སྲིད་སྐྱོང་མཆོག་གིས་ཨ་རིའི་མེ་ནེ་སོ་ཌར་ས་གནས་སུ་འཚམས་གཟིགས་གནང་།

སྲིད་སྐྱོང་མཆོག་གིས་ཕ་མ་དང་ཕྲུ་གུ་རྣམས་ཀྱིས་རང་ཁྱིམ་དུ་ངེས་པར་བོད་སྐད་བཤད་པའི་གོམས་གཤིས་འཇགས་དགོས་གལ་གསུངས་འདུག

ཁ་སང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཨ་རིའི་མེ་ནེ་སོར་ཌ་བོད་རིགས་སྤྱི་མཐུན་ཚོགས་པའི་རིག་གཞུང་སློབ་གྲྭར་འཚམས་གཟིགས་ཕེབས་ཡོད་ཅིང་། སྐབས་དེར་སྲིད་སྐྱོང་མཆོག་གིས། བོད་པ་རྣམས་ཐོག་མར་མེ་ནེ་སོར་ཌར་སླེབས་པ་ནས་བཟུང་བོད་རིགས་སྤྱི་མཐུན་ཚོགས་པའི་འགན་འཁུར་འོག་བོད་ཀྱི་རིག་གཞུང་སློབ་གྲྭ་འཛུགས་མཁན་དང་ཕྱག་ལས་གནང་མཁན་ཡོངས་ལ་ཐུགས་རྗེ་ཆེ་ཞུ་རྒྱུ་ཡིན། སློབ་གྲྭའི་ནང་དུ་དགེ་རྒན་གལ་ཆེན་པོ་ཆགས་ཡོད། དགེ་རྒན་མེད་ཚེ་སློབ་གྲྭ་ཁུངས་འཁྱོལ་རྒྱུ་ཁག་པོ་ཆགས་ཡོད། དགེ་རྒན་རྣམས་ཀྱིས་སྒེར་གྱི་ལས་ཀ་དང་ཡོང་སྒོ་སོགས་ལ་མ་བལྟས་པར་གཟའ་སྤེན་པ་དང་ཉི་མར་སློབ་གྲྭ་འཚོག་བཞིན་ཡོད། མི་རབས་གསར་བ་གསོ་སྐྱོང་ཞུ་བར་འདི་ལས་ལྷག་པའི་ཞབས་འདེགས་ཤིག་མེད་པས། དགེ་རྒན་རྣམ་པ་ཚོར་ཐུགས་རྗེ་ཆེ་ཞུ་སྙིང་འདོད་བྱུང་། ཕྲུ་གུ་ཚོས་བསམ་བློའི་ཐག་གཅོད་བྱེད་ཐུབ་ཀྱི་མེད་པར་བརྟེན། ཕ་མ་རྣམས་ཀྱིས་འགན་བཞེས་ཏེ་ཕྲུ་གུ་ངེས་པར་དུ་སློབ་གྲྭར་བསྐྱལ་དགོས། ཕྲུ་གུ་རྣམས་མཉམ་དུ་འཛོམས་ཏེ་བོད་སྐད་བཤད་པ་དང་། བོད་ཆས་གྱོན་པའི་གོམས་གཤིས་ཤིག་ཆགས་འདུག ཕྲུ་གུ་རྣམས་ཀྱིས་ཁྱིམ་དུ་ཕ་མ་དང་མཉམ་དུ་བོད་སྐད་བཤད་དགོས། ཕ་མ་རྣམས་ཀྱིས་ཀྱང་ངེས་པར་དུ་བོད་སྐད་བཤད་དགོས། བྱིས་པའི་སྐབས་ནས་བཟུང་བོད་སྐད་བཤད་པའི་གོམས་གཤིས་ཡོད་ཚེ། ལོ་ཆེན་པོ་སོན་ཡང་རང་བཞིན་གྱིས་བོད་སྐད་ཡག་པོ་བཤད་ཐུབ་ཀྱི་ཡོད། ཆུང་དུས་ཀྱི་སྐབས་ལ་བོད་སྐད་མ་བཤད་ཚེ། ཆེན་པོ་ཆགས་དུས་སློབ་གྲྭ་གཞན་དུ་འགྲོ་དགོས་པས། དབྱིན་སྐད་མ་གཏོགས་བོད་སྐད་བཤད་པའི་གོ་སྐབས་ཡོད་པ་མ་རེད། ཡུ་རོབ་ཕྱོགས་ཀྱི་བོད་པ་ཞིག་གིས། ཁོས་བོད་སྐད་ཤེས་ཀྱི་མེད་པ་དེ་ཕ་མའི་ཆུང་དུས་བོད་སྐད་མ་བཤད་པའི་སྐྱོན་རེད་ཅེས་བཤད་ཡོད་འདུག རྗེས་མར་ཕྲུ་གུས་ཆུང་དུས་བོད་སྐད་སྦྱངས་བའི་གོ་སྐབས་སྤྲད་མ་སོང་ཟེར་བ་ཞིག་མེད་པར་བཟོ་དགོས་པ་ཕ་མའི་འོས་འགན་རེད། ཕྲུ་གུ་ཚོས་ཁྱིམ་དུ་ཕ་མ་དང་མཉམ་དུ་ངེས་པར་དུ་བོད་སྐད་བཤད་དགོས། ཞེས་གསུངས་འདུག

ཡང་ཟླ་འདིའི་ཕྱི་ཚེས་ ༢༥ ཉིན་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་མེ་ནེ་སོ་ཌའི་ས་གནས་བོད་རིགས་མི་མང་ལ་འཚམས་གཟིགས་གནང་ཡོད་ཅིང་། ༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་འཕྲོད་བཞེས་སྐོར་ལ་སྲིད་སྐྱོང་མཆོག་གིས། ཟླ་འདིའི་ཕྱི་ཚེས་ ༡༣ ཉིན་གྱི་ཞོགས་པར་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་ཁ་ཞུས་ཏེ། བོད་མིའི་སྒྲིག་འཛུགས་ཀྱི་རྒྱུན་ལྡན་གྱི་ལས་དོན་བྱེད་ཕྱོགས་དང་། གནད་དོན་བྱེ་བྲག་ཁ་ཤས་ཀྱི་ཐོག་སྙན་སེང་ཞུ་རྒྱུ་བྱུང་། སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་ཁམས་གསལ་ཐང་ཡིན་པ་དང་། ཉིན་ལྔ་དྲུག་གི་མཚམས་སུ་མི་ལྔ་བརྒྱ་དྲུག་བརྒྱ་ལྷག་ལ་རྟག་ཏུ་མཇལ་ཁ་གནང་བཞིན་ཡོད་ཅིང་། ༧མགོན་པོ་གང་ཉིད་དགུང་ལོ་མཐོ་བོ་ཡིན་པར་བསྟུན་སྐུ་གཟུགས་ཀྱི་གནས་བབ་ཐོག་ནས་སྔོན་མ་ནང་བཞིན་འཛམ་གླིང་རྒྱལ་ཁབ་ཁག་ཏུ་ཆིབས་བསྒྱུར་གནང་ཐུབ་ཀྱི་མེད་ཀྱང་། གསུང་ཆོས་དང་བརྟན་བཞུགས་ཀྱི་སྐབས་སུ་ང་ཚོའི་སེམས་ཤུགས་མི་ཆག་པའི་ཆེད་དུ། དགུང་ལོ་བརྒྱ་དང་བཅུ་ལྷག་བཞུགས་པའི་དགོངས་བཞེས་གནང་ཡོད་པ་རེད། སྐུ་ཚེ་བརྟན་པར་བླ་སློབ་དམ་ཚིག་གཙང་མ་དགོས་པས། བླ་མའི་ཐུགས་བསྐྱེད་བཀའ་དགོངས་གཞིར་བཟུང་ཐོག་བསྐྱོད་ཐུབ་ཚེ། བོད་ཀྱི་བསྟན་སྲིད་གཉིས་ཀ་ཕན་ཐོགས་པ་ཞིག་རེད་ཅེས་གསུངས་འདུག

ཡང་བོད་རྒྱའི་དཀའ་རྙོག་གི་སྐོར་ལ་སྲིད་སྐྱོང་མཆོག་གིས། བཙན་བྱོལ་བོད་མིའི་སྒྲིག་འཛུགས་དབུ་མའི་ལམ་གྱི་སྲིད་ཇུས་ཀྱི་ཐོག་འཚེ་བ་མེད་པ་དང་ཞི་མོལ་ལམ་ཁར་འགྲོ་བཞིན་ཡོད་པ་དང་། བོད་རྒྱའི་དཀའ་རྙོག་མ་སེལ་བར་དུ། རྒྱལ་སྤྱིའི་སྤྱི་ཚོགས་སྟེང་དུ་བོད་དོན་དྲིལ་བསྒྲགས་བྱ་རྒྱུ་གལ་ཆེན་པོ་ཡིན་པས། ད་ལྟའི་བཀའ་ཤག་གིས་འཛམ་གླིང་གི་གསར་ལམ་ཆེ་ཤོས་དང་བརྒྱུད་ལམ་མང་པོ་ཞིག་ལ་བོད་དོན་སྐོར་གླེང་སློང་བྱེད་པར་གོ་སྐབས་ཡག་པོ་བྱུང་ཡོད་སྐོར་དང་། བོད་པ་རྣམས་འཛམ་གླིང་གི་རྒྱལ་ཁབ་ཉི་ཤུ་ལྷག་གི་ནང་དུ་ཐོར་ཏེ་རྒྱལ་ཁབ་དེ་དག་གི་མི་སེར་ཆགས་ཡོད་པ་དང་། རྒྱལ་ཁབ་དེའི་ནང་དུ་རང་ཉིད་ཀྱི་མགོ་ཁྲིད་ལ་འོས་ཤོག་བླུགས་པའི་ཐོབ་ཐང་ཡོད་པས། བོད་དོན་ཐོག་རྒྱབ་སྐྱོར་གནང་བར་འབོད་སྐུལ་ཞུ་ཐུབ་པའི་གོ་སྐབས་ཡོད་པ་མ་ཟད། ད་ལྟའི་བཀའ་ཤག་གིས་རྒྱལ་ཁབ་སོ་སོའི་ནང་དུ་དྭང་བླངས་བོད་དོན་ཞུ་གཏུགས་ཀྱི་ལས་འགུལ་ཤུགས་ཆེན་འགྲོ་བཞིན་ཡོད་པ་དེར་གཞོན་སྐྱེས་རྣམས་མཉམ་ཞུགས་གང་མང་བྱས་ཏེ། རྒྱལ་སྤྱིའི་ཐོག་བོད་དོན་དྲིལ་བསྒྲགས་གལ་ཆེན་ཡིན་སྐོར་སོགས་གསུངས་འདུག

གསར་འགོད་པ། བྱམས་པ་ཚེ་རིང་།

རྩོམ་སྒྲིག་པ། སྐལ་བཟང་སྦྱིན་པ།