བོད་ཀྱི་འགྲེམས་སྟོན་ཁང་ནས་བོད་རང་དབང་རང་བཙན་ཡིན་སྐབས་ཀྱི་བོད་པ་རང་གིས་བཟོས་པའི་ཤོག་དངུལ་དང་དངུལ་ཊམ་སྐོར་ཞིག་དུས་ཐུང་ནང་འགྲེམས་སྟོན་གནང་བཞིན་འདུག
དེ་རིང་སྔ་དྲོའི་ཆུ་ཚོད་ ༡༠ པའི་ཐོག་གངས་སྐྱིད་བོད་ཀྱི་འགྲེམས་སྟོན་ཁང་དུ། བོད་ཀྱི་འགྲེམས་སྟོན་ཁང་གི་གོ་སྒྲིག་འོག བོད་དངུལ་སྐོར་གྱི་དུས་ཐུང་འགྲེམས་སྟོན་ཞིག་དབུ་འབྱེད་གནང་སོང་། དབུ་འབྱེད་མཛད་སྒོའི་ཐོག་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་དང་། ས་རཱ་མཐོ་སློབ་ཀྱི་ལོ་རྒྱུས་སློབ་དཔོན་གཙང་ཕྲུག་སྟོབས་ལགས། བོད་ཀྱི་འགྲེམས་སྟོན་ཁང་གི་འགན་འཛིན་བསྟན་འཛིན་སྟོབས་ལྡན་ལགས། ཉམས་ཞིབ་པ་ཁག་ཅིག་བཅས་མཉམ་ཞུགས་གནང་འདུག
བོད་དངུལ་གྱི་འགྲེམས་སྟོན་སྐོར་ལ་བོད་ཀྱི་འགྲེམས་སྟོན་ཁང་གི་འགན་འཛིན་བསྟན་འཛིན་སྟོབས་ལྡན་ལགས་ཀྱིས། དེ་རིང་འགྲེམས་སྟོན་ནི་དམིགས་བསལ་གྱི་འགྲེམས་སྟོན་ཞིག་ཆགས་ཡོད། དེ་ཡང་དམིགས་བསལ་རྒྱུ་མཚན་གསུམ་ཡོད། དང་པོ། བོད་ཀྱི་མེས་པོ་རྣམས་ལ་རྗེས་དྲན་གྱི་ཆེད་དུ་ཆགས་ཡོད། ལོ་རྒྱུས་ཐོག་བོད་རང་བཙན་གཙང་མ་ཡིན་པ་བོད་དངུལ་གྱི་ཐོག་ནས་ར་སྤྲོད་བྱེད་ཐུབ་པ་ཞིག་རེད། ཕྱི་ལོ་ ༡༧༩༡ ནས་བཟུང་སོ་སོའི་ལུང་པའི་དངུལ་ཐོག་མ་བཅུ་གསུམ་བཟོས་ཏེ་རིམ་པ་བཞིན་མགོ་བཙུགས་ཡོད་འདུག གཉིས་པ། ཕྱི་ལོ་ ༢༠༡༧ ནས་ཕྱི་ལོ་ ༢༠༢༢ བར་བོད་ཀྱི་འགྲེམས་སྟོན་ཁང་གསར་འཛུགས་ཀྱི་ལས་འཆར་དང་བསྟུན་ནས། རྒྱ་གར་དང་།བལ་ཡུལ། གཞིས་ཆགས་སོགས་ནས་བོད་དངུལ་མང་པོ་མཁོ་སྤྲོད་བྱས་ཡོད། དེ་དག་གཏན་འཇགས་ཀྱི་འགྲེམས་སྟོན་བྱས་ཐུབ་མེད་པས། ཐེངས་འདིའི་དུས་ཐུང་འགྲེམས་སྟོན་ནང་དུ་མི་མང་གི་ཞལ་འདེབས་གནང་བའི་བོད་དངུལ་རྣམས་ཀྱིས་བོད་ཀྱི་རྩ་དོན་དང་། བོད་ཀྱི་གཞོན་སྐྱེས་རྣམས་ལ་ཕན་ཐོགས་པའི་སྡིངས་ཆ་ཞིག་བསྐྲུན་ཡོད། གསུམ་པ། ཐེངས་འདིའི་དུས་ཐུང་འགྲེམས་སྟོན་ནི་བོད་ཀྱི་འགྲེམས་སྟོན་ཁང་གི་ལས་བྱེད་བསྟན་འཛིན་སྟོབས་ལྡན་ལགས་དང་ངག་དབང་གཉིས་ཀྱིས་གོ་སྒྲིག་གཙོ་བོ་བྱས་ཡོད་ཅིང་། སློབ་སྟོན་པ་གཙང་ཕྲུག་སྟོབས་ལགས་དང་། ཐུབ་བསྟན་ཡར་འཕེལ་ལགས། སྐུ་ཞབས་བྱམས་ལྡན་ལགས། ༧སྐུའི་ན་བཟའ་ཆེན་མོ་བཅས་ཀྱི་མཉམ་རུབ་ལ་བརྟེན་ནས་གྲུབ་པ་ཞིག་ཆགས་ཡོད།ཅེས་བརྗོད་བྱུང་།
ཐེངས་འདིའི་འགྲེམས་སྟོན་གྱི་གལ་གནད་སྐོར་ལ་ཁོང་གིས། འཛམ་གླིང་མཉམ་འབྲེལ་རྒྱལ་ཚོགས་ཀྱི་ཁོངས་སུ་རྒྱལ་ཁབ་ ༡༩༣ ཡོད། རྒྱལ་ཁབ་དེ་དག་རང་དབང་རང་བཙན་ཡིན་པའི་དཔང་རྟགས་གཙོ་བོ་སོ་སོའི་རྒྱལ་ཁབ་ཀྱི་དངུལ་དེ་ཆགས་ཡོད། བོད་ཀྱི་ལོ་རྒྱུས་སུ་ཕྱིར་མིག་བལྟས་ཀྱང་། བོད་པ་རང་ཉིད་ཀྱིས་བཟོས་པའི་དངུལ་ནི་བོད་རང་བཙན་གཙང་མ་ཡིན་པའི་དཔང་རྟགས་གལ་ཆེན་ཞིག་ཆགས་ཡོད། དེ་བས་བོད་ཀྱི་མ་འོངས་སོན་རྩ་རྣམས་ཀྱིས་དོ་སྣང་བྱ་དགོས་པ་དང་། དམིགས་བསལ་བོད་དངུལ་ཐོག་བོད་པ་རང་ཉིད་ཀྱིས་ཉམས་ཞིབ་བྱས་པ་ཧ་ཅང་ཉུང་ཉུང་ཡིན་པས། བོད་དངུལ་ཐོག་ཉམས་ཞིབ་བྱེད་ཐུབ་པའི་གལ་གནད་ཞིག་ཏུ་བརྩི་བཞིན་ཡོད།ཅེས་བརྗོད་བྱུང་།
བོད་ཀྱི་དངུལ་ཊམ་སོགས་ཀྱི་འཕེལ་རིམ་སྐོར་ལ་ཁོང་གིས། ཉམས་ཞིབ་ཀྱི་ཡིག་ཆའི་ནང་དུ་ལོ་ངོ་བཞི་སྟོང་གི་གོང་དུ་སེམས་ཅན་དང་དངོས་པོ་ཕར་ཚུར་བརྗེ་ལེན་བྱས་པ་ཞིག་ཐོན་གྱི་འདུག དུས་རབས་བདུན་པའི་ནང་དུ་ཁྲིམས་ཐོག་ནས་གསེར་དང་དངོས་པོ་བརྗེ་ལེན་བྱས་པ་བྱུང་ཡོད། དུས་རབས་ ༡༧ པའི་དཀྱིལ་ནས་དུས་རབས་ ༡༨ ཀྱི་དཀྱིལ་བར་དུ་བལ་ཡུལ་བརྒྱུད་བོད་ནང་དུ་ཡོངས་གྲགས་སུ་བལ་ཊམ་བེད་སྤྱོད་བྱས་ཡོད་ཀྱང་། རྗེས་སུ་གོར་བོད་དམག་འཁྲུག་ཐེངས་གཉིས་བྱུང་རྐྱེན་བལ་ཊམ་བེད་སྤྱོད་མཚམས་འཇོག་བྱས་འདུག ཕྱི་ལོ་༡༧༩༡ ལོ་ནས་བཟུང་བོད་པ་རང་ཉིད་ཀྱི་དངུལ་ཐོག་མ་བཅུ་གསུམ་ཞེ་ལྔ་ཞེས་པ་བཟོས་པ་ལོ་རྒྱུས་སུ་གསལ་འདུག དེ་ཡང་དང་པོ་ལྷ་སའི་ཞོལ་དུ་བཟོས་ཡོད་ཅིང་། རྗེས་སུ་ཀོང་པོ་ཁུལ་དུ་སྤོས་ཏེ་དངུལ་འབོར་རྒྱ་སྐྱེད་བྱས་ནས་མིང་ལ་ཀོང་ཊམ་བཏགས་ཡོད་འདུག དེ་ནས་དགའ་ལྡན་ཕོ་བྲང་གི་དགའ་ལྡན་ཊམ་ཀ་དང་།སྐལ་བཟང་ཊམ་ཀ་སོགས་རིམ་པ་མང་པོ་བྱུང་འདུག ཕྱི་ལོ་ ༡༩༢༠ ནང་དུ་གསེར་ཊམ་བཟོས་པའི་ལོ་རྒྱུས་ཀྱང་ཐོན་ཡོད། ཤོག་དངུལ་ནི་ཕྱི་ལོ་ ༡༩༡༣ ལོ་བཟུང་ནས་རྒྱལ་དབང་སྐུ་ཕྲེང་བཅུ་གསུམ་པ་མཆོག་གི་སྐབས་དར་སྤེལ་ཕྱིན་ཡོད་འདུག ཅེས་བརྗོད་བྱུང་།
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
![Changpa nomads walk on a rugged path in Ladakh's Chushul valley [Tarushi Aswani/Al Jazeera]](https://tibettimes.net/wp-content/uploads/2026/10/Screen-Shot-2026-10-16-at-2.29.07-PM-360x180.png)
