དམངས་གཙོ་ཡར་ཐོན་སྲིད་དོན་ཚོགས་པའི་སྲིད་འཛིན་འོས་མི་སྐུ་ཞབས་ལེ་ཆིན་ཏི་མཆོག་ལ་ཐའེ་ཝན་སྲིད་འཛིན་འོས་བསྡུའི་ཁྲོད་རྒྱལ་ཁ་ཐོབ་འདུག
མདང་དགོང་ཐའེ་ཝན་འོས་བསྡུ་ལྷན་ཁང་ནས་སྲིད་འཛིན་འོས་བསྡུ་ཆེན་མོའི་གྲུབ་འབྲས་ཡོངས་ཁྱབ་གསལ་བསྒྲགས་གནང་བ་ལྟར་ན། འདི་ལོའི་སྲིད་འཛིན་འོས་བསྡུར་འོས་འཕེན་ཐོ་འགོད་བྱེད་མཁན་ ༡༩,༥༤༨,༥༣༡ བྱུང་སྟེ་བརྒྱ་ཆ་ ༧༢ ཟིན་ཡོད་པའི་ཁྲོད་ནས། གོ་མན་ཏང་སྲིད་དོན་ཚོགས་པའི་སྲིད་འཛིན་འོས་མི་ཧུག་ཡུག་ཡིས་(侯友宜)ལགས་ལ་འོས་གྲངས་ ༤,༦༧༡,༠༢༡ སྟེ་འོས་ཀྱི་བརྒྱ་ཆ་ ༣༣.༤༩། ཐའེ་ཝན་མི་མང་སྲིད་དོན་ཚོགས་པའི་སྲིད་འཛིན་འོས་མི་ཁི་ཝན་ཌི (柯文哲) ལགས་ལ་འོས་གྲངས་ ༣,༦༩༠,༤༦༦སྟེ་འོས་ཀྱི་བརྒྱ་ཆ་ ༢༦.༤༦ དང་། དམངས་གཙོ་ཡར་ཐོན་སྲིད་དོན་ཚོགས་པའི་སྲིད་འཛིན་འོས་མི་ལེ་ཆིན་ཏི་(賴清德) ་ལགས་ལ་འོས་གྲངས་ ༥,༥༨༦,༠༡༩ དང་འོས་ཀྱི་བརྒྱ་ཆ་ ༤༠.༠༥ ཐོབ་སྟེ་སྲིད་འཛིན་དུ་བདམས་ཐོན་བྱུང་འདུག
འོས་བསྡུ་ཁྱབ་བསྒྲགས་བྱས་རྗེས་སྐུ་ཞབས་ལེ་ཆིན་ཏི་མཆོག་གིས། ཐའེ་ཝན་གྱིས་དམངས་གཙོའི་ལེའུ་གསར་པ་ཞིག་བྲིས་པར་ཐུགས་རྗེ་ཆེ་ཞུ། ཐེངས་འདིའི་འོས་བསྡུའི་ཁྲོད་ནས་ང་ཚོའི་བླང་བྱ་ཆེན་པོ་གསུམ་བཏོན་ཡོད། དང་པོ། ཐའེ་ཝན་གྱིས་རྒྱལ་སྤྱིའི་སྤྱི་ཚོགས་ལ་དམངས་གཙོ་དང་དབང་ཤེད་རིང་ལུགས་བར་གྱི་ཁྱད་པར་བཤད་ཡོད། ཐའེ་ཝན་མི་མང་སྤྱི་མཐུན་རྒྱལ་ཁབ་དམངས་གཙོའི་ཕྱོགས་སུ་ལངས་ཏེ་བློ་སེམས་བརྟན་པོའི་ཐོག་ནས་མུ་མཐུད་དུ་ཤར་བསྐྱོད་བྱ་རྒྱུ་ཡིན། གཉིས་པ། ཐའེ་ཝན་གྱི་སྲིད་འཛིན་འོས་བསྡུའི་འགྲན་རྩོད་སྐབས་སུ་ཕྱི་ནང་གཉིས་ཀྱི་གནོན་ཤུགས་མང་པོ་སྤྲད་ཡོད་ཀྱང་། ཐའེ་ཝན་མི་མང་ཁོ་ནར་ཐའེ་ཝན་གྱི་སྲིད་འཛིན་འོས་འདེམས་བྱེད་པའི་ཐོབ་ཐང་ཡོད་པའི་ར་སྤྲོད་བྱས་ཡོད། གསུམ་པ། ང་ཚོས་རང་ཉིད་ཀྱི་བདམས་པའི་ཡང་དག་པའི་ལམ་ཁ་ལས་ཕྱིར་འཐེན་བྱེད་མི་སྲིད་ལ། ཐའེ་ཝན་གྱི་ཞི་བདེ་སྲ་བརྟན་གཏོང་བར་ཤུགས་སྣོན་རྒྱག་རྒྱུ་ཡིན། ཞེས་གསུངས་འདུག
དེ་བཞིན་ཕྱོགས་འགལ་ཚོགས་པའི་སྲིད་འཛིན་འོས་མི་ཧུག་ཡུག་ཡེ་ལགས་ཀྱིས། ཐེངས་འདིའི་འོས་བསྡུའི་འགྲན་རྩོད་ཁྲོད་རང་ཉིད་ཀྱི་ཧུར་བརྩོན་གྱིས་མ་འདང་བར་བློ་འགྱོད་བྱུང་ཡོད་ཅིང་། ངས་ལྷག་བསམ་རྣམ་དག་གིས་རྒྱབ་སྐྱོར་བྱེད་མཁན་ཚང་མར་དགོངས་དག་ཞུ་རྒྱུ་ཡིན། ཞེས་དང་། ཐའེ་ཝན་མི་མང་གི་མཐར་ཐུག་གི་གདམ་ཀར་བརྩི་བཀུར་ཞུ་རྒྱུ་ཡིན། ཞེས་སྲིད་འཛིན་བདམས་ཐོན་བྱུང་བར་རྟེན་འབྲེལ་ཞུས་འདུག
ཐའེ་ཝན་གྲོས་ཚོགས་སུ་གྲོས་ཚོགས་འཐུས་མི་ཁྱོན་གྲངས་ ༡༡༣ ས་མིག་ཡོད་པ་ལས། དམངས་གཙོ་ཡར་ཐོན་སྲིད་དོན་ཚོགས་པར་གྲོས་ཚོགས་འཐུས་མི་གྲངས་ ༥༡ དང་། གོ་མིན་ཏང་སྲིད་དོན་ཚོགས་པར་གྲོས་ཚོགས་འཐུས་མི་གྲངས་ ༥༢ ། ཐའེ་ཝན་མི་མང་སྲིད་དོན་ཚོགས་པར་གྲོས་ཚོགས་འཐུས་མི་གྲངས་ ༨ ། སྲིད་དོན་ཚོགས་པ་མེད་པའི་གྲོས་ཚོགས་འཐུས་མི་ ༢ བཅས་ཐོབ་འདུག གྲོས་ཚོགས་འཐུས་མི་སྐབས་སྔོན་མ་དག་དང་བསྡུར་ན་དམངས་གཙོ་ཡར་ཐོན་ཚོགས་པའི་གྲོས་ཚོགས་འོས་མི་གྲངས་ ༡༠ ཉུང་དུ་སོང་ཡོད་འདུག
ཕྱི་ལོ་ ༢༠༢༣ ལོར་དམངས་གཙོ་ཡར་ཐོན་སྲིད་དོན་ཚོགས་པའི་སྲིད་འཛིན་འོས་མི་ལེ་ཆིན་ཏི་ལགས་དང་། ཞའོ་མེ་ཆིན་ལགས་སྲིད་འཛིན་གཞོན་པའི་འོས་མིར་ལངས་རྒྱུ་ཡིན་པའི་གསལ་བསྒྲགས་བྱས་རྗེས། རྒྱ་ནག་གཞུང་འབྲེལ་གྱི་གསར་འགྱུར་བརྒྱུད་ལམ་ཁག་ཏུ་དམངས་གཙོ་ཡར་ཐོན་ཚོགས་པའི་སྲིད་འཛིན་འོས་མི་ལེ་ཆིན་ཏི་དང་མི་ཞའོ་མེ་ཆིན་གཉིས་ལ་སྐྱོན་བརྗོད་ཤུགས་ཆེན་བྱས་ཡོད་པ་མ་ཟད། ཐའེ་ཝན་རང་བཙན་ནི་དམག་འཁྲུག་ཅིག་ཡིན་པ་དང་། ཁོང་གཉིས་ཀྱིས་ཐའེ་ཝན་རང་བཙན་ཁྱབ་བསྒྲགས་ཤུགས་ཆེན་བྱས་ནས་དཀའ་རྙོག་བཟོ་བཞིན་ཡོད་ཚུལ་བསྒྲགས་ཡོད་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
