འཇམ་མགོན་ས་སྐྱ་པཎྜིཏ་ཀུན་དགའ་རྒྱལ་མཚན་དཔལ་བཟང་པོ་མཆོག་གི་དགོངས་རྫོགས་རྗེས་དྲན་ཐེངས་ ༧༧༢ པ་བསྟུན་ནས་༧དཔལ་ས་སྐྱའི་ཁྲི་འཛིན་ཞེ་གཉིས་པ་རཏྣ་བཛྲ་རིན་པོ་ཆེ་མཆོག་དབུ་བཞུགས་ཐོག མཁས་དབང་གསུམ་གྱིས་ས་པཎ་མཆོག་གི་མཛད་རྗེས་དང་ཤུགས་རྐྱེན་སྐོར་ལ་བགྲོ་གླེང་གནང་འདུག
དེ་རིང་ཁེ་ན་ཌའི་ཊོ་རོན་ཊོ་གངས་ལྗོངས་ཆོས་ལྡན་གླིང་ཚོགས་ཁང་དུ། དཔལ་ས་སྐྱ་ཆོས་འཁོར་གླིང་དང་ས་གནས་བོད་རིགས་སྤྱི་མཐུན་ཚོགས་པ་གཉིས་ཀྱི་གོ་སྒྲིག་འོག འཇམ་མགོན་ས་སྐྱ་པཎྜི་ཏ་ཀུན་དགའ་རྒྱལ་མཚན་དཔལ་བཟང་པོ་མཆོག་གི་དགོངས་རྫོགས་རྗེས་དྲན་ཐེངས་ ༧༧༢ པ་དང་བསྟུན། ཆོས་རྗེ་ས་པཎ་མཆོག་གི་མཛད་རྣམ་ཐོག་མཁས་པའི་བགྲོ་གླེང་ཞིག་འཚོགས་ཡོད་ཅིང་། ཚོགས་ཐོག་ཏུ་༧དཔལ་ས་སྐྱའི་ཁྲི་འཛིན་ཞེ་གཉིས་པ་རཏྣ་བཛྲ་རིན་པོ་ཆེ་མཆོག་དབུ་བཞུགས་ཐོག ༧སྐུའི་གསུང་བསྒྱུར་བ་དགེ་བཤེས་ཐུབ་བསྟན་སྦྱིན་པ་ལགས་དང་། ཁ་ལི་ཧྥོར་ནི་ཡ་གཙུག་ལག་སློབ་གཉེར་ཁང་གི་སློབ་དཔོན་མཱ་ཐོ་ཝི་ལིམ་ཀིན་(Matthew William king)ལགས། ཊོ་རོན་ཊོ་གཙུག་ལག་སློབ་གཉེར་ཁང་གི་སློབ་དཔོན་སཱ་རཱ་ཧཱ་རི་ཆར་ཌི་སོན་(Sarah Richardson)བཅས་ས་གནས་བོད་རིགས་སེར་སྐྱ་མི་མང་རྣམས་མཉམ་ཞུགས་གནང་ཡོད་འདུག
ཐེངས་འདིའི་བགྲོ་གླེང་གི་སྐོར་ལ་དཔལ་ས་སྐྱ་ཆོས་འཁོར་གླིང་གི་མཁན་པོ་ཀུན་དགའ་ཤེས་རབ་ལགས་ཀྱིས། འཇམ་མགོན་ས་སྐྱ་པཎྜིཏ་ཀུན་དགའ་རྒྱལ་མཚན་དཔལ་བཟང་པོ་མཆོག་གིས་སངས་རྒྱས་བསྟན་པ་སྤྱི་དང་། ལྷག་དོན་བོད་བརྒྱུད་ནང་བསྟན་གྱི་མདོ་སྔགས་རིག་གནས་དང་བཅས་པར་མཛད་རྗེས་བླ་མེད་བཞག་ཡོད་ཅིང་། བགྲོ་གླེང་ཐོག་ས་པཎ་མཆོག་གིས་བོད་སྔ་རབས་པས་བོད་བསྒྱུར་བྱས་མེད་པའི་མདོ་སྔགས་ཀྱི་ཆོས་དང་། བོད་བསྒྱུར་ཟིན་པ་རྣམས་ལ་དག་བཅོས། བོད་དུ་ཡོད་པའི་ཆོས་ནོར་བ་རྣམས་ལ་སྡོམ་གསུམ་རབ་དབྱེ་སོགས་ཀྱི་གཞུང་བརྩམས་ཏེ་བཀའ་ཆོས་བསྩལ་བའི་རླབས་ཆེན་གྱི་མཛད་རྗེས་བཞག་པར་མི་མང་གི་ཤེས་རྟོགས་ཡོང་རྒྱུ་དམིགས་ཡུལ་དང་པོ་ཡིན། ཁོང་གིས་རྒྱ་གར་གྱི་རིག་གཞུང་ལྟར་རིག་གནས་ཆེ་ཆུང་དང་སྒྲའི་བསྟན་བཅོས། རོལ་མོའི་བསྟན་བཅོས་སོགས་བོད་ཀྱི་ཤེས་ཡོན་གྱི་བང་མཛོད་ཞིག་བསྐྲུན་པར་གསལ་སྟོན་བྱ་རྒྱུ་དམིགས་ཡུལ་གཉིས་པ་ཡིན། དེ་བཞིན་ས་པཎ་མཆོག་ནས་དངོས་ཤུགས་བརྒྱུད་གསུམ་གྱིས་བོད་པ་རྣམས་ཞི་བའི་ཐོག་སོག་པོའི་འཇིགས་པ་ལས་བསྐྱབས་ཡོད་པ་དང་། ཁོང་གི་ཚ་བོ་འགྲོ་མགོན་ཆོས་རྒྱལ་འཕགས་པས་སོག་པོའི་རྒྱལ་བོ་རྣམས་ཆོས་ཀྱིས་འདུལ་བ་མ་ཟད། འཛམ་གླིང་ཡོངས་སུ་ཞི་བདེ་སྐྲུན་པའི་མཁྱེན་རྟོགས་བཅས་དམིགས་ཡུལ་གསུམ་གྱི་ཆེད་དུ་གོ་སྒྲིག་ཞུས་ཡོད་ཅེས་བརྗོད་སོང་།
༧དཔལ་ས་སྐྱའི་ཁྲི་འཛིན་ཞེ་གཉིས་པ་རཏྣ་བཛྲ་རིན་པོ་ཆེ་མཆོག་གིས། དཔལ་ལྡན་ས་སྐྱ་བའི་ཆོས་རྒྱུད་ཀྱི་ནང་དུ་རྗེ་བཙུན་གོང་མ་རྣམ་ལྔ་ཡོད་པའི་ནང་ནས་གཅིག་ནི་ས་སྐྱ་པཎྜིཏ་ཆེན་པོ་མཆོག་རེད། ཁོང་གིས་སྐུ་ན་གཞོན་དུས་ནས་སློབ་གཉེར་གྱི་ཐོག་གསན་བསམ་རྒྱ་ཆེར་མཛད་ཡོད་ཅིང་། རྒྱ་གར་གྱི་ལེགས་སྦྱར་སྐད་ཀྱང་གཏིང་ཟབ་མཁྱེན་གྱི་ཡོད་པ་མ་ཟད། རྒྱ་གར་འཕགས་པའི་ཡུལ་ནས་དར་བའི་དམ་པའི་ཆོས་དང་།བོད་གངས་ཅན་གྱི་ཆོས་རྒྱུད་ཁག་ལ་རིས་མེད་ཐོག་ནས་དད་པ་དག་སྣང་བྱེད་མཁན་ཡིན་པ་མ་ཟད། རིས་སུ་མ་ཆེད་པའི་ཆོས་ལུགས་ཚང་མ་སློབ་གཉེར་གཏིང་ཟབ་བྱས་ཏེ། ཕྱོགས་རིས་མི་འགྲོ་བའི་ཉམས་མྱོང་ཐོག་གྲུབ་མཐའ་ཀུན་འདུས་ལ་སོགས་བརྩམས་ཏེ་མིག་དཔེ་ཡག་པོ་བསྟན་ཡོད་སྐོར་གསུངས་སོང་།
ཁ་ལི་ཧྥོར་ནི་ཡ་གཙུག་ལག་སློབ་གཉེར་ཁང་གི་སློབ་དཔོན་མཱ་ཐོ་ཝི་ལིམ་ཀིན་(Matthew William king)ལགས། ཕྱི་ལོ་ ༡༢༤༧ ལོར་ལན་ཀྲུའུ་དུ་ས་པཎ་མཆོག་དང་སོག་པོའི་རྒྱལ་བོ་གོ་དན་མཇལ་འཕྲད་གནང་ཡོད་ཅིང་། བོད་དང་སོག་པོའི་ཆོས་འབྱུང་ཁག་ཏུ་རྒྱལ་བོ་གོ་དན་གྱིས་ས་པཎ་མཆོག་ལ་རྫུ་འཕྲུལ་དང་མངོན་ཤེས་ཡོད་མེད་སྐོར་འཁོད་ཡོད་པ་དང་། ཁོང་གཉིས་བར་གྱི་འབྲེལ་བ་གལ་ཆེན་ཞིག་ནི་ས་པཎ་མཆོག་གིས་འཕགས་པ་སེང་གེ་དགྲ་ཡི་ཆོས་འཁོར་ལ་བརྟེན་ཏེ། རྒྱལ་བོ་གོ་དོན་ནད་ལས་བསྐྱབས་པ་དེ་རེད། དེའི་སྐོར་སོག་པོའི་ལོ་རྒྱུས་དང་ཆོས་འབྱུང་མང་པོར་གསལ་སྟོན་རྒྱས་བཤད་བྱས་ཡོད། ས་པཎ་མཆོག་གིས་ཐབས་མཁས་ཐུགས་རྗེ་ཐོག་རྒྱལ་བོ་གོ་དན་ནད་ལས་སྐྱབས་པར་བརྟེན། སོག་པོའི་བློན་ཆེན་དང་སྐུ་དྲག་མང་པོས་ནང་བསྟན་དུ་ཞུགས་པའི་ཐོག་མའི་རྨང་གཞི་རུ་གྱུར་བ་རེད། བོད་ཀྱི་ཆོས་འབྱུང་ཁག་ཏུ་རྒྱལ་བོ་གོ་དན་ནད་ལས་སྐྱབས་པ་དེ་ནི་བོད་ནང་ཐོག་མར་སློབ་དཔོན་པདྨ་འབྱུང་གནས་ཀྱིས་ནང་ཆོས་ཐོག་མར་སྤེལ་སྐབས་ལྷ་འདྲེ་དམ་ལ་བཏགས་པ་སྤྱི་མཚུངས་བཞིན་བཤད་ཀྱི་ཡོད་ལ། སོག་པོའི་ལོ་རྒྱུས་སུ་དེ་ནི་བོད་སོག་གི་མཆོད་ཡོན་གྱི་འབྲེལ་བ་དང་ནང་ཆོས་ཐོག་མར་སོག་ཡུལ་དར་བར་ངོས་འཛིན་བྱེད་ཀྱི་ཡོད།
ས་པཎ་མཆོག་གིས་རྒྱལ་བོ་གོ་དན་ནད་ལས་སྐྱབས་པ་ནི་ཕྱོགས་གཞན་ཞིག་ནས་བཤད་ན་སོག་ཡུལ་དུ་ཆོས་སྲིད་ཟུང་འབྲེལ་བྱེད་པའི་རྒྱུ་རྐྱེན་གཙོ་བོ་ཆགས་ཡོད། རྗེས་སུ་འགྲོ་མགོན་ཆོས་རྒྱལ་འཕགས་པས་རྒྱལ་བོ་ཀུབ་ལི་ཁན་དང་བཙན་མོ་སོགས་དབང་བསྐུར་པས། སོག་ཡུལ་ནང་ཆོས་སྲིད་ཟུང་འབྲེལ་སྲ་བརྟན་དང་རྒྱུན་གནས་ཐུབ་ཡོད། འགྲོ་མགོན་ཆོས་རྒྱལ་འཕགས་པའི་རྗེས་སུ། རྒྱལ་དབང་སྐུ་ཕྲེང་གསུམ་པ་དང་ལྔ་བ་སོགས་བོད་ཀྱི་བླ་སྤྲུལ་མང་པོ་དང་སོག་པོའི་རྒྱལ་བོ་བར་དུ་ཆོས་སྲིད་ཀྱི་འབྲེལ་བ་བྱུང་ཡོད། སོག་པོའི་ལོ་རྒྱུས་སྨྲ་བ་ཚོས་ས་པཎ་མཆོག་གིས་སོག་ཡིག་གསར་བཟོ་དང་བསྒྱུར་བཅོས་བྱས་པར་བརྟེན། སོག་ཡིག་ཏུ་བཀའ་འགྱུར་དང་བསྟན་འགྱུར་སྒྱུར་ཐུབ་པ་ངོས་འཛིན་བྱེད་ཀྱི་ཡོད། ས་པཎ་མཆོག་གིས་གསང་སྔགས་རྡོ་རྗེ་ཐེག་པ་དང་། ཆོས་སྲིད་ཟུང་འབྲེལ་གྱི་མཛད་རྗེས་ལ་བརྟེན་ཏེ། རིམ་བཞིན་སོག་ཡུལ་དུ་ཚད་མ་རིག་པའི་གཞུང་སོགས་ནང་བསྟན་དར་ཁྱབ་ཤུགས་ཆེན་བྱུང་། ས་སྐྱ་ལེགས་བཤད་ནི་སོག་ཡུལ་ནང་དུ་ཤུགས་རྐྱེན་ཆེས་ཆེར་ཐེབས་ཡོད་པའི་ཕྱག་དཔེ་ཞིག་ཡིན་ལ། སོག་ཡུལ་ནང་དུ་ནང་བསྟན་དར་ཁྱབ་ཆེན་པོ་བྱུང་བའང་ས་པཎ་མཆོག་གི་མཛད་འཕྲིན་དང་ཁ་བྲལ་ཐབས་མེད་པ་ཞིག་ལ་ངོས་འཛིན་བྱེད་ཀྱི་ཡོད། ཅེས་བརྗོད་སོང་།
དེ་བཞིན་དགེ་བཤེས་ཐུབ་བསྟན་སྦྱིན་པ་ལགས་ནས་ས་པཎ་མཆོག་གིས་བོད་བརྒྱུད་ནང་བསྟན་གྱི་ཐུན་མོང་རིག་གནས་ལ་བཞག་པའི་རླབས་ཆེན་གྱི་མཛད་རྗེས་དང་ཤུགས་རྐྱེན་གྱི་བརྗོད་གཞི་ཐོག་གཏམ་བཤད་དང་དྲི་བ་དྲིས་ལན་གནང་ཡོད་པ་དང་། སློབ་དཔོན་སཱ་རཱ་ཧཱ་རི་ཆར་ཌི་སོན་ལགས་གཉིས་ཀྱིས་ས་སྐྱ་པཎྜི་ཏས་བོད་བརྒྱུད་ནང་བསྟན་གྱི་མདོ་སྔགས་རིག་གནས་ལ་བཞག་པའི་མཛད་རྗེས་དང་དེའི་ཤུགས་རྐྱེན་སྐོར་ལ་གཏམ་བཤད་དང་དྲི་བ་དྲིས་ལན་གནང་ཡོད་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། སྐལ་བཟང་སྦྱིན་པ།
མཁས་དབང་ཐུབ་བསྟན་སྦྱིན་པ་ལགས་ནི་ བློ་ཟུར་གནས་ཀྱི་མཁས་དབང་རེད་་་བཟམ་གདོང་ནི་བློ་ཡོར་བའི་མཁས་དབང་རེད