གངས་ཅན་སྐྱིད་གཤོངས་ཀྱི་བོད་ཀྱི་སྨན་རྩིས་ཁང་གི་ཉེ་འགྲམ་དུ་དབུས་རྒྱལ་སྤྱིའི་དབུ་མའི་ལམ་ལས་འགུལ་ཁང་གི་ཡིག་ཚང་གསར་པ་ཞིག་སྒོ་འབྱེད་གནང་།
དེ་རིང་ཕྱི་ཚེས་ ༨ ཉིན་གྱི་ཞོགས་པ་ཆུ་ཚོད་ ༩ པའི་ཐོག་དབུས་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གི་ལས་ཁུངས་གསར་པ་སྒོ་འབྱེད་གནང་ཡོད་ཅིང་། མཛད་སྒོའི་ཐོག་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། དགའ་ལྡན་ཕོ་བྲང་གི་དྲུང་ཆེ་ཡང་སྟེང་རིན་པོ་ཆེ་མཆོག་གིས་དབུས། སྤྱི་འཐུས་ཚོགས་གཞོན་མཆོག་དང་སྤྱི་འཐུས་ཁག་ཅིག དེ་བཞིན་གཞུང་ཁོངས་མ་ཡིན་པའི་ཚོགས་པ་ཁག་གི་སྐུ་ཚབ་དང་མི་མང་ཁག་ཅིག་བཅས་འཛོམས་འདུག
སྐབས་དེར་སྲིད་སྐྱོང་སྤེན་པ་ཚེ་རིང་མཆོག་གིས་དབུ་མའི་ལམ་གྱི་སྲིད་ཇུས་དང་འབྲེལ་ནས། འཛིན་སྐྱོང་བཀའ་ཤག་གིས་༧གོང་ས་སྐྱབས་མགོན་ཆེན་པོ་མཆོག་གི་དགོངས་པ་གཞི་ལ་བཞག་པའི་ཐོག་ནས། བོད་རྒྱའི་དཀའ་རྙོག་གཙོ་བོར་གྱུར་བའི་ལས་དོན་བྱ་རྒྱུ་ཡིན་ཞེས་ཞུ་ཡི་ཡོད་ལ། དེ་སྔའང་བཀའ་ཤག་གི་ལངས་ཕྱོགས་དང་ལས་དོན་བྱེད་ཕྱོགས་སོགས་ཀྱི་ཐོག་ལ། སྤྱི་ཚོགས་ནང་གང་འཚམ་ཞིག་ཞུས་ཟིན་པ་ཡིན། ཞེས་དང་། བཀའ་ཤག་སྐབས་བཅུ་དྲུག་པས་བོད་ཀྱི་བྱུང་རབས་ཀྱི་སྐོར་ལ་དོ་སྣང་སྤྲད་དགོས་ཞེས་མང་ཚོགས་ལ་ཞུ་ཡི་ཡོད་ལ། གྲོས་ཚོགས་སུའང་སྙན་གསེང་ཞུས་ཡོད། དེའི་རྒྱུ་མཚན་ཡང་རྒྱ་ནག་གཞུང་ལ་གོ་བརྡ་ཞིག་སྤྲད་དགོས་ཏེ། རྒྱ་ནག་གཞུང་གིས་བོད་ཀྱི་ལོ་རྒྱུས་ལ་འཁྱོག་བཤད་བྱས་པ་ཡིན་ནའང་། བོད་ཀྱི་ལོ་རྒྱུས་ལ་འཁྱོག་བཤད་བྱེད་ཀྱི་ཡོད་པ་གསལ་སྟོན་དང་། རྒྱལ་སྤྱིའི་སྤྱི་ཚོགས་ནང་བོད་ལ་ལོ་རྒྱུས་ཀྱི་ཐོག་ནས་རང་བཙན་ཡོད་པའི་གནས་བབ་ལ་ངོས་འཛིན་བྱས་པ་བརྒྱུད། དབུ་མའི་ལམ་ལ་གདེང་འཇོག་ཚད་མེད་ཡོང་ཐུབ་རྒྱུ་ཞིག་བྱ་དགོས། དབུ་མའི་ལམ་གྱི་ཐོག་ནས་བོད་རྒྱའི་དཀའ་རྙོག་སེལ་ཐུབ་པའི་ལམ་ཞིག་ཏུ་འགྲོ་དགོས་ཀྱི་ཡོད་པ་རེད། ཅེས་གསུངས་སོང་།
ཡང་སྲིད་སྐྱོང་མཆོག་གིས། ང་ཚོའི་སྤྱི་ཚོགས་ནང་རང་བཙན་དང་དབུ་མ་ཞེས་རྩོད་ཀྱིན་ཡོད་པ་རེད། དེ་དག་རྩོད་དགོས་པ་ཞིག་མི་འདུག རང་བཙན་རྩོད་དགོས་ནའང་རྒྱ་ནག་གཞུང་ལ་ཕར་ཁ་གཏད་ནས་རྩོད། དབུ་མས་ཀྱང་རྒྱ་ནག་ལ་ཁ་གཏད་ནས་རྩོད། བོད་མིའི་སྒྲིག་འཛུགས་ཀྱིས་དང་བླངས་བོད་དོན་ཞུ་གཏུགས་ལས་འགུལ་ཞེས་པའི་སྡིངས་ཆ་བསྐྲུན་ཡོད་པ་འདི། ང་ཚོས་གང་ཡིན་ཡང་རྩོད་ཆོག་པ་ཞིག་ཡིན་ཡང་། གཞན་ལ་འགྲེལ་བཤད་རྒྱག་སྐབས་དང་པོ་བོད་མིའི་སྒྲིག་འཛུགས་ཀྱིས་གཏན་ལ་ཕབ་པའི་སྲིད་ཇུས་འགྲེལ་བཤད་བརྒྱབ། དེ་ནས་སོ་སོ་སྒེར་གྱི་འདོད་པ་དེ་འདྲ་ཞིག་ཡིན་ཞེས་བཤད་ནའང་སྐྱོན་གང་ཡང་ཡོད་མ་རེད་ལ། འགལ་ཟླར་ཡང་འགྲོ་དགོས་པ་ཞིག་གཏན་ནས་མེད་དེ། དམངས་གཙོ་ཡིན་པའི་ཆ་ནས་བསམ་ཚུལ་མི་འདྲ་བ་ཡོང་བསྡད་པ་དེ་རང་བཞིན་རེད། དེ་ངོས་ཟིན་པའི་ཐོག་ནས་འགྲོ་དགོས་པ་རེད་མ་གཏོགས། ཚང་མ་གཅིག་པ་གཅིག་རྐྱང་ཡོང་གི་རེད་ཟེར་བ་ཁག་པོ་ཞེ་དྲགས་རེད། ཅེས་སོགས་གསུངས་སོང་།
འདི་གའི་གསར་འགོད་པས་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གི་ཚོགས་གཙོ་དགེ་བཤེས་བློ་བཟང་ཆོས་འཕེལ་ལགས་སུ་ལས་འགུལ་ཁང་གི་མ་འོངས་པར་ལས་གཞི་གསར་པ་དང་འཆར་འགོད་སོགས་གང་ཡོད་མེད་དྲིས་པར། ཁོང་གིས། སྐབས་དང་པོ་ནས་དྲུག་པ་བར་སྤྱི་ཡོངས་ཀྱིས་རྩོམ་ཡིག་འགྲན་སྡུར་དང་བགྲོ་གླེང་། མི་མང་ལ་གོ་རྟོགས་སོགས་སྤེལ་མུས་ཡིན་པའི་ཁྲོད། འདི་ལོར་དབུ་མའི་ལམ་ལས་འགུལ་ཁང་གིས་དབུ་མའི་ལམ་གྱི་བརྗོད་བྱ་རང་གི་ཐོག་ལ་འགྲོ་སོང་མང་དག་ཅིག་བཏང་ནས་རྩོམ་ཡིག་འགྲན་སྡུར་རྒྱ་ཆེན་པོ་ཞིག་བྱས་པ་དེའི་མཇུག་བསྐྱང་སྟེ། རྩོམ་ཡིག་དེ་དག་དེབ་གཟུགས་སུ་དགོད་རྒྱུའི་འཆར་གཞི་དང་། དཔེ་དེབ་དེ་དག་ཀྱང་འཛམ་གླིང་ས་ཕྱོགས་མང་དག་ཅིག་ཏུ་འགྲེམས་སྤེལ་བྱ་རྒྱུ། རྒྱ་བལ་འབྲུག་གསུམ་གཙོས་ས་གནས་གཞན་དུ་ཕྱིན་ནས། ༧གོང་ས་རྒྱལ་བ་རིན་པོ་ཆེ་མཆོག་གི་དགོངས་པ་ལས་འཁྲུངས་པའི་དབུ་མའི་ལམ་གྱི་སྲིད་ཇུས་སྐོར་ལ་གོ་རྟོགས་མང་ཙམ་སྤེལ་རྒྱུའི་མཚོན་པའི་རྒྱུན་ལས་གསར་འདེམས་དང་ཕྱོགས་སྐྱོད་བྱ་རྒྱུའི་འཆར་གཞི་ཡོད་སྐོར་སོགས་འགྲེལ་བརྗོད་གནང་བྱུང་།
ཡང་འདི་གའི་གསར་འགོད་པས་ཕྱོགས་སྐྱོད་གནང་བའི་བརྒྱུད་རིམ་ཁྲོད་བོད་མི་ཚོར་དབུ་མའི་ལམ་གྱི་སྲིད་ཇུས་ཀྱི་ཐོག་ལ་གོ་རྟོགས་གང་འདྲ་ཡོད་མེད་དྲིས་པར། ཁོང་གིས། བཙན་བྱོལ་བོད་མིའི་སྤྱི་ཚོགས་ཁྲོད་དབུ་མའི་ལམ་གྱི་སྲིད་ཇུས་ཀྱི་ཐད་ནས་གོ་རྟོགས་ཧ་ཅང་དམན་པོ་ཡིན་ཡང་། མི་རབས་རྒན་པ་ཚོར་དབུ་མའི་ལམ་གྱི་སྲིད་ཇུས་དེ་༧གོང་ས་རྒྱལ་བ་རིན་པོ་ཆེ་མཆོག་གི་རླབས་ཆེན་གྱི་དགོངས་པ་ཡིན་པའི་སྒྲོམ་གཞི་མདོར་བསྡུས་ཤིག་ཤེས་ཀྱི་འདུག ཡིན་ཡང་། དབུ་མའི་ལམ་གྱི་སྲིད་ཇུས་དེ་ལྟ་གྲུབ་ཅིག་དང་རིག་པའི་གཞུང་ལུགས་ཤིག་ཡིན་པས་དེའི་ཐོག་མི་རབས་རྒན་པ་ཚོ་ལའང་གོ་རྟོགས་དམན་པོ་ཡིན་སྐོར་དང་། བཙན་བྱོལ་གྱི་བོད་པའི་ན་གཞོན་དང་ལྷག་པར་སློབ་གྲྭ་དང་མཐོ་སློབ་སོགས་སུ་འགྲིམ་མུས་ཡིན་པའི་ན་གཞོན་རྣམས་ལ་གོ་རྟོགས་དམན་པོ་ཡིན་ཡང་། ན་གཞོན་དེ་དག་ལ་གཞི་རྩའི་སློབ་སྦྱོང་ཡོད་པས་དབུ་མའི་ལམ་གྱི་སྐོར་གོ་རྟོགས་སྤེལ་ཚེ་གོ་བ་བླང་རྒྱུ་དང་ངོ་སྤྲོད་བྱ་རྒྱུ་ལས་སླ་པོ་ཡོད་སྐོར་སོགས་འགྲེལ་བརྗོད་གནང་སོང་།
གསར་འགོད་པ། དཔལ་ལྡན།
རྩོམ་སྒྲིག་པ། པདྨ་མཚོ།
