དར་ཐང་སྲས་མོ་ཀུན་བཟང་དབང་མོ་ལགས་ཀྱི་གོ་སྒྲིག་འོག་གནས་མཆོག་རྡོ་རྗེ་གདན་དུ་རྒྱལ་ཁབ་མི་འདྲ་བ་ ༡༡ ནས་ཡོང་བའི་སྐྱ་སེར་གཅིག་ཁྲི་ཙམ་གྱིས་པ་ལིའི་སྡེ་སྣོད་གསུམ་ཀློག་འདོན་གནང་གི་འདུག
ཟླ་འདིའི་ཕྱི་ཚེས་ ༢ ནས་ཉིན་གྲངས་ ༡༠ རིང་དར་ཐང་རིན་པོ་ཆེ་མཆོག་གི་དགོངས་བཞེད་དང་སྦྱིན་བདག་གནང་སྟེ། གནས་མཆོག་རྡོ་རྗེ་གདན་གྱི་བྱང་ཆུབ་ཤིང་དྲུང་དུ། དར་ཐང་སྲས་མོ་ཀུན་བཟང་དབང་མོ་ལགས་ཀྱི་ལམ་སྟོན་དང་གོ་སྒྲིག་གནང་ནས་རྒྱལ་སྤྱིའི་སྡེ་སྣོད་གསུམ་ཀློག་འདོན་ལྷན་ཚོགས་ཐེངས་བཅོ་བརྒྱད་པས་པ་ལི་ནང་ཡོད་པའི་སྡེ་སྣོད་གསུམ་ཀློག་འདོན་གནང་བཞིན་འདུག་ལ། སྡེ་སྣོད་ཀློག་འདོན་ནང་རྒྱ་གར་དང་། བྷང་ལ་དྷེ་ཤི། ཁེམ་བྷོ་ཌི་ཡ། ཨིན་ཌོ་ནེ་ཤི་ཡ། ལའོ་སི། འབར་མ། བལ་ཡུལ་། སིངྒ་ལ། ཐའེ་ལེན་ཌི། ཝེ་ཐི་ནམ། ཨ་རི་སོགས་རྒྱལ་ཁབ་བཅུ་གཅིག་ནས་ནང་པའི་དད་ལྡན་ཁྲི་གཅིག་ཙམ་ལྷན་འཛོམས་གནང་ཡོད་འདུག
ལྷན་ཚོགས་དེའི་ངེས་སྟོན་པ་དར་ཐང་རིན་པོ་ཆེའི་སྲས་མོ་ཀུན་བཟང་དབང་མོ་ལགས་ཀྱིས་འདི་ག་བོད་ཀྱི་དུས་བབ་གསར་འགོད་པར། ད་ལན་གནས་མཆོག་རྡོ་རྗེ་གདན་དུ་ཉིན་གྲངས་བཅུའི་རིང་པ་ལིའི་སྡེ་སྣོད་གསུམ་ཀློག་འདོན་གྱི་ལས་གཞི་ཞིག་སྤེལ་མུས་ཡིན་ལ། དེ་ནི་གཙོ་བོ་རྒྱ་གར་གཙོས་རྒྱལ་ཁབ་མི་འདྲ་བའི་དགེ་སློང་སེར་པོའི་སྡེ་རྣམས་ལྷན་གཅིག་ཏུ་འཛོམས་རྒྱུའི་སླད་དུ་ཡིན། འདིར་ཕེབས་མཁན་ཡོངས་ལ་པ་ལིའི་སྡེ་སྣོད་ཀྱི་གླེགས་བམ་ཕུལ་ནས་ཚང་མས་ལྷན་གཅིག་ཏུ་མགྲིན་དབྱངས་གཅིག་གི་ཐོག་ནས་ཀློག་འདོན་གནང་གི་ཡོད་ལ། རྒྱལ་ཁབ་དེ་དག་ནས་ཕེབས་པའི་སེར་སྐྱ་ཕོ་མོ་ཡོངས་ཀྱིས་ཞོགས་པའི་ཆུ་ཚོད་ ༨ པ་ནས་ཀློག་འདོན་དབུ་འཛུགས་གནང་སྟེ། དགོང་མོ་རྟག་པར་ཉིན་དེར་ཀློག་འདོན་གནང་བའི་གླེགས་བམ་དེ་དག་གི་བརྗོད་བྱ་སོགས་ཀྱི་ཐད་ནས་བགྲོ་གླེང་དང་གོ་བསྡུར་གནང་གི་ཡོད། དེའི་རྒྱུ་མཚན་གཙོ་བོ་ནི་རྒྱ་གར་ནི་ནང་པའི་ཆོས་ཀྱི་མཆེད་ཁུངས་ཐོག་མ་དེ་ཡིན་པས། སྟོན་པ་བཅོམ་ལྡན་འདས་ཀྱི་གསུང་རབ་རྣམས་སྲུང་སྐྱོབ་དང་། དུས་རབས་ཉེར་གཅིག་པའི་ནང་སླར་གསོ་ཡོང་ཆེད་དུ་ཡིན། ཞེས་འགྲེལ་བརྗོད་གནང་བྱུང་།
ཡང་སྲས་མོ་ལགས་ཀྱིས། ངའི་པ་ལགས་དར་ཐང་རིན་པོ་ཆེ་མཆོག་ལ་ནང་པའི་དགེ་སློང་སེར་པོའི་སྡེ་རྣམས་མཉམ་གཅིག་ཏུ་བསྡུས་ནས་རིག་གནས་དང་རིག་གཞུང་བརྗེ་རེས་གནང་རྒྱུའི་དགོངས་བཞེད་ཅིག་ཡོད་པ་བཞིན། ལོ་ལྟར་འདི་ལྟ་བུའི་ལྷན་ཚོགས་ཤིག་འཚོགས་ཐུབ་པར་དགེ་འདུན་པ་དང་། མི་སྒེར། སྦྱིན་བདག་སོགས་ཀྱི་རོགས་སྐྱོར་གནང་བ་དེ་བཀའ་དྲིན་ཆེན་པོ་ཡིན་ལ། སླད་མར་ཡང་འདི་འདྲ་མུ་མཐུད་ནས་འཚོག་རྒྱུ་ཡིན། ཞེས་འགྲེལ་བརྗོད་གནང་བྱུང་།
དར་ཐང་རིན་པོ་ཆེ་མཆོག་གིས་ཕྱི་ལོ་ ༡༩༨༩ ལོར་རྡོ་རྗེ་གདན་དུ་སྔ་འགྱུར་སྨོན་ལམ་ཆེན་མོ་དབུ་འཛུགས་གནང་སྟེ། ད་བར་མི་ལོ་ཧྲིལ་པོ་ ༣༤ ཙམ་རིང་རྙིང་མའི་སྨོན་ལམ་ཆེན་མོར་དངོས་ཤུགས་བརྒྱུད་གསུམ་ནས་རྒྱབ་སྐྱོར་དང་སྦྱིན་བདག་གནང་མུས་ཡིན་འདུག་ལ། ལྷག་པར་དུ་བཀའ་འགྱུར་དང་བསྟན་འགྱུར་གྱིས་གཙོས་པའི་བསྟན་བཅོས་དཀོན་པའི་རིགས་པར་སྐྲུན་གནང་སྟེ་ཚོགས་སྡེ་དང་མི་སྒེར་སོགས་ལ་རིན་མེད་གྱི་ཐོག་ནས་མཆོད་སྦྱིན་གནང་མུས་ཡིན་འདུག དེ་བཞིན་ཕྱི་ལོ་ ༢༠༢༡ ཟླ་ ༥ ཚེས་ ༢༦ ཉིན་ཨ་མེ་རི་ཀའི་ཕོ་བྲང་དཀར་པོའི་ནང་དུ་ས་ག་ཟླ་བ་སྲུང་གཙིའི་མར་མེ་མཆོད་འབུལ་གྱི་འདུ་འཛོམས་ཐོག་མ་དེར་ཕེབས་པ་སོགས་ཆོས་ཕྱོགས་ཀྱི་མཛད་པ་རྒྱ་ཆེར་བསྐྱངས་དང་སྐྱོང་མུས་ཡིན་འདུག
རྒྱལ་སྤྱིའི་སྡེ་སྣོད་གསུམ་ཀློག་འདོན་གྱི་ལས་གཞི་དེ་ནི་ཕྱི་ལོ་ ༢༠༠༦ ལོར་ཐོག་མར་གནས་མཆོག་རྡོ་རྗེ་གདན་དུ་དབུ་འཛུགས་གནང་ཡོད་ཅིང་། ལོ་ལྟར་ཆོས་ཚོགས་Light of Buddhadharma Foundation International ཀྱི་མཐུན་འགྱུར་འོག སྲས་མོ་ཆེ་བ་ཀུན་བཟང་དབང་མོ་ལགས་ཀྱིས་སྣེ་འཁྲིད་དེ་རྒྱལ་སྤྱིའི་སྡེ་སྣོད་གསུམ་ཀློག་འདོན་ལྷན་ཚོགས་ཀྱིས་སྡེ་སྣོད་ཀློག་འདོན་གྱི་ལས་གཞི་སྤེལ་མུས་ཡིན་ལ། སྲས་མོ་འབྲིང་པདྨ་ལྷ་མོ་ལགས་ཀྱིས་རྙིང་མའི་སྨོན་ལམ་སོགས་ཀྱི་སྦྱིན་བདག་གནང་གི་ཡོད། དེ་བཞིན་སྲས་མོ་ཆུང་བ་ཚེ་རིང་དཔལ་མོ་དགེ་ལེགས་ལགས་ཀྱིས་ཝར་ན་རུ་ཡོད་པའི་སྔ་འགྱུར་རྙིང་མའི་མཐོ་སློབ་ལ་ཞིབ་འཇུག་དང་བཀའ་འགྱུར་གྱི་དཀར་ཆག་ཕྱོགས་སྒྲིག་གི་ཕྱག་ལས་གནང་མུས་ཡིན་འདུག
གསར་འགོད་པ། དཔལ་ལྡན།
རྩོམ་སྒྲིག་པ། པདྨ་མཚོ།
![FILE - Venezuelan opposition leader Maria Corina Machado gestures at a protest ahead of the Friday inauguration of President Nicolas Maduro for his third term, in Caracas, Venezuela January 9, 2025. [File photo: Reuters/Maxwell Briceno]](https://tibettimes.net/wp-content/uploads/2025/10/Maria-Corina-Machado--360x180.jpg)
![Hungary's Laszlo Krasznahorkai poses for photographers in London [File: Matt Dunham/AP]](https://tibettimes.net/wp-content/uploads/2025/10/Screenshot-2025-10-10-at-2.23.17-PM-360x180.png)
