དེ་རིང་༧གོང་ས་རྒྱལ་བ་རིན་པོ་ཆེ་མཆོག་ནས་ཐའེ་ཝན་གྱི་སྲིད་འཛིན་གསར་པ་སྐུ་ཞབས་ལེ་ཆིན་ཏི་མཆོག་ལ་འཚམས་འདྲིའི་གསུང་འཕྲིན་བསྩལ་གནང་འདུག
ཁ་སང་ཐའེ་ཝན་སྲིད་འཛིན་གྱི་འོས་བསྡུའི་ཁྲོད་སྐུ་ཞབས་ལེ་ཆིན་ཏི་ (Lai Ching-te) མཆོག་སྲིད་འཛིན་གསར་པར་འོས་འདེམས་བྱུང་བར་བརྟེན། དེ་རིང་༧གོང་ས་རྒྱལ་བ་རིན་པོ་ཆེ་མཆོག་ནས་སྐུ་ཞབས་ལི་ཆིན་ཏི་མཆོག་གི་མཚན་ཐོག་ཏུ་གནང་བའི་འཚམས་འདྲིའི་གསུང་འཕྲིན་ནང་། ད་ལྟའི་ཆར་ཐའེ་ཝན་ནང་དམངས་གཙོའི་ལམ་ལུགས་ཉམས་ལེན་བྱེད་བཞིན་པ་མཐོང་དུས། རང་དབང་དང་ཆེ་མཐོང་གི་རྗེས་སུ་སྙེག་བཞིན་པ་རྣམས་ལ་བློ་སྤོབས་སྐྱེད་པའི་འབྱུང་ཁུངས་དོན་དམ་པ་ཞིག་རེད། ངོས་རང་ཐའེ་ཝན་ནང་ཕྱིན་སྐབས་ཐའེ་ཝན་མི་མང་གིས་སྣེ་ལེན་ཟབ་རྒྱས་ཞུས་སོང་། སྐབས་དེར་ཐའེ་ཝན་ནང་དམངས་གཙོའི་ལམ་ལུགས་སྲ་བརྟན་དུ་གནས་ཡོད་པ་མཐོང་བྱུང་། ཐའེ་ཝན་མི་མང་ཡར་རྒྱས་དང་དམངས་གཙོའི་ཤེད་ཤུགས་ཆེ་རུ་ཕྱིན་པ་ཙམ་མིན་པར། ཡུལ་དེའི་དཔལ་འབྱོར་དང་ཤེས་ཡོན་ཐོག་ཡར་རྒྱས་ཤུགས་ཆེན་ཕྱིན་པ་མ་ཟད། རྒྱུན་སྲོལ་གྱི་རིག་གཞུང་ཕུན་སུམ་ཚོགས་པ་རྣམས་མི་ཉམས་རྒྱུད་འཛིན་བྱེད་བཞིན་འདུག ཅེས་གསུངས་འདུག
ཡང་༧མགོན་པོ་གང་ཉིད་མཆོག་ནས། ཐའེ་ཝན་གྱི་ནང་པ་དད་ལྡན་པ་རྣམས་ཀྱིས་ནང་པ་སངས་རྒྱས་པའི་ཆོས་ལ་དད་གུས་ཆེན་པོ་བྱེད་བཞིན་པར་ཡིད་སྨོན་སྐྱེ་ཡི་ཡོད། ངོས་རང་ནང་པའི་དགེ་འདུན་པ་ཞིག་ཡིན་པའི་ཆ་ནས། ངོས་ནས་ཁོང་རྣམས་ལ་ནང་ཆོས་འཆད་ཁྲིད་དང་ཆོས་ཕྱོགས་ཀྱི་ལམ་སྟོན་དུས་ནས་དུས་སུ་བསླབ་རྒྱུའི་འབད་བརྩོན་གང་ཐུབ་ཞུ་ཡི་ཡོད། ཅེས་དང་། ཐའེ་ཝན་དང་རྒྱ་ནག་མི་དམངས་སྤྱི་མཐུན་རྒྱལ་ཁབ་གཉིས་བར་གྱི་འབྲེལ་ལམ་ལེགས་པོ་བསྐྲུན་རྒྱུ་གལ་ཆེ་ཤོས་ཡིན་པ་དང་། ས་གནས་དང་རྒྱལ་ཁབ། རྒྱལ་སྤྱིའི་ཚོགས་སྡེ་ཁག་གིས་གྲོས་མོལ་གྱི་ལམ་ནས་རྩོད་རྙོག་ཞི་འགྲིག་ཡོང་རྒྱུར་ཡིད་ཆེས་བརྟན་པོ་ཡོད། ཅེས་གསུངས་འདུག
མཐའ་དོན་དུ་༧མགོན་པོ་གང་ཉིད་ནས། སྐུ་ཞབས་ལེ་ཡིས་ཐའེ་ཝན་མི་མང་གི་རེ་བ་དང་མངོན་འདོད་རྣམས་བསྒྲུབ་པར་བྱ་གཞག་རྣམས་ལམ་ལྷོངས་ཡོང་བའི་ཐུགས་སྨོན་མཛད་འདུག
སྐུ་ཞབས་ལེ་ཆིན་ཏི་མཆོག་ནི་ཕྱི་ལོ་ ༡༩༥༩ ཟླ་ ༡༠ ཚེས་ ༦ ཉིན་ཐའེ་པའེ་རྫོང་གི་བྱང་ཁུལ་དུ་སྐྱེས་ཤིང་། རྡོ་སོལ་བསྔོག་འདོན་གྱི་ཁྱིམ་ཚང་ཞིག་ཏུ་སྐྱེས། ཆུང་དུས་ཐའེ་པའེ་གྲོང་ཁྱེར་དུ་སློབ་གྲྭར་འགྲིམས་རྗེས། ཐའེ་ནན་ (Tainan) དུ་ཡོད་པའི་རྒྱལ་ཡོངས་ཁྲིན་ཁུང་གཙུག་ལག་སློབ་ཆེན་(National Cheng Kung Univertsity) དུ་སློབ་སྦྱོང་བྱས། དེ་ནས་ཐའེ་པའེ་རུ་ཡོད་པའི་ཐའེ་ཝན་རྒྱལ་ཡོངས་མཐོ་རིམ་སློབ་གཉེར་ཁང་དུ་སློབ་སྦྱོང་གནང་རྗེས། (Harvard) གཙུག་ལག་སློབ་ཆེན་དུ་མང་ཚོགས་ཀྱི་འཕྲོད་བསྟེན་ཐོག་ལ་གཙུག་ལག་རབ་འབྱམས་པའི་སློབ་སྦྱོང་བྱས། ཕྱི་ལོ་ ༢༠༡༠ ཟླ་ ༡ པོའི་ནང་དམངས་གཙོ་ཡར་ཐོན་ཚོགས་པའི་ (Democratic Progressive Party)ཚོགས་མི་ཆགས་རྗེས། ༢༠༡༠ ལོའི་ཟླ་ ༡༡ ནང་ཐའེ་ནན་གྲོང་སྡེའི་སྤྱི་ཁྱབ་ལ་བདམས་ཐོན་བྱུང་། ལོ་དེའི་ཕྱི་ཟླ་ ༡༢ ཚེས་ ༢༥ ཉིན་གྲོང་སྡེའི་སྤྱི་ཁྱབ་ཀྱི་ལས་དོན་མགོ་བཙུགས། ཁོང་ནི་ཐའེ་ཝན་གྱི་སྲིད་དོན་པ་དང་། སྨན་པ་ (physician) ཟུར་པ་ཞིག་ཡིན་པ་མ་ཟད། ད་ལྟའི་ཆར་ཐའེ་ཝན་གྱི་སྲིད་འཛིན་གཞོན་པའང་ཡིན་འདུག་ལ། འདི་ལོའི་ཕྱི་ཟླ་ ༥ ཚེས་ ༢༠ ཉིན་སྲིད་འཛིན་གྱི་ལས་འཁུར་དངོས་སུ་མགོ་འཛུགས་གནང་རྒྱུ་ཡིན་པ་རེད།
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
