བོད་སློབ་ཁག་གི་འགན་བདག་ ༤༤ ལ་གཞོན་སྐྱེས་མགོ་ཁྲིད་ཀྱི་ཟབ་སྦྱོང་སྤྲོད་བཞིན་འདུག

ཟབ་སྦྱོང་གི་དུས་ཡུན་ཐུང་ཐུང་ཡིན་ནའང་མཉམ་ཞུགས་པ་རྣམས་བོད་མིའི་སྒྲིག་འཛུགས་ཀྱི་ལས་དོན་བྱེད་ཕྱོགས་དང་། བོད་དོན་གྱི་སྐོར། སྤྱིར་བཏང་གི་ཤེས་བྱའི་ཐོག་ཡར་རྒྱས་འགྲོ་བཞིན་ཡོད་སྐོར་འགྲེལ་བརྗོད་གནང་བྱུང་།

ཁ་སང་ནས་ཕྱི་ཚེས་ ༢༧ བར་ཉིན་གྲངས་དྲུག་རིང་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ། བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་གོ་སྒྲིག་འོག བོད་སློབ་ཁག་གི་འགན་བདག་རྣམས་ལ་གཞོན་སྐྱེས་མགོ་ཁྲིད་ཟབ་སྦྱོང་ཐེངས་བཅུ་བ་འཚོག་བཞིན་ཡོད་ཅིང་། ཐེངས་འདིའི་ཟབ་སྦྱོང་ནང་རྒྱ་གར་དང་བལ་ཡུལ་གཉིས་ཀྱི་བོད་མིའི་གཏན་ཉིན་སློབ་གྲྭ་ཁག་ ༡༦ ནས་སློབ་གྲྭའི་འགན་བདག་གྲངས་ ༤༤ དང་། ལམ་སྟོན་པའི་དགེ་རྒན་གྲངས་ ༡༦ བཅས་མཉམ་ཞུགས་གནང་བཞིན་ཡོད་འདུག

འདི་གའི་གསར་འགོད་པས་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་ཤེས་ཡོན་ཚན་པའི་འགན་འཛིན་བསྟན་འཛིན་རྡོ་རྗེ་ལགས་སུ་ཟབ་སྦྱོང་སྐོར་ལ་བཅར་འདྲི་བྱས་པར་ཁོང་གིས། ཟབ་སྦྱོང་འདིའི་དམིགས་ཡུལ་གཙོ་བོ་ནི་མ་འོངས་པའི་བོད་ཀྱི་འཛུགས་སྐྲུན་དང་འབྲེལ་བ་ཡོད་པ་དང་། མ་འོངས་བོད་ཀྱི་མགོ་ཁྲིད་གསོ་སྐྱོང་བྱེད་པ་གནད་འགག་ཆེན་པོ་ཡིན་པར་བརྟེན། བོད་ཀྱི་སློབ་གྲྭ་ཁག་ ༡༦ ནས་འགན་བདག་ ༤༤ མཉམ་ཞུགས་བྱེད་བཞིན་ཡོད། ཟབ་སྦྱོང་ནང་མགོ་ཁྲིད་ཀྱི་ནུས་རྩལ་དང་། བོད་ཀྱི་དམངས་གཙོའི་འཕེལ་རིམ། དབུ་མའི་ལམ་གྱི་སྲིད་ཇུས། དཔེ་ཀློག་གི་གལ་གནད་དང་ཐབས་ལམ། བོད་ཀྱི་སྐད་ཡིག་དང་རིག་གཞུང་གི་གལ་གནད། ཤེས་ཡོན་གྱི་དམིགས་ཡུལ། བོད་མིའི་སྒྲིག་འཛུགས་ཀྱི་ངོ་སྤྲོད། ཕོ་མོ་འདྲ་མཉམ་གྱི་གོ་རྟོགས། དྲ་རྒྱའི་སྲུང་སྐྱོབ་དང་བདེ་འཇགས། ཆོས་ལུགས་ལ་མ་བརྟེན་པའི་བཟང་སྤྱོད་བཅས་ཀྱི་བརྗོད་གཞི་ཐོག་ཟབ་ཁྲིད་གནང་བཞིན་ཡོད་པ་མ་ཟད། བོད་མིའི་སྒྲིག་འཛུགས་ཀྱི་ལས་ཁུངས་ཁག་དང་། བོད་ཀྱི་འགྲེམས་སྟོན་ཁང་། ༧གོང་ས་ཏཱ་ལའི་བླ་མ་དཔེ་མཛོད་དང་ཡིག་ཚགས་ཁང་བཅས་སུ་ལྟ་སྐོར་སོགས་ཀྱི་ལས་རིམ་གོ་སྒྲིག་ཞུ་བཞིན་ཡོད། ཅེས་འགྲེལ་བརྗོད་གནང་བྱུང་།

ཐེངས་འདིའི་ཟབ་སྦྱོང་གི་གལ་གནད་སྐོར་ལ་ཁོང་གིས། ཕྱི་ལོ་ ༢༠༡༣ ལོ་ནས་བཟུང་སློབ་ཕྲུག་རྣམས་ལ་མགོ་ཁྲིད་ཀྱི་ཟབ་སྦྱོང་མགོ་ཚུགས་ཡོད་ཅིང་། ཐེངས་འདི་གཞོན་སྐྱེས་ཀྱི་ཟབ་སྦྱོང་ཐེངས་ ༡༠ པ་ཆགས་ཡོད། སྔོན་མ་ཟབ་སྦྱོང་ནང་དུ་འཛུལ་ཞུགས་བྱེད་མཁན་འཛིན་རིམ་བཅུ་པའི་སློབ་ཕྲུག་ཡིན་ལ། དེ་དུས་སློབ་ཕྲུག་ ༣༠༠ ཙམ་མཉམ་ཞུགས་བྱས་ཡོད། ཟབ་སྦྱོང་གོ་སྒྲིག་བྱེད་མཁན་དང་མཉམ་ཞུགས་གནང་མཁན་རྣམས་ལ་བསམ་འཆར་བསྡུ་རུབ་བྱས་སྐབས། སློབ་གྲྭའི་འགན་བདག་རྣམས་ལ་ཟབ་སྦྱོང་སྤྲོད་ཐུབ་ཚེ། ཟབ་སྦྱོང་གི་དམིགས་ཡུལ་གཞིར་བཟུང་འགྲུབ་ཐུབ་པར་ཕན་ཐོགས་ཡོད་པའི་ལམ་སྟོན་འོག ཐེངས་འདིར་དམིགས་བསལ་སློབ་གྲྭའི་འགན་བདག་རྣམས་ཀྱི་ཆེད་དུ་ཟབ་སྦྱོང་སྤྲོད་བཞིན་ཡོད། ཅེས་འགྲེལ་བརྗོད་གནང་བྱུང་།

ཟབ་སྦྱོང་གི་ཕན་འབྲས་སྐོར་ལ་ཁོང་གིས། ཟབ་སྦྱོང་གྲུབ་པ་དང་མཉམ་དུ་ཟབ་སྦྱོང་གི་ཕན་འབྲས་ག་ཚོད་བྱུང་ཡོད་མེད་ཐོག མཉམ་ཞུགས་པ་རྣམས་ལ་བསམ་འཆར་བསྡུ་རུབ་བྱེད་བཞིན་ཡོད། དེའི་སྐབས་སུ་ཁོང་ཚོས་ཟབ་སྦྱོང་གི་བརྗོད་གཞི་བརྒྱ་ཆ་ ༨༠ ཙམ་གྱིས་ཕན་འབྲས་བྱུང་ཡོད་པར་བརྗོད་ཀྱི་འདུག གལ་ཆེ་ཤོས་ཤིག་ལ་མཉམ་ཞུགས་པ་རྣམས་སོ་སོའི་སློབ་གྲྭར་ཕྱིར་ལོག་རྗེས། སོ་སོའི་སློབ་གྲྭའི་ནང་དུ་ཟབ་སྦྱོང་ནང་སྦྱངས་བའི་བརྗོད་གཞི་རྣམས་གོ་རྟོགས་སྤེལ་བཞིན་ཡོད། འདས་བའི་ལོ་བཅུའི་རིང་རོབ་རྩིས་ཙམ་བྱས་ཚེ་ཕལ་ཆེར་སློབ་ཕྲུག་ ༢༥༠༠ ཙམ་ལ་ཟབ་སྦྱོང་གོ་སྒྲིག་ཞུས་ཐུབ་ཡོད། ཟབ་སྦྱོང་གི་དུས་ཡུན་ཐུང་ཐུང་ནང་དུ་བོད་མིའི་སྒྲིག་འཛུགས་ཀྱི་ལས་དོན་བྱེད་ཕྱོགས་དང་། བོད་དོན་གྱི་སྐོར། སྤྱིར་བཏང་གི་ཤེས་བྱའི་ཐོག་གཏན་གཏན་ཡར་རྒྱས་འགྲོ་བཞིན་ཡོད་པར་བསམ་གྱི་འདུག ཅེས་འགྲེལ་བརྗོད་གནང་བྱུང་།

ཟབ་སྦྱོང་དུ་མཉམ་ཞུགས་བྱེད་དགོས་པའི་དམིགས་ཡུལ་དང་ཉམས་མྱོང་སྐོར་ལ་སློབ་གྲྭ་ཁག་ཅིག་གི་འགན་བདག་རྣམས་བཅར་འདྲི་བྱེད་སྐབས། དོན་གྲུབ་གླིང་སློབ་གྲྭའི་འགན་བདག་ས་ནེ་ཧཱ་སྒྲོལ་མ་ལགས་ཀྱིས།  ང་ཚོ་སློབ་གྲྭའི་འགན་བདག་ཡིན་པའི་ཆ་ནས་མགོ་ཁྲིད་ཀྱི་འོས་འགན་འཁུར་སྟངས་ཐོག་ཤེས་རྟོགས་དགོས་པ་རེད། ཐེངས་འདིའི་ཟབ་སྦྱོང་ནང་དུ་འགན་བདག་གི་འགན་འཁུར་ལ་སློབ་སྦྱོང་བྱེད་པའི་གོ་སྐབས་ཐོབ་སོང་། འགན་བདག་གིས་སློབ་ཕྲུག་ཚང་མར་འདྲ་མཉམ་གྱི་འདུ་ཤེས་འཛིན་དགོས་པ་གལ་ཆེན་པོ་མཐོང་སོང་། ཞེས་བརྗོད་བྱུང་།

བལ་ཡུལ་རྣམ་རྒྱལ་མཐོ་སློབ་ཀྱི་འགན་བདག་ཕུར་བུ་བསྟན་འཛིན་ལགས་ཀྱིས། ཟབ་སྦྱོང་འདི་ནི་སློབ་གྲྭའི་འགན་བདག་རྣམས་ཀྱིས་མ་འོངས་པར་མགོ་ཁྲིད་ཀྱི་འོས་འགན་འཁུར་སྟངས་ཀྱི་ལམ་སྟོན་ཞིག་རེད། སློབ་གྲྭ་ནི་སྤྱི་ཚོགས་ཤིག་ཡིན་པས། དེའི་ནང་དུ་དཀའ་ངལ་གཏན་གཏན་ཡོད་པ་ཞིག་རེད། ཟབ་སྦྱོང་ཁྲོད་སློབ་གྲྭའི་ནང་དུ་སློབ་ཕྲུག་རྣམས་དང་མཉམ་དུ་འབྲེལ་བ་བྱེད་སྟངས་དང་། དཀའ་ངལ་ལ་གདོང་ལེན་བྱེད་སྟངས་སོགས་ལམ་སྟོན་གནང་བྱུང་། ཞེས་བརྗོད་སོང་།

ཡང་བལ་ཡུལ་ཨེས་ཨོ་ཨེས་མཐོ་སློབ་ཀྱི་འགན་བདག་པདྨ་དབྱངས་འཛོམས་བླ་མ་ལགས་ཀྱིས། ང་ཚོའི་ཕ་ཡུལ་ས་ཁུག་ཡིན་པར་བརྟེན། ད་ལྟ་བར་མགོ་ཁྲིད་མེད་པའི་དཀའ་ངལ་གྱིས་ཡར་རྒྱས་ཕྱིན་མེད་པ་རེད། ཟབ་སྦྱོང་གི་ལམ་སྟོན་འོག་མ་འོངས་བར་དེང་རབས་ཀྱི་སློབ་སྦྱོང་མཉམ་དུ་སྤྱི་ཚོགས་ཡར་རྒྱས་གཏོང་འདོད་ཡོད་པ་དང་། ཟབ་སྦྱོང་ཁྲོད་སློབ་གྲྭ་ནང་དུ་འགན་བདག་གི་འགན་འཁུར་སྐབས་མི་རིགས་འདྲ་མིན་བར་འཆམ་མཐུན་བྱེད་དགོས་པའི་གོ་རྟོགས་བྱུང་། ཞེས་བརྗོད་སོང་།

དེ་བཞིན་ཌོ་ལིན་ཇི་སམ་བྷོ་ཊ་སློབ་གྲྭའི་འགན་བདག་བདེ་སྐྱིད་སྒྲོལ་མ་ལགས་ཀྱིས། ཐེངས་འདིའི་ཟབ་སྦྱོང་ནི་སློབ་གྲྭའི་ནང་དུ་འགན་བདག་གི་འགན་འཁུར་སྐབས་དཀའ་ངལ་ལ་གདོང་ལེན་ཇི་ལྟར་བྱེད་དགོས་མིན་ལམ་སྟོན་ཞིག་རེད། འགན་བདག་གིས་སློབ་གྲྭའི་ཆེད་དུ་ལས་ཀ་བྱེད་སྐབས་ལས་འགན་དེ་དཀའ་ངལ་དུ་མི་འཛིན་པར་འབད་བརྩོན་བྱ་དགོས་པའི་གོ་རྟོགས་བྱུང་། ཞེས་བརྗོད་སོང་།

གསར་འགོད་པ། བྱམས་པ་ཚེ་རིང་།

རྩོམ་སྒྲིག་པ། པདྨ་མཚོ།