༸གོང་ས་རྒྱལ་བ་རིན་པོ་ཆེ་འཛམ་གླིང་ཞི་བདེའི་སྨོན་ལམ་གྱི་ཚོགས་མགོན་དུ་ཆིབས་བསྒྱུར་བསྐྱངས་ནས་སེམས་ཀྱི་གནས་ལུགས་ལ་བརྟག་དཔྱད་བྱ་རྒྱུ་དཔེ་གལ་ཆེན་པོ་ཡིན་སྐོར་བཀའ་སློབ་བསྩལ་སོང་།
དེ་རིང་ཕྱི་ཟླ་ ༡༢ ཚེས་ ༢༣ ༸གོང་ས་རྒྱལ་བ་རིན་པོ་མཆོག་གནས་མཆོག་རྡོ་རྗེ་གདན་གྱི་མཆོད་རྟེན་རིན་པོ་ཆེ་མཆོག་གི་དྲུང་དུ་ཞབས་ཀྱིས་བཅགས་ནས། འཛམ་གླིང་ཞི་བདེའི་སྨོན་ལམ་གྱི་ཚོགས་མགོན་དུ་ཆིབས་བསྒྱུར་བསྐྱངས་གནང་སོང་ལ། དེ་བཞིན་དེ་རིང་གི་སྨོན་ལམ་དེའི་ཐོག་ས་སྐྱ་གོང་མ་ཁྲི་འཛིན་རིན་པོ་ཆེ་མཆོག་དང་། དགའ་ལྡན་ཁྲི་པ་རྗེ་བཙུན་བློ་བཟང་བསྟན་འཛིན་མཆོག་སོགས་ཕྱི་ནང་གི་བསྟན་བདག་བླ་ཆེན་རྣམས་དང་། རྒྱལ་ཁབ་ ༣༣ ཙམ་ནས་ནང་པའི་བླ་སྤྲུལ་དགེ་འདུན་པ་ ༢༠༠༠ ཙམ་ཕེབས་ཡོད་འདུག
སྐབས་དེར་༸གོང་ས་རྒྱལ་བ་རིན་པོ་ཆེ་མཆོག་གིས། དེ་རིང་ཆོས་གྲོགས་ཚང་མར་ཞུ་རྒྱུ་ལ། ངོས་རང་གཙོས་ང་རང་ཚོ་ཚང་མ་སངས་རྒྱས་བཅོམ་ལྡན་འདས་ཀྱི་གནས་ཁྱད་པར་ཅན་འདིར་རུག་རུག་བྱས་ནས་འདུས་ཡོད་པ་རེད། སྟོན་པས་རྟེན་འབྱུང་ནང་དེ་ཁོ་ན་ཉིད་གསུངས་པ་དེ་ཐུན་མོང་མ་ཡིན་པ་ཞིག་ཆགས་འདུག དེ་དང་འདྲ་བའི་རྟེན་འབྱུང་གི་ལྟ་བ་དེ་རང་དོན་ཡིད་བྱེད་ཀྱི་བློ་དང་འདྲེས་པ་ཡིན་ན།། ཉེ་རང་དགྲ་བཅོམ་པའི་གོ་འཕང་ཐོབ་རྒྱུ་ཞིག་དང་། རྟེན་འབྱུང་གི་ལྟ་བ་དེ་བྱང་ཆུབ་ཀྱི་སེམས་ཀྱིས་འཛིན་དུས། སྒྲིབ་གཉིས་སྤང་པའི་བྲལ་བའི་ཡོན་ཏན་མངོན་པར་བྱ་ཐུབ་རྒྱུ་ཞིག་ཆགས་ཀྱི་ཡོད་པས། སེམས་ཀྱི་གནས་ལུགས་བརྟག་དཔྱད་བྱ་རྒྱུ་དཔེ་གལ་ཆེན་པོ་འདུག ཅེས་གསུངས་སོང་།
ཡང་མགོན་པོ་གང་ཉིད་ཀྱིས། ངོས་རང་ལ་ཆ་བཞག་ནའང་བཅོམ་ལྡན་འདས་ཀྱི་རྗེས་འབྲང་དགེ་སློང་ཞིག་ཡིན་པས། ཟབ་པ་དང་རྒྱ་ཆེ་བའི་ལམ་གྱི་སྐོར་ལ་ལོ་མང་པོར་སློབ་སྦྱོང་བྱས་ནས་སྒོམ་མཁན་ཞིག་ཆགས་ཡོད། དེ་རིང་བཅོམ་ལྡན་འདས་མངོན་པར་རྫོགས་པར་སངས་རྒྱས་ནས་ཆོས་འཁོར་སྐོར་སའི་གནས་ཁྱད་པར་ཅན་འདིར། བཅོམ་ལྡན་འདས་ཀྱི་ཟབ་པ་དང་རྒྱ་ཆེ་བའི་ལམ་གྱི་སྐོར་ལ་རྗེས་འདེད་བྱ་རྒྱུ་བྱུང་བ་དེ་ཧ་ཅང་གི་སྐལ་བ་བཟང་པོ་ཡིན། འཛམ་གླིང་འདིའི་སྒང་གི་སེམས་ཅན་ཐམས་ཅད་དང་ཡང་སྒོས་མི་ཚང་མས་སྡུག་བསྔལ་མི་འདོད་ཅིང་བདེ་བ་འདོད་མཁན་ཤ་སྟག་རེད། ཡིན་ན་ཡང། སྡུག་བསྔལ་དང་བདེ་བའི་རྒྱུ་བཙལ་བཅད་ནས་བསམ་བློ་གཏོང་མཁན་ཉུང་ཉུང་ཆགས་འདུག ཅེས་དང་། བདག་ཅག་གི་སྟོན་པ་བཅོམ་ལྡན་འདས་ཀྱིས་གསུངས་པ་དེ་ང་རང་ཚོས་ལག་ལེན་བསྟར་ནས། སེམས་མ་འདུལ་བ་དེ་འདུལ་བར་བྱོས། སེམས་མ་ཞི་བ་དེ་ཞི་བ་བྱོས། དེ་འདྲ་ཞིག་ལ་ངོས་རང་གི་ཉམས་མྱོང་གི་ཐོག་ནས་ལོ་མང་པོ་ཞིག་ལ་བསམ་བློ་གཏོང་ཡོང་དུས། སེམས་ནང་དུ་ཆགས་སྡང་སྐྱེ་རྒྱུ་དེ་ཧ་ལམ་མེད་པ་ཞིག་ཡོང་གི་ཡོད། དཔེར་ན། བོད་ནང་དུ་དཀའ་ངལ་མང་པོ་ཞིག་འཕྲད་ཀྱིན་ཡོད་རེད་དེ། དཀའ་ངལ་དེ་དག་ལ་སྙིང་རྗེ་སྐྱེས་པ་མ་གཏོགས་ཁོང་ཁྲོ་གཏན་ནས་ལང་གི་མི་འདུག དེ་ནི་བཅོམ་ལྡན་འདས་ཀྱི་ཆོས་ཀྱི་བསླབ་བྱས་སེམས་ལ་འགུལ་སྐྱོད་ཐེབས་པ་ཞིག་ཆགས་བསྡད་ཡོད་རེད། བྱས་ཙང་། ཆོས་གྲོགས་ཚང་མས་སངས་རྒྱས་བཅོམ་ལྡན་འདས་ཀྱི་ཆོས་ལ་སློབ་སྦྱོང་བྱས་ནས། རང་རྒྱུད་ལ་སྐྱེས་ནས་ཕྱིན་ཚེ་དངོས་གནས་དྲང་གནས་ཞི་བདེ་ཡོང་ཐུབ་རྒྱུ་ཞིག་དང་། དེ་ལ་བརྟེན་ནས་ཚེ་རབས་ནས་ཚེ་རབས་སེམས་རྒྱུད་འདུལ་པོ་ཞིག་གི་ཐོག་ནས་འགྲོ་ཐུབ་རྒྱུ་ཞིག་རེད། ཅེས་སོགས་གསུངས་སོང་།
དེ་བཞིན་༸གོང་ས་རྒྱལ་བ་རིན་པོ་ཆེ་མཆོག་གི་མཛད་འཆར་ལྟར་ན། ཟླ་འདིའི་ཕྱི་ཚེས་ ༢༩ ནས་ཉིན་གྲངས་གསུམ་རིང་༸གོང་ས་རྒྱལ་བ་རིན་པོ་ཆེ་མཆོག་ནས་གནས་མཆོག་རྡོ་རྗེ་གདན་གྱི་དུས་དབང་གསུང་ཆོས་ར་བར་ཆོས་འབྲེལ་དང་། ཕྱི་ལོ་ ༢༠༢༤ ཟླ ༡ ཚེས་ ༡ ཉིན་༸གོང་ས་རྒྱལ་བ་རིན་པོ་ཅེ་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་ཡིན་འདུག
གསར་འགོད་པ། དཔལ་ལྡན།
(རང་དོན་ཡེ་ཤེས་ཀྱི་བློ་དང་འབྲེལ་བ་ཡིན་ན།) ཞེས་བཀོད་འདུག་པ་ནོར་བ་ཡིན། རང་དོན་ཡིད་བྱེད་ཀྱི་བློ་དང་འདྲེས་པ་ཡིན་ན། ཞེས་འགོད་དགོས།
(ཆགས་བཞག་ནའང་། ) ཆ་བཞག་ནའང་།
(གོ་འཕངས་) གོ་འཕང་
(ལག་ལེག) ལག་ལེན་
(སྐྱེས་རྒྱུ་) སྐྱེ་རྒྱུ་
(ཕྱིན་ཚེ་) ཕྱིན་ཆད་