ཡུ་རོབ་མཐུན་ཚོགས་དང་རྒྱ་ནག་དབར་གྱི་ལྷན་ཚོགས་སྟེང་བོད་དོན་གླེང་སློང་དགོས་པའི་རེ་སྐུལ་ཞུས།

རྒྱ་ནག་གི་རྒྱལ་ས་པེ་ཅིན་དུ་ཡུ་རོབ་མཐུན་ཚོགས་དང་རྒྱ་ནག་དབར་གྱི་ལྷན་ཚོགས་ཐེངས་ ༢༤ པ་འཚོག་རྒྱུ་ཡིན་པས་རྒྱལ་སྤྱིའི་བོད་དོན་ལས་འགུལ་ཁང་གིས་ལྷན་ཚོགས་དེའི་སྟེང་ཡུ་རོབ་མཐུན་ཚོགས་ཀྱིས་བོད་རྒྱའི་དཀའ་རྙོག་སེལ་ཐབས་ཀྱི་གྲོས་འཆར་ངེས་གཏན་བཟོ་རྒྱུའི་ནན་སྐུལ་ཞུས་ཡོད་འདུག

སང་ཉིན་ཕྱི་ཚེས་ ༧ ནས་ ༨ བར་ཉིན་གྲངས་གཉིས་རིང་ཡུ་རོབ་མཐུན་ཚོགས་དང་རྒྱ་ནག་དབར་གྱི་ལྷན་ཚོགས་ཐེངས་ ༢༤ པ་འཚོག་རྒྱུ་ཡིན་པ་དང་། ཐེངས་འདིའི་ལྷན་ཚོགས་སྟེང་ཡུ་རོབ་སྤྱི་མཐུན་ལྷན་ཚོགས་ཀྱི་ཚོགས་གཙོ་ཆཱར་ལེ་སི་ (Charles Michel) མཆོག་དང་། ཡུ་རོབ་མཐུན་ཚོགས་ཀྱི་འཛིན་སྐྱོང་ལྷན་ཁང་གི་ཚོགས་གཙོ་ལྕམ་ཨུར་སུ་ལ་ (Ursula Von der Leyen) མཆོག ཡུ་རོབ་ཕྱི་སྲིད་དང་བདེ་འཇགས་སྲིད་ཇུས་ཚན་པའི་འཐུས་མི་ཇོ་སི་ཧྥི་བྷོར་རིལ་ (Joseph Borrell) མཆོག་བཅས་དང་། རྒྱ་ནག་གི་མགོ་ཁྲིད་ཞི་ཅིན་ཕིང་དང་རྒྱ་ནག་གི་སྲིད་བློན་ལི་ཆང་ (Li Qiang) སོགས་མཉམ་ཞུགས་བྱ་རྒྱུ་ཡིན་འདུག ད་ལན་གྱི་ལྷན་ཚོགས་དེ་ནི་ཕྱི་ལོ་ ༢༠༡༩ ནས་བཟུར་ཡུ་རོབ་མཐུན་ཚོགས་དང་རྒྱ་ནག་གཉིས་དངོས་སུ་ཐུག་འཕྲད་བྱས་པ་ཐེངས་དང་པོ་ཡིན་འདུག

དེ་འབྲེལ་ཁ་སང་ཕྱི་ཚེས་ ༥ ཉིན་རྒྱལ་སྤྱིའི་བོད་དོན་ལས་འགུལ་ཁང་གི་ཡུ་རོབ་མཐུན་ཚོགས་ཀྱི་སྲིད་ཇུས་འགན་འཛིན་ (ICT’s EU Policy Director) ཝིན་སེན་ཌེ་ (Vincent Metten) ལགས་ཀྱིས། ཨེ་ཤ་ཡའི་ཁུལ་དུ་བོད་ཀྱི་གནད་དོན་གལ་ཆེན་ཞིག་ཏུ་རྩིས་ནས། ཡུ་རོབ་སྤྱི་མཐུན་ལྷན་ཚོགས་ཀྱི་ཚོགས་གཙོ་ཆཱར་ལེ་སི་ (Charles Michel) མཆོག་དང་། ཡུ་རོབ་མཐུན་ཚོགས་ཀྱི་འཛིན་སྐྱོང་ལྷན་ཁང་གི་ཚོགས་གཙོ་ལྕམ་ཨུར་སུ་ལ་ (Ursula Von der Leyen) མཆོག་གཉིས་ཀྱིས་ཡུ་རོབ་མཐུན་ཚོགས་དང་རྒྱ་ནག་དབར་གྱི་ལྷན་ཚོགས་དེའི་སྟེང་བོད་ནང་གི་སེལ་མ་ཐུབ་པའི་དཀའ་རྙོག་ཚུད་པའི་བོད་མིའི་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་ཡིན་པའི་ཐད་གླེང་སློང་དང་གྲོས་མོལ་གནང་དགོས་པའི་རེ་འདུན་བཏོན་ཡོད་པ་མ་ཟད། རྒྱ་ནག་གཞུང་གིས་བོད་རྒྱ་ཞི་མོལ་སླར་གསོ་གནང་ཐབས་དགོས་སྐོར་ནན་སྐུལ་ཞུས་ཡོད་འདུག

གཞན་ཡང་། ཟླ་འདིའི་ཕྱི་ཚེས་ ༤ ཉིན་རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཁང་ (Human Rights Watch) གིས་ཡུ་རོབ་མཐུན་ཚོགས་ལ་རེ་སྐུལ་ཞུ་ཡིག་ཅིག་ཕུལ་བའི་ནང་། རྒྱ་ནག་ནང་ཡུ་རོབ་མཐུན་ཚོགས་དང་རྒྱ་ནག་དབར་གྱི་ལྷན་ཚོགས་འཚོག་རྒྱུ་ཡིན་པས། རྒྱ་ནག་གཞུང་གིས་བོད་དང་ཧོང་ཀོང་། ཤར་ཊུར་ཀི་སི་ཐན་ལ་སོགས་པའི་ནང་དྲག་གནོན་ཚབས་ཆེན་བྱས་དང་བྱེད་མུས་ཡིན་པར་བརྟེན། ཡུ་རོབ་མཐུན་ཚོགས་ཀྱིས་རྒྱ་ནག་གཞུང་དང་ཚོང་འབྲེལ་རྒྱུན་ལྡན་ལྟར་མེད་པའི་གནད་དོན་ཁ་གསལ་བཟོ་དགོས་པའི་སྐུལ་མ་བཏང་འདུག

ཡང་ཞུ་ཡིག་དེའི་ནང་། རྒྱ་ནག་གཞུང་གིས་བོད་ནང་གི་བོད་མི་རྣམས་ལ་དྲག་གནོན་ཤུགས་ཆེན་བྱེད་མུས་ཡིན་པ་དང་། བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་དུ་འགྲོ་བཞིན་ཡོད་སྐོར། དེ་བཞིན་བོད་ཀྱི་སྐད་ཡིག་རྩ་མེད་བཟོ་ཐབས་ཀྱི་སྲིད་ཇུས་འདྲ་མིན་ལག་བསྟར་བྱས་ཏེ། བཙན་གྱིས་རྒྱ་སྒྱུར་སློབ་གསོ་སྤྲོད་མུས་ཡིན་པའི་གནད་དོན་དང་། རྒྱ་ནག་གཞུང་གིས་ཤར་ཊུར་ཀི་སི་ཐན་ནང་གི་ཡུ་གུར་བ་དང་། ཁ་ཆེའི་གྲངས་ཉུང་མི་རིགས་རྣམས་འཛིན་བཟུང་བཙན་ཁྲིད་དང་སྡུག་སྦྱོང་མནར་གཅོད་གཏོང་བ། དེ་བཞིན་ཡུལ་མི་དེ་དག་གི་ནང་མི་ཁ་བྲལ་དུ་གཏོང་བ་དང་ལྟ་སྲུང་ནན་པོ་བྱེད་མོས་ཡིན་པ་སོགས་ཡུལ་དེའི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་བཏང་དང་གཏོང་མུས་ཡིན་པའི་གནད་དོན། ད་དུང་རྒྱ་གཞུང་གིས་ཧོང་ཀོང་རྒྱལ་ཁབ་ཀྱི་བདེ་འཇགས་རྩ་ཁྲིམས་ (Draconian National Security Law) ལག་བསྟར་འོག ཧོང་ཀོང་བའི་རང་དབང་དང་ཐོབ་ཐང་མེད་པ་བཟོ་བ་དང་། རྒྱ་གཞུང་གིས་ཧོང་ཀོང་གི་སྤྱི་ཚོགས་ཁྲོད་དམ་དྲག་ཆེས་ཆེར་བྱེད་མུས་ཡིན་པ་མ་ཟད། ཁྲིམས་ཐོག་ནས་ཡུལ་དེའི་འགྲོ་བ་མིའི་ཐོབ་ཐང་རྩོད་ལེན་པ་རྣམས་ལ་གདུག་རྩུབ་གཏོང་བའི་སྐོར། ད་དུང་ཕྱིའི་རྒྱལ་ཁབ་ཁག་ཏུ་ཡོད་པའི་ཧོང་ཀོང་གི་དམངས་གཙོ་དོན་གཉེར་བ་དང་ཁྲིམས་བཟོ་ལྷན་ཚོགས་ཀྱི་ཚོགས་མི་ཟུར་པ་རྣམས་ལ་རྒྱལ་མཚམས་ལས་བརྒལ་བའི་གནོན་ཤུགས་སྤྲོད་མུས་ཡིན་སྐོར་སོགས་བཀོད་འདུག

གསར་འགོད་པ། བསྟན་འཛིན་ཕུར་བུ།

རྩོམ་སྒྲིག་པ། པདྨ་མཚོ།