༧གོང་ས་མཆོག་གིས་བྱང་ཆུབ་སེམས་ཀྱི་ཉམས་ལེན་གྱིས་ལུས་སེམས་གཉིས་ཀར་ཕན་ཐོགས་ཆེན་པོ་ཡོད་པ་མ་ཟད། ཚེ་བསྒྲུབ་བྱེད་པའི་ཐབས་ལམ་ཡག་ཤོས་དེ་ཡིན། ཞེས་གསུངས་སོང་།
དེ་རིང་ཕྱི་ཚེས་༡༤ ཉིན་གྱི་སྔ་དྲོའི་ཆུ་ཚོད་ ༨།༠༠ ཐོག་རྒྱ་གར་ནུབ་བྷང་གྷལ་ས་ལུ་སྒར་དུ་ཡོད་པའི་སྲད་རྒྱུད་གྲྭ་ཚང་དུ། ༸གོང་ས་རྒྱལ་བ་རིན་པོ་ཆེ་མཆོག་གིས་སེམས་བསྐྱེད་ཀྱི་གསུང་ཆོས་སྩལ་སྐབས། དེ་རིང་རྒྱ་གར་ཤར་ཕྱོགས་ཀྱི་མི་མང་རྣམས་ལ་ཐུག་འཕྲད་བྱས་ཏེ་ཆོས་འབྲེལ་སོགས་བྱུང་བར་ཡག་པོ་ཞེ་དྲགས་བྱུང་། ས་ཐག་རིང་ཡང་ངོས་རང་གི་གཟུགས་པོ་མ་བདེ་བ་གང་ཡང་མ་བྱུང་། འབྲས་ལྗོངས་ཁུལ་གྱི་སེར་སྐྱ་མི་མང་རྣམས་དད་འདུན་བརྩེ་གཅིག་ཡིན་པ་ཧ་ཅང་ཡག་པོ་བྱུང་། ངོས་ཀྱིས་སློབ་སྦྱོང་ལ་དོ་སྣང་བྱ་དགོས་པའི་འབོད་སྐུལ་ཞུས་པ་ཡིན། སྤྱིར་ཆོས་དད་བྱེད་མིན་སོ་སོའི་རང་དབང་རེད། ཆོས་བྱེད་པ་ཡིན་ཚེ་ཆོས་ཀྱི་འགྲོ་སྟངས་གང་འདྲ་ཡིན་མིན་ཤེས་དགོས་པའི་ནན་སྐུལ་ཞུས་ཡོད། འབྲས་ལྗོངས་མི་མང་གིས་དགའ་བོ་ཞེ་དྲགས་བྱེད་ཀྱི་འདུག་ལ། ངོས་ཀྱི་གཟུགས་པོའང་བདེ་ཐག་ཆོད་བྱུང་།
རང་བཞིན་དོན་ནི་རབ་སྒྲུབ་ཕྱིར།། བྱང་ཆུབ་སེམས་ནི་བསྐྱེད་པ་བགྱི། ཞེས་པ་དེ་ང་ཚོས་ཉིན་ལྟར་འདོན་གྱི་ཡོད་པ་ལྟར་གཞན་དོན་བསྒྲུབ་པ་དང་། རང་དོན་སེམས་ཀྱི་ཞི་བདེ། ལུས་ཀྱི་འཕྲོད་བསྟེན་སོགས་བསྒྲུབ་པར་བྱང་ཆུབ་ཀྱི་སེམས་རེད། བྱང་ཆུབ་ཀྱི་སེམས་ལ་བསམ་བློ་ཡག་པོ་བཏང་ཚེ་གཞན་ལ་ཕན་པ་དང་། རང་ཉིད་ཀྱི་འཕྲོད་བསྟེན་སོགས་ལ་ཕན་ཐོགས་འདུག ངོས་རང་གིས་ཞོགས་པ་ཡར་ལངས་པ་དང་མཉམ་དུ། ཐོག་མར་རྟེན་འབྲེལ་བསྟོད་པ་བཏོན་ནས་རྟེན་འབྱུང་དེ་ཁོ་ན་ཉིད་སེམས་ལ་དྲན་པ་བྱས་པ་ཡིན། དེ་ནས་བྱང་ཆུབ་ཀྱི་སེམས་ལ་བསམ་བློ་བཏང་དུས། སེམས་ཀྱི་ཞི་བདེ་ལ་བསྟེན་ནས་ལུས་ཀྱི་འབྱུང་བ་ཐམས་ཅད་སྙོམས་པའི་ཕན་ཐོགས་འདུག དམིགས་བསལ་སྨན་ཟ་དགོས་པ་གང་ཡང་མེད། གཟུགས་པོ་ལྷོད་ལྷོད་བྱས་ཏེ་སྡོད་ཀྱི་འདུག ཆོས་ཟེར་དུས་འདོན་པ་བཏོན་པ་དང་། ཚོགས་འཚོགས་པའི་སྲོལ་ལ་གོ་རྒྱུ་མེད། ཆོས་ཟེར་བ་དེ་སོ་སོའི་བསམ་བློ་བཏང་ནས་མ་འདུལ་བ་འདུལ་བར་བྱེད་པ་དང་། མ་ཞི་བ་དེ་ཞི་བར་བྱེད་དགོས། འགོག་བདེན་སོགས་ལམ་སང་བསམ་བློ་འཁོར་མི་ཐུབ་མོད། སེམས་འགྱུར་བ་འགྲོ་ཐུབ་པ་དེ་སུ་ཡིན་རུང་བསམ་བློ་གཏོང་དགོས་པ་ཞིག་ཆགས་ཡོད། ཅེས་གསུངས།
ཡང་༧གོང་ས་མཆོག་གིས། ངོས་རང་རྒྱ་གར་ཤར་ཕྱོགས་འབྲས་ལྗོངས་ཁུལ་དུ་ཕྱིན་པ་ཡིན། ཡུལ་མི་རྣམས་ལ་དངོས་གནས་དད་པ་འདུག ནང་པའི་ཆོས་ཟེར་དུས་ཞབས་བརྟན་བྱེད་པ་དང་། རྔ་བརྡུང་བ། སྦུགས་དཀྲོལ་བ་སོགས་མ་རེད། སངས་རྒྱས་ཀྱི་ཆོས་ཟེར་དུས་བསམ་བློ་བཏང་ནས་ཡོང་རྒྱུ་ཞིག་རེད། བློ་སྦྱངས་ཏེ་སེམས་ལ་མ་རུང་བ་བྱེད་མཁན་གྱི་ཉོན་མོངས་དུག་གསུམ་ངོ་ཤེས་དགོས་པ་དང་། ཉོན་མོངས་པའི་ལྡོག་ཕྱོགས་ཀྱི་བློ་ལ་རིམ་བཞིན་གོམས་ཏེ། ཉོན་མོངས་ཤུགས་ཆུང་དུ་གཏོང་བ་ནི་སངས་རྒྱས་ཆོས་ཀྱི་ཐུན་མོང་མ་ཡིན་པའི་འགྲོ་སྟངས་ཤིག་རེད། དེང་སང་འཛམ་གླིང་དུའང་ཕན་ཐོགས་ཀྱི་འདུག དེང་སྐབས་ཆོས་ལུགས་དང་མ་འབྲེལ་བའི་བཟང་སྤྱོད་ཟེར་བ་ཞིག་བཤད་ཀྱི་ཡོད། ང་ཚོ་མིའི་སྤྱི་ཚོགས་ནང་དུ་སྡོད་སྐབས་བརྩེ་བ་ཡོད་ན་ཕན་ཚུན་འཆམ་མཐུན་དང་། དཀའ་ངལ་སེལ་རོགས་བྱ་རྒྱུ་གལ་ཆེན་པོ་རེད། ངོས་ཀྱིས་རྟག་པར་ཆོས་ལུགས་དང་མ་འབྲེལ་བའི་བཟང་སྤྱོད་ཟེར་བ་དེ་བོད་པའི་སྤྱི་ཚོགས་གཅིག་པོའི་ནང་དུ་མིན་པར་རྒྱ་གར་དང་ཕྱི་རྒྱལ་ཁག་ཏུའང་དེ་ལྟར་བཤད་ཀྱི་ཡོད། ཆོས་དད་ཡོད་མེད་ལ་མ་བལྟས་པར་སེམས་པ་བཟང་པོ་བྱ་རྒྱུ་གལ་ཆེན་པོ་རེད། ཅེས་གསུངས་སོང་།
༧མགོན་པོ་གང་ཉིད་མཆོག་གིས། མི་ཚེ་ནི་ཐོག་མར་ཨ་མའི་འོ་མ་སྦྱིན་པ་ནས་བཟུང་མགོ་ཚུགས་པ་དང་། བདེ་སྐྱིད་ནི་ཨ་མའི་བྱམས་བརྩེ་འོག་ནས་བྱུང་བ་རེད། མི་ཚེ་གང་བོར་ཨ་མའི་བྱམས་བརྩེའི་འོག་ནས་གཅེས་སྐྱོང་བྱས་པའི་ཚོར་བ་ཉམས་པ་མེད་པར་གནས་དགོས། ཆོས་ཁས་ལེན་མིན་ལ་མ་བལྟས་པར་མི་ཚེ་གང་བོའི་ནང་དུ་སེམས་པ་བཟང་པོ་བྱ་རྒྱུ་ཧ་ཅང་གལ་ཆེན་པོ་རེད། ང་ཚོས་འཛམ་གླིང་ཞི་བདེ་ཟེར་གྱི་ཡོད་ཀྱང་། ང་དང་ཁྱོད་ཀྱི་ཕྱོགས་ཞེན་གྱི་ཐོག་ནས་གོ་མཚོན་བེད་སྤྱོད་བྱས་ཏེ་འཁྲུག་འཛིང་བྱུང་ཡོད། དེང་སང་འཛམ་གླིང་ཐོག་གོ་མཚོན་བཀག་སྡོམ་བྱེད་པར་དོ་སྣང་གསར་བ་ཞིག་བྱུང་ཡོད། གཙོ་བོ་སེམས་རྒྱུད་ཀྱི་ང་རྒྱལ་དང་། ཕྲག་དོག ཞེ་སྡང་སོགས་ཤུགས་ཆུང་དུ་གཏོང་ཐུབ་ཚེ། དོན་དང་མཐུན་པའི་ཞི་བདེ་ཡོང་ཐུབ་ཀྱི་རེད། ཆོས་ལུགས་འདྲ་མིན་ལྟ་གྲུབ་སོགས་སྣ་ཚོགས་པ་ཡོད་ཀྱང་ཞི་བདེ་ཁ་གཅིག་གྲགས་སུ་འདོད་ཀྱི་ཡོད། སེམས་སུ་ཞི་བདེ་དང་། ཆགས་སྡང་གི་བློ་ཉུང་དུ་བཏང་ན་གོ་མཚོན་དགོས་ཀྱི་མེད་པ་རེད། ངའི་མི་ཚེ་ནང་དུ་ཆ་བཞག་ཀྱང་འཛམ་གླིང་དམག་ཆེན་དང་པོ་དང་གཉིས་པ་བརྒྱབ་ཡོད། དམག་ཆེན་གསུམ་པ་རྒྱལ་ཁབ་མང་པོས་གྲ་སྒྲིག་བྱས་ཏེ་བསྡད་པ་རེད། ང་ཚོའི་ཨ་མས་བསྐྱངས་པའི་བྱམས་བརྩེ་ལ་ཤེས་ཡོན་སྡེ་ཚན་ནས་དོ་སྣང་བྱ་དགོས་པ་ཞིག་རེད། ཞི་བདེ་ཟེར་བ་དེ་སེམས་ཀྱི་ཞི་བདེར་གོ་དགོས་པ་གལ་ཆེན་རེད། འཛམ་གླིང་ཐོག་གི་མི་ཚང་མ་ཨ་མའི་བྱམས་བརྩེ་འོག་ཏུ་འཚར་ལོངས་བྱུང་བ་གཅིག་ཡིན་པ་དང་། མིའི་སྤྱི་ཚོགས་འདི་བྱམས་བརྩེ་ལྡན་པའི་སྤྱི་ཚོགས་ཤིག་ཆགས་པའི་ཆ་རྐྱེན་ཚང་ཡོད། མི་གཅིག་གྱུར་གྱི་འདུ་ཤེས་ཐོག་ནས་མི་དང་མིའི་བར་གྱི་བརྩེ་བ་འཛིན་རྒྱུ་གལ་ཆེན་པོ་རེད་ལ། མི་དང་མིའི་བར་དུ་དབང་ཡོད་བྱེད་པའི་དུས་ཚོད་ཡོལ་བ་རེད། ཅེས་གསུངས།
ཡང་མགོན་པོ་གང་ཉིད་མཆོག་གིས། ང་ཚོ་མི་གཅིག་གྱུར་ཡིན་ཡང་རྒྱལ་ཁབ་མི་འདྲ་བ་དང་ལམ་ལུགས་མི་འདྲ་བའི་ཐོག་ནས་ཕྱོགས་ཁག་ཏུ་དབྱེ་བཞིན་ཡོད་པ་ནོར་འཁྲུལ་རེད། ང་ཚོས་སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག སེམས་ཅན་ཐམས་ཅད་སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག སེམས་ཅན་ཐམས་ཅད་སྡུག་བསྔལ་མེད་པའི་བདེ་བ་དང་མི་འབྲལ་བར་གྱུར་ཅིག སེམས་ཅན་ཐམས་ཅད་ཉེ་རིང་ཆགས་སྡང་གཉིས་དང་བྲལ་བའི་བཏང་སྙོམས་ལ་གནས་བར་གྱུར་ཅིག་ཅེས་འདོན་བཞིན་ཡོད་པ་མ་ཟད། དེ་ལྟར་བསམ་བློ་གཏོང་པའི་ནུས་པ་ཆེན་པོ་རེད། མི་གཅིག་གྱུར་གྱི་འདུ་ཤེས་ཀྱི་ཐོག་ཕན་ཚུན་རོགས་རམ་བྱ་རྒྱུ་མ་གཏོགས། ཕྱོགས་ཞེན་བྱེད་པའི་དུས་ཚོད་རྫོགས་པ་རེད། འཛམ་གླིང་ཞི་བདེ་ཟེར་བ་དེ་གནམ་ནས་འབབ་རྒྱུ་མེད་ཅིང་། ས་ནས་སྐྱེ་རྒྱུའང་མེད། ཞི་བདེ་བསྐྲུན་མཁན་མི་ཡིན་པ་རེད། མིའང་དང་པོ་ཉིད་ནས་ཞི་བདེ་སྐྲུན་མཁན་ཞིག་མ་རེད། མི་ནི་བྱམས་བརྩེའི་རང་བཞིན་ལྡན་པ་ཞིག་རེད། སེམས་ཀྱི་ཞི་བདེར་དོ་སྣང་མ་བྱས་པར་ཕྱི་དངོས་པོའི་སྟོབས་ཤུགས་ལ་བསམ་བློ་གཏོང་བཞིན་ཡོད། མི་གཅིག་གྱུར་ཐོག་ནས་ཀུན་ལ་ཕན་བདེ་བསྒྲུབ་པ་གལ་ཆེན་པོ་རེད། ཅེས་གསུངས།
མཇུག་ཏུ། ངོས་རང་ལ་ཆ་བཞག་ན་བྱང་ཆུབ་ཀྱི་སེམས་སྒོམ་པ་དེ་ངོས་ཀྱིས་ཉམས་ལེན་གྱི་གཙོ་བོ་ཆགས་ཡོད་ཅིང་། དེའི་རང་བཞིན་གྱིས་སེམས་ལ་ཞི་བདེ་ཡོང་བ་དང་། འཕྲོད་བསྟེན་གྱི་ཐོག་ཕན་ཐོགས་ཆེན་པོ་རེད་ལ། ཚེ་བསྒྲུབ་ཡག་ཤོས་དེ་རེད། ངོས་རང་ལ་ཁྱེད་ཚོས་ཏཱ་ལའི་བླ་མ་ཟེར་ནས་དགའ་བོ་བྱེད་ཀྱི་ཡོད། ངོས་ལ་དགའ་བོ་ཡོད་ན་གཞན་ཕན་གྱི་བློ་སྦྱོང་རྒྱུ་ཧ་ཅང་གལ་ཆེན་པོ་རེད། ངོས་རང་གིས་བྱང་ཆུབ་ཀྱི་སེམས་སྒོམ་ཡོད་པས་སེམས་ཞི་བདེར་རང་བཞིན་གྱིས་གནས་བསྡད་ཡོད། སུ་དང་འགྲོགས་ཀྱང་བྱམས་བརྩེ་མ་གཏོགས་ཕྲག་དོག་སོགས་ཡོང་གི་མི་འདུག ཆོས་གྲོགས་ཚོས་བྱང་ཆུབ་ཀྱི་སེམས་སྒོམ་རོགས། བྱང་ཆུབ་ཀྱི་སེམས་སྟོན་པའི་གཞུང་བྱང་ཆུབ་སེམས་པའི་སྤྱོད་པ་འཇུག་པ་དེ་བདག་གཞན་མཉམ་གཅེས་ཀྱི་བློ་སྦྱོང་བར་ཡག་པོ་འདུག ངོས་ཀྱིས་ཀྱང་རྟག་ཏུ་འདོན་བཞིན་ཡོད། དབུ་མ་འཇུག་པའི་ནང་དུའང་གཞན་ཕན་གྱི་བློ་ཡག་པོ་གསུངས་ཡོད། ཉིན་རེ་བཞིན་གང་ཐུབ་བྱང་ཆུབ་ཀྱི་སེམས་ཉམས་ལེན་བྱོས། རྒྱལ་བ་རིན་པོ་ཆེའི་འགྲམ་ནས་ཆོས་འབྲེལ་ཐོབ་པའི་སྙིང་བོ་བྱང་ཆུབ་ཀྱི་སེམས་སྒོམ་རྒྱུ་དེ་རེད། ཅེས་གསུངས།
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། སྐལ་བཟང་སྦྱིན་པ།
