རྒྱ་ནག་གཞུང་གིས་བོད་འདམ་གཞུང་རྫོང་ནས་ཡིན་པའི་བོད་རིགས་བུད་མེད་སེམས་སྐྱིད་སྒྲོལ་མ་ཞེས་པ་ཞིག་ལ་རྒྱལ་ཁབ་ཀྱི་གསང་བ་ཕྱིར་བསྒྲགས་བྱས་པའི་ཉེས་མིང་འོག་ལོ་གཅིག་དང་ཕྱེད་ཀའི་ཁྲིམས་ཐག་བཅད་ཡོད་འདུག
རྒྱ་ནག་གཞུང་གིས་དྲ་ལམ་ཞིབ་བཤེར་དང་དམ་དྲག་ཤུགས་ཆེན་བྱེད་བཞིན་ཡོད་པ་མ་ཟད། དམིགས་བསལ་གྱིས་བོད་ཀྱི་ས་གནས་གང་སར་ཁ་པར་སྔོག་བཤེར་དང་འཛིན་བཟུང་བཀག་ཉར་བྱེད་བཞིན་ཡོད་པ་ལྟར། ཕྱི་རྒྱལ་གྱི་ལས་ཁུངས་དང་། རྩ་འཛུགས། མི་སྒེར་བཅས་སུ་ངན་འབྲེལ་གྱིས་གསང་མྱུལ་གྱི་བྱ་སྤྱོད་སྤེལ་ཏེ། རྒྱལ་ཁབ་ཀྱི་གསང་བ་ཕྱིར་བསྒྲགས་བྱས་ཚུལ་གྱི་ཉེས་མིང་འོག འདམ་གཞུང་རྫོང་ཉེན་རྟོག་པས་སྦྲ་ཁ་གྲོང་ཚོའི་བོད་རིགས་བུད་མེད་སེམས་སྐྱིད་སྒྲོལ་མ་ཞེས་པ་ཞིག་ལ་ལོ་གཅིག་དང་ཕྱེད་ཀའི་ཁྲིམས་ཐག་བཅད་ཡོད་འདུག
འདི་གའི་གནས་ཚུལ་མཁོ་སྤྲོད་པས་བརྗོད་པ་ལྟར་ན། འདི་ལོའི་ཕྱི་ཟླ་ ༡༠ པའི་ནང་འདམ་གཞུང་རྫོང་ཉེན་རྟོག་པས་སེམས་སྐྱིད་སྒྲོལ་མ་ལགས་གློ་བུར་དུ་འཛིན་བཟུང་བཙན་འཁྲིད་བྱས་ཏེ་གོ་ཐོས་མེད་པར་གྱུར་ཡོད་པ་དང་། ཟླ་འདིའི་ཕྱི་ཚེས་ ༢ ཉིན་གཞི་ནས་ཁོང་མོའི་ཁྱིམ་མི་ཚོར་སེམས་སྐྱིད་སྒྲོལ་མ་ལགས་ལ་ལོ་གཅིག་དང་ཕྱེད་ཀའི་ཁྲིམས་ཐག་བཅད་ཟིན་པའི་བརྡ་ཐོ་འབྱོར་ཡོད་འདུག
ཡང་འབྲེལ་ཡོད་གནས་ཚུལ་སྤྲོད་པ་ཞིག་གིས་འདི་གའི་གསར་འགོད་པར། སེམས་སྐྱིད་སྒྲོལ་མ་ལགས་འཛིན་བཟུང་བྱེད་དགོས་པའི་རྒྱུ་རྐྱེན་གཞན་གང་ཡང་མེད་ཀྱང་། དུས་རྒྱུན་ཆོས་ཕྱོགས་ཀྱི་སྐད་འཕྲིན་ཚོགས་པ་དེ་འདྲའི་ནང་མཉམ་ཞུགས་བྱས་ཡོད་སྟབས། དེ་རིགས་ཁྲིམས་འགལ་དུ་བརྩིས་ནས་ཁྲིམས་ཐག་བཅད་པ་ཞིག་ཡིན་སྲིད་སྐོར་འགྲེལ་བརྗོད་བྱས་བྱུང་།
སེམས་སྐྱིད་སྒྲོལ་མ་ལགས་འཛིན་བཟུང་བྱས་རྗེས། ནང་མི་ཚོས་སེམས་ཁྲལ་ཆེན་པོ་བྱེད་བཞིན་ཡོད་པ་མ་ཟད། ཁོང་མོའི་སྤུན་མཆེད་ཚེ་རྡོ་ལགས་ས་གནས་ཉེན་རྟོག་ཁང་དུ་ཐེངས་བཞི་ལ་ཕྱིན་ནས་སྐད་ཆ་དྲིས་ཡོད་ཀྱང་། རྒྱ་ནག་ཉེན་རྟོག་ཕྱོགས་ནས་ལན་གང་ཡང་སྤྲད་མེད་སྐོར་བརྗོད་བྱུང་།
སེམས་སྐྱིད་སྒྲོལ་མ་ལགས་ནི་མཚོ་སྔོན་ཞིང་ཆེན་ཆུ་དམར་ལེབ་རྫོང་སྐྱེས་འཚར་བྱུང་ཡིན་ཞིང་། ཕྱི་ལོ་ ༢༠༡༩ ལོར་འདམ་གཞུང་རྫོང་སྦྲ་ཁ་གྲོང་ཚོའི་ནང་མནའ་མར་ཡོང་བ་ཞིག་ཡིན་འདུག
