ཨ་རིའི་དམག་དོན་གནམ་གྲུ་ཞིག་བརྡབ་སྐྱོན་བྱུང་། 

ཨ་རིའི་དམག་དོན་གནམ་གྲུ་ཞིག་ཉི་ཧོང་གི་ཡ་ཀུ་ཤི་མའི་མཚོ་གླིང་ཁུལ་དུ་བརྡབ་སྐྱོན་བྱུང་ནས་ད་ལྟ་ཉི་ཧོང་གི་མྱུར་སྐྱོབ་ཚན་པས་འཚོལ་ཞིབ་བྱེད་མུས་ཡིན་འདུག

དེ་རིང་ཕྱི་ཚེས་ ༢༩ ཉིན་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་སྤེལ་བ་ལྟར་ན། དེ་རིང་ཉི་ཧོང་གི་གྲོང་ཁྱེར་ཨི་ཝ་ཀུ་ནི་( Iwakuni) ནས་ཨ་རིའི་མཁའ་དམག་གི་ས་ཚིགས་ཆེ་ཤོས་ཡོད་སའི་ཉི་ཧོང་གི་ཀ་དྷི་ན་ (Kadena) རུ་འཕུར་སྐྱོད་བྱས་པའི་ཨ་རིའི་སི་ཝི་ ༢༢ (CV-22) རྟགས་ཅན་གྱི་དམག་དོན་གནམ་གྲུ་ཞིག་ཡ་ཀུ་ཤི་མ་ (Yakushima) མཚོ་གླིང་ཁུལ་དུ་བརྡབ་སྐྱོན་བྱུང་ཡོད་ཅིང་། དེའི་ཁྲོད་ཨ་རིའི་དམག་དོན་མི་སྣ་གྲངས་ ༨ ལྷག་ཡོད་འདུག་ཀྱང་། ད་ལྟ་ཁོང་ཅག་གི་འཆི་གསོན་གྱི་གནས་སྟངས་དང་བརྡབ་སྐྱོན་བྱུང་བའི་ཐད་གསལ་ཁ་གང་ཡང་མེད་པ་རེད།

དེའི་ཐད་ཉི་ཧོང་གི་མཚོ་ཁུལ་དོ་དམ་གྱི་མགྲིན་ཚབ་པ་ཀ་ཛུ་ཨོ་གྷ་ཝ་(Kazuo Ogawa) ལགས་ཀྱིས། དེ་རིང་རེས་གཟའ་ལྷག་པའི་ཉིན་ཨ་རིའི་དམག་མི་བརྒྱད་ཡོད་པའི་དམག་དོན་གནམ་གྲུ་དེ་ཉི་ཧོང་གི་ཡ་ཀུ་ཤི་མའི་མཚོ་གླིང་གི་ཉེ་འགྲམ་དུ་ཆགས་པའི་མཚོ་ཁུལ་དུ་བརྡབ་སྐྱོན་བྱུང་ཡོད་པས། ཉི་ཧོང་གི་མཚོ་ཁུལ་ལྟ་སྐྱོང་དོ་དམ་ཚན་པས་མཚོ་ཁུལ་དེར་འཚོལ་ཞིབ་དང་མྱུར་སྐྱོབ་བྱེད་མགོ་བཙུགས་ཡོད། ཅེས་དང་། ང་ཚོས་དོན་དངོས་ཐོག་དམག་དོན་གནམ་གྲུ་དེ་ས་གནས་གང་ནས་གང་དུ་འཕུར་སྐྱོད་བྱེད་ཀྱིན་ཡོད་མེད་ཤེས་རྟོགས་གསལ་པོ་མ་བྱུང་ཡང་། དེ་ནི་ཉི་ཧོང་གི་གྲོང་ཁྱེར་ཨི་ཝ་ཀུ་ནི་( Iwakuni) ནས་ཀ་དྷི་ན་(Kadena) བར་འཕུར་སྐྱོད་བྱེད་ཀྱི་ཡོད་པའི་ཚོད་དཔག་བྱས་ཡོད། ཅེས་བརྗོད་འདུག

སྤྱིར་ཨ་རིའི་དམག་དོན་གནམ་གྲུ་དེ་ཉི་ཧོང་གི་ཆུ་ཚོད་ ༡༤། ༤༠ ཙམ་ལ་རེ་ཌཱར་(radar ) ནས་བོར་བརླག་ཏུ་གྱུར་ཡོད་ཅིང་། སྐར་མ་ལྔ་ཙམ་གྱི་རྗེས་སུ་ཉི་ཧོང་གི་མཚོ་ཁུལ་དོ་དམ་ཚན་པར་གནམ་གྲུ་བརྡབ་སྐྱོན་བྱུང་བའི་གནས་ཚུལ་འབྱོར་ཏེ།  ད་ལྟ་ཉི་ཧོང་གཞུང་གིས་དོན་རྐྱེན་བྱུང་བའི་མཚོ་ཁུལ་དུ་མཚོ་གྲུ་དྲུག་དང་། གནམ་གྲུ་གཉིས་བཅས་མངག་གཏོང་བྱས་ནས། མཚོ་ཁུལ་དེར་རྟོག་ཞིབ་དང་མྱུར་སྐྱོབ་ཀྱི་ལས་དོན་བྱེད་མུས་ཡིན་ཡང་། ད་ལྟ་དམག་དོན་མི་སྣ་དེ་དག་གི་འཆི་གསོན་གྱི་གནས་སྟངས་སོགས་ཀྱི་ཐད་ལ་གསལ་ཁ་གང་ཡང་མེད་པར། ཉི་ཧོང་གི་མྱུར་སྐྱོབ་ཚན་པས་མུ་མཐུད་མཚོ་ཁུལ་དེར་འཚོལ་ཞིབ་བྱེད་མུས་ཡིན་འདུག

ཨ་རིའི་སི་ཝི་ ༢༢ (CV-22 Osprey) རྟགས་ཅན་གྱི་དམག་དོན་གནམ་གྲུ་ནི་ཉི་ཧོང་དུ་གནས་སྡོད་བྱེད་མུས་ཡིན་པའི་ཨ་རིའི་དམག་དོན་གྱི་གནམ་གྲུ་ཡིན་ཞིང་། ཕྱི་ལོ་ ༢༠༡༦ ཟླ་ ༡༢ ཚེས་ ༡༤ ཉིན་སི་ཝི་ ༢༢ རྟགས་ཅན་གྱི་ཨ་རིའི་དམག་དོན་གནམ་གྲུ་ཞིག་ཨོ་ཀི་ན་ཝ་(Okinawa) མཚོ་གླིང་ཁུལ་དུ་བརྡབ་སྐྱོན་བྱུང་ཡོད་ཅིང་། ཕྱི་ལོ་ ༢༠༡༧ ཟླ་ ༨ ཚེས་ ༥ ཉིན་ཉི་ཧོང་དུ་གནས་སྡོད་ཨ་རིའི་(MV-22) རྟགས་ཅན་གྱི་དམག་དོན་གནམ་གྲུ་དེ་ཨོ་གླིང་གི་ཁུན་སི་ལེན་ཌི་(Queensland) མཚོ་ཁུལ་ནས་ཆག་སྐྱོན་བྱུང་སྟེ། དོན་རྐྱེན་དེའི་ཁྲོད་ནས་མི་གྲངས་ ༢༣ ལྷག་མྱུར་སྐྱོབ་བྱས་ཡོད་ཀྱང་། མི་གྲངས་གསུམ་བོར་བརླག་ཏུ་གྱུར་བའི་གནས་ཚུལ་ཐོན་ཡོད་འདུག

སྤྱིར་དམག་དོན་གྱི་ཆ་ནས་ཕྱོགས་ཁག་རྒྱལ་ཁབ་བཞི་སྟེ། ཨ་རི་དང་། རྒྱ་གར། ཉི་ཧོང་། ཨོ་གླིང་བཅས་ཀྱིས་སྔར་ལས་ལྷག་པའི་མཉམ་འབྲེལ་ནུས་པ་སྤུངས་ཏེ་རྒྱ་གར་ཞི་བདེ་རྒྱ་མཚོའི་ཁུལ་བརྟན་སྲུང་གིས་རྒྱ་ནག་གཞུང་གི་དབང་ཤུགས་སྐྱེད་པར་རྒོལ་ལན་སློག་གིན་ཡོད་ལ། ཨེ་ཤ་ཡའི་མཚོ་གླིང་ཁུལ་དུ་རྒྱ་ནག་གཞུང་གི་དབང་ཤུགས་ལ་འགོག་རྒོལ་དང་། རྒྱ་གར་ཞི་བདེ་རྒྱ་མཚོའི་ཁུལ་བརྟན་སྲུང་ཆེད། རྒྱལ་ཁབ་དེ་དག་གི་མཚོ་ཁུལ་དུ་ཕན་ཚུན་དམག་སྦྱོང་སྤེལ་རེས་དང་། ལྷག་པར་ཉི་ཧོང་གི་ཀ་དྷི་ན་(Kadena) ཁུལ་དུ་ཨ་རིའི་མཁའ་དམག་གི་ས་ཚིགས་ཤིག་ཀྱང་ཡོད་འདུག

གསར་འགོད་པ། དཔལ་ལྡན།

རྩོམ་སྒྲིག་པ། སྐལ་བཟང་སྦྱིན་པ།