༧གོང་ས་རྒྱལ་བ་རིན་པོ་ཆེ་མཆོག་གི་ཉིན་གྲངས་གསུམ་རིང་གི་བཀའ་ཆོས་ལེགས་པར་གྲུབ།
ཕྱི་ལོ་ ༢༠༢༣ ཟླ་ ༡༢ ཚེས་ ༣༡ ༧གོང་རྒྱལ་བ་རིན་པོ་ཆེ་མཆོག་ནས་གནས་མཆོག་རྡོ་རྗེ་གདན་དུ། རྗེ་བཙུན་འཇམ་དཔལ་དབྱངས་ཀྱི་རྗེས་གནང་གི་བཀའ་དབང་སྩལ་ཡོད་ཅིང་།སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་ནས། སྤྱིར་ཆོས་ལུགས་ཚང་མས་གཞན་ཕན་དང་སེམས་པ་བཟང་པོའི་སྐོར་གསུངས་ཀྱི་ཡོད་ལ་ཆོས་ལུགས་ཚང་མར་གུས་ཞབས་བྱ་དགོས་གལ་ཆེ། ང་རང་ཚོ་ནང་པ་སངས་རྒྱས་པའི་གནས་ཆེན་འདི་གར་ཆོས་གྲོགས་ཚང་མ་ལྷན་འཛོམས་ཀྱིས་བདག་ཉིད་བདག་གི་མགོན་ཞེས་པའི་ཐོག་བསམ་བློ་གཏང་དགོས། མ་འོངས་གང་ཡོང་མིན་རང་ཉིད་ལག་ཏུ་ཡོད་པ་མ་གཏོགས་འཇིག་རྟེན་བཀོད་པ་པོ་གཅིག་གིས་གཞན་དབང་དུ་མེད། གང་ལྟར་རང་ཉིད་ཀྱི་སྐྱོན་རྣམས་སོ་སོས་འདུལ་དགོས་པར་བརྟེན་བདག་ཉིད་བདག་གི་མགོན་ཞེས་པ་ནི་ཧ་ཅང་གི་གལ་གནད་ཆེན་པོ་རེད། དེ་བཞིན་སྡུག་བསྔལ་གྱི་རྒྱུ་ནི་ཀུན་འབྱུང་ཡིན་པ་ཤེས་པ་དང་། རྒྱུ་ཀུན་འབྱུང་མ་རིག་པ་ནི་ཕྱིན་ཅི་ལོག་པའི་བློ་ཡིན་པ་ཤེས་དུས། དེར་གཉེན་པོ་སྟོབས་ལྡན་ཡོད་པ་དེ་རང་རྒྱུད་དུ་སྐྱེས་ནས་སྤང་བྱ་སྤངས་པའི་བྲལ་བའི་ཡོན་ཏན་ཐོབ་ཐུབ་པ་ནི་སངས་རྒྱས་པའི་ཆོས་ཀྱི་ཐུན་མོང་མ་ཡིན་པའི་འགྲོ་ལུགས་རེད་འདུག ངོས་ལ་མཚོན་ན་ཆུང་དུས་ནས་དཔེ་ཆ་བལྟས་པའི་སྟོབས་ཀྱིས་བསམ་བློ་གཏོང་དུས་སྤང་བྱ་སྤངས་པས་བྲལ་བའི་ཡོན་ཏན་དེ་རིམ་བཞིན་ཐོབ་ཀྱི་ཡོད་པ་ནི་རྒྱུ་མཚན་ལྡན་པ་དང་དངོས་ཡོད་གནས་ཚུལ་ཡིན་པ་མཐོང་གི་འདུག་ལ། དེར་བརྟེན་ནས་བསླབ་པ་གསུམ་དང་ལམ་ཉམས་ལེན་བྱ་རྒྱུའི་སེམས་ཤུགས་ཀྱང་རྙེད་ཐུབ་ཀྱི་འདུག གང་ལྟར་སངས་རྒྱས་ཀྱི་ཆོས་ནི་རིག་པ་དང་ལྡན་པ། སྤོབས་པ་སྐྱེས་དགོས་པ་ཞིག་ཆགས་བསྡད་ཡོད་པ་གསལ་པོ་རེད། ཅེས་གསུངས་བྱུང་།
༧མགོན་པོ་གང་ཉིད་ཀྱིས། རང་དོན་སྒྲུབ་པར་བྱང་ཆུབ་ཀྱི་སེམས་དང་། གཞན་དོན་སྒྲུབ་པར་བྱང་ཆུབ་ཀྱི་སེམས་བཅས། ་དེ་འདྲའི་ཡིད་དུ་འོང་བའི་བྱང་ཆུབ་ཀྱི་སེམས་ནི་རང་གཞན་གཉིས་ཀར་ཕན་ཐོགས་རྒྱ་ཆེན་པོར་སྒྲུབ་ཐུབ་པ་དེ་གང་ཐུབ་ཐུབ་ཉམས་ལེན་བྱ་དགོས། ངོས་རང་ཡང་ཞོགས་པ་ཡར་ལངས་སྐབས་བྱང་ཆུབ་ཀྱི་སེམས་ཐོག་བསམ་བློ་ནན་གཏན་གཏོང་གི་ཡོད་པས་སེམས་ཀྱི་ཞི་བདེ་ངོ་མ་དང་སྙིང་སྟོབས་ཡོང་གི་འདུག འདིར་འཛོམས་པའི་ཆོས་གྲོགས་ཚང་མས་སེམས་བསྐྱེད་བཟང་པོའི་ཐོག་བསམ་བློ་བཏང་བ་ཡིན་ན་འཕྲལ་དུ་བདེ་བ་དང་། ཕུགས་སུ་སངས་རྒྱས་ཀྱི་གོ་འཕང་ཐོབ་པའི་རྒྱུ་བྱེད་མཁན་ཡིན་སྟབས་ཚང་མས་བྱང་ཆུབ་སེམས་ཀྱི་སྐོར་དགོངས་པ་ཡག་པོ་བཞེས། ཞེས་གསུངས་སོང་།
ཡང་༧མགོན་པོ་གང་ཉིད་ཀྱིས། ངོས་རང་ཆུང་དུས་སྐུ་འབུམ་གྱི་ལྷ་ཁང་དུ་ཕྱིན་སྐབས་ཕྲུ་གུ་ཚོས་ཨ་ར་པ་ཙ་བགྲང་པ་གོ་བསྡད་ཀྱིན་ཡོད། ངོས་རང་གི་གཟུངས་སྔགས་ཀྱི་སྒྲ་ཐོག་མ་ཆགས་བསྡད་ཡོད། བྱས་ཙང་ད་རེས་རྗེ་བཙུན་འཇམ་དཔལ་དབྱངས་ཀྱི་རྗེས་གནང་བྱེད་པའི་གོ་སྐབས་ཐོབ་པར་ང་རང་ཞེ་དྲགས་དགའ་པོ་བྱུང་། ངོས་རང་དུས་རྒྱུན་དུ་རྗེ་བཙུན་འཇམ་པའི་ལྷག་པའི་ལྷར་བརྩིས་ཏེ་ཨ་ར་པ་ཙ་བགྲང་གི་ཡོད་པ་དང་། དེས་ཆོས་རབ་ཏུ་རྣམ་འབྱེད་ཀྱི་ཤེས་རབ་གོང་ནས་གོང་དུ་འཕེལ་ཏེ་བདེན་བཞི་དང་བདེན་གཉིས་སོགས་ཀྱི་གོ་བ་སླ་རུ་རྟོགས་ཐུབ་ཀྱི་འདུག ཅེས་གསུངས་སོང་།
ཉིན་དེར་༧གོང་ས་རྒྱལ་བ་རིན་པོ་ཆེ་མཆོག་ནས་རྗེ་བཙུན་འཇམ་དཔལ་དབྱངས་ཀྱི་བཀའ་དབང་སྩལ་གནང་མཛད་སྐབས་དང་བསྟུན། སྟོན་པའི་ཟུང་སྔགས་དང་། སྨན་ལྷའི་ཟུང་སྔགས། དེ་བཞིན་བཛྲ་གུ་རུའི་ཟུང་སྔགས་སོགས་ཀྱི་ལྗགས་ལུང་སྩལ་གནང་མཛད་སོང་།
གསར་འགོད་པ། དཔལ་ལྡན།