མ་ཎི་རྡོ་འབུམ་ཁྲི་སྟོན་ཞུས་རྐྱེན་བོད་མི་བཞི་བཙན་འཁྲིད་བྱས་འདུག

དེ་རིང་ཞོགས་པ་བོད་ནང་གི་ཆུ་ཚོད་ ༨།༣༠ ཙམ་ལ་བོད་སྐྱེ་རྒུ་མདོ་ནས་མ་ཎི་རྡོ་བརྐོས་ཆེད་ཞལ་འདེབས་མང་པོ་བསྡུས་ཏེ་ཁྲིམས་འགལ་བྱས་ཡོད་པའི་ཉེས་མིང་གཡོགས་ཏེ་མ་ཎི་ཁྲི་སྟོན་གྱི་ལས་གཞིའི་གཙོ་འགན་འཁུར་མཁན་བོད་མི་བཞི་བཙན་འཁྲིད་བྱས་འདུག

ལོ་ལྟར་ཚེས་བཟང་དུས་བཟང་དང་བསྟུན་བོད་སྐྱེ་རྒུ་མདོ་ཁུལ་ནས་མ་ཎི་རྡོ་བརྐོས་མང་པོ་ཞལ་འབྱེད་གནང་སྟེ་ཁྲི་གསོལ་གནང་སྲོལ་ཡོད་པ་ལྟར། འདི་ལོར་བོད་ཀྱི་ས་ཁུལ་མང་པོ་ནས་ཞལ་འདེབས་བསླངས་ཏེ་མ་ཎི་སྟོང་རྡོ་ ༢༥༠ ཁྲི་གསོལ་ཞུས་པར་བརྟེན། ས་གནས་ཉེན་རྟོག་པ་ཡོང་སྟེ། ཆོས་ལུགས་དང་རུས་རྒྱུད་བཅས་ཀྱི་སྟོབས་ཤུགས་བེད་སྤྱད་དེ་སྤྱི་ཚོགས་ལ་ཐེ་གཏོགས་དང་མི་རིགས་ལས་དོན་གྱི་མིང་གཡར་ནས་མི་སྒེར་གྱི་སྙན་གྲགས་རྒྱས་ཆེད། མང་ཚོགས་ལ་འཇིགས་སྐུལ་དང་མགོ་སྐོར་བཏང་ཡོད་སྐོར་གྱི་ཉེས་མིང་གཡོགས་པ་མ་ཟད། ལས་གཞི་བཀག་སྡོམ་བྱས་ཏེ་གཙོ་འགན་འཁུར་མཁན་བློ་དགའ་དང་ཉི་མ། ཚེ་དར། རིན་ཆེན་ཞེས་པའི་སྐྱེས་པ་བཞི་བཙན་འཁྲིད་བྱས་ཡོད་འདུག

གནས་ཚུལ་མཁོ་སྤྲོད་པས་འདི་ག་བོད་ཀྱི་དུས་བབ་གསར་ཁང་གི་གསར་འགོད་པར་བརྗོད་པ་ལྟར་ན། སྐྱེ་རྒུ་མདོ་ཁུལ་ཉེན་རྟོག་པ་ཡོང་ནས་ལས་ཀ་འདི་གནས་སྐབས་མཚམས་འཇོག་བྱེད་དགོས་རེད། ཁྱེད་རང་ཚོས་མགོ་བ་འདིར་སྐད་བཏང་ཤོག་ལབ་སྟེ་མགོ་བ་ཉི་མ་དང་ཁོང་གི་རོགས་པ་གསུམ་བཅས་བཙན་འཁྲིད་བྱས་ནས་ད་ལྟ་ཁུལ་ཐོག་གི་བཀག་ཉར་ཁང་དུ་ཡོད་སྐོར་བརྗོད་བྱུང་།

ཡང་འབྲེལ་ཡོད་གཞན་ཞིག་གིས་བརྗོད་པ་ལྟར་ན། ད་ཐེངས་མ་ཎི་ཁྲི་སྟོན་དེའི་ནང་དུ་ས་གནས་འདྲ་མིན་ནས་ཞལ་འདེབས་ཧ་ཅང་མང་པོ་བྱུང་ཡོད་པ་དང་། ཚོད་དཔག་བྱས་ན་རྒྱ་སྒོར་ཁྲི་ ༢༥༠ ལྷག་ཡོད་པ་དང་། སྤྱིར་བཏང་ལོ་རེར་རྡོ་གང་མང་མང་ཞིག་ཁྲི་སྟོན་བྱེད་ཀྱི་ཡོད་ཀྱང་། ད་ལོ་ནང་བཞིན་གཏན་ནས་བྱུང་མྱོང་ཡོད་པ་མ་རེད་ཅེས་བརྗོད་བྱུང་།

ཉི་མ་དང་བློ་དགའ་གཉིས་ནི་ཕ་མ་གཅིག་ཡིན་ཞིང་། ད་ལྟ་སྐྱེ་རྒུ་མདོ་རུ་གོས་ཆེན་ད་མཆོད་ཆས་སོགས་ཀྱི་ཚོང་ཁང་ཞིག་གཉེར་བཞིན་ཡོད་འདུག དེ་ནས་ཚེ་དར་ནི་འབྲི་སྟོད་རྫོང་ནས་ཡིན་པ་དང་། རིན་ཆེན་གྱིས་རྒྱ་ནག་མ་ནི་ཟེར་ས་ནས་རྡོ་རྐོས་ཀྱི་ལས་ཀ་བྱས་ནས་འཚོ་བ་སྐྱེལ་བཞིན་ཡོད་འདུག