སྐབས་བཅུ་བདུན་པའི་ཚོགས་དུས་དྲུག་པའི་མཇུག་སྐྱོང་ཚོགས་འདུ་འཕར་འགྱངས་བྱས་ཏེ། ཕྱི་ལོ་ ༢༠༢༤ ཟླ་ ༣ ཚེས་ ༡༣ ནས་ ༡༦ ལས་ཉིན་བཞིའི་རིང་འཚོགས་རྒྱུ་ཡིན་པའི་གསལ་བསྒྲགས་གནང་སོང་།
དེ་རིང་ཚོགས་དྲུང་ལས་ཁུངས་ཀྱིས། ཟླ་འདིའི་ཕྱི་ཚེས་ ༢༥ ནས་ ༢༩ བར་ཉིན་གྲངས་ལྔའི་རིང་འཚོགས་གཏན་ཁེལ་བའི་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་དུས་དྲུག་པའི་ལས་དོན་མཇུག་སྐྱོང་གི་ཚོགས་འདུ་འཕར་འགྱངས་བྱས་ཏེ། ཕྱི་ལོ་ ༢༠༢༤ ལོའི་ཟླ་ ༣ ཚེས་ ༡༣ ནས་ ༡༦ བར་འཚོགས་རྒྱུའི་གསལ་བསྒྲགས་སྤེལ་འདུག་པ་མ་ཟད། ཕྱི་ལོ་ ༢༠༢༤ ལོའི་ཚོགས་དུས་བདུན་པའི་སྔོན་སོང་ཚོགས་བརྡ་དེ་ཕྱིར་འཐེན་བྱས་རྗེས། ད་ལྟ་རང་བསྐྱར་དུ་ཚོགས་དུས་བདུན་པ་དེ་ཕྱི་ལོ་ ༢༠༢༤ ཟླ་ ༣ ཚེས་ ༡༨ ནས་ ༣༠ བར་འཚོགས་གཏན་ཁེལ་བའི་ཚོགས་བརྡའི་གསལ་བསྒྲགས་ཤིག་འཕྲོ་མཐུད་སྤེལ་སོང་།
ཚོགས་དྲུང་ལས་ཁུངས་ཀྱི་གསལ་བསྒྲགས་ནང་། སྐབས་བཅུ་བདུན་པའི་གྲོས་ཚོགས་ཚོགས་དུས་ ༦ པ་དེ་བཞིན་བཙན་བྱོལ་བོད་མིའི་བཅའ་ཁྲིམས་དོན་ཚན་ཞེ་དགུ་བའི་ནང་གསེས་ ༢ པ་ལྟར། སྤྱི་འཐུས་ཉུང་མཐའི་གྲངས་ཚད་མ་ལོངས་པར་ཚོགས་འདུ་ཉིན་གྲངས་བདུན་ལྷག་འཕར་འགྱངས་བྱེད་དགོས་བྱུང་ན་ཚོགས་གཙོ་སྦྲེལ་པོས་ཚོགས་འདུ་འཕར་འགྱངས་ཀྱི་ཐག་གཅོད་བྱ་རྒྱུ་ཞེས་གསལ་བ་ལྟར། ཕྱི་ཟླ་ ༩ ཚེས་ ༢༨ ཉིན་རེ་ཞིག་ཚོགས་འདུ་འཕར་འགྱངས་དང༌། ཚོགས་དུས་འདིའི་ལས་དོན་ལྷག་མ་རྣམས་མུ་མཐུད་བསྐྱང་རྒྱུའི་དུས་ཚོད་གཏན་འཁེལ་བྱུང་མཚམས་འབྲེལ་ལམ་ཞུ་རྒྱུ་གནང་བ་ལྟར། ཚོགས་དུས་དྲུག་པའི་ལས་དོན་མུ་མཐུད་སྐྱོང་དགོས་རིགས་ཕྱི་ལོ་ ༢༠༢༣ ཕྱི་ཟླ་ ༡༢ ཚེས་ ༢༥ ནས་ཚེས་ ༢༩ བར་ལས་ཉིན་ལྔ་བསྐྱང་གཏན་འཁེལ་བའི་ཡིག་ཆུང་སྔོན་སོང་ཡང་། ད་ཆ་མཚན་གཞུང་ཟུར་གསལ་སྤྱི་འཐུས་གྲངས་ ༡༦ དགོངས་ཞུ་འབྱོར་བར་བརྟེན། སླར་ཡང་བཅའ་ཁྲིམས་དོན་ཚན་ཞེ་དགུ་བའི་ནང་གསེས་ ༢ པའི་དགོངས་དོན་འཕར་འགྱངས་ཀྱིས། ཚོགས་དུས་དྲུག་པའི་ལས་དོན་མཇུག་སྐྱོང་དགོས་རིགས་ ཕྱི་ལོ་ ༢༠༢༤ ཟླ་ ༣ ཚེས་ ༡༣ ནས ༡༦ བར་ལས་ཉིན་བཞིའི་རིང་བསྐྱང་གཏན་ཁེལ་སོང་བས། ཚོགས་མི་རྣམ་པ་དུས་ཐོག་ཚོགས་བཅར་ཐོག སྤྱི་འཐུས་རྣམ་པས་ཕྱི་ཚེས་ ༡༢ རེས་གཟའ་མིག་དམར་ཉིན་ཚོགས་དྲུང་ལས་ཁུངས་སུ་ངོ་བཅར་འབྱོར་ཐོ་འགོད་གནང་ཡོང་བ་དང་། དེ་བཞིན་ཕྱོགས་བཞུགས་སྤྱི་འཐུས་རྣམ་པར་བཞུགས་མཚེར་ཚོགས་དྲུང་ལས་ཁུངས་ནས་གོ་སྒྲིག་ཞུ་དགོས་རིགས་ཕྱི་ལོ་ ༢༠༢༤ ཟླ་ ༢ ཚེས་ ༡༡ འགྱངས་མེད་ཡིག་ཐོག་གནང་དགོས་ཞེས་བཀའ་ཕེབས་སོང་བ་དགོངས་མངའ་ཞུ། ཞེས་གསལ་འདུག
གསར་འགོད་པ། སྐལ་བཟང་སྦྱིན་པ།
