འདི་ལོའི་འཛམ་གླིང་ན་གཞོན་བུམ་པ་རྟགས་མའི་གངས་ཤུད་རྩེད་འགྲན་ཁྲོད་བོད་རིགས་རྩེད་འགྲན་པ་གཡུ་སྒྲོན་ལྷ་མོ་དང་བུ་མོ་ཨ་ཉི་ལགས། ཚེ་རིང་གཡུ་སྒྲོན་ལགས་བཅས་ལ་གསེར་གྱི་བྱ་དགའ་ཐོབ་འདུག
ཉེ་ཆར་ཧྥ་རན་སི་རྒྱལ་ཁབ་ཀྱི་མེ་རི་བྷེལ་(Méribel) གངས་ཤུད་ས་ཁུལ་དུ། རྒྱལ་སྤྱིའི་གངས་ཤུད་རྩེད་འགྲན་ལྷན་ཚོགས་ (International Ski Mountaineering Federation) ཀྱི་གོ་སྒྲིག་འོག ཕྱི་ལོ་ ༢༠༢༣ ནས་ ༢༠༢༤ ལོའི་བར་གྱི་འཛམ་གླིང་ན་གཞོན་བུམ་པ་རྟགས་མའི་གངས་ཤུད་རྩེད་འགྲན་འཚོགས་ཡོད་པའི་ཁྲོད་དུ། བོད་རིགས་རྩེད་འགྲན་པ་གཡུ་སྒྲོན་ལྷ་མོ་ལགས་ལ་ལོ་ ༢༠ མན་གྱི་བུ་མོའི་རྩེད་འགྲན་ནང་ཐག་ཉེ་བའི་འགྲན་བསྡུར་གྱི་གསེར་གྱི་བྱ་དགའ་དང་སྒེར་གྱི་རྒྱང་རྒྱུག་འགྲན་བསྡུར་ནང་དངུལ་གྱི་བྱ་དགའ་ཐོབ་ཡོད་ཅིང་། བུ་མོ་ཨ་ཉི་ལགས་ལ་ལོ་ ༡༨ མན་གྱི་བུ་མོའི་རྩེད་འགྲན་གྱི་ཐག་ཉེ་འགྲན་བསྡུར་ནང་གསེར་གྱི་བྱ་དགའ་དང་། སྒེར་གྱི་རྒྱང་རྒྱུག་འགྲན་བསྡུར་ནང་ཟངས་ཀྱི་བྱ་དགའ་ཐོབ་འདུག དེ་བཞིན་ཚེ་རིང་གཡུ་སྒྲོན་ལགས་ལ་ལོ་ ༡༨ མན་གྱི་བུ་མོའི་རྩེད་འགྲན་ཁྲོད་སྒེར་གྱི་རྒྱང་རྒྱུག་འགྲན་བསྡུར་གྱི་ནང་དུ་གསེར་གྱི་བྱ་དགའ་ཐོབ་འདུག ཐེངས་འདིའི་གངས་ཤུད་རྩེད་འགྲན་ནང་ཧྥ་རན་སི་དང་། ཨེ་ཊ་ལི། ཨོ་གླིང་། འཇར་མན། སི་པན་སོགས་རྒྱལ་ཁབ་ ༡༢ ཀྱི་རྩེད་འགྲན་པ་ ༡༠༠ ལྷག་ཙམ་མཉམ་ཞུགས་གནང་ཡོད་འདུག
ཡང་། འདི་ལོའི་ཕྱི་ཟླ་ ༢ ཚེས་ ༡༡ ཉིན་ནས་ཉིན་གཉིས་རིང་ཡུ་རོབ་ཀྱི་རྒྱལ་ཁབ་ཨི་ཊ་ལི་རུ། ཐོག་མར་འཛམ་གླིང་བུམ་པ་རྟགས་མའི་ན་གཞོན་གངས་ཤུད་རྩེད་འགྲན་འཚོགས་ཡོད་ཅིང་། སྐབས་དེར་བོད་རིགས་རྩེད་འགྲན་པ་ཚེ་བརྟན་གཡུ་སྒྲོན་ལགས་ལ་ལོ་ ༡༨ མན་གྱི་བུ་མོའི་རྩེད་འགྲན་ནང་ཨང་དང་པོ་ཐོབ་ཡོད་པ་དང་། ལོ་ ༡༦ མན་གྱི་སྐྱེས་པའི་རྩེད་འགྲན་ནང་བོད་རིགས་རྩེད་འགྲན་པ་ཀུན་བཟང་རྣམ་རྒྱལ་ལགས་ལ་གསེར་གྱི་རྟགས་མ་དང་། དངོས་གྲུབ་ཚེ་རིང་ལགས་ལ་དངུལ་གྱི་རྟགས་མ་ཐོབ་ཡོད་པ་མ་ཟད། ལོ་ ༡༦ མན་གྱི་བུ་མོའི་འགྲན་བསྡུར་ཁྲོད་ནམ་མཁའ་བུ་ཁྲིད་ལགས་ལ་ཨང་གཉིས་པ་བཅས་ཐོབ་འདུག
དེ་བཞིན་ལོ་ ༡༦ མན་གྱི་བུ་མོའི་འགྲན་སྡུར་ནང་ཨ་ཉི་བུ་མོ་ལ་ཨང་བཞི་པ་དང་། ལོ་ ༢༠ མན་གྱི་བུ་མོའི་རྩེད་འགྲན་ཁྲོད་བསོད་ནམས་ཆོས་སྒྲོན་ལགས་ལ་ཨང་བཞི་པ། གཡུ་སྒྲོན་ལྷ་མོ་ལགས་ལ་ཨང་ལྔ་པ་བཅས་ཐོབ་ཡོད་འདུག་ལ། སྐབས་དེར་འཛམ་གླིང་གི་རྒྱལ་ཁབ་ཧྥ་རན་སི་དང་། ནོར་ཝེ། རྒྱ་ནག་སོགས་རྒྱལ་ཁབ་ ༡༢ ཀྱི་རྩེད་འགྲན་པ་མི་གྲངས་ ༡༢༠ ལྷག་གིས་འཛུལ་ཞུགས་བྱས་ཡོད་འདུག
འཛམ་གླིང་བུམ་པ་རྟགས་མའི་ན་གཞོན་གངས་ཤུད་རྩེད་འགྲན་འདི་ནི་ཕྱི་ལོ་ ༢༠༢༡ ལོའི་ཟླ་ ༧ པར་ཨོ་རྩལ་ལྷན་ཚོགས་ཀྱིས་གཏན་འབེབས་བྱས་ཤིང་། ཕྱི་ལོ་ ༢༠༢༦ ལོའི་དགུན་ཁའི་ཨོ་རྩལ་འགྲན་ཚོགས་ཆེད་བཙུགས་པའི་ལས་གཞི་གསར་པ་ཞིག་ཡིན་འདུག འདས་ལོའི་ཕྱི་ཟླ་ ༥ ནང་རྒྱལ་ཁབ་ཁག་གི་རྩེད་འགྲན་པ་རྣམས་འདེམས་ཐོན་བྱུང་སྟེ། ཡུ་རོབ་ཏུ་རྩེད་འགྲན་དངོས་སུ་སྦྱོང་བརྡར་བྱེད་མགོ་བཙུགས་ཡོད་འདུག
ཕྱི་ལོ་ ༢༠༢༡ ལོར་རྒྱ་ནག་གི་རི་ཁུལ་རྒྱང་རྒྱུག་འགྲན་བསྡུར་བསྡུས་ཏེ་སྤྱི་ལེ་ ༤༢ དང་སྤྱི་ལེ་ ༢༡ གི་མི་སྒེར་གྱི་ལུས་རྩལ་འགྲན་བསྡུར་བྱས་ཡོད་པ་དང་། བུད་མེད་ཀྱི་རྒྱང་རྒྱུག་ཁྲོད་བོད་རིགས་བུ་མོ་ཚེ་བརྟན་གཡུ་སྒྲོན་ལགས་ཀྱིས་དུས་ཡུན་ཆུ་ཚོད་ ༡ དང་སྐར་མ་ ༣༩ དང་སྐར་ཆ་ ༣༤ ནང་སྤྱི་ལེ་ ༢༡ གི་རྒྱང་རྒྱུག་འགྲན་སྡུར་ཁྲོད་ཨང་དང་པོ་ཐོབ་འདུག་ལ། བུ་མོ་ཨ་ཉི་ལགས་ལ་རི་ཁུལ་རྒྱང་རྒྱུག་ནང་ཨང་ལྔ་པ་དང་། གནམ་གང་བུ་ཁྲིད་ལགས་ལ་ཨང་བདུན་པ་བཅས་ཐོབ་ཡོད་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། སྐལ་བཟང་སྦྱིན་པ།
