བོད་དོན་གདུང་སེམས་མཉམ་སྐྱེད་ཀྱི་ལག་དེབ་སྔོན་པོ།

ཕྱི་ལོ་ ༡༩༩༦ ནས་ད་ལྟ་བར་བོད་མིའི་སྒྲིག་འཛུགས་ཀྱི་བོད་དོན་གདུང་སེམས་མཉམ་སྐྱེད་མཚོན་སླད་ཀྱི་ལག་དེབ་སྔོན་པོའི་ལས་གཞིའི་ནང་མཉམ་ཞུགས་གནང་མཁན་མི་གྲངས་ ༧༠༠༠ ཙམ་བྱུང་ཡོད་འདུག

ཉེ་ཆར་ཨོ་སི་ཊོ་ལི་ཡའི་བོད་དོན་ལྷན་ཁང་ (Australia Tibet Council) གི་ཚོགས་མི་ཊོམ་ (Tom Berndt) ལགས་དང་ཨེ་ལེན་ (Elaine Berndt) ལགས་རྣམ་གཉིས་ཀྱིས། བཙན་བྱོལ་བོད་མིའི་ལག་དེབ་སྔོན་པོའི་ (Blue Book) ཚོགས་མིའི་ཁོངས་སུ་གསར་དུ་འཛུལ་ཞུགས་གནང་ཡོད་པ་དང་། ཁོང་རྣམ་པ་གཉིས་ནི་ལག་དེབ་སྔོན་པོའི་ཚོགས་ཁོངས་སུ་ཞུགས་མཁན་གསར་ཤོས་དེ་ཡིན་ལ། རྒྱ་བལ་འབྲུག་གསུམ་ཕུད་ལྷོ་ཤར་ཨེ་ཤ་ཡའི་ཁུལ་གྱི་སྤྱི་འཐུས་རྡོ་རིང་བསྟན་འཛིན་ཕུན་ཚོགས་ལགས་ཀྱིས། ཁོང་རྣམ་གཉིས་ལག་དེབ་སྔོན་པོའི་ལས་གཞི་ནང་མཉམ་ཞུགས་གནང་བར་དགའ་བསུའི་འཚམས་འདྲི་ཞུས་འདུག

ཕྱི་ལོ་ ༡༩༩༦ ལོར་བོད་གཞུང་གིས་བོད་དོན་ལ་གདུང་སེམས་མཉམ་སྐྱེད་ཀྱི་ལག་དེབ་སྔོན་པོ་ (Blue Book) ལས་གཞི་འདི་མགོ་འཛུགས་གནང་ཡོད་པ་དང་། འཛམ་གླིང་རྒྱལ་ཁབ་འདྲ་མིན་ནས་མི་སྒེར་དང་། ཚོགས་པ། སྒྲིག་འཛུགས་གང་རུང་ཞིག་གིས་བོད་དོན་རྒྱབ་སྐྱོར་མཚོན་ཆེད་ཞལ་འདེབས་གནང་སྟེ་ལས་གཞི་འདིའི་ནང་མཉམ་ཞུགས་གནང་གི་ཡོད་འདུག་ལ། ལས་གཞི་འདི་བརྒྱུད་ཞལ་འདེབས་བྱུང་བའི་དངུལ་བབ་རྣམས་ཀྱང་བཙན་བྱོལ་བོད་མིའི་སྤྱི་ཚོགས་ཡར་རྒྱས་དང་། བོད་མིའི་འཕྲོད་བསྟེན། ཤེས་ཡོན་གྱི་སྡེ་ཁག་སོགས་བོད་མིའི་སྒྲིག་འཛུགས་ཀྱི་བྱེད་སྒོ་སྣ་མང་ལ་མཐུན་འགྱུར་སླད་བེད་སྤྱོད་གནང་གི་ཡོད་འདུག

འདི་གའི་གསར་འགོད་པས་བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་འབྲེལ་ཡོད་ལས་བྱེད་ལ་དེའི་སྐོར་སྐད་ཆ་དྲིས་པར་ཁོང་མོས། ད་བར་ལག་དེབ་སྔོན་པོ་ལས་གཞིའི་ནང་མཉམ་ཞུགས་བྱེད་མཁན་མི་གྲངས་ ༧༠༠༠ ཙམ་བྱུང་ཡོད་པ་དང་། འབྱུང་འགྱུར་ལས་གཞི་འདི་མང་ཚོགས་ནང་དུས་ནས་དུས་སུ་གོ་རྟོགས་གང་མང་སྤེལ་རྒྱུ་དང་། ཞལ་འདེབས་བསྡུ་རུབ་གང་ཐུབ་ཡོང་རྒྱུའི་འབད་བརྩོན་ཞུ་བཞིན་ཡོད་སྐོར་བརྗོད་བྱུང་།

གསར་འགོད་པ། བསྟན་འཛིན་ཕུར་བུ།

རྩོམ་སྒྲིག་པ། པདྨ་མཚོ།