རྒྱལ་སྤྱིའི་བོད་དོན་ལས་འགུལ་ཁང་གིས་ཨ་རིའི་ཕྱི་འབྲེལ་ལས་དོན་ཚོགས་ཆུང་གིས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་དེ་ནར་འགྱངས་མེད་པར་གཏན་འབེབས་བྱ་རྒྱུའི་ནན་སྐུལ་ཞུས་ཡོད་འདུག
ཁ་སང་ཕྱི་ཚེས་ ༢༧ ཉིན་རྒྱལ་སྤྱིའི་བོད་དོན་ལས་འགུལ་ཁང་གིས་གནས་ཚུལ་སྤེལ་བ་ལྟར་ན། སང་ཉིན་ཕྱི་ཚེས་ ༢༩ ཉིན་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་དེ་གཏན་འབེབས་ཡོང་བར་འོས་བསྡུ་བྱ་རྒྱུ་ཡིན་སྟབས། རྒྱལ་སྤྱིའི་བོད་དོན་ལས་འགུལ་ཁང་གིས་ཁྲིམས་འཆར་བསྐྱར་བཅོས་ལ་རྒྱབ་སྐྱོར་ཡོད་པ་དང་། ཨ་རིའི་ཕྱི་འབྲེལ་ལས་དོན་ཚོགས་ཆུང་གིས་ཁྲིམས་འཆར་དེ་ནར་འགྱངས་མེད་པར་གཏན་འབེབས་བྱ་ཐུབ་པའི་འབོད་སྐུལ་ཞུས་ཡོད་འདུག
ཨ་རིའི་ཕྱི་འབྲེལ་ལས་དོན་ཚོགས་ཆུང་གི་ཚོགས་མི་སྐུ་ཞབས་གྷེ་རི་གྷོ་རི་མིག་སི་ལགས་ཀྱིས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་བསྐྱར་བཅོས་གནང་ཡོད་པ་དང་། ཁྲིམས་འཆར་བསྐྱར་བཅོས་བྱས་པ་དེས་ཞི་བའི་ལམ་ནས་བོད་རྒྱའི་དཀའ་རྙོག་སེལ་བར་ཨ་རིས་མུ་མཐུད་དུ་རྒྱབ་སྐྱོར་གནང་རྒྱུ་དང་། བོད་མི་རྣམས་ལ་རྒྱབ་སྐྱོར་ཆེད་དུ་གོམ་པ་མདུན་སྤོས་བྱས་པ་ཞིག་མཚོན་གྱི་ཡོད་སྐོར་སོགས་གསལ་ཡོད་འདུག
དེའི་ཐད་རྒྱལ་སྤྱིའི་བོད་དོན་ལས་འགུལ་ཁང་གི་ཚོགས་གཙོ་བསྟན་ཆོས་རྒྱ་མཚོ་ལགས་ཀྱིས། བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་དེའི་བརྒྱུད་རྒྱ་ནག་པེ་ཅིན་གཞུང་ལ་གྲོས་མོལ་ཁོ་ནའི་ལམ་ནས་བོད་རྒྱའི་དཀའ་རྙོག་སེལ་ཐུབ་རྒྱུ་ཡིན་པའི་བརྡ་ལན་གསལ་པོ་སྤྲད་ཡོད་པ་རེད། ང་རང་གིས་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ཇིམ་མེག་གྷོ་ཝན་ (Jim McGovern) ལགས་དང་། ཨ་རིའི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་དང་གྲོས་ཚོགས་འོག་མའི་འཐུས་མི་སྐུ་ཞབས་མཱ་ཡི་ཀེལ་མེ་ཁོལ་ (Michael McCaul) ལགས། ཨ་རིའི་ཕྱི་འབྲེལ་ལས་དོན་ཚོགས་ཆུང་གི་ཚོགས་མི་སྐུ་ཞབས་གྷེ་རི་གྷོ་རི་མིག་སི་ (Gregory Meeks) ལགས་བཅས་ཀྱིས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་ལ་མུ་མཐུད་དུ་རྒྱབ་སྐྱོར་གནང་བར་ཐུགས་རྗེ་ཆེ་ཞུ་ཡི་ཡོད། ལས་འགུལ་ཁང་གིས་ཀྱང་ཨ་རིའི་གྲོས་ཚོགས་སུ་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་གཏན་འབེབས་ཡོང་རྒྱུའི་རེ་བ་བྱེད་བཞིན་ཡོད། ཅེས་གསུངས་ཡོད་འདུག
འདི་ལོའི་ཕྱི་ཟླ་ ༢ ཚེས་ ༨ ཉིན་ཨ་རིའི་གྲོས་ཚོགས་འོག་མའི་འཐུས་མི་དང་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་སྐུ་ཞབས་མཱ་ཡི་ཀེལ་མེག་ཁོལ་ (Michael McCaul) ལགས་དང་། ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ཇིམ་མེག་གྷོ་ཝན་ (Jim McGovern) ལགས། གྲོས་ཚོགས་གོང་མའི་འཐུས་མི་སྐུ་ཞབས་ཇེ་ཧྥི་མར་ཁི་ལེ་ (Jeff Merkley) ལགས། གྲོས་ཚོགས་གོང་མའི་འཐུས་མི་སྐུ་ཞབས་ཊོ་ཌི་ཡང་ (Todd Young) ལགས་བཅས་ཀྱིས་ཨ་རིའི་གྲོས་ཚོགས་སུ་བོད་རྒྱའི་དཀའ་རྙོག་སེལ་ཐབས་སུ་རྒྱབ་སྐྱོར་གྱི་ཁྲིམས་འཆར་ (Promoting a Resolution to the Tibet-China Conflict Act) བསྐྱར་དུ་ངོ་སྤྲོད་གནང་ཡོད་འདུག
འདས་ལོའི་ཕྱི་ཟླ་ ༧ པའི་ནང་ཨ་རིའི་གྲོས་ཚོགས་འོག་མའི་ནང་བོད་དོན་རྒྱབ་སྐྱོར་གནང་མཁན་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ཇིམ་མེག་གྷོ་ཝན་ལགས་དང་། ཨ་རིའི་གྲོས་ཚོགས་འོག་མའི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཞོན་གྲོས་ཚོགས་འཐུས་མི་སྐུ་ཞབས་མཱ་ཡི་ཀེལ་མེ་ཁོལ་ལགས་གཉིས་ཀྱིས་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་གསར་པ་བཏོན་ཡོད་འདུག་ལ། ཁྲིམས་འཆར་དེའི་ནང་། ད་ལྟའང་བོད་རྒྱའི་དཀའ་རྙོག་སེལ་མེད་པ་དང་། རྒྱལ་སྤྱིའི་ཁྲིམས་ཀྱི་ཐོག་ནས་བོད་ཀྱི་ཁྲིམས་མཐུན་གྱི་གནས་བབ་ད་དུང་ཐག་གཅོད་གནང་མེད་པར་ངོས་འཛིན་པའི་ཐོག་ནས། རྒྱལ་སྤྱིའི་ཁྲིམས་གཞིར་བཟུང་བོད་མི་རྣམས་ལ་བོད་ཀྱི་བདག་དབང་དང་རང་ཐག་རང་གཅོད་ཀྱི་ཐོབ་ཐང་ཡོད་པ་དང་། རྒྱ་ནག་གཞུང་གིས་བོད་ཀྱི་ལོ་རྒྱུས་འཁྱོག་བཤད་བྱེད་བཞིན་པར་ངོས་ལེན་མེད་པ་མ་ཟད། བོད་རྒྱའི་དཀའ་རྙོག་སེལ་ཐབས་སུ་བོད་རྒྱ་འབྲེལ་མོལ་གྱི་གནས་བབ་སླར་གསོ་མ་ཐུབ་པ་དེ་རྒྱ་ནག་གི་ནོར་འཁྲུལ་ཡིན་སྐོར་དང་། བོད་རྒྱའི་དཀའ་རྙོག་སེལ་བར་བོད་མི་དམངས་ལ་རང་ཐག་རང་གཅོད་ཀྱི་ཐོབ་ཐང་ཡོད་པར་བརྟེན། ཞི་བའི་ལམ་ནས་བོད་རྒྱའི་དཀའ་རྙོག་སེལ་བར་ཨ་རིས་མུ་མཐུད་དུ་རྒྱབ་སྐྱོར་གནང་རྒྱུ་ཡིན་པ་སོགས་གསལ་ཡོད་འདུག
གསར་འགོད་པ། བསྟན་འཛིན་ཕུར་བུ།
