆེན་སྐུ་ཞབས་ (Simon Brimingham) ལགས་དང་། ཨོ་གླིང་གྲོས་ཚོགས་འཐུས་མི་སྐུ་ཞབས་པི་ཊར་ (Peter Khalil) ལགས་གཉིས་དང་མཇལ་འཕྲད་ཀྱིས་ཆུ་ཚོད་གཅིག་ཙམ་གྱི་རིང་བོད་དོན་སྐོར་གླེང་སློང་གནང་ཡོད་འདུག་ལ། ཉིན་དེར་ཨོ་གླིང་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པས་གྲོས་ཚོགས་ཀྱི་ཚོགས་ཁང་དུ་བོད་དོན་ངོ་སྤྲོད་ (Tibet Briefing) ཀྱི་གསུང་བཤད་ལས་རིམ་ཞིག་གོ་སྒྲིག་ཞུས་ཡོད་པ་དེའི་ནང་དུ། ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་མཉམ་ཞུགས་གནང་སྟེ། བཀའ་བློན་མཆོག་གིས། བོད་ནང་གི་ཛ་དྲག་གི་གནས་སྟངས་དང་། དབུ་མའི་ལམ་གྱི་ཐོག་ནས་བོད་རྒྱའི་དཀའ་རྙོག་སེལ་ཐབས་སུ་འབད་བརྩོན་བྱེད་བཞིན་ཡོད་པའི་གནས་བབ། དེ་བཞིན་འབྱུང་འགྱུར་ཕྱི་ལོ་ ༢༠༢༤ ཟླ་ ༡ པོའི་ནང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚན་པས་རྒྱ་ནག་གི་གནད་དོན་ཐོག་ཞིབ་འཇུག་ (Universal Periodic Review on China) གནང་སྐབས། བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་ལ་གླེང་སློང་ངེས་པར་དུ་གནང་དགོས་སྐོར་སོགས་ནན་བརྗོད་གནང་ཡོད་འདུག

བོད་དོན་ངོ་སྤྲོད་ཀྱི་གསུང་བཤད་ལས་རིམ་དེའི་ནང་ཨོ་གླིང་གྲོས་ཚོགས་འོག་མའི་ཚོགས་གཞོན་ལྕམ་སྐུ་ (Sharon Claydon) ལགས་དང་། གྲོས་ཚོགས་འོག་མའི་འཐུས་མི་ལྕམ་སུ་སན་རེ་ཡེ་ (Susan Templeman) ལགས། དེ་བཞིན་གྲོས་ཚོགས་གོང་མའི་འཐུས་མི་སྐུ་ཞབས་ཌིན་ (Dean Smith) ལགས་དང་། གྲོས་ཚོགས་གོང་མའི་འཐུས་མི་ལྕམ་སྐུ་ཇའེ་ནེ་ཊི་ (Janet Elizabeth Rice) ལགས་སོགས་ཆབ་སྲིད་ཚོགས་པ་འདྲ་མིན་གྱི་གྲོས་ཚོགས་འཐུས་མི་ཁག་ཅིག་ལྷན་ཞུགས་གནང་ཡོད་འདུག

Kalon Norzin Dolma presenting souvenir to Shadow Foreign Minister of Australia, Senator Simon Birmingham

ཕྱི་ཚེས་ ༡༥ ཉིན་བཀའ་བློན་ནོར་འཛིན་སྒྲོལ་མ་མཆོག་ཨོ་གླིང་གི་གྲོང་ཁྱེར་སི་ཌི་ནི་རུ་ཡོད་པའི་ལོ་ཝི་བསྟི་གནས་ཁང་ (Lowy Institute) དུ་ཆེད་ཕེབས་ཀྱིས་ཉམས་ཞིབ་པ་བགྲེས་པ་རི་ཆར་ཌི་ (Richard Mcgregor) དང་ཐུག་འཕྲད་གནང་སྟེ། རྒྱ་ནག་གཞུང་གིས་བོད་ནང་དུ་དྲག་གནོན་སྲིད་ཇུས་ལག་བསྟར་འོག་བོད་ནང་དུ་ཆོས་དད་རང་དབང་མེད་པ་དང་། བོད་ཕྲུག་ཕ་མ་དང་ཁ་བྲལ་བཏང་ནས་བཙན་གྱིས་བཅའ་སྡོད་སློབ་གྲྭར་བཅུག་སྟེ་རྒྱ་སྒྱུར་སློབ་གསོ་སྤྲོད་ཀྱི་ཡོད་སྐོར་སོགས་བོད་ནང་གི་ཛ་དྲག་གནས་སྟངས་ཐད་ངོ་སྤྲོད་གནང་འདུག དེ་བཞིན་ས་གནས་དེར་ཡོད་པའི་ (Bill Crews) ཐེབས་རྩ་ཁང་དུ་ཆེད་ཕེབས་ཀྱིས་སྐུ་ཞབས་བྷིལ་ (Bill Crew) ལགས་དང་ཐུག་འཕྲད་གནང་འདུག ཉིན་དེའི་ཉིན་རྒྱབ་ཏུ་ཨོ་གླིང་གི་གྲོང་ཁྱེར་ཁེན་བྷེ་རར་ཕེབས་འབྱོར་གྱིས་ཁེན་བྷེ་རའི་སྐུ་ཚབ་དོན་གཅོད་ཟུར་པ་ཁག་ཅིག་དང་། ཁེན་བྷེ་ར་བོད་རིགས་མཐུན་ཚོགས་ཀྱི་རྒྱུན་ལས་རྣམས་དང་ཐུག་འཕྲད་གནང་ཡོད་འདུག

ཡང་སང་ཉིན་ཕྱི་ཚེས་ ༡༨ ཉིན་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་ཨོ་གླིང་གི་གྲོང་ཁྱེར་སི་ཌི་ནི་རུ་ཕེབས་རྒྱུ་ཡིན་པ་དང་། སྐབས་དེར་ཨོ་གླིང་བོད་དོན་ལས་འགུལ་ཁང་ (Australia Tibet Council) གི་འཛིན་སྐྱོང་འགན་འཛིན་དང་ཐུག་འཕྲད་གནང་རྒྱུ་ཡིན་འདུག་ལ། སི་ཌི་ནི་གྲོང་ཁྱེར་དུ་རྟེན་གཞི་བྱས་ཡོད་པའི་བོད་རྒྱ་མཛའ་འབྲེལ་ཚོགས་པའི་ཚོགས་མི་དང་རྒྱ་ནག་གི་མང་གཙོའི་ལས་འགུལ་བ་རྣམས་ལ་ཐུག་འཕྲད་གནང་སྟེ། ཕྱི་ཚེས་ ༡༩ ཉིན་ནིའུ་ཛི་ལེན་ཌི་རྒྱལ་ཁབ་ཏུ་འཐོན་རྒྱུ་ཡིན་འདུག

གསར་འགོད་པ། བསྟན་འཛིན་ཕུར་བུ།

རྩོམ་སྒྲིག་པ། སྐལ་བཟང་སྦྱིན་པ།