ཏཱ་ལའི་བླ་མ་མཐོ་རིམ་སློབ་གཉེར་ཁང་གི་སྐབས་དང་པོའི་འབུམ་རམས་སློབ་ཐོན་པ་རྣམས་ལ་མཇལ་ཁ་བསྩལ།

ཏཱ་ལའི་བླ་མ་མཐོ་རིམ་སློབ་གཉེར་ཁང་གི་སྐབས་དང་པོའི་འབུམ་རམས་སློབ་ཐོན་པ་རྣམ་པས་བོད་རང་གི་སྐད་ཡིག་ཐོག་ནས་རྒྱལ་སྤྱིའི་ཤེས་ཡོན་གྱི་འཕེལ་རིམ་ལྟར་འབུམ་རམས་པའི་བསླབ་གནས་ཐོབ་པ་དེ་ནི་བོད་ཀྱི་ཤེས་ཡོན་གྱིས་གོམ་པ་ཆེན་པོ་ཞིག་མདུན་དུ་སྤོས་བར་ངོས་འཛིན་གནང་གི་འདུག

དེ་རིང་༧གོང་ས་རྒྱལ་བ་རིན་པོ་ཆེ་མཆོག་ནས་ཏཱ་ལའི་བླ་མ་མཐོ་རིམ་སློབ་གཉེར་ཁང་གི་སྐབས་དང་པོའི་འབུམ་རམས་སློབ་ཐོན་པ་བདུན་ལ་མཇལ་ཁ་བསྩལ་ཡོད་པ་དང་། འབུམ་རམས་སློབ་ཐོན་པ་དགེ་བཤེས་རོང་བོ་བློ་བཟང་སྙན་གྲགས་ལགས་ཀྱིས་འདི་ག་བོད་ཀྱི་དུས་བབ་གསར་འགོད་པར། བཙན་བྱོལ་གྱི་སྒྲིག་འཛུགས་ཤིག་གི་ནང་ལོགས་ལ་སོ་སོའི་སྐད་ཡིག་གི་ཐོག་ནས། རྒྱལ་སྤྱིའི་ཤེས་ཡོན་གྱི་འཕེལ་རིམ་ནང་བཞིན་ཕྱིན་ནས་འབུམ་རམས་པའི་སྒྲིག་སྲོལ་གཞིར་བཟུང་རྒྱལ་སྤྱིའི་ཞིབ་འཇུག་གི་དཔྱད་ཐབས་རིག་པ་བེད་སྤྱོད་བཏང་སྟེ། གནའ་རབས་ཀྱི་ལྟ་གྲུབ་དང་། རྩོམ་རིག ལོ་རྒྱུས། དེ་བཞིན་སྐད་བརྡ་དང་། དེང་རབས་ཀྱི་དཔེ་མཛོད་སོགས་ཀྱི་ཐོག་ལ། དེང་དུས་ཀྱི་ཞིབ་འཇུག་གི་དཔྱད་ཐབས་བེད་སྤྱོད་བྱས་ནས་ཐོན་ཐུབ་པ་དེ། ༧རྒྱལ་བ་རིན་པོ་ཆེ་མཆོག་གི་ཤེས་ཡོན་གྱི་གོམ་ཁ་མདུན་དུ་སྤོ་རྒྱུའི་གནའ་དེང་གི་འདབ་གཤོག་གཉིས་ལྡན་སྐྱེད་སྲིང་བྱ་དགོས་པའི་བཀའ་སློབ་ཡང་དང་ཡང་དུ་གནང་བ་ལ་བརྟེན་ནས། བོད་ཁྱིམ་སློབ་གྲྭ་དང་། ཏཱ་ལའི་བླ་མ་མཐོ་སློབ་ཀྱི་དབུ་ཁྲིད་ཚོས་འགན་བླངས་ཏེ། སྐབས་དང་པོ་དེ་ཐོན་པ་དེས་བཙན་བྱོལ་སྒྲིག་འཛུགས་དང་ལྷག་པར་དུ་༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་བྱུང་སོང་། སྐབས་དང་པོ་ཐོན་པ་ཡིན་ཙང་སྐབས་ཕྱི་མ་དེ་འགྲོ་སྟངས་ཀྱི་ལམ་ཕྱེས་པར་བརྟེན། ང་ཚོས་ཤེས་ཡོན་གྱི་གོམ་པ་ཆེན་པོ་སྤོ་ཐུབ་ཡོད་རེད་བསམ་གྱི་འདུག ཅེས་བརྗོད་བྱུང་།

ནོར་གླིང་མཐོ་སློབ་ཀྱི་སློབ་སྤྱི་ཟུར་པ་འབུམ་རམས་སློབ་ཐོན་པ་སྨན་ཤེར་བློ་གྲོས་ལགས་ཀྱིས། དགའ་ཚོར་ཆེན་པོ་བྱུང་། རྒྱུ་མཚན་ནི། ང་ཚོ་བོད་ཀྱི་སྐད་ཡིག་དང་བོད་རིག་པའི་སྒང་ལ་འབུམ་རམས་པའི་གནས་རིམ་དེ་འདྲ་ཞིག་བསླེབས་པར་མི་རབས་རྒན་པ་མང་པོ་ཞིག་གིས་སྐུ་ལས་བསྐྱོན་པ་དང་། མི་རབས་གཞོན་པ་མང་པོ་ཞིག་གིས་འབད་བརྩོན་བྱས་ཏེ། ད་ལྟ་དངོས་སུ་རྒྱ་གར་ནང་དུ་སོ་སོ་བོད་པ་རང་གི་འཛིན་སྐྱོང་གི་གཙུག་ལག་སློབ་གྲྭ་འདིའི་ནང་དངོས་སུ་ལེགས་འགྲུབ་བྱུང་བ་མ་ཟད། འདིའི་ནང་ཆ་ཤས་ལེན་ཐུབ་པར་ཧ་ཅང་གི་དགའ་པོ་བྱུང་། ཞེས་བརྗོད་བྱུང་།

འབུམ་རམས་སློབ་ཐོན་པ་དགེ་བཤེས་བློ་བཟང་དངོས་གྲུབ་ལགས་ཀྱིས། དེ་རིང་ཚོར་བ་དམིགས་བསལ་ཞིག་འདུག ཕྱོགས་གཅིག་ནས་དེ་རིང་༧གོང་ས་རྒྱལ་བ་རིན་པོ་ཆེ་མཆོག་གི་མཇལ་ཁ་རག་པ་དང་། ལྷག་དོན་དུ་ངའི་དཔྱད་རྩོམ་འདི་བརྡ་སྤྲོད་གཞུང་ལུགས་རང་དང་འབྲེལ་བ་ཡོད་པ་ཞིག་རེད། དེ་འདྲ་འབྲི་མཁན་ཉུང་ཉུང་རེད། དེར་བརྟེན། ༧གོང་ས་མཆོག་ལ་དཔྱད་རྩོམ་འདི་སྤྱན་འབུལ་ཞུ་སྐབས། ༧གོང་ས་མཆོག་གིས་འགྲིག་ཨ། འགྲིག་ཨ། ཞེས་བཀའ་གནང་སོང་། དེར་བརྟེན་ཚོར་སྣང་སྐྱིད་པོ་བྱུང་། ཞེས་བརྗོད་བྱུང་།

ཉེ་སྔོན་ཕྱི་ཟླ་ ༡༡ ཚེས་ ༣༠ ཉིན་རྒྱ་གར་ལྷོ་ཕྱོགས་སྦེང་ལོར་དུ་རྟེན་གཞི་བྱས་པའི་ཏཱ་ལའི་བླ་མ་མཐོ་རིམ་སློབ་གཉེར་ཁང་དུ་སྐབས་དང་པོའི་བོད་ཀྱི་སྐད་ཡིག་དང་རྩོམ་རིག ལོ་རྒྱུས། ནང་པའི་ལྟ་གྲུབ་བཅས་རིག་ཚན་བཞིའི་ཐོག་ནས་འབུམ་རམས་པའི་བསླབ་པ་མཐར་སོན་པའི་མཛད་སྒོ་འཚོགས་ཡོད་ཅིང་། སྐབས་དང་པོའི་འབུམ་རམས་སློབ་ཐོན་པ་རྣམས་ནི་དགེ་བཤེས་རོང་བོ་བློ་བཟང་སྙན་གྲགས་ལགས་དང་། དགེ་བཤེས་བློ་བཟང་སྨོན་ལམ་ལགས། དགེ་བཤེས་བློ་བཟང་དངོས་གྲུབ་ལགས། ས་རཱ་མཐོ་སློབ་ཀྱི་སློབ་དཔོན་བསོད་ནམས་རྒྱལ་མཚན་ལགས། ཏཱ་ལའི་བླ་མ་མཐོ་རིམ་སློབ་གཉེར་ཁང་གི་སློབ་དཔོན་ཨ་འབྲུག་དཀོན་མཆོག་ལགས། ས་རཱ་མཐོ་སློབ་ཀྱི་སློབ་དཔོན་གཙང་ཕྲུག་སྟོབས་ལགས། ནོར་གླིང་མཐོ་སློབ་ཀྱི་སློབ་སྤྱི་ཟུར་པ་སྨན་ཤེར་བློ་གྲོས་ལགས་བཅས་ཡིན་པ་རེད།

གསར་འགོད་པ། བསྟན་འཛིན་ཕུར་བུ།

རྩོམ་སྒྲིག་པ། པདྨ་མཚོ།