རྒྱ་གར་གཞུང་དམངས་གཉིས་ཀྱིས་༧པཎ་ཆེན་རིན་པོ་ཆེ་མཆོག་གང་མགྱོགས་ཀློད་གྲོལ་གཏང་བར་རྒྱབ་སྐྱོར་གནང་དགོས་པའི་འབོད་སྐུལ་ཞུས།

༧ཀུན་གཟིགས་༧པཎ་ཆེན་རིན་པོ་ཆེ་མཆོག་གི་སྐོར་ལ་གོ་རྟོགས་ལས་འགུལ་སྤེལ་བའི་ཚོགས་འདུ་བསྡུས་ཏེ་རྒྱ་གར་གཞུང་དམངས་གཉིས་ཀྱིས་༧པཎ་ཆེན་རིན་པོ་ཆེ་མཆོག་གང་མགྱོགས་ཀློད་གྲོལ་གཏང་བར་རྒྱབ་སྐྱོར་གནང་དགོས་པའི་སྐོར་གྱི་དོན་ཚན་ ༦ ཅན་གྱི་འབོད་སྐུལ་ཞིག་ཞུས་འདུག

ཁ་སང་ཕྱི་ཚེས་ ༥ ཉིན་གྱི་ཕྱི་དྲོའི་ཆུ་ཚོད་ ༦ པའི་ཐོག་བྱེས་ཀྱི་གདན་ས་བཀྲ་ཤིས་ལྷུན་པོའི་གོ་སྒྲིག་འོག  རྒྱ་གར་རྒྱལ་ས་ལྡི་ལིའི་གྲོས་ཚོགས་ཀྱི་ཚོགས་གཞོན་ཚོགས་ཁང་ (Deputy Speaker hall) དུ་༧ཀུན་གཟིགས་༧པཎ་ཆེན་རིན་པོ་ཆེ་མཆོག་གི་སྐོར་ལ་གོ་རྟོགས་ལས་འགུལ་སྤེལ་བའི་ཚོགས་འདུ་འཚོགས་ཡོད་པ་དང་། ཚོགས་ཐོག་ཏུ་རྒྱ་གར་གྲོས་ཚོགས་གོང་མའི་འཐུས་མི་དང་རྒྱ་གར་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་(Shri.Sujeet Kumar)མཆོག་དང་། རྒྱ་གར་གྲོས་ཚོགས་འཐུས་མི་ཟུར་པ་སྐུ་ཞབས་(Shri.R.K Khrimey)མཆོག གྲོས་ཚོགས་འཐུས་མི་སྐུ་ཞབས་(Aneel Prasad Hegde)མཆོག་དང་། གྲོས་ཚོགས་འཐུས་མི་(Chandeshwar Prasad)མཆོག རྒྱ་གར་གྲོས་ཚོགས་འཐུས་མི་འཇམ་དབྱངས་ཚེ་རིང་རྣམ་རྒྱལ་མཆོག རྒྱ་གར་རྒྱལ་ཡོངས་ཀྱི་བོད་དོན་རྒྱབ་སྐྱོར་ཚོགས་པ་(Core Group for Tibetan Cause – India)ཡི་ཚོགས་གཙོ་རིན་ཆེན་མཁའ་འགྲོ་(Rinchen Khando Khrimey)མཆོག   དེ་བཞིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་བྱེས་ཀྱི་གདན་ས་བཀྲ་ཤིས་ལྷུན་པོའི་མཁན་པོ་གཟིག་རྒྱབ་རིན་པོ་ཆེ་མཆོག་གི་དབུས་བོད་མི་མང་སྤྱི་འཐུས་གཉིས་དང་། ལ་དྭགས་རི་ལྗོངས་ཡར་རྒྱས་ལྷན་ཚོགས་ཀྱི་སྡེ་དཔོན་བཀྲིས་རྒྱལ་མཚན་མཆོག རྒྱལ་སྤྱིའི་ནང་པའི་མཐུན་ཚོགས་ཀྱི་སྤྱི་ཁྱབ་དྲུང་ཆེ་ཤར་རྩེའི་མཁན་ཟུར་བྱང་ཆུབ་ཆོས་ལྡན་རིན་པོ་ཆེ།  དེ་བཞིན་གཞུང་ཁོངས་མ་ཡིན་པའི་ཚོགས་པ་ཁག་ཅིག་སྐུ་ཚབ་བཅས་ཚོགས་བཅར་གནང་ཡོད་འདུག

ཚོགས་ཐོག་ཏུ་སྲིད་སྐྱོང་སྤེན་པ་ཚེ་རིང་མཆོག་གིས།  ༧ཀུན་གཟིགས་པཎ་ཆེན་སྐུ་ཕྲེང་བཅུ་པ་མཆོག་གིས་བོད་དང་བོད་མིའི་ཆེད་དུ་བློས་གཏོང་གནང་བའི་རླབས་ཆེན་གྱི་མཛད་རྗེས་བསྐྱངས་བ་ལ་བརྟེན་ནས། ༧པཎ་ཆེན་སྐུ་ཕྲེང་བཅུ་གཅིག་པ་མཆོག་ནི་བོད་དང་བོད་མི་རྣམས་ལ་ཧ་ཅང་གལ་ཆེན་དུ་གྱུར་ཡོད་སྟབས། ༧གོང་ས་རྒྱལ་བ་རིན་པོ་ཆེ་མཆོག་དང་༧པཎ་ཆེན་རིན་པོ་ཆེ་མཆོག་རྣམ་གཉིས་ནི་ཉི་ཟླ་བཞིན་དུ་ངོས་འཛིན་གནང་གི་ཡོད་ཀྱང་། དེང་གི་ཆར་འཛམ་གླིང་གི་བཙོན་པ་ཆུང་ཤོས་སུ་ངོས་འཛིན་བྱས་པའི་༧པན་ཆེན་རིན་པོ་ཆེ་མཆོག་རྒྱ་ནག་གཞུང་གིས་བཙན་ཁྲིད་བྱས་པའི་ཁྲིམས་དང་མི་མཐུན་པའི་བྱ་སྤྱོད་ལ་ངོ་རྒོལ་བྱེད་ཀྱི་ཡོད་ཅིང་། རྒྱ་ནག་དམར་ཤོག་སྲིད་གཞུང་གིས་གང་མགྱོགས་ཀློད་གྲོལ་གཏང་དགོས་སྐོར་དང་། བོད་ཀྱི་གནད་དོན་དང་ད་ལྟའི་ཛ་དྲག་གི་གནས་སྟངས་ཚུད་པའི་བོད་ནང་གི་བོད་མིའི་གནས་སྟངས་དང་། དེ་བཞིན་བོད་ཀྱི་ས་ཁམས་ཆགས་ཚུལ་སོགས་ཀྱི་ཐད་ནས་ཁྱིམ་མཚེས་རྒྱལ་ཁབ་དང་དེང་གི་འཛམ་གླིང་ལའང་གལ་ཆེན་དུ་གྱུར་ཡོད་སྐོར་སོགས་གསུང་བཤད་གནང་ཡོད་པ་རེད།

བྱེས་ཀྱི་གདན་ས་བཀྲ་ཤིས་ལྷུན་པོ་དགོན་པའི་མཁན་པོ་གཟིག་རྒྱབ་རིན་པོ་ཆེ་མཆོག་གིས། བོད་མི་དང་ཧི་མ་ལ་ཡའི་ནང་པ། དེ་བཞིན་འགྲོ་བ་མིའི་ཐོབ་ཐང་དང་། ཆོས་ལུགས་དད་མོས་རང་དབང་། བྱིས་པའི་རང་དབང་རྩོད་ལེན་པ་དག་ཚུད་པའི་༧ཀུན་གཟིགས་པཎ་ཆེན་རིན་པོ་ཆེ་མཆོག་གི་དད་ལྡན་ས་ཡ་མང་པོའི་ཚབ་བྱས་ནས། ངས་ལག་ཟུང་ཐལ་མོ་སྦྱར་ནས་རྒྱ་གར་གྲོས་ཚོགས་དང་མི་མང་གིས་རྒྱ་ནག་གཞུང་གིས་༧པཎ་ཆེན་རིན་པོ་ཆེ་མཆོག་གང་མགྱོགས་ཀློད་གྲོལ་ཞུ་རྒྱུར་རྒྱབ་སྐྱོར་གནང་བའི་རེ་སྐུལ་ཞུ་ཡི་ཡོད། ཅེས་གསུངས་འདུག 

ད་ལན་༧ཀུན་གཟིགས་པཎ་ཆེན་རིན་པོ་ཆེ་མཆོག་གི་སྐོར་ལ་གོ་རྟོགས་ལས་འགུལ་སྤེལ་བའི་ཚོགས་འདུའི་སྟེང་། རྒྱ་གར་གཞུང་མང་གཉིས་ཀྱིས་རྒྱབ་སྐྱོར་གནང་དགོས་པའི་དོན་ཚན་དྲུག་ཅན་གྱི་འབོད་སྐུལ་ཞིག་གནང་བའི་ནང། རྒྱ་གར་གཞུང་གིས་༧ཀུན་གཟིགས་པཎ་ཆེན་རིན་པོ་ཆེ་མཆོག་གང་མགྱོགས་ཀློད་གྲོལ་སླད། རྒྱ་ནག་གཞུང་ལ་གནོན་ཤུགས་སྤྲད་དགོས་པ་མ་ཟད། ཁོང་གི་སྐུ་གཟུགས་འཕྲོད་སྦྱོར་སླད། རྒྱ་གར་གཞུང་གི་ཆེས་མཐོའི་མི་སྣ་དག་ཐུག་འཕྲད་གནང་དུ་འཇུག་དགོས་སྐོར། དེ་བཞིན་རྒྱ་གར་གཞུང་གིས་༧པཎ་ཆེན་རིན་པོ་ཆེ་མཆོག་གི་མི་ལོ་ ༢༨ རིང་བཙོན་ཁང་དུ་དཀའ་སྡུག་མྱོང་མུས་ཡིན་པར་ངོས་འཛིན་ཆེད་གཟེངས་རྟགས་དབུལ་དགོས་པ། རྒྱ་གར་གྲོས་ཚོགས་འཐུས་མིའི་མཚན་རྟགས་འཁོད་པའི་ཞུ་གཏུགས་བསྒྲགས་གཏམ་སྤེལ་བ། བྱ་བྲལ་རིན་པོ་ཆེ་སོགས་ཀློད་གྲོལ་གཏང་དགོས་པ་སོགས་ཀྱི་དགོས་འདུན་བཏོན་འདུག

གསར་འགོད་པ། དཔལ་ལྡན།

རྩོམ་སྒྲིག་པ། པདྨ་མཚོ།