འཇིག་རྟེན་ཞི་བདེའི་སྨོན་ལམ་ཆེན་མོ་ཉིན་དགུ་པའི་ཐོག་༧དཔལ་ས་སྐྱ་གོང་མ་བདག་ཁྲི་རིན་པོ་ཆེ་མཆོག་གིས་བྱང་ཆུབ་སེམས་བསྐྱེད་ཀྱི་སྡོམ་པ་བསྩལ།
དེ་རིང་ཕྱི་ཚེས་ ༣ ཉིན་གནས་མཆོག་རྡོ་རྗེ་གདན་དུ། དཔལ་ས་སྐྱའི་འདུས་མང་ཡོངས་ཀྱིས་ཇི་ལྟར་གསོལ་བ་བཏབ་པ་ལྟར།༧དཔལ་ས་སྐྱ་འཇིག་རྟེན་ཞི་བདེའི་སྨོན་ལམ་ཆེན་མོ་ཐེངས་ ༣༢ པའི་ཉིན་དགུ་པའི་ཐོག་༧དཔལ་ས་སྐྱ་གོང་མ་བདག་ཁྲི་རིན་པོ་ཆེ་མཆོག་གིས་བྱང་ཆུབ་སེམས་བསྐྱེད་ཀྱི་སྡོམ་པ་བསྩལ་སོང་།
༧དཔལ་ས་སྐྱ་གོང་མ་བདག་ཁྲི་རིན་པོ་ཆེ་མཆོག་གིས། སེམས་བསྐྱེད་ཅེས་པ་དེ་ཧ་ཅང་གལ་ཆེན་པོ་རེད། གང་ཡིན་ཟེར་ན་སེམས་བསྐྱེད་ཐོབ་ནས་སངས་རྒྱས་བར་དམ་བཅའ་བ་དང་མགོ་ཚུགས་ཀྱི་ཡོད། བྱང་ཆུབ་སེམས་སྐྱེས་གྱུར་ན་སྐད་ཅིག་གིས།།འཁོར་བའི་བཙོན་རྭར་བསྡམས་པའི་ཉམ་ཐག་རྣམས།། བདེ་གཤེགས་རྣམས་ཀྱི་སྲས་ཞེས་བརྗོད་བྱ་ཞིང་།།འཇིག་རྟེན་ལྷ་མིར་བཅས་པའི་ཕྱག་བྱར་འགྱུར།། ཞེས་གསུངས་བ་བཞིན། སེམས་བསྐྱེད་ནི་མ་འོངས་བར་སངས་རྒྱས་བར་རྟེན་དུ་འཁྱེར་བ་དགོས་པ་ཞིག་རེད། ང་ཚོར་རྟེན་ཐོབ་དཀའ་བ་རྟེན་འབྱུང་གི་མི་ལུས་ཐོབ་པ་དང་། མཇལ་དཀའ་བ་སངས་རྒྱས་ཀྱི་བསྟན་པ་མཇལ་བའི་དུས་སྐབས་བཟང་པོ་འདིར། ཆོས་བྱས་ཏེ་ལམ་སྣེ་མ་ཟིན་པ་ཡིན་ན་ཚེ་ངེས་པ་མེད་པ་རེད། སྐྱེ་བའི་མཐའ་མར་ཤི་དགོས། ག་དུས་ཤི་བའང་སུས་ཀྱང་ལབ་ཐུབ་ཀྱི་མེད། ཤི་བའི་གནས་སྐབས་སུ་སོ་སོའི་དགེ་སྡིག་གང་བསགས་ཡོད་པ་དེའི་རྗེས་སུ་འབྲང་རྒྱུ་མ་གཏོགས། སོ་སོའི་འདེམས་ཀ་བྱ་རྒྱུ་མེད་པ་རེད། དེ་བས་ད་ལྟ་ང་ཚོ་རང་དབང་ཡོད་པའི་སྐབས་དཀར་པོ་དགེ་བའི་ཆོས་ལ་ལམ་སྣེ་ཟིན་པ་ཞིག་ངེས་པར་དུ་དགོས་པ་རེད། འཛམ་གླིང་དུ་ཆོས་ལུགས་འདྲ་མིན་ཡོད་པ་ཚང་མས་མི་ལ་ཕན་ཐོགས་པ་ཤ་སྟག་ཡོད་ཀྱང་། སྐྱོན་ཀུན་སེལ་དང་ཡོན་ཏན་ཀུན་རྫོགས་ནི་སྟོན་པ་ཐུབ་པའི་དབང་པོ་བཞིན་མེད་པ་ཞིག་ཡིན་དུས། ཐར་བ་ཐམས་ཅད་མཁྱེན་པའི་གོ་འཕངས་རྙེད་ཐུབ་ཀྱི་མེད་པ་རེད། ང་ཚོའི་སྟོན་པ་ཐུགས་རྗེ་ཅན་ནི་འཁོར་བ་ལས་གྲོལ་བ་དང་། ཐམས་ཅད་མཁྱེན་པའི་ཡེ་ཤེས་མངོན་དུ་མཛད་དེ། རང་ཉིད་ཀྱིས་ཇི་ལྟར་མཛད་པ་བཞིན་གཞན་ལའང་དེ་ལྟར་དུ་ལམ་བསྟན་ཡོད།
སྟོན་པ་བཅོམ་ལྡན་འདས་ཀྱིས་ཆོས་བསམ་གྱིས་མི་ཁྱབ་པ་གསུངས་ཡོད་ཀྱང་། མདོར་བསྡུས་ན་ཐེག་པ་ཆེ་ཆུང་གཉིས་སུ་བསྡུས་ཡོད་ཅིང་། ཐེག་པ་ཆུང་བའི་ལམ་གྱིས་རང་ཉིད་ཞི་བར་བྱེད་པ་ཙམ་ལས་གཞན་དོན་རྒྱ་ཆེན་པོ་འབྱུང་ཐུབ་ཀྱི་མེད། ཐེག་པ་ཆེན་པོ་ནི་བསམ་པ་དང་སྦྱོར་བ་གང་ཅིའི་ཐད་རྒྱ་ཆེན་པོ་ཡིན་པ་མ་ཟད། རང་གཞན་གཉིས་ཀྱི་དོན་ཐམས་ཅད་ཕུན་སུམ་ཚོགས་པ་བསྒྲུབ་ཐུབ་པས། ཐེག་ཆེན་ལམ་དུ་ནན་ཏན་གྱིས་འཇུག་དགོས་པ་གལ་ཆེན་པོ་རེད། ཐེག་པ་ཆེན་པོའི་ལམ་གྱི་གཞི་དང་ངོ་བོ་གྱུར་བ་བྱང་ཆུབ་མཆོག་ཏུ་སེམས་བསྐྱེད་རྒྱུ་དེ་རེད། ཅེས་གསུངས་སོང་།
ཡང་༧བདག་ཁྲི་རིན་པོ་ཆེ་མཆོག་གིས། སྤྱིར་བཏང་སེམས་ཅན་གྱི་དབང་བོ་རབ་འབྲིང་ཐ་གསུམ་ལ་བསྟུན་ཏེ། བྱང་ཆུབ་ཀྱི་སེམས་ལ་བསླབ་བྱ་རིམ་པ་མང་པོ་གསུངས་ཡོད། འགྲོ་འདུག་སྤྱོད་གསུམ་ཐོག་རང་ཉིད་ཀྱིས་ཅི་ཞིག་བྱེད་ཀྱི་ཡོད་ཀྱང་། སེམས་ཅན་ཐམས་ཅད་ཀྱི་ཆེད་དུ་སངས་རྒྱས་དགོས་པའི་བསམ་པ་ནམ་ཡང་མི་འདོར་པར་སྙིང་དབུས་སུ་བཅང་རྒྱུ་ནི་བསླབ་བྱ་ནང་ནས་གལ་ཆེ་ཤོས་དེ་ཡིན། ཞེས་དང་། དགེ་བའི་རྩ་བ་ཐམས་ཅད་གྱི་ནང་ནས་གལ་ཆེ་ཤོས་ནི་བྱང་ཆུབ་མཆོག་ཏུ་སེམས་བསྐྱེད་རྒྱུ་དེ་རེད། བྱང་ཆུབ་ཀྱི་སེམས་ལ་ཡུད་ཙམ་དུ་སེམས་བསྐྱེད་པས་ཀྱང་ཕན་ཡོན་བསམ་གྱི་མི་ཁྱབ་པ་རེད། ཅེས་གསུངས་སོང་།
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
