བོད་མིའི་བརྡ་འཕྲིན་འཕྲུལ་ལས་ཆེད་ལས་པའི་ཚོགས་འདུ་ཐེངས་གཉིས་པའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་བོད་རིགས་གཞོན་སྐྱེས་རྣམས་ཀྱིས་བོད་པའི་སྤྱི་ཚོགས་ནང་དུ་ཞབས་ཞུ་བསྒྲུབ་གལ་ཆེ་བའི་སྐོར་གསུངས་འདུག
ཏཱ་ལའི་བླ་མ་མཐོ་རིམ་སློབ་གཉེར་ཁང་གི་ངོ་དེབ་ལས་བླངས། ༢༠༢༤།༠༡།༠༤
ཟླ་འདིའི་ཕྱི་ཚེས་ ༣ ནས་ཉིན་གྲངས་གཉིས་རིང་རྒྱ་གར་ལྷོ་ཕྱོགས་སྦེང་ལོར་ཏཱ་ལའི་བླ་མ་མཐོ་རིམ་སློབ་གཉེར་ཁང་དུ། བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་འཕྲུལ་རིགས་སྡེ་ཚན་དང་སྤྱི་ཚོགས་ཡར་རྒྱས་ཐེབས་རྩ་གཉིས་ཀྱི་གོ་སྒྲིག་འོག བོད་མི་བརྡ་འཕྲིན་འཕྲུལ་ལས་ཆེད་ལས་པའི་ཚོགས་འདུ་ཐེངས་གཉིས་པ་འཚོགས་ཡོད་ཅིང་། ཐེངས་འདིའི་དབུ་འབྱེད་མཛད་སྒོའི་ཐོག་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། དཔལ་འབྱོར་ལས་ཁུངས་ཀྱི་དྲུང་འཕར་བསྟན་འཛིན་ལེགས་གྲུབ་ལགས། ཏཱ་ལའི་བླ་མའི་མཐོ་སློབ་ཀྱི་སློབ་སྤྱི་བསྟན་འཛིན་དཔལ་བཟང་ལགས། བོད་མིའི་སྒྲིག་འཛུགས་འཕྲུལ་རིགས་ཚན་པའི་འགན་འཛིན་བསྟན་འཛིན་ཚུལ་ཁྲིམས་ལགས། ལྷོ་སྤྱི་འཇིགས་མེད་ཚུལ་ཁྲིམས་ལགས། ཨ་རིའི་རོགས་ཚོགས་ཀྱི་སྐུ་ཚབ་སོགས་བརྡ་འཕྲིན་འཕྲུལ་ལས་ཀྱི་སློབ་གཉེར་བ་གྲངས་ ༨༨ མཉམ་ཞུགས་གནང་ཡོད་འདུག
འདི་གའི་གསར་འགོད་པས་ཁ་པར་བརྒྱུད་བོད་མིའི་སྒྲིག་འཛུགས་འཕྲུལ་རིགས་ཚན་པའི་འགན་འཛིན་བསྟན་འཛིན་ཚུལ་ཁྲིམས་ལགས་སུ་ཐེངས་འདིའི་ཚོགས་འདུའི་སྐོར་ལ་བཀའ་འདྲི་ཞུས་པར་ཁོང་གིས། ཚོགས་འདུ་འདིའི་དམིགས་ཡུལ་གཙོ་བོ་ནི་བརྡ་འཕྲིན་འཕྲུལ་རིགས་ཆེད་ལས་པའི་ཐོག་བསླབ་པ་མཐར་སོན་པའི་གཞོན་སྐྱེས་རྣམས་ཀྱི་ཤེས་ཡོན་རྒྱ་སྐྱེད་དང་། ནུས་སྟོབས་གོང་སྤེལ། བོད་མིའི་སྒྲིག་འཛུགས་ནང་ཞབས་ཞུའི་ལས་ཀའི་སྡིངས་ཆ་བསྐྲུན་རྒྱུ་དེ་ཆགས་ཡོད། ཐེངས་འདིའི་ཚོགས་ཐོག་ཏུ་ཏཱ་ལའི་བླ་མ་མཐོ་རིམ་སློབ་གཉེར་ཁང་གི་སློབ་གཉེར་བ་གྲངས་ ༤༠ དང་། ས་ཕྱོགས་ཁག་གཞན་ནས་ཚོགས་བཅར་བ་གྲངས་ ༤༨ བཅས་ཁྱོན་ཚོགས་བཅར་བ་གྲངས་ ༨༨ མཉམ་ཞུགས་གནང་ཡོད། ཚོགས་འདུའི་སྐབས་སུ་བོད་མིའི་སྒྲིག་འཛུགས་ཀྱི་བརྡ་འཕྲིན་འཕྲུལ་ལས་ཀྱི་ལས་གཞི་ཁག་དང་། མ་འོངས་བའི་ལས་དོན་བྱེད་ཕྱོགས་སོགས་ངོ་སྤྲོད་ཞུས་ཡོད། ཅེས་བརྗོད་བྱུང་།
ཡང་ཁོང་གིས། ད་ལྟའི་ཆར་བོད་མིའི་སྒྲིག་འཛུགས་སུ་བརྡ་འཕྲིན་འཕྲུལ་ལས་དང་འབྲེལ་བའི་ལས་གཞི་མང་པོ་འགྲོ་དང་འགྲོ་བཞིན་ཡོད་པ་དང་། མ་འོངས་བའང་བརྡ་འཕྲིན་འཕྲུལ་ལས་དང་འབྲེལ་བའི་ལས་གཞི་མང་པོ་ཡོད་པས། བོད་མིའི་སྒྲིག་འཛུགས་ཀྱི་བརྡ་འཕྲིན་འཕྲུལ་ལས་ཚན་པའི་ཁོངས་སུ་ཆེད་ལས་བའི་ལས་བྱེད་མེད་པའི་དཀའ་ངལ་ཡོང་བཞིན་ཡོད་པ་རེད། ཐེངས་འདིར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས་ཀྱང་བོད་མི་བརྡ་འཕྲིན་འཕྲུལ་རིགས་ཆེད་ལས་བའི་ཚོགས་འདུར་དམིགས་བསལ་ཆེད་ཕེབས་གནང་ཡོད་པ་མ་ཟད། རྒྱ་གར་བཟོ་ཚོང་ཁང་ཁག་ཏུ་ཡོད་པའི་བོད་རིགས་བརྡ་འཕྲིན་འཕྲུལ་ཆས་ཆེད་ལས་བ་རྣམས་ལ་བོད་མིའི་སྒྲིག་འཛུགས་ཀྱི་ལས་ཁུངས་ཁག་གི་བརྡ་འཕྲིན་འཕྲུལ་ལས་དང་། སྨོན་ལམ་མིས་བཟོས་རིག་ནུས་ལས་གཞི། འཕྲུལ་རིགས་བདེ་འཇགས་སོགས་བོད་པའི་སྤྱི་ཚོགས་ནང་དུ་ཞབས་ཞུ་བསྒྲུབ་གལ་ཆེ་བའི་སྐོར་གསུངས་སོང་། ཞེས་འགྲེལ་བརྗོད་གནང་བྱུང་།
དེ་བཞིན། འདས་ལོའི་ཕྱི་ཟླ་ ༡ ཚེས་ ༩ ནས་ཉིན་གཉིས་རིང་དྷ་ས་འཛིན་སྐྱོང་སྦྱོང་བརྡར་བསྟི་གནས་ཁང་དུ་བོད་མི་བརྡ་འཕྲིན་འཕྲུལ་ལས་ཆེད་ལས་པའི་ཚོགས་འདུ་ཐེངས་དང་པོ་འཚོགས་ཡོད་ཅིང་། སྐབས་དེར་བོད་མིའི་དང་བླངས་དཔྱ་དངུལ་བསྡུ་ཐབས་བདེ་སླད་མཉེན་ཆས་གསར་སྐྲུན་གནང་ཕྱོགས་དང་། བོད་མིའི་སྒྲིག་འཛུགས་ཀྱི་གློག་འཕྲུལ་ཡིག་ཚགས། དྲ་རྒྱའི་བདེ་འཇགས། བོད་མིའི་སྒྲིག་འཛུགས་ཀྱི་སྔོན་རྩིས་འབུལ་ཕྱོགས་འཕྲུལ་རིག་གྲངས་མཛོད་ཀྱི་ངོ་བོར་སྒྱུར་ཐབས། ཕྱོགས་གསུམ་ཅན་གྱི་འགུལ་གཟུགས་བཟོ་སྐྲུན་བྱེད་ཕྱོགས། བཙན་བྱོལ་ནང་གི་བོད་མི་བརྡ་འཕྲིན་འཕྲུལ་ལས་ཆེད་ལས་པའི་གནས་སྟངས་རྒྱུས་ལོན་དང་། བོད་མི་འཕྲུལ་ལས་ཆེད་ལས་པ་ནང་ཁུལ་འབྲེལ་ལམ་འཛུགས་པ། བོད་མི་འཕྲུལ་ལས་ཆེད་ལས་པས་བོད་མིའི་སྒྲིག་འཛུགས་མཉམ་ལས་གནང་ཕྱོགས་སྐོར་སོགས་ལ་བགྲོ་གླེང་གནང་ཡོད་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། སྐལ་བཟང་སྦྱིན་པ།
