ངོ་དེབ་ཀྱིས་རྒྱ་ནག་ཏུ་བཀོལ་སྤྱོད་བྱེད་བཞིན་པའི་ངོ་དེབ་ཁ་བྱང་ ༤༧༠༠ ལྷག་སྒོ་བརྒྱབ་འདུག

ངོ་དེབ་ཀྱིས་རྒྱ་ནག་ཏུ་བཀོལ་སྤྱོད་བྱེད་བཞིན་པའི་ངོ་དེབ་ཁ་བྱང་ ༤༧༠༠ ལྷག་སྒོ་བརྒྱབ་ནས་ཕྱི་ལོ་ ༢༠༢༤ ལོའི་ཨ་རིའི་སྲིད་འཛིན་གྱི་འོས་བསྡུར་འགོག་རྐྱེན་མི་ཡོང་བའི་སྔོན་འགོག་བྱེད་ཀྱི་ཡོད་འདུག

རྒྱ་ནག་གཞུང་གིས་རྒྱལ་སྤྱིའི་སྤྱི་ཚོགས་དྲ་ལམ་ཁག་ཏུ་རྒྱ་ནག་གི་སྐར་ལྔའི་དྲ་དམག་མང་དག་ཅིག་མངག་གཏོང་བྱས་ནས། སྤྱི་ཚོགས་དང་གཞུང་སྒེར་སོགས་ཀྱི་བར་དོན་མེད་རྙོག་གྲ་སློང་ཐབས་ཡང་ཡང་བྱེད་ཀྱི་ཡོད་པ་ལྟར། ད་ལྟ་རྒྱ་ནག་ཏུ་བཀོལ་སྤྱོད་བྱེད་བཞིན་ཡོད་ཅིང་། པར་དང་མིང་སོགས་ཁ་གསལ་མེད་པའི་ངོ་དེབ་ཁ་བྱང་  ༤༧༠༠ ལྷག་གིས་ཨ་རིའི་མི་སེར་ཡིན་ཁུལ་གྱིས། ཨ་རིའི་ཆབ་སྲིད་ཀྱི་གནད་དོན་དང་། ལོ་རྗེས་མའི་ཨ་རིའི་སྲིད་འཛིན་གྱི་འོས་བསྡུ། ཨ་རྒྱའི་འབྲེལ་ལམ་སོགས་ཀྱི་སྐོར་ལ་འཁྱོག་བརྗོད་དང་ལོག་འགྲེལ་བྱེད་བཞིན་ཡོད་སྟབས། རྒྱལ་སྤྱིའི་སྤྱི་ཚོགས་བརྒྱུད་ལམ་ཆེ་ཤོས་ཀྱི་གྲས་ངོ་དེབ་ལས་ཁུངས་(facebook) ཀྱིས་རྒྱ་ནག་གི་ངོ་དེབ་ཁ་བྱང་དེ་དག་སྒོ་བརྒྱབ་ཡོད་པའི་གནས་ཚུལ་སྤེལ་འདུག

དེའི་ཐད་ངོ་དེབ་ཏུ་ཚུལ་མཐུན་མིན་པའི་བྱ་སྤྱོད་ཞིབ་འཇུག་ཚན་པའི་སྣེ་ཁྲིད་བྷིན་ནིམ་མོ་(Ben Nimmo) ཡིས། ལོ་རྗེས་མའི་འོས་བསྡུ་བསླེབ་ལ་ཉེ་བའི་དུས་འདིར། ཕྱི་ཕྱོགས་ཀྱི་མིས་དྲ་ལམ་བརྒྱུད་ཨ་རིའི་མི་མང་ལ་འཇབ་རྒོལ་ཞིག་བྱེད་ཀྱིན་འདུག་པས། ང་ཚོས་སྔོན་ཚོད་ནས་དོགས་གཟོན་བྱ་དགོས། ཞེས་བརྗོད་འདུག་ལ། རྒྱ་ནག་ཏུ་ཡོད་པའི་ངོ་དེབ་ཀྱི་ཁ་བྱང་གཉེར་མཁན་དེ་དག་གིས་བུད་མེད་ཀྱི་མངལ་ཤོར་བ་དང་། འགལ་ཟླ་ཆེ་བའི་རིག་གཞུང་ཕན་ཚུན་གྱི་དཀའ་ཁག དེ་བཞིན་ཡོ་ཁུ་རེན་གྱི་དམག་འཁྲུག་དང་འབྲེལ་ནས་རོགས་སྐྱོར་གྱི་གནད་དོན་སོགས་གླེང་སློང་བྱས་ཏེ། ཨ་རིའི་མི་མང་ནང་ཁུལ་དུ་རྩོད་རྙོག་སློང་གི་ཡོད་འདུག

སྤྱིར་རྒྱ་ནག་གཞུང་གིས་རྒྱ་ནག་ནང་ངོ་དེབ་ཚུད་པའི་རྒྱལ་སྤྱིའི་སྤྱི་ཚོགས་དྲ་ལམ་ཕལ་མོ་ཆེ་གཏན་འགོག་བྱས་ཡོད་ཀྱང་།  ད་ལྟ་ཕྱི་ལོ་ ༢༠༢༤ ལོའི་ཨ་རིའི་སྲིད་འཛིན་གྱི་འོས་བསྡུ་བསླེབ་ལ་ཉེ་བའི་སྐབས་འདིར། རྒྱ་ནག་ནང་ངོ་དེབ་བཀོལ་སྤྱོད་བྱེད་མཁན་ཇེ་མང་དུ་འགྲོ་བཞིན་ཡོད་པའི་ཁར། ད་ལྟ་རྒྱ་ནག་གི་ངོ་དེབ་ཀྱི་ཁ་བྱང་ ༤༧༠༠ ལྷག་གིས་འཛམ་གླིང་ས་ཕྱོགས་གང་སར་ཡོད་པའི་མི་གཞན་གྱི་མིང་དང་། པར་རིས་སོགས་བཞག་ནས་ངོ་དེབ་བེད་སྤྱོད་གཏོང་གི་ཡོད་པ་མ་ཟད། ངོ་ཐག་མི་ཆོད་པའི་ཁ་བྱང་དེ་དག་གིས་ཕན་ཚུན་གྱི་པར་རིས་དང་འགྲེམས་སྤེལ་བྱས་པའི་གནས་ཚུལ་སོགས་ལ་དགའ་རྟགས་སྤྲོད་རེས་བྱེད་ཀྱི་ཡོད་ཅིང་། དེ་དག་གི་གནས་ཚུལ་ཁ་ཤས་ཤིག་ཨེ་སི་(X) འམ་ཊི་ཝེ་ཊར་ནས་ཁུར་ཡོང་གི་ཡོད་པ་ཤེས་རྟོགས་བྱུང་འདུག

འདས་པའི་ལོ་ཤས་རིང་ངོ་ཐག་མི་ཆོད་པའི་ངོ་དེབ་ཁ་བྱང་དག་གིས་མི་གཞན་དང་དྲ་ལམ་སོགས་ནས་གནས་ཚུལ་རྫུན་བཟོ་དང་རྐུ་བཤུས་བྱས་ནས་གང་བྱུང་དྲ་ལམ་དུ་སྤེལ་བའི་ཁྲོད། ཨ་རིའི་མང་གཙོ་དང་སྤྱི་མཐུན་ཚོགས་པ་གཉིས་དང་འབྲེལ་བའི་ཨ་རིའི་ཆབ་སྲིད་ཀྱི་གནད་དོན་ཚུད་པའི་ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་བ་ལྕམ་སྐུ་པེ་ལོ་སི་(Nancy Pelosi) མཆོག་དང་། ཨ་རིའི་ཁྲིམས་རྩོད་པ་དང་ཆབ་སྲིད་པ་གྷི་རི་ཆིན་ཝ་ཡའེ་མིར་ (Gretchen Whitmer) ཨ་རིའི་གྲོས་ཚོགས་འོག་མའི་ཇིམ་རྗོ་ཌིན་ (Jim Jordan) སོགས་ཀྱི་སྐོར་ལ་གནས་ཚུལ་རྫུན་སྤེལ་དང་འཁྱོག་བརྗོད་མང་དག་ཅིག་བྱས་ཡོད་པའི་གནས་ཚུལ་ཐོན་འདུག

ཡང་གནས་ཚུལ་ནང་། ད་ལྟ་རྒྱ་ནག་ནང་བཀོལ་སྤྱོད་བྱེད་བཞིན་པའི་ངོ་དེབ་ཁ་བྱང་དེ་དག་གིས་གསང་བའི་ངང་རྒྱ་གར་དང་བོད་ཐོག་རྟོག་ཞིབ་བྱས་ཏེ་ནང་ཁུལ་དུ་དབྱེ་དཀྲུག་འཕེན་གྱི་ཡོད་པ་མ་ཟད། རྒྱ་གར་དང་བོད་གཉིས་ནས་རྒྱ་ནག་ལ་དགའ་ཞེན་ཡོད་པའི་གནས་ཚུལ་མང་དག་ཅིག་བརྒྱུད་སྤེལ་བྱེད་བཞིན་ཡོད་པ་རེད། དེ་བཞིན་ཊི་ལི་གྷི་རམ་ (Telegram channels) གྱི་བརྒྱུད་ལམ་ཞིག་ནས་དབྱིན་ཡིག་གི་ཐོག་ནས་ཡོ་ཁུ་རེན་ལ་བཙན་འཛུལ་བྱེད་པའི་གནས་ཚུལ་འཁྱོག་བརྗོད་བྱེད་ཀྱི་ཡོད་པའི་གནས་ཚུལ་ཞིག་ཀྱང་ཤེས་རྟོགས་བྱུང་འདུག་ལ།  ངོ་དེབ་ཁ་བྱང་དེ་དག་གིས་རྒྱ་ནག་དམར་ཤོག་སྲིད་གཞུང་གི་དྲིལ་བསྒྲགས་མང་པོ་ཞིག་ཁྱབ་སྤེལ་དང་ཨ་རིའི་ནང་གི་ཕྱོགས་ཞེན་གྱི་སྐད་ཆར་འུར་སྒྲོག་དང་། ལྟ་ཚུལ་མི་འདྲ་བའི་བར་དཀྲུག་ཤིང་སློང་བའི་གནས་ཚུལ་བཀྲམ་གྱི་ཡོད་འདུག

གཞན་ཡང་དབྱིན་ཡུལ་གྱི་རྒྱལ་ས་ལོན་ཌོན་དུ་རྟེན་གཞི་བྱས་པའི་དྷི་གྷ་ཌེན་ (The Guardian) གསར་ཁང་གིས་གནས་ཚུལ་སྤེལ་བ་ལྟར་ན། ད་ལྟ་རྒྱ་ནག་གི་ངོ་དེབ་དེ་དག་གིས་ངོ་དེབ་ཁོ་ན་མ་ཡིན་པར་ཊི་ཝེ་ཊར་རམ་ཨེག་སི་(X) སོགས་ཀྱི་གནས་ཚུལ་རྫུན་བཟོ་བྱས་ཏེ་ངོ་དེབ་སྟེང་བརྒྱུད་སྤེལ་དང་། འཛམ་གླིང་ནང་ཤུགས་རྐྱེན་ཆེ་བའི་ཆབ་སྲིད་པ་དང་ཕྱུག་བདག་སོགས་སུ་བརྫུས་ནས། གནས་ཚུལ་མང་པོ་ཞིག་བརྒྱུད་སྤེལ་བྱེད་ཀྱིན་ཡོད་པ་ཤེས་རྟོགས་བྱུང་འདུག་ལ། དེའི་ཁྲོད་ཀྱི་དཔེ་མཚོན་ཞིག་ནི་འཛམ་གླིང་གི་ཕྱུག་བདག་ཆེན་པོ་ཨེ་ལོན་མེག་སི་(Elon Musk) ཡིས་ཁྱབ་བསྒྲགས་བྱས་པ་དག་ཡང་བསྐྱར་བརྒྱུད་སྐུར་(retweeted ) བྱེད་ཀྱི་ཡོད་འདུག

འདི་ལོའི་ཕྱི་ཟླ་ ༥ ཚེས་ ༣ ཉིན་ངོ་དེབ་སྤྱི་ཚོགས་དྲ་ལམ་ཚན་པས་དྲ་ལམ་ནས་འཇབ་རྒོལ་བྱས་པའི་སྙན་ཐོ་ཞིག་བཏོན་པའི་ནང་། འདས་པའི་ལོ་ཤས་རིང་ངོ་ཐག་མ་ཆོད་པའི་ཁ་བྱང་དེ་དག་གིས་འཛམ་གླིང་ཁྱོན་ཡོངས་ཀྱི་ཆབ་སྲིད་ཀྱི་འགྱུར་འགྲོས་དང་ཁེ་ཕན་སོགས་ལ་དམིགས་ནས་གནས་ཚུལ་མང་དག་ཅིག་རྫུན་སྤེལ་བྱས་ཏེ། ངོ་དེབ། ཊི་ཝེ་ཊར། ཡུ་ཊུབ་ (YouTube)།  ཊིག་ཊོག་སོགས་སུ་སྤེལ་བའི་མ་ཟད། གཞུང་སྒེར་མང་པོ་ཞིག་གི་སྤྱི་ཚོགས་དྲ་ལམ་ཁག་ཚུད་པའི་དྲ་རྒྱ་མང་པོ་ཞིག་ལ་འཇབ་རྒོལ་བྱས་ཡོད་སྐོར་དང་། ཕྱི་ལོ་ ༢༠༡༦ ཙམ་ནས་ངོ་དེབ་ལས་ཁུངས་ཀྱིས་རྒྱ་ནག་གཞུང་གི་དྲ་ལམ་འཇབ་རྒོལ་བའམ་སྐར་ལྔའི་དྲ་དམག་གི་ཁ་བྱང་རྣམས་སྒོ་བརྒྱབ་ཡོད་ཀྱང་། ཉེ་བའི་ལོ་ཤས་ནང་རྒྱ་ནག་གིས་ངོ་དེབ་དང་། ཨིན་སི་ཊི་ར་གྷི་རམ་ཚུད་པའི་རྒྱ་ནག་ནང་བཀག་སྡོམ་བྱས་པའི་སྤྱི་ཚོགས་དྲ་ལམ་ཁག་བཀོལ་མཁན་ཇེ་མང་དུ་ཕྱིན་པ་དང་། དེ་དག་གིས་རྒྱ་ནག་དམར་ཤོག་སྲིད་གཞུང་གི་ལྟ་བ་དང་ལངས་ཕྱོགས་སོགས་དྲ་ལམ་དུ་སྤེལ་གྱི་ཡོད་སྐོར་སོགས་གསལ་འདུག

ཕྱི་ལོ་ ༢༠༡༦ ལོའི་ཨ་རིའི་སྲིད་འཛིན་གྱི་འོས་བསྡུའི་སྐབས། ཨུ་རུ་སུས་ངོ་དེབ་ཚུད་པའི་སྤྱི་ཚོགས་དྲ་ལམ་མང་དག་ཅིག་ནས་ཨ་རིའི་འོས་བསྡུའི་ལས་དོན་ལ་བཀག་འགོག་དང་འགོག་རྐྱེན་ཆེན་པོ་བཟོས་ཡོད་ལ། སྤྱི་ཚོགས་དྲ་ལམ་དེ་དག་ནས་གནས་ཚུལ་མང་དག་ཅིག་རྫུན་སྤེལ་བྱས་ནས། ཨ་རིའི་གཞུང་མང་གཉིས་ཀྱི་བར་འགལ་ཟླ་བཟོ་ཐབས་དང་སྤྱི་ཚོགས་ནང་གི་རྙོག་འཛིང་མང་པོ་ཞིག་བསྐྱར་དུ་སློང་ཐབས་བྱས་འདུག་པས། ཨ་རིའི་ཆེད་མཁས་པ་མང་དག་ཅིག་གིས། རྒྱ་ནག་དང་ཨུ་རུ་སུས་ཕྱི་ལོ་ ༢༠༢༤ ལོའི་ཨ་རིའི་སྲིད་འཛིན་གྱི་འོས་བསྡུར་འགོག་རྐྱེན་ཆེན་པོ་བཟོ་སྲིད་པའི་ཚོད་དཔག་བྱེད་ཀྱི་ཡོད་འདུག

གསར་འགོད་པ། དཔལ་ལྡན།

རྩོམ་སྒྲིག་པ། སྐལ་བཟང་སྦྱིན་པ།