མགོན་པོ་སྐྱིད་ལགས་ཀློད་གྲོལ་བཏང་འདུག

ཟླ་འདིའི་ཕྱི་ཚེས་ ༢༡ ཉིན་རྒྱ་གཞུང་ཉེན་རྟོག་པས་བདེན་པའི་འཐབ་རྩོད་པ་མགོན་པོ་སྐྱིད་ལགས་ཉིན་གྲངས་དགུའི་རིང་འཛིན་བཟུང་བཀག་ཉར་བྱས་རྗེས་ཀློད་གྲོལ་བཏང་ཡོད་འདུག

ད་རེས་བཀག་ཉར་ཁང་དུ་རྒྱའི་ལས་བྱེད་པས་མགོན་པོ་སྐྱིད་ལགས་སུ་སྡུག་སྦྱོང་མནར་གཅོད་བཏང་བའི་གནས་ཚུལ་ཤེས་རྟོགས་ཐུབ་ཀྱི་མེད་ནའང་། མགོན་པོ་སྐྱིད་ལགས་སུ་བཟའ་ཟླ་ཆོས་སྐྱོང་ལགས་དང་གཅིག་མཚུངས་ཀྱིས་རྗེས་ཕྱོགས་ཞི་འབོད་ལས་འགུལ་རིགས་མི་སྤེལ་བའི་ཁ་ཏ་སློབ་གསོ་བྱས་ཡོད་པ་མིང་བརྗོད་འདོད་མེད་པའི་མི་ཞིག་གིས་འགྲེལ་བརྗོད་གནང་བྱུང་།

ཟླ་འདིའི་ཕྱི་ཚེས་ ༡༣ ཉིན་ཨ་ཅག་མགོན་པོ་སྐྱིད་དང་བཟའ་ཟླ་ཆོས་སྐྱོང་གཉིས་ཀྱིས། རྡོ་རྗེ་བཀྲ་ཤིས་ལགས་སུ་དྲང་བདེན་མིན་པའི་ཁྲིམས་ཐག་བཅད་པ་བསྐྱར་ཞིབ་དགོས་པའི་ཞི་འབོད་ལས་འགུལ་སྤེལ་སྐབས། རྒྱ་གཞུང་ཉེན་རྟོག་པས་ཁོང་གཉིས་འཛིན་བཟུང་བཙན་ཁྲིད་བྱས་ཏེ་གར་ཡོད་མི་ཤེས་པར་གྱུར་བ་དང་། ཟླ་འདིའི་ཕྱི་ཚེས་ ༡༨ ཉིན་གྱི་སྔ་དྲོར་ཆོས་སྐྱོང་ལགས་ཉིན་ལྔའི་རིང་འཛིན་བཟུང་བཀག་ཉར་བྱས་རྗེས་ཀློད་གྲོལ་བཏང་ཡོད་པ་རེད།

ཨ་ཅག་མགོན་པོ་སྐྱིད་ལགས་ཀྱིས་ཕྱི་ལོ་ ༢༠༢༢ ཙམ་ནས་བཟུང་ཁོང་མོའི་གཅུང་པོ་བོད་ཀྱི་ཚོང་པ་རྡོ་རྗེ་བཀྲ་ཤིས་ལགས་ཀྱི་ཁྲིམས་ཆད་དྲང་བདེན་བྱུང་མེད་པ་དང་། རྡོ་རྗེ་བཀྲ་ཤིས་ཀློད་གྲོལ་གཏོང་དགོས་པ། ཁོང་མོ་གཅུང་པོ་ལ་ཐུག་ཏུ་འཇུག་དགོས་པའི་རེ་འདུན་སོགས་བཏོན་ཏེ། ལྷ་ས་འབྲིང་རིམ་མི་དམངས་ཁྲིམས་ཁང་དང་གྲྭ་བཞི་བཙོན་ཁང་སོགས་ཀྱི་མདུན་དུ་ཕྱག་འཚལ་བ་དང་སྐད་འབོད་རྒྱག་པ་སོགས་ཀྱི་ཞུ་འབོད་ལས་འགུལ་མཚམས་མ་བཞག་པར་ད་བར་སྤེལ་ཡོད་ལ། ཁོང་མོས་ཞི་འབོད་ལས་འགུལ་སྤེལ་བའི་བརྒྱུད་རིམ་ཁྲོད། རྒྱ་གཞུང་ཉེན་རྟོག་པས་མགོན་པོ་སྐྱིད་ལགས་གཙོ་བྱས་པའི་བཟའ་ཟླ་ཆོས་སྐྱོང་ལགས་དང་གཅེན་པོ་རྡོ་རྗེ་ཚེ་བརྟན་བཅས་ལ་ལས་འགུལ་སྤེལ་ཡུལ་ནས་སྔ་གཞུག་ཏུ་གང་བྱུང་འཛིན་བཟུང་བཙན་ཁྲིད་བྱས་པ་དང་རུབ་རྡུང་བཏང་བ། སྡིགས་ར་སྐུལ་བ་སོགས་དྲང་བདེན་མིན་པ་དང་མནར་གཅོད་ཀྱི་བརྒྱུད་རིམ་མང་པོ་བརྒྱུད་མྱོང་བ་རེད།

ཕྱི་ལོ་ ༢༠༠༨ ལོར་ས་བྱི་ཞི་རྒོལ་ཆེན་མོའི་རྗེས་སུ་རྡོ་རྗེ་བཀྲ་ཤིས་ལགས་ཀྱིས་བོད་མི་ཞི་རྒོལ་བར་རྒྱབ་སྐྱོར་དང་བཙན་བྱོལ་བོད་མིའི་སྤྱི་ཚོགས་ལ་དངུལ་འབོར་ཆེན་གྱིས་ཞལ་དེབས་སྤྲད་ཡོད་ལུགས་སོགས་བརྗོད་ནས་འཛིན་བཟུང་བྱས་པ་དང་།  ཕྱི་ལོ་ ༢༠༡༠ ཟླ་ ༦ ་ཚེས་ ༢༦ ཉིན་ལྷ་སར་གསང་བའི་ངང་ཁྲིམས་རྭ་ཚོགས་ཏེ་རྡོ་རྗེ་བཀྲ་ཤེས་ཀྱིས་བུ་ལོན་གཡོ་ལེན་བྱས་ཡོད་པའི་ཉེས་འཛུགས་འོག་ཚེ་བཙོན་གྱི་ཁྲིམས་ཐག་བཅད་ཡོད་ནའང་། ད་བར་རྡོ་རྗེ་བཀྲ་ཤིས་ལགས་དང་ཁོང་གི་ཁྲིམས་རྩོད་པ། ད་དུང་ནང་མི་སོགས་ཀྱིས། རྡོ་རྗེ་བཀྲ་ཤིས་ལགས་སུ་རྒྱ་གཞུང་གིས་ཉེས་འཛུགས་བྱས་ཏེ་དྲང་བདེན་མིན་པའི་ཁྲིམས་ཐག་བཅད་པར་ངོས་ལེན་རྩ་བ་ནས་བྱེད་ཀྱི་མེད་པ་མ་ཟད། ད་ལྟ་ད་དུང་རྡོ་རྗེ་བཀྲ་ཤིས་ལགས་ཀྱི་གཅེན་མོ་མགོན་པོ་སྐྱིད་དང་ཁྱོ་ག་ཆོས་སྐྱོང་ལགས། གཅེན་པོ་རྡོ་རྗེ་ཚེ་བརྟན་ལགས་བཅས་ཀྱིས་རྡོ་རྗེ་བཀྲ་ཤིས་ལགས་ཀྱི་ཁྲིམས་ཆད་བསྐྱར་ཞིབ་དགོས་པ་དང་བཙོན་གྲོལ་གཏོང་དགོས་པ་སོགས་ཀྱི་ཞི་འབོད་ལས་འགུལ་སྤེལ་མུས་ཡིན་པ་རེད།