རྒྱ་ནག་ནང་ངོ་རྟགས་མི་ཆོད་པའི་གློ་བའི་ནད་གཞི་ཞིག་ཁྱབ་གདལ་འགྲོ་བཞིན་འདུག

འཛམ་གླིང་འཕྲོད་བསྟེན་སྒྲིག་འཛུགས་ཀྱིས་རྒྱ་ནག་ནང་ངོས་འཛིན་མི་ཐུབ་པའི་གློ་བའི་ནད་གཞི་ཞིག་ཁྱབ་གདལ་དུ་འགྲོ་བཞིན་ཡོད་པས་ཡུལ་མི་རྣམས་ནས་སྔོན་འགོག་གི་ཐབས་ལམ་རྣམས་ངེས་པར་དུ་ལག་བསྟར་བྱ་དགོས་པའི་རེ་སྐུལ་ཞུས་འདུག

ད་ལྟའི་ཆར་རྒྱ་ནག་ནང་ངོས་འཛིན་མི་ཐུབ་པའི་ནད་གཞི་ཞིག་ཁྱབ་གདལ་དུ་ཕྱིན་ཏེ། ཉིན་རེའི་ཆ་སྙོམས་ཐོག་རྒྱ་ནག་གི་བྱིས་པ་ ༧༠༠༠ ཙམ་ལ་ནད་གཞི་ཕོག་ནས་སྨན་ཁང་དུ་བསྟེན་གཏུག་བྱ་དགོས་པའི་ཛ་དྲག་གི་གནས་སྟངས་བྱུང་ཡོད་པ་མ་ཟད། ནད་གཞི་དེ་ཕོག་པའི་བྱིས་པའི་གྲངས་ཚད་ཇེ་མང་དུ་འགྲོ་བཞིན་ཡོད་པར་བརྟེན། འཛམ་གླིང་འཕྲོད་བསྟེན་སྒྲིག་འཛུགས་ཀྱིས་རྒྱ་ནག་གཞུང་ལ་འགོས་ཁྱབ་ཆེ་བའི་ནད་གཞི་དེའི་རང་བཞིན་དང་འགོས་ཁྱབ་བྱུང་སྟངས། ཁྱབ་ཆེ་ལུགས་སོགས་ཞིབ་ཕྲའི་གནས་ཚུལ་མཁོ་སྤྲོད་བྱེད་དགོས་པའི་རེ་སྐུལ་ཞུས་ཡོད་འདུག

དེ་རིང་རྒྱ་གར་གྱི་གསར་ཁང་ (The Print) གིས་གནས་ཚུལ་སྤེལ་བ་ལྟར་ན། རྒྱ་ནག་གཞུང་གིས། རྒྱ་ནག་གི་རྒྱལ་ས་པེ་ཅིན་དང་བྱང་ཤར་ཁུལ་གྱི་ལེའོ་ཉིང་ (Liaoning) ཞིང་ཆེན་ནང་བྱིས་པའི་གློ་ཚད་ནད་གཞི་ཞིག་ཁྱབ་གདལ་ཕྱིན་ཡོད་པ་ལས། ངོས་འཛིན་མི་ཐུབ་ཅིང་འགོས་ཁྱབ་སླ་ཞིང་ཉེན་ཁ་ཆེ་བའི་གློ་བའི་ནད་གཞི་ཞིག་ཁྱབ་གདལ་དུ་ཕྱིན་མེད་ལུགས་སྐོར་སོགས་བརྗོད་འདུག་ལ། ད་ལྟའི་ཆར་རྒྱ་ནག་གཞུང་ཕྱོགས་ནས་རྒྱ་ནག་ནང་འགྲིམ་འགྲུལ་དང་ཚོང་འབྲེལ་སོགས་བཀག་སྡོམ་བྱས་མེད་ནའང་། འབྲེལ་ཡོད་རྒྱ་ནག་གི་དཔོན་རིགས་ཚོས་བྱིས་པའི་ནད་གཞི་དེའི་ཛ་དྲག་གནས་སྟངས་དེ་དང་འབྲེལ་ནས་ཉེན་བརྡ་བཏང་ཡོད་པ་མ་ཟད། སྨན་ཁང་ཁག་ཏུ་ནད་གཞི་དེའི་ཐོག་ལ་ཞིབ་འཇུག་ནན་པོ་བྱེད་མུས་ཡིན་ཚུལ་སོགས་བསྒྲགས་འདུག

ད་ལྟའི་ཆར་རྒྱ་ནག་གི་བྱང་ཁུལ་དུ་བྱིས་པ་མང་པོར་ངོས་འཛིན་མི་ཐུབ་པའི་ནད་གཞི་ཕོག་མཁན་ཇེ་མང་དུ་ཕྱིན་པ་མ་ཟད་ནད་གཞི་དེའི་ཁྱབ་ཚད་ཤུགས་ཆེན་འགྲོ་བཞིན་ཡོད་པར་བརྟེན། རྒྱ་ནག་གི་རྒྱལ་ས་པེ་ཅིན་དུ་ཡོད་པའི་སྨན་ཁང་ནང་ནད་པའི་གྲངས་འབོར་ཇེ་མང་དུ་ཕྱིན་ཏེ་བྱིས་པའི་ཕ་མ་སྤུན་མཆེད་སོགས་སྨན་ཁང་དུ་བང་བསྒྲིགས་ཏེ་འཚང་ཁ་ཤིག་ཤིག་གིས་ཐོ་འགོད་བྱེད་བཞིན་ཡོད་པ་དང་། སྨན་པར་བསྟེན་གཏུག་བྱེད་བཞིན་པའི་གནས་སྟངས་ཛ་དྲག་ཅན་དུ་གྱུར་ཡོད་འདུག དེ་འབྲེལ་རྒྱ་ནག་གི་གྲོང་ཁྱེར་ཏ་ལི་ཡན་ (Dalian) དུ་ཡོད་པའི་སྨན་ཁང་ཞིག་གི་སྨན་པ་ཀྲང་ལི་ (Zhang Li) ཟེར་བ་ཞིག་གིས། བྱིས་པ་ཆུང་ཆུང་གི་འཕྲོད་བསྟེན་གྱི་ཐོག་ལ་སེམས་ཁྲལ་ཆེ་ཤོས་ཡོད་པ་དང་། གློ་བའི་ནད་གཞི་འདྲ་མིན་ཡོད་པར་བརྟེན། ནད་གཞི་ཁ་ཤས་ལ་བཅོས་ཐབས་ཡོད་ཀྱང་བྱིས་པའི་འཕྲོད་བསྟེན་ལ་གནོད་སྐྱོན་ཚབས་ཆེན་ཡོང་གི་ཡོད་སྐོར། གློ་བའི་ནད་གཞི་དེའི་ནང་ངོ་རྟགས་མི་འཕྲོད་པའི་ནད་འབུ་མང་པོ་ཡོད་པ་མ་ཟད། གློ་བའི་ནད་གཞི་ཁ་ཤས་བཅོས་ཐུབ་ཀྱི་ཡོད་ཀྱང་། ནད་གཞི་ཁ་ཤས་བཅོས་ཐུབ་ཀྱི་མེད་སྐོར། ཏོག་དབྱིབས་གཉན་རིམས་ཀྱི་རྗེས་ནས་འགོས་ཁྱབ་ཆེ་བའི་ནད་འབུའི་ནད་རིགས་མི་འདྲ་བ་མང་བའི་རྐྱེན་གྱིས། མིའི་སྲོག་ལའང་ཉེན་ཁ་ཆེ་སྐོར་སོགས་བརྗོད་འདུག

ཟླ་འདིའི་ཕྱི་ཚེས་ ༢༢ ཉིན་འཛམ་གླིང་འཕྲོད་བསྟེན་སྒྲིག་འཛུགས་ཀྱིས། རྒྱ་ནག་ནང་བྱིས་པར་ངོ་རྟགས་མི་འཕྲོད་པའི་ནད་གཞི་ཕོག་བཞིན་པ་དང་འབྲེལ་ནས་གཞུང་འབྲེལ་གསལ་བསྒྲགས་ཤིག་སྤེལ་བའི་ནང་། རྒྱ་ནག་གཞུང་གིས་བྱིས་པའི་གློ་ཚད་ནད་གཞི་དེར་བརྟག་དཔྱད་གཏོང་གི་ཡོད་ཁར། ནད་པ་རྣམས་ལ་ལྟ་རྟོག་ཡག་པོ་བྱེད་བཞིན་ཡོད་སྐོར་བརྗོད་འདུག་མོད། རྒྱ་ནག་བྱང་ཁུལ་དུ་ཡོད་པའི་ཕྲུ་གུའི་ནང་ལ་ངོ་རྟགས་མི་ཆོད་པའི་གློ་བའི་ནད་གཞི་ཕོག་མཁན་ཇེ་མང་དུ་འགྲོ་བཞིན་ཡོད་པ་དང་། ཁ་གསལ་མེད་པའི་གནས་ཚུལ་མང་པོ་བྱུང་གི་ཡོད་སྟབས། རྒྱ་ནག་གཞུང་གིས་ངོས་འཛིན་མི་ཐུབ་པའི་གློ་བའི་ནད་གཞི་དེའི་འབྱུང་རྐྱེན་སོགས་ཞིབ་ཕྲའི་གནས་ཚུལ་མཁོ་སྤྲོད་དགོས་པའི་འབོད་སྐུལ་ཞུས་ཡོད་འདུག

འདི་ལོའི་ཕྱི་ཟླ་ ༡༠ པའི་ཟླ་དཀྱིལ་ནས་བཟུང་རྒྱ་ནག་བྱང་ཁུལ་དུ་ཡོད་པའི་བྱིས་པ་ཆུང་ཆུང་ཚོར་ངོས་འཛིན་མི་ཐུབ་པའི་གློ་བའི་ནད་གཞི་ཞིག་འགོས་ཁྱབ་ཤུགས་ཆེན་བྱུང་ཡོད་ཅིང་། དེ་ནི་འདས་པའི་ལོ་ངོ་གསུམ་གོང་གི་ཏོག་དབྱིབས་གཉན་རིམས་ཀྱི་ཁྱབ་ཚད་ལས་ཀྱང་རྒྱ་ནག་ནང་ཁྱབ་གདལ་ཆེ་བའི་ནད་གཞི་ཞིག་ཆགས་ཡོད་པར་བརྟེན། འཛམ་གླིང་འཕྲོད་བསྟེན་སྒྲིག་འཛུགས་ཀྱིས་རྒྱ་ནག་ནང་ངོས་འཛིན་མི་ཐུབ་པའི་གློ་བའི་ནད་གཞི་དེ་འགོས་ཁྱབ་མི་ཡོང་བ་དང་སྔོན་འགོག་སླད། རྒྱ་ནག་གི་མི་མང་རྣམས་ནས་ཁ་རས་ངེས་པར་དུ་གྱོན་པ་དང་ཁྱིམ་དུ་སྡོད་དགོས་པ། འགོག་ཁབ་རྒྱག་དགོས་པ། དེ་བཞིན་བརྟག་དཔྱད་ངེས་པར་དུ་བྱ་དགོས་པ་དང་། རྒྱང་ཐག་འཇོག་དགོས་པ་སོགས་སྔོན་འགོག་གི་ཐབས་ལམ་དེ་དག་ངེས་པར་དུ་ལག་བསྟར་བྱེད་པའི་འབོད་སྐུལ་ཞུས་ཡོད་འདུག

ཁ་སང་ཕྱི་ཚེས་ ༢༣ ཉིན་འཛམ་གླིང་འཕྲོད་བསྟེན་འཛུགས་ཀྱིས། རྒྱལ་ཁབ་ཅིག་གིས་འཛམ་གླིང་གི་གནམ་གཤིས་འགྱུར་ལྡོག་ཐོག་ལ་གདོང་ལེན་བྱེད་ཐུབ་པར་མི་མང་གི་འཕྲོད་བསྟེན་ལེགས་པོ་དགོས་པ་དེ་གལ་ཆེ་ཤོས་ཤིག་ཡིན་པའི་སྐོར་ལ་གསལ་བསྒྲགས་ཤིག་སྤེལ་བའི་ནང་། ཉེ་བའི་ཆར་འཛམ་གླིང་གི་གནམ་གཤིས་འགྱུར་ལྡོག་རྐྱེན་གྱིས་མིའི་འཕྲོད་བསྟེན་ལ་གནོད་སྐྱོན་ཚབས་ཆེན་གཏོང་བཞིན་ཡོད་པ་ལྟར། གནམ་གཤིས་འགྱུར་ལྡོག་གི་རྐྱེན་གྱིས་ནད་རིགས་འདྲ་མིན་བྱུང་སྟེ། མང་ཚོགས་ཁྲོད་ཁྱབ་གདལ་ཤུགས་ཆེན་འགྲོ་དང་འགྲོ་མུས་ཡིན་པ་མ་ཟད། འཛམ་གླིང་གི་ཚ་དྲོད་འཕེལ་རྐྱེན་གྱིས་ཤིང་ནགས་མེར་བསྲེགས་པ་དང་། མཁའ་རླུང་འབག་བཙོག་ཤུགས་ཆེར་ཕྱིན་ཏེ། དབུགས་འབྱིན་རྔུབ་ཀྱི་དཀའ་ངལ་དང་གློ་བའི་ནད་རིགས་འདྲ་མིན་བྱུང་གི་ཡོད་པར་བརྟེན། འགྲོ་བ་མི་སྤྱི་ཡོངས་ཀྱི་འཕྲོད་བསྟེན་ལ་དོ་ཕོག་ཤུགས་ཆེན་འགྲོ་བཞིན་ཡོད། དེར་བརྟེན། མི་མང་གི་འཕྲོད་བསྟེན་ནི་གལ་གནད་ཆེ་ཤོས་ཤིག་ཡིན་པ་མ་ཟད། འཛམ་གླིང་གི་གནམ་གཤིས་འགྱུར་ལྡོག་ལ་གདོང་ལེན་བྱེད་ཐུབ་པར་མི་མང་གི་འཕྲོད་བསྟེན་ལེགས་པོ་དགོས་པ་དང་ལྟ་སྲུང་ལེགས་པོ་བྱ་དགོས་རྒྱུ་གལ་ཆེ་ཤོས་ཡིན་སྐོར་སོགས་བཀོད་འདུག

གསར་འགོད་པ། བསྟན་འཛིན་ཕུར་བུ།

རྩོམ་སྒྲིག་པ། སྐལ་བཟང་སྦྱིན་པ།