རྒྱ་ནག་གཞུང་གིས་མགོ་ལོག་པདྨ་རྫོང་གི་གླུ་བ་མགོ་ལོག་དཔལ་ལྡན་ལགས་སུ་ལོ་གསུམ་གྱི་བཙོན་འཇུག་ཁྲིམས་ཐག་བཅད་ནས་ད་ལྟ་མགོ་ལོག་པདྨ་རྫོང་གི་བཙོན་ཁང་དུ་ཡོད་འདུག
རྒྱ་ནག་གཞུང་གིས་བོད་ནང་གི་སྒྱུ་རྩལ་བ་དང་རྩོམ་པ་པོ། མཁས་དབང་སོགས་ལ་དམ་དྲག་དང་ནག་ཉེས་སྣ་ཚོགས་གཡོགས་ནས། གང་བྱུང་འཛིན་བཟུང་བཀག་ཉར་དང་བཙན་འཁྲིད་སོགས་བྱས་དང་བྱེད་མུས་ཡིན་པ་ལྟར། ཉེ་ལམ་རྒྱ་ནག་གཞུང་གིས་མགོ་ལོག་པདྨ་རྫོང་དྷི་མདའ་ཡུལ་ཚོའི་ཡོ་སྟག་སྡེ་བ་ནས་ཡིན་པའི་བོད་ཀྱི་ན་གཞོན་གླུ་བ་མགོ་ལོག་དཔལ་ལྡན་ལགས་ཀྱིས་ལ་རྒྱའི་གླུ་ཞིག་བླངས་བར་ཁ་གཡར་ནས་འཛིན་བཟུང་བཙན་ཁྲིད་བྱས་ཏེ། ད་ལྟ་མགོ་ལོག་པདྨ་རྫོང་གི་བཙོན་ཁང་དུ་བཀག་ཉར་གྱིས་ལོ་གསུམ་གྱི་བཙོན་འཇུག་ཁྲིམས་ཐག་བཅད་ཡོད་འདུག
འདི་གའི་གསར་འགོད་པར་བོད་ནང་གི་འབྲེལ་ཡོད་བོད་མི་ཞིག་གིས། རྒྱ་ནག་གཞུང་གིས་ཟླ་ཤས་སྔོན་པདྨ་རྫོང་ཡོ་སྟག་གི་གླུ་བ་མགོ་ལོག་དཔལ་ལྡན་ལགས་ཀྱིས་ལ་རྒྱའི་གླུ་ཞིག་བླངས་པའི་ཉེས་མིང་གི་འོག་ནས། འཛིན་བཟུང་བཙན་ཁྲིད་བྱས་ཡོད་པ་མ་ཟད། དུས་ཡུན་གང་འཚམ་ཞིག་ལ་བཀག་ཉར་དང་འདྲི་རྩད་བྱས་པ་བརྒྱུད། གསང་བའི་ཐོག་ནས་ཁོང་ལ་ལོ་གསུམ་གྱི་བཙོན་འཇུག་ཁྲིམས་ཐག་བཅད་ཡོད་སྐོར་བརྗོད་བྱུང་།
ཡང་ཁོང་གིས། རྒྱ་ནག་གཞུང་གིས་མགོ་ལོག་དཔལ་ལྡན་ལ་ཁྲིམས་དང་མཐུན་པའི་ཐོག་ནས་ཁྲིམས་བཤེར་བྱས་མེད། སྤྱིར་མགོ་ལོག་པདྨ་རྫོང་དུ་ཁྲིམས་ཁང་ཡོད་ཀྱང་གནད་དོན་དེ་ནི་དམར་ཤོག་ཏང་གི་གནད་དོན་ཞིག་ཏུ་ངོས་འཛིན་གྱིས་མགོ་ལོག་ཁུལ་ཐོག་ནས་ཐག་གཅོད་བྱ་དགོས་སྐོར་བརྗོད་ཡོད་ཀྱང་། མགོ་ལོག་པདྨ་རྫོང་གི་ཉེན་རྟོག་པས་མགོ་ལོག་དཔལ་ལྡན་ལགས་ཀྱི་ནང་མིར་ཁོང་ལ་ལོ་གསུམ་གྱི་ཁྲིམས་ཐག་བཅད་པ་རེད་ཟེར་བ་ཙམ་མ་གཏོགས། ནང་མིར་གཞུང་འབྲེལ་གྱི་ཐོག་ནས་ཁྲིམས་ཐག་བཅད་པའི་ཡིག་ཆ་གང་ཡང་འབྱོར་མེད་སྐོར་སོགས་འགྲེལ་བརྗོད་གནང་བྱུང་།
གླུ་བ་མགོ་ལོག་དཔལ་ལྡན་ལགས་ནི་མགོ་ལོག་པདྨ་རྫོང་དྷི་མདའ་ཡུལ་ཚོའི་ཡོ་སྟག་སྡེ་བ་ནས་ཡིན་ཞིང་། ཁོང་ཉིད་རྒྱུན་དུ་ནས་རྡུང་ལེན་སོགས་ལེན་རྒྱུར་དགའ་པོ་ཡོད་ལ། འདས་ལོར་སྨིན་ཐང་གསེར་མོ་འཚོས་གཙོ་སྒྲུབ་བྱས་པའི་རྡུང་ལེན་འགྲན་སྡུར་ཁྲོད་ཨང་རིམ་དྲུག་པ་བླངས་ནས། ཁོང་གི་ལྷད་མེད་པའི་མི་གཤིས་དྭངས་མ་དེར་བོད་ཁམས་སུ་བསྔགས་བརྗོད་བྱེད་མཁན་མང་དག་ཅིག་བྱུང་ཡོད་ལ། འདས་ལོར་ཁོང་གིས་ཨ་མ་དྲན་གླུ་ཞེས་པའི་རྡུང་ལེན་བརྩམས་ཆོས་ཤིག་ཀྱང་དྲ་ལམ་དུ་བཀྲམ་ཡོད་པ་རེད། ད་ལྟ་གླུ་བ་དཔལ་ལྡན་ལགས་ཀྱི་མགྱོགས་འཕྲིན་ལ་རྗེས་འདེད་བྱེད་མཁན་མི་གྲངས་ ༩༨༠༠༠།༥ ལྷག་ཡོད་ཀྱང་། ཁོང་གིས་འདི་ལོའི་ཕྱི་ཟླ་ ༣ ཚེས་ ༢༦ རྗེས་ནས་མགྱོགས་འཕྲིན་དྲ་ལམ་དུ་གླུ་དང་པར་སོགས་ཁྱབ་སྤེལ་བྱས་མེད་པ་རེད།
བསྐྱར་བཅོས། དེ་སྔོན་གྱི་གསར་འགྱུར་ནང་མགོ་ལོག་པདྨ་རྫོང་ཐོག་ཏུ་ཁྲིམས་ཁང་མེད་པས་མགོ་ལོག་ཁུལ་ཐོག་ནས་ཁྲིམས་ཐག་གཅོད་དགོས་སྐོར་བྲིས་ཡོད་ཀྱང་། མགོ་ལོག་པདྨ་རྫོང་ཐོག་ཏུ་ཁྲིམས་ཁང་ཡོད་ཀྱང་དཔལ་ལྡན་གྱི་གནད་དོན་དེ་ཚབས་ཆེན་དུ་བརྩིས་ནས་ཁུལ་ཁྲིམས་ཁང་ནས་ཐག་གཅོད་བྱེད་དགོས་སྐོར་བརྗོད་པ་ཞིག་ཡིན་འདུག་པས་བཟོ་བཅོས་བྱས་ཡོད།
གསར་འགོད་པ། དཔལ་ལྡན།
རྩོམ་སྒྲིག་པ། སྐལ་བཟང་སྦྱིན་པ།
