དམངས་གཙོ་ཡར་ཐོན་ཚོགས་པའི་ལས་ཐོག་སྲིད་འཛིན་གཞོན་པ་དང་ཕྱི་ལོ་ ༢༠༢༤ ལོའི་སྲིད་འཛིན་གྱི་འོས་མི་ལེ་ཆིན་ཏི་མཆོག་གིས་ཐའེ་ཝན་རྒྱལ་ཡོངས་འོས་བསྡུའི་ཁྲོད་མི་མང་གིས་དམངས་གཙོ་དང་རྒྱ་ནག་གཉིས་ལས་གཅིག་འདེམས་དགོས་སྐོར་བརྗོད་འདུག
ཕྱི་ལོ་ ༢༠༢༤ ལོའི་ཟླ་དང་པོའི་ཚེས་ ༡༣ ཉིན་ཐའེ་ཝན་གྱི་སྲིད་འཛིན་འོས་འདེམས་བྱེད་པའི་ཉིན་མོར་གཏན་འཁེལ་བྱུང་ཡོད་པ་ལྟར། ད་ལྟའི་ཆར་ཡོངས་གྲགས་སུ་ཐའེ་ཝན་སྲིད་འཛིན་གྱི་འོས་མི་ཁོངས་སུ་དམངས་གཙོ་ཡར་ཐོན་སྲིད་དོན་ཚོགས་པའི་ཚོགས་མི་དང་། ད་ལྟའི་ལས་ཐོག་སྲིད་འཛིན་གཞོན་པ་ལེ་ཆིན་ཏི་(賴清德) ་ལགས་དང་། གོ་མན་ཏང་སྲིད་དོན་ཚོགས་པའི་ཚོགས་མི་དང་ཐའེ་པེ་གྲོང་ཁྱེར་གྱི་སྤྱི་ཁྱབ་ཧུག་ཡུག་ཡེ་(侯友宜)ལགས། ཐའེ་ཝན་མི་མང་སྲིད་དོན་ཚོགས་པའི་ཚོགས་མི་ཐའེ་པེ་གྲོང་ཁྱེར་སྤྱི་ཁྱབ་ཟུར་བ་ཁི་ཝན་ཌི་(柯文哲)ལགས། སྲིད་དོན་ཚོགས་པ་མེད་པའི་ཐའེ་ཝན་གྱི་ཕྱུག་བདག་གོ་ཐེ་མིན་(郭台銘)་ལགས་བཅས་མཉམ་ཞུགས་བྱེད་བཞིན་ཡོད་འདུག
ཐའེ་ཝན་སྲིད་འཛིན་གྱི་འོས་བསྡུའི་སྐོར་ལ་དམངས་གཙོ་ཡར་ཐོན་སྲིད་དོན་ཚོགས་པའི་སྲིད་འཛིན་གྱི་འོས་མི་ལེ་ཆིན་ཏི་ལགས་ཀྱིས། ཐའེ་ཝན་གྱི་བདེ་འཇགས་ནི་རྒྱལ་སྤྱིའི་གནད་དོན་ཞིག་ཡིན་པ་དང་། འཛམ་གླིང་མི་མང་གིས་ཐའེ་ཝན་གྱི་འོས་བསྡུར་དོ་སྣང་བྱེད་བཞིན་ཡོད་པས། ཐའེ་ཝན་མི་མང་དམངས་གཙོའི་ལམ་ལུགས་ཀྱི་ཕྱོགས་སུ་མུ་མཐུད་བསྐྱོད་པའམ། ཡང་ན་རྒྱ་ནག་གི་པང་དུ་ལོག་སྟེ་རྒྱ་ནག་གཅིག་གི་སྲིད་ཇུས་འོག་གནས་རྒྱུ་ཡིན་མིན་ཐད་འདེམས་གསེས་བྱ་དགོས། ཞེས་བརྗོད་ཡོད་པ་དང་། རྒྱ་ནག་གཞུང་གིས་ཐའེ་ཝན་ཕྱོགས་ཡོངས་ནས་རྒྱ་ནག་གཅིག་གི་ཁོངས་གཏོགས་ཡིན་པའི་ངོས་ལེན་བྱེད་དུ་འཇུག་བཞིན་ཡོད་ཀྱང་། དམངས་གཙོ་ཡར་ཐོན་སྲིད་དོན་ཚོགས་པས་ཐའེ་ཝན་གྱི་མ་འོངས་པ་ཐའེ་ལན་མི་མང་གིས་ཐག་གཅོད་བྱ་དགོས་སྐོར་བརྗོད་དེ་རྒྱ་ནག་གཞུང་གི་ལངས་ཕྱོགས་དེ་ལ་ངོས་ལེན་བྱེད་ཀྱི་མེད་པ་རེད།
ཉེ་ལམ་ཕྱི་ཟླ་ ༡༠ ནང་ཐའེ་ཝན་གྱི་གསར་འགྱུར་བརྒྱུད་ལམ་ཁག་གིས་ཐའེ་ཝན་གྱི་རྒྱལ་ཡོངས་འོས་བསྡུའི་སྐོར་ནས་ཐའེ་ཝན་མི་མང་ཁྲོད་དུ་བསམ་ཚུལ་འོས་ཤོག་བསྡུས་བའི་ནང་དུ། དམངས་གཙོ་ཡར་ཐོན་སྲིད་དོན་ཚོགས་པའི་སྲིད་འཛིན་འོས་མི་ལེ་ཆིན་ཏི་ལགས་ལ་འོས་གྲངས་བརྒྱ་ཆ་ ༣༢ རྒྱབ་སྐྱོར་ཐོབ་ཡོད་པ་དང་། ཁ་གཏད་སྲིད་དོན་ཚོགས་པའི་འོས་མི་ཧུག་ཡུག་ཡེ་ལགས་ལ་འོས་གྲངས་བརྒྱ་ཆ་ ༢༢ ཐོབ། ཐའེ་ཝན་མི་མང་སྲིད་དོན་ཚོགས་པའི་སྲིད་འཛིན་འོས་མི་ཁི་ཝན་ཌི་ལགས་ལ་འོས་གྲངས་བརྒྱ་ཆ་ ༢༠། སྲིད་དོན་ཚོགས་པ་མེད་པའི་ཐའེ་ཝན་གྱི་ཕྱུག་བདག་གོ་ཐེ་མིན་ལགས་ལ་འོས་གྲངས་བརྒྱ་ཆ་ ༥ བཅས་ཐོབ་ཡོད་པས། མི་མང་གི་བསམ་ཚུལ་འོས་ཤོག་ཁྲོད་ད་ལྟའི་གཞུང་འཛིན་དམངས་གཙོ་ཡར་ཐོན་ཚོགས་པའི་སྲིད་འཛིན་གྱི་འོས་མི་ལེ་ཆིན་ཏི་ལགས་སུ་རྒྱལ་ཁ་ཆེན་པོ་ཐོབ་ཡོད་འདུག
གོ་མན་ཏང་སྲིད་དོན་ཚོགས་པའི་སྲིད་འཛིན་འོས་ཧུག་ཡུག་ཡེ་ལགས་དང་། ཐའེ་ཝན་མི་མང་སྲིད་དོན་ཚོགས་པའི་སྲིད་འཛིན་འོས་མི་ཁི་ཝན་ཌི་ལགས་གཉིས་ལ་མང་ཚོགས་ཀྱི་འོས་གྲངས་ཡག་པོ་ཐོབ་མེད་པར་བརྟེན། གོ་མན་ཏང་སྲིད་དོན་ཚོགས་པ་དང་ཐའེ་ཝན་མི་མང་སྲིད་དོན་ཚོགས་པ་གཉིས་མཉམ་འབྲེལ་བྱས་ཏེ། སྲིད་འཛིན་གྱི་འོས་མིར་མི་འོས་ལངས་བྱ་རྒྱུ་ཡིན་པའི་ཐག་གཅོད་བྱུང་ཡོད་ཀྱང་། སྲིད་དོན་ཚོགས་པ་དེ་གཉིས་བར་སྲིད་འཛིན་གྱི་འོས་མིར་སུ་ཞིག་ལངས་དགོས་མིན་ཐད་རྩོད་རྙོག་བྱུང་ཡོད་པ་རེད།
དམངས་གཙོ་ཡར་ཐོན་སྲིད་དོན་ཚོགས་པའི་ལེ་ཆིན་ཏི་ལགས་དང་ལྷན་དུ། ཨ་རིའི་ཐའེ་ཝན་གཞུང་ཚབ་པ་ཞའོ་མེ་ཆིན་ལགས་སྲིད་འཛིན་གཞོན་པའི་འོས་མིར་ལངས་པ་ཡོངས་བསྒྲགས་བྱས་འདུག་ལ། སྲིད་དོན་ཚོགས་གཞན་གྱི་ད་སྔ་བར་སྲིད་འཛིན་གཞོན་པའི་འོས་མི་ཡོངས་བསྒྲགས་བྱས་པ་མཐོང་རྒྱུ་མི་འདུག
དམངས་གཙོ་ཡར་ཐོན་སྲིད་དོན་ཚོགས་པས་ཞའོ་མེ་ཆིན་ལགས་སྲིད་འཛིན་གཞོན་པའི་འོས་མིར་ལངས་རྒྱུ་ཡིན་པའི་གསལ་བསྒྲགས་བྱས་རྗེས། རྒྱ་ནག་གཞུང་འབྲེལ་གྱི་གསར་འགྱུར་བརྒྱུད་ལམ་ཁག་ཏུ་དམངས་གཙོ་ཡར་ཐོན་ཚོགས་པའི་སྲིད་འཛིན་འོས་མི་ལེ་ཆིན་ཏི་དང་མི་ཞའོ་མེ་ཆིན་གཉིས་ལ་སྐྱོན་བརྗོད་ཤུགས་ཆེན་བྱས་ཡོད་པ་མ་ཟད། ཐའེ་ཝན་རང་བཙན་ནི་དམག་འཁྲུག་ཞིག་ཡིན་པ་དང་། ཁོང་གཉིས་ཀྱིས་ཐའེ་ཝན་རང་བཙན་ཁྱབ་བསྒྲགས་ཤུགས་ཆེན་བྱས་ནས་དཀའ་རྙོག་བཟོ་བཞིན་ཡོད་ཚུལ་བསྒྲགས་འདུག
ཐའེ་པེ་རྒྱལ་ཡོངས་གཙུག་ལག་སློབ་གླིང་གི་ཉམས་ཞིབ་པ་ཧྲིན་པོ་ཡང་(沈伯洋) ལགས་ཀྱིས། ཐའེ་ཝན་རྒྱལ་ཡོངས་སྲིད་འཛིན་གྱི་འོས་བསྡུའི་སྐབས་སུ། པེ་ཅིན་གཞུང་གིས་ཐའེ་ཝན་གྱི་སྤྱི་ཚོགས་ནང་དུ་གནས་ཚུལ་རྫུན་མ་ཁྱབ་སྤེལ་བྱས་ཏེ། སྲིད་འཛིན་གྱི་འོས་བསྡུར་ཤུགས་རྐྱེན་ངན་པ་ཐེབས་སུ་འཇུག་བཞིན་ཡོད་པས། གསར་འགྱུར་བརྒྱུད་ལམ་ཁག་གིས་འོས་བསྡུ་དང་འབྲེལ་བའི་གནས་ཚུལ་ལ་དོ་སྣང་བྱ་རྒྱུ་གལ་ཆེན་ཡིན་སྐོར་བརྗོད་འདུག་ལ། སྲིད་འཛིན་གྱི་འོས་མི་ལེ་ཆིན་ཏི་ལགས་ཀྱིས་ཀྱང་དེ་ནི་རྒྱ་ནག་གཞུང་གིས་ཐའེ་ཝན་གྱི་རྒྱལ་ཡོངས་འོས་བསྡུར་གནོན་ཤུགས་སྤྲོད་བཞིན་ཡོད་པའི་དཔང་རྟགས་གསལ་བོ་ཞིག་རེད་ཅེས་བརྗོད་འདུག
དེ་བཞིན་ཉམས་ཞིབ་པ་ཚོས་ཐའེ་ཝན་རྒྱལ་ཡོངས་འོས་བསྡུ་ནང་གོ་མིན་ཏང་སྲིད་དོན་ཚོགས་པ་དང་ཐའེ་ཝན་མི་མང་སྲིད་དོན་ཚོགས་པ་གཉིས་ཀྱིས་མཉམ་འབྲེལ་བྱས་ཏེ། ཁ་གཏད་སྲིད་དོན་ཚོགས་པའི་འོས་མི་ཧུག་ཡུག་ཡེ་ལགས་སྲིད་འཛིན་དང་། ཐའེ་ཝན་མི་མང་སྲིད་དོན་ཚོགས་པའི་སྲིད་འཛིན་འོས་མི་ཁི་ཝན་ཌི་ལགས་སྲིད་འཛིན་གཞོན་པའི་འོས་གདམ་རྒྱུའི་འཆར་གཞི་ཡོད་ཚུལ་དང་། སྲིད་འཛིན་གཞོན་པའི་ལས་ཐོག་ལེ་ཆིན་ཏི་ལགས་སྲིད་འཛིན་གྱི་འོས་ཤོག་ཐོབ་པའི་རེ་བ་ཆེ་བ་དང་། ཞའོ་མེ་ཆིན་ལགས་ལ་དམངས་གཙོ་ཡར་རྒྱས་སྲིད་དོན་ཚོགས་པས་སྲིད་འཛིན་གཞོན་པའི་འོས་འདེམས་བྱ་རྒྱུའི་ཚོད་དཔག་སོགས་བྱས་ཡོད་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། སྐལ་བཟང་སྦྱིན་པ།
