ཟླ་འདིའི་ཕྱི་ཚེས་ ༢༣ ཉིན་གྱི་ཕྱི་དྲོར་ཀང་ར་རྫོང་གི་ཊན་ཌ་སྨན་ཁང་དུ། བོད་ཀྱི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་ཐོག་མ་དང་སྤྱི་འཐུས་ལྷན་ཚོགས་ཀྱི་ཚོགས་གཙོ་གཞོན་པ། དཔལ་འབྱོར་བཀའ་བློན་དང་དབུས་སྤྱི་ཁྱབ་འདེམས་བསྐོ་ལྷན་ཁང་གི་ཚོགས་གཙོ། དེ་བཞིན། བོད་མི་མང་སྤྱི་འཐུས་སྐབས་བཞི་བ་དང་ལྔ་བ། དྲུག་པ་བཅས་གནང་མྱོང་བའི་གྲ་ཕྱི་ཕུན་རབ་བློ་བཟང་དར་རྒྱས་མཆོག་སྐུ་གཟུགས་བདེ་མིན་གྱི་དབང་གིས་འདས་གྲོངས་སུ་གྱུར་ཡོད་པ་རེད།
དེ་རིང་བོད་མི་མང་སྤྱི་འཐུས་ལྷན་ཚོགས་ཀྱིས་དམ་པ་ཁོང་གིཤུལ་ལུས་ནང་མི་གཉེན་འབྲེལ་ཡོངས་ལ་ཐུགས་གསོའི་གསུང་འཕྲིན་ཞིག་སྩལ་བའི་ནང་། སྐུ་ཚེ་མ་ཟིན་པའི་ཡིད་སྐྱོའི་གནས་ཚུལ་ཐོན་པར་ཤིན་ཏུ་ཡིད་སྐྱོ་དང་བློ་ཕམ་གྱི་གནས་སུ་གྱུར་བ་དང་། དམ་པ་གང་གི་ཤུལ་ལུས་ནང་མི་ཉེ་འབྲེལ་རྣམས་ཀྱང་ཐུགས་ཡིད་གདུང་ཆེན་པོའི་ངང་ཡོད་ངེས་ཀྱང་། འཇིག་རྟེན་གྱི་སྐྱེ་འགྲོ་ཀུན་ལ་སྐྱེ་འཆིའི་རང་དབང་མེད་པ་ཆོས་ཉིད་ལ་དགོངས་རྒྱ་ཆེ་བཞེས་དང་འབྲེལ། དམ་པ་དེ་ཉིད་ཀྱི་ཆེད་རྣམ་དཀར་དགེ་ཚོགས་ཀྱི་གནང་སྒོ་རིམ་པ་གནང་བཞིན་ཡོད་པར་གཞིར་བཅས། འདི་ནས་གྲོས་ཚོགས་སུ་སྤྱི་མཚུངས་ལྟར་གཞུང་འབྲེལ་མྱ་ངན་གུས་འདུད་ཀྱི་གྲོས་ཆོད་བཞག་ཟིན་རྗེས་འབུལ་ལམ་ཞུ་རྒྱུ་དང་། དམ་པ་དེ་ཉིད་ཀྱིས་བོད་བསྟན་སྲིད་མི་རིགས་དང་། བོད་མིའི་སྒྲིག་འཛུགས། བོད་རྒྱ་ཆེའི་མང་ཚོགས་བཅས་ཀྱི་དོན་དུ་ཞབས་ཞུ་མཐར་སོན་གནང་བའི་མཛད་རྗེས་ལ་ཡི་རངས་བསྔགས་བརྗོད་དང་། མཆོག་གསུམ་རྒྱལ་བའི་སྤྱན་སྔར་མཆོད་སྤྲིན་དང་བཅས་གང་གིས་ཚེ་རབས་ཀུན་ཏུ་བྱས་བསགས་སྡིག་ལྟུང་རྣམས་བྱང་ཞིང་དག་ཅིང་། འཕགས་མཆོག་ཕྱག་ན་པདྨོའི་རྗེས་སུ་བཟུང་སྟེ་རྣམ་མཁྱེན་རྒྱལ་བའི་གོ་འཕང་ལ་མྱུར་དུ་རེག་པའི་སྨོན་འདུན་དང་སྦྲགས། ཤུལ་ལུས་ནང་མི་ཉེ་འབྲེལ་ལྟོས་བཅས་ཡོངས་ལ་ཐུགས་གསོ་ཞུ་རྒྱུ་ཡིན་ཞེས་གསུངས་འདུག
འདས་པོ་དམ་པ་གྲ་ཕྱི་ཕུན་རབ་བློ་བཟང་དར་རྒྱས་མཆོག་ནི་ཕྱི་ལོ་ ༡༩༣༧ ལོར་ལྷ་སར་འཁྲུངས་ཤིང་༌། ཆུང་དུས་ནས་བོད་ཡིག་སློབ་སྦྱོང་གནང་སྟེ་སློབ་གྲྭ་ཐོན་པ་དང་། འཕན་ཡུལ་སེར་སྨད་བྲག་རྒྱབ་རིན་པོ་ཆེའི་ཞབས་ཞུ་དང་སྦྲགས་ཆོས་ཕྱོགས་ཀྱི་སློབ་གཉེར་གནང་བའི་སྐབས་སུ། ཕྱི་ལོ་ ༡༩༥༩ ལོར་དུས་འགྱུར་དབང་གིས་རྒྱ་གར་དུ་བཙན་བྱོལ་ལ་ཐོག་མར་ཀ་སྦུག་ཁུལ་དུ་ལོ་བཞི་ཙམ་རིང་བོད་གཞུང་སློབ་གྲྭའི་ནང་དབྱིན་ཡིག་སློབ་སྦྱོང་དང་༌། ཞོར་ལ་བོད་ཡིག་འཛིན་གྲྭ་ཁ་ཤས་ཀྱི་དགེ་རྒན་གནང་། ཕྱི་ལོ་ ༡༩༦༣ ལོར་མའེ་སོར་ལུགས་ཟུང་བསམ་གླིང་དུ་ཕེབས་ཏེ་རང་རིགས་ན་གཞོན་ཁག་ཅིག་ལ་ལས་ཞོར་སློབ་སྦྱོང་སྤྲོད་པའི་གོ་སྒྲིག་རྐང་ལེན་གྱིས་དགེ་རྒན་ཡང་གནང་བ་དང་༌། མང་ཚོགས་ནས་འོས་འདེམས་ཞུས་པ་ལྟར་གཞིས་མིའི་མཉམ་འབྲེལ་ལྟ་རྟོག་ཚོགས་པའི་ཚོགས་མི་དང་༌། དེ་རྗེས་དྲུང་ཆེ། གཞིས་སྒར་དུ་དབུས་གཙང་འཐུས་མི་ལོ་གསུམ་བཅས་གནང་། ཕྱི་ལོ་ ༡༩༦༩ ལོར་བོད་མི་མང་སྤྱི་འཐུས་སྐབས་བཞི་པ་དང་ཕྱི་༡༩༧༢ ལོར་སྐབས་ལྔ་པ། དེ་བཞིན་ཕྱི་ལོ་ ༡༩༧༦ ལོར་སྐབས་དྲུག་པ་བཅས་ཀྱི་དབུས་གཙང་སྤྱི་འཐུས་སུ་འདེམས་ཐོན་བྱུང་བ་མ་ཟད། སྐབས་དྲུག་པའི་སྤྱི་ལྷན་ཚོགས་གཙོ་གཞོན་པའི་མཛད་འགན་བཞེས་པ་དང་། ཕྱི་ལོ་ ༡༩༧༩ ལོར་འཚམས་འདྲི་གཟིགས་སྐོར་སྐུ་ཚབ་ཚོགས་པའི་ཚོགས་མི་ལྔའི་ཁོངས་སུ་བོད་དུ་ཕེབས། གཞན་ཡང་སྤྱི་འཐུས་སྐབས་ལྔ་པ་དང༌། སྐབས་དྲུག་པ་གཉིས་ཀྱི་དབུས་སྤྱི་ཁྱབ་འདེམས་བསྐོ་ལྷན་ཚོགས་ཀྱི་ཚོགས་མི་དང་། སྐབས་བདུན་པའི་དབུས་སྤྱི་ཁྱབ་འདེམས་བསྐོ་ལྷན་ཚོགས་ཀྱི་གཙོ་འཛིན་བཅས་ཀྱི་ཐུགས་འགན་བཞེས།
ཕྱི་ལོ་ ༡༩༨༠ ལོར་དཔལ་འབྱོར་ལས་ཁུངས་ཀྱི་དྲུང་ཆེའི་ལས་འགན་བཞེས་པ་དང༌་། ཕྱི་ལོ་ ༡༩༨༣ ལོའི་ཟླ་ ༣ པར་དཔལ་འབྱོར་བཀའ་བློན་དུ་བསྐོ་གཞག་གནང་། ཕྱི་ལོ་ ༡༩༨༧ ལོར་འཆར་འགོད་ལྷན་ཚོགས་དབུ་ཚུགས་པ་ནས་བཟུང་བཀའ་ཤག་གི་ལས་བགོས་ལྟར་འཆར་འགོད་ལྷན་ཚོགས་ཀྱི་ཐུགས་འགན་གཅིག་ལྕོགས་སུ་བཞེས་ཤིང་། ཕྱི་ལོ་ ༡༩༩༠ ལོར་འཆར་འགོད་ལྷན་ཚོགས་ཀྱི་ཚོགས་གཙོར་རང་འཇགས་བསྐོ་གཞག་བསྩལ་བ་ལྟར་ཐུགས་འགན་བཞེས། གཞན་ཡང་ཆེས་མཐོའི་སློབ་ཡོན་ཚོགས་ཆུང་གི་ཚོགས་མི་དང་། དཔལ་འབྱོར་བདེ་དོན་ལྷན་ཚོགས་ཀྱི་ཚོགས་གཙོ། ཡིད་ཆེས་དགེ་རྩའི་འགན་འཛིན་ལྷན་ཚོགས་ཀྱི་ཚོགས་མི་དང་ཚོགས་གཙོའི་ལས་ཚབ་བཅས་དང་། ཕྱི་ལོ་ ༡༩༩༠ ལོར་སྤྱི་འཐུས་སྐབས་བཅུ་གཅིག་པའི་དབུས་སྤྱི་ཁྱབ་འདེམས་བསྐོ་ལྷན་ཚོགས་ཀྱི་གཙོ་འཛིན་དང་། ལོ་དེའི་ཟླ་ ༩ པར་གོང་ས་སྐྱབས་མགོན་ཏཱ་ལའི་བླ་མའི་འཛམ་གླིང་སྤྱི་ཡོངས་འོས་འགན་ཐེབས་རྩ་ཚོགས་པའི་ཚོགས་མི་བཅས་ཀྱི་ཐུགས་འགན་བཞེས། ཕྱི་ལོ་ ༡༩༩༡ ལོའི་ཟླ་ ༦ ཚེས་ ༢༨ ཉིན་འོས་བསྡུ་ལས་ཁང་གི་སྤྱི་ཁྱབ་འགན་འཛིན་ལས་ཚབ་ཏུ་ཐད་བསྐོ་གནང་། ཕྱི་ལོ་ ༡༩༩༢ ལོའི་ཟླ་ ༣ ཚེས་ ༡༠ ཉིན་ཆེས་མཐོའི་ཁྲིམས་ཞིབ་ཁང་གསར་འཛུགས་སྐབས་ཁྲིམས་ཞིབ་པ་ཆེ་བའི་མཛད་ཁུར་དམ་འབུལ་བཞེས་ཏེ། ཕྱི་ལོ་ ༢༠༠༢ ཟླ་ ༩ ཚེས་ ༡༩ ཉིན་བགྲེས་ཡོལ་དུ་ཕེབས།
