ཏཱ་ལའི་བླ་མ་མཐོ་རིམ་སློབ་གཉེར་ཁང་གི་སྐབས་དང་པོའི་འབུམ་རམས་པའི་སློབ་ཐོན་པའི་ཁོངས་སུ། བོད་ཀྱི་སྐད་ཡིག རྩོམ་རིག ལོ་རྒྱུས། ནང་པའི་ལྟ་གྲུབ་བཅས་རིག་ཚན་བཞིའི་ཐོག་འབུམ་རམས་པའི་སློབ་གཉེར་བ་བདུན་བསླབ་པ་མཐར་སོན་བྱུང་འདུག
ཁ་སང་རྒྱ་གར་སྦེང་ལོར་ཏཱ་ལའི་བླ་མ་མཐོ་སློབ་ཚོགས་ཁང་དུ། སྐབས་དང་པོའི་འབུམ་རམས་བསླབ་པ་མཐར་སོན་གྱི་མཛད་སྒོ་འཚོགས་ཡོད་ཅིང་། ཚོགས་ཐོག་ཏུ་སྦེང་ལོར་གཙུག་ལག་སློབ་གཉེར་ཁང་གི་ཡིག་རྒྱུགས་ཚན་པའི་རིག་སྡེ་འགན་འཛིན་འབུམ་རམས་པ་སི་རི་ནི་ཝ་སི་ (Pro.Srinivas Chowdappa)ལགས། དམིགས་བསལ་འབྲེལ་མཐུད་པ་འབུམ་རམས་པ་ཀཱ་རི་གྷར་ (C.S Karigar ) ལགས། བོད་ཕྲུག་ཁྱིམ་སྡེའི་སྤྱི་ཁྱབ་འགན་འཛིན་བསོད་ནམས་སྲི་ཆོས་ལགས། ཝཱ་ཎ་གཙུག་ལག་སློབ་གཉེར་ཁང་གི་ལོ་རྒྱུས་སློབ་དཔོན་བྱམས་པ་བསམ་གཏན་ལགས། འབུམ་རམས་པ་ལྷག་པ་ཚེ་རིང་ལགས། འབུམ་རམས་པ་རབ་གླིང་བློ་བཟང་རྡོ་རྗེ་ལགས། འབུམ་རམས་པ་ཟུར་བ་སྤེན་པ་རྡོ་རྗེ་ལགས། ས་རཱ་མཐོ་རིམ་སློབ་གཉེར་ཁང་གི་འབུམ་རམས་པ་རྡོ་རྗེ་ཚེ་རིང་ལགས་བཅས་མཐོ་སློབ་ཀྱི་དགེ་སློབ་རྣམས་མཉམ་ཞུགས་གནང་ཡོད་འདུག
སྐབས་དང་པོའི་འབུམ་རམས་པ་བསླབ་པ་མཐར་སོན་གྱི་ནང་དུ་དགེ་བཤེས་རོང་བོ་བློ་བཟང་སྙན་གྲགས་ལགས་དང་། དགེ་བཤེས་བློ་བཟང་སྨོན་ལམ་ལགས། དགེ་བཤེས་བློ་བཟང་དངོས་གྲུབ་ལགས། བསོད་ནམས་རྒྱལ་མཚན་ལགས། ཨ་འབྲུག་དཀོན་མཆོག་ལགས། གཙང་ཕྲུག་སྟོབས་ལགས། སྨན་ཤེར་བློ་གྲོས་ལགས་བཅས་ཡོད་འདུག
འདི་གའི་གསར་འགོད་པས་ཁ་པར་བརྒྱུད་སྐབས་དང་པོའི་འབུམ་རམས་པའི་བསླབ་པ་མཐར་སོན་སྐོར་ལ་ཏཱ་ལའི་བླ་མ་མཐོ་སློབ་ཀྱི་སློབ་སྤྱི་བསྟན་འཛིན་དཔལ་བཟང་ལགས་སུ་བཀའ་འདྲི་ཞུ་སྐབས། ཐེངས་འདིའི་འབུམ་རམས་པའི་བསླབ་པ་མཐར་སོན་གྱི་མཛད་སྒོ་ནི་ཏཱ་ལའི་བླ་མ་མཐོ་སློབ་ཀྱི་སྐབས་དང་པོའི་འབུམ་རམས་པ་ཆགས་ཀྱི་ཡོད་ཅིང་། བོད་ཕྲུག་ཁྱིམ་སྡེའི་མཐོ་རིམ་སློབ་གཉེར་ཁང་གིས་སློབ་སྦྱོང་གི་རིམ་པ་མཐོ་ཤོས་དེ་ཡིན་པ་མ་ཟད། བོད་ཕྲུག་ཁྱིམ་སྡེའི་སྔོན་འགྲོ་ནས་འབུམ་རམས་པའི་ཤེས་ཡོན་གྱི་གནས་རིམ་བར་དུ་སླེབས་པའི་ལོ་རྒྱུས་ཀྱི་ཉིན་མོ་ཞིག་ཀྱང་ཡིན། ཞེས་བརྗོད་སོང་།
འབུམ་རམས་པའི་བསླབ་གནས་ཀྱི་བྱུང་རིམ་སྐོར་ལ་ཁོང་གིས། ཏཱ་ལའི་བླ་མ་མཐོ་སློབ་ཀྱི་སློབ་སྤྱི་ཟུར་བ་བུ་མོ་ཚེ་རིང་ལགས་ཀྱིས་སྦེང་ལོར་གཙུག་ལག་སློབ་གཉེར་ཁང་ནས་འབུམ་རམས་པའི་སློབ་དཔོན་གྱི་ལག་འཁྱེར་བཞེས་ཏེ། འབུམ་རམས་པའི་ཉམས་ཞིབ་པ་ ༨ བླངས་ཆོག་པའི་ཆོག་མཆན་ཐོབ་རྗེས། ཕྱི་ལོ་ ༢༠༢༠ ལོ་ནས་བཟུང་ཏཱ་ལའི་བླ་མ་མཐོ་རིམ་སློབ་གཉེར་ཁང་དུ་འབུམ་རམས་པའི་བསླབ་གནས་མགོ་ཚུགས་པ་རེད། ཉེ་ཆར་འབུམ་རམས་པ་རྣམས་ཀྱིས་ཞིབ་འཇུག་གི་དཔྱད་རྩོམ་དང་གཏམ་བཤད་སོགས་ཡོངས་སུ་གྲུབ་སྟེ། ཕྱི་ཟླ་ ༡༡ ཚེས་ ༢༨ ནས་ཉིན་གཉིས་རིང་འབུམ་རམས་པའི་བསླབ་གནས་ཀྱི་མཐའ་མའི་དམ་བཅའ་ཕུལ་བ་རེད། ཅེས་བརྗོད་སོང་།
དེ་བཞིན་ཁོང་གིས། ཐེངས་འདིར་འབུམ་རམས་པ་བདུན་བསླབ་པ་མཐར་སོན་བྱུང་ཐུབ་ཡོད་ཅིང་། དེ་ནི་༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་རྗེ་བཀའ་དྲིན་དང་། ཨ་མ་རྗེ་བཙུན་པདྨ་ལགས་ཀྱི་མི་ཚེ་ཧྲིལ་བོར་སྐུ་ངལ་བསྐྱོན་པའི་གྲུབ་འབྲས་ཤིག་རེད། ཐེངས་འདིའི་འབུམ་རམས་པའི་བསླབ་པ་མཐར་སོན་ནི་རྒྱལ་སྤྱིའི་ཐོག་ངེས་ལེན་ཡོད་པའི་བསླབ་གནས་ཚད་ལྡན་གྱི་ལག་འཁྱེར་ཞིག་ཆགས་ཡོད་པས། འབུམ་རམས་པ་རྣམ་པ་ཡང་ལག་འཁྱེར་གྱི་ཐོག་ནས་གཞན་དང་མཉམ་དུ་དཔུང་བ་འདྲ་མཉམ་བྱས་ཏེ་འགྲོ་ཐུབ་རེད་ལ། དེ་ནི་བོད་པ་རང་ཉིད་ཀྱི་འཛིན་སྐྱོང་འོག་ཏུ་ཡོད་པའི་མཐོ་རིམ་སློབ་གཉེར་ཁང་ཞིག་ཡིན་པར་སྤོབས་པ་སྐྱེས་པ་ཞིག་རེད། མ་འོངས་བའང་བོད་ཀྱི་གཞོན་སྐྱེས་རྣམས་བོད་རིག་པའི་ཐོག་འབུམ་རམས་པའི་བསླབ་གནས་ཐོག་སློབ་སྦྱོང་བྱ་དགོས་པ་གལ་ཆེན་པོ་རེད། ཅེས་བརྗོད་སོང་།
མཛད་སྒོའི་ཐོག་བོད་ཕྲུག་ཁྱིམ་སྡེའི་སྤྱི་ཁྱབ་འགན་འཛིན་བསོད་ནམས་སྲི་ཆོས་ལགས་ཀྱིས། སྐབས་དང་པོའི་འབུམ་རམས་པའི་བསླབ་པ་མཐར་སོན་མཁན་རྣམས་ནི་མི་ཚེ་ཧྲིལ་བོ་ཤེས་ཡོན་ཐོག་བརྩོན་པ་གནང་ཞིང་། བོད་ཀྱི་སྤྱི་ཚོགས་ནང་དུ་ཞབས་ཞུ་རླབས་ཆེན་སྒྲུབ་མཁན་ཤ་སྟག་རེད། བཀྲ་ཤིས་ཉིན་མོར་བོད་ཕྲུག་ཁྱིམ་སྡེའི་མགོ་ལས་ཡོངས་ཀྱི་ཚབ་ཞུས་ཏེ་འཚམས་འདྲི་ཞུ་རྒྱུ་ཡིན། མ་འོངས་བར་བོད་མི་ཡོངས་ཀྱིས་བོད་ཀྱི་སྐད་ཡིག་དང་རྒྱལ་རབས་ལོ་རྒྱུས་སོགས་ཀྱི་ཐོག་སྦྱངས་བརྩོན་བྱེད་དགོས་ཀྱི་འདུག ད་ལྟའི་ཆར་ང་ཚོའི་སྐབས་སུ་བབ་པའི་དཀའ་ངལ་ནི་མཐུན་རྐྱེན་བཟང་པོ་དང་གོ་སྐབས་ཡག་པོ་ཡོད་ཀྱང་། བོད་པའི་སྤྱི་ཚོགས་ནང་དུ་བོད་ཀྱི་རིག་གཞུང་སོགས་ཀྱི་ཐོག་སློབ་སྦྱོང་བྱེད་པར་མཉམ་ཞུགས་བྱེད་མཁན་ཉུང་ཉུང་ཡིན་པས། བོད་ཀྱི་སྤྱི་ཚོགས་ཡོངས་ནས་གནད་དོན་དེའི་ཐོག་རྡོག་རྩ་གཅིག་སྒྲིལ་བྱས་ཏེ་ཡར་རྒྱས་གཏོང་དགོས་པའི་འབོད་སྐུལ་ཞུ་བཞིན་ཡོད། ཅེས་བརྗོད་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། སྐལ་བཟང་སྦྱིན་པ།
ཏཱ་ལའི་བླ་མ་མཐོ་རིམ་སློབ་གཉེར་ཁང་གི་སྐབས་དང་པོའའི་འབུམ་རམས་པའི་བསླབ་པ་མཐར་ཕྱིན་སོན་པ་ཡོངས་ལ་འཚམས་འདྲི་དང་། བོད་ཀྱི་སྐད་དང་རིགས་གཞུང་། ལོ་རྒྱུས། ནང་པའི་ལྟ་གྲུབ་གང་གི་ཆ་ནས་བོད་སྤྱི་པའི་ཞབས་འདེགས་ཞུས་ཐུབ་པའི་སྨོན་འདུན་ཞུས། བཀྲིས་བདེ་ལེགས་འབུམ་རམས་པ་རྣམ་པ་ལྷན་རྒྱས་ལ།