ཉི་ཧོང་གཞུང་གིས་རྒྱ་ནག་གི་དབང་ཤུགས་འགོག་སྲུང་སླད་དམག་དོན་གྱི་ནུས་པ་ཇེ་མཐོར་གཏོང་མགོ་བཙུགས་ཡོད་འདུག
ཁ་སང་ཕྱི་ཚེས་ ༡༥ ཉིན་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་ཐོན་པའི་གནས་ཚུལ་ལྟར་ན། ཉི་ཧོང་རྒྱལ་ཁབ་ཀྱིས་མཐའ་མཚམས་སྲུང་སྐྱོབ་དང་བདེ་འཇགས་སོགས་ཀྱི་ཐོག་ནས་འགྲོ་སོང་ཕོན་ཆེན་བཏང་སྟེ། དམག་དོན་མཚོན་པའི་མཐའ་མཚམས་སུ་རྒྱལ་སྲུང་དམག་མི་ཇེ་མང་དུ་བཏང་ཡོད་པ་མ་ཟད། ཕྱོགས་ཡོངས་ནས་རྒྱ་ནག་གཞུང་གི་སུན་གཙེར་ལ་འགོག་སྲུང་ནན་མོ་དང་། ཨེ་ཤ་ཡ་ཁུལ་དུ་རྒྱ་ནག་གི་དབང་ཤུགས་སྐྱེད་པར་རྒོལ་ལན་སློག་གིན་ཡོད་འདུག
དེ་འབྲེལ་ཉི་ཧོང་གི་རྒྱལ་སྲུང་ལྷན་ཁང་གིས། ཉི་ཧོང་གི་དཔུང་དམག་གིས་མཐུན་ཕྱོགས་རྒྱལ་ཁབ་ཁག་དང་ལྷན་མུ་མཐུད་དུ་ལས་ཀ་བྱ་རྒྱུ་ཡིན་པའི་དམ་བཅས་པ་དང་། བྱང་ཀོ་རི་ཡ་ལ་དམིགས་ཏེ་མེ་ཤུགས་འཕུར་མདའ་ཅན་གྱི་དམག་གྲུ་བཀོད་སྒྲིག་བྱས་ཡོད་ཅིང་། རྩོད་རྙོག་ཆེ་བའི་བྱང་ཀོ་རི་ཡའི་བྱ་སྤྱོད་ལ་བརྟེན་ནས་སྒྱོགས་མདེལ་དེ་གྲ་སྒྲིག་བྱས་པ་ཞིག་ཡིན་ཡང་། རྒྱ་ནག་ལ་མཚོ་གྲུ་ཅན་གྱི་མེ་ཤུགས་འཕུར་མདའ་གཏོང་ཉེན་ཡོད་སྲིད་སྐོར་དང་། ཊོག་ཡོའི་གཞུང་གིས་ས་མཚོ་གནམ་གསུམ་དུ་ཨེ་ཧྥི་ ༡༥ (F-15) རྟགས་ཅན་གྱི་དམག་དོན་གནམ་གྲུ་དང་རྒྱལ་ཁབ་ཀྱིས་བཟོ་སྐྲུན་བྱས་པའི་མཁའ་དམག་གནམ་གྲུ་དང་མཚོ་གྲུ། མེ་ཤུགས་འཕུར་མདའ་སོགས་ཚུད་པའི་ཉེན་ཚབས་ཆེ་བའི་མཚོན་ཆ་ (lethal weapons) དེ་དག་ཕྱི་ཚོང་བྱ་རྒྱུའི་ཐག་གཅོད་ཀྱང་བྱས་ཡོད་འདུག
དེ་བཞིན་ཨ་རིའི་མཚོ་དམག་ལྟེ་གནས་ཁང་ (US Naval Institute) གིས་ཞིབ་འཇུག་བྱས་པ་བརྒྱུད། འདས་ལོར་དམག་མིའི་ཆེད་དུ་འགྲོ་གྲོན་བརྒྱ་ཆ་ ༡༦ གམ་ཆ་སྙོམས་ཨ་སྒོར་ཐེར་འབུམ་ ༥༦ བཏང་ཡོད་པ་ཤེས་རྟོགས་བྱུང་འདུག་ལ། མ་འོངས་པར་ཉི་ཧོང་གིས་གནམ་དམག་སྲུང་སྐྱོབ་སླད་མེ་ཤུགས་འཕུར་མདའ་དང་། ཉི་ཧོང་གི་ལྷོ་ནུབ་གླིང་ཕྲན་སྲུང་སྐྱོབ་སོགས་ཀྱི་ཆེད་དུ་ཆ་སྙོམས་ཨ་སྒོར་ཐེར་འབུམ་ ༥།༢ ཙམ་གཏང་རྒྱུའི་འཆར་གཞི་ཡོད་འདུག
འདས་ལོའི་ཕྱི་ཟླ་ ༡༢ ནང་ཨ་རིས་རྒྱ་ནག་ཚུད་པའི་འཛམ་གླིང་གི་མི་སྒེར་དང་ཚོགས་སྡེ་ ༢༥༠ ལྷག་ནས་ཨུ་རུ་སུའི་ཡུ་ཁུ་རེན་ལ་བཙན་འཛུལ་བྱེད་པར་མཐུན་སྦྱོར་བྱས་སྟབས་སྲིད་དོན་དང་དཔལ་འབྱོར་གྱི་ཉེས་ཆད་བཅད་དེ། ཨ་རིའི་མཐུན་ཕྱོགས་རྒྱལ་ཁབ་རྣམས་ཀྱིས་རྒྱ་ནག་དང་ཚོང་འབྲེལ་མཚམས་འཇོག་དགོས་པའི་རེ་སྐུལ་ཞུས་པ་མ་ཟད། རྒྱ་ནག་གི་བཟོ་ཚོང་ཁང་དང་བཟོ་གྲྭ་ཁག་ཅིག་ལ་ཉེས་ཆད་བཅད་འདུག་ལ། རྒྱ་ནག་གིས་ཀྱང་ཨ་རིའི་གོ་མཚོན་དང་འབྲེལ་བའི་བཟོ་གྲྭ་ཁག་གིས་རྒྱ་ནག་གི་ནང་སྲིད་ལ་ཐེ་གཏོགས་བྱེད་ཀྱི་ཡོད་པའི་ངོས་འཛིན་འོག་ཉེས་ཆད་བཏང་བ་དང་། ཨ་རིའི་དཔོན་རིགས་སོགས་ལ་དཔལ་འབྱོར་ཉེས་ཆད་བཅད་ཅིང་། ཕྱི་ལོ་ ༢༠༢༡ ལ་ལྷོ་རྒྱ་ནག་རྒྱ་མཚོའི་ཁུལ་དུ་མིས་བཟོས་གླིང་ཕྲན་འཛུགས་སྐྲུན་གྱི་ལས་འཆར་ནང་ཆ་ཤས་ཆེན་པོ་ལེན་མཁན་གྱི་གཞུང་གཉེར་རྒྱ་ནག་གི་འགྲིམ་འགྲུལ་འཛུགས་སྐྲུན་བཟོ་གྲྭ་ (China Communications Construction Company) ཞེས་པ་དེ་དང་དེའི་ཡན་ལག་བཟོ་གྲྭ་ཁག་གིས་འཛམ་གླིང་ཁྱོན་ཡོངས་ནང་ལྐོག་ཟ་རུལ་སུངས་དང་། ཁོར་ཡུག་གཏོར་བཅོམ་གྱིས་མཚོན་པའི་ལས་ཀ་གཉེར་ཡོད་སྟབས། རྒྱ་ནག་གཞུང་ལ་གཞུང་གཉེར་བཟོ་གྲྭ་དེ་དག་བརྒྱུད་རྒྱ་བསྐྱེད་རིང་ལུགས་ལག་བསྟར་བྱེད་འཇུག་གི་མེད་སྐོར་སོགས་བརྗོད་དེ་རྒོལ་ལན་བསློགས་ཡོད་པ་རེད།
གཞན་ཡང་། ཉེ་ལམ་རྒྱ་ནག་ནང་དཔལ་འབྱོར་གྱི་ཉམས་རྒུད་ཤུགས་ཆེན་འགྲོ་བཞིན་ཡོད་པ་མ་ཟད། འདས་པའི་ལོ་ཤས་རིང་རྒྱ་ནག་གི་དཔལ་འབྱོར་ཉམས་ཉེས་ཆེན་པོ་ཐེབས་ཡོད་པར་བརྟེན། དཔལ་འབྱོར་རིག་པའི་ཆེད་མཁས་པ་ཁག་ཅིག་གིས། རྒྱ་ནག་གི་རྒྱལ་ནང་གི་ཐོན་སྐྱེད་གྱི་འགྲོ་རྒྱུག་ཉུང་བ་དང་། སྒེར་གྱི་ཚོགས་པ་ཁག་གིས་མ་འཛུགས་ཤུགས་ཆེན་བྱས་རྐྱེན། རྒྱལ་ཁབ་ཀྱི་དཔལ་འབྱོར་ཡར་རྒྱས་ལྷོད་དུ་ཕྱིན་ཏེ་དཔལ་འབྱོར་གྱི་དཀའ་ངལ་ཚབས་ཆེན་འཕྲད་ཉེན་ཡོད་པའི་ཚོད་དཔག་བྱེད་བཞིན་འདུག
གསར་འགོད་པ། བསྟན་འཛིན་ཕུར་བུ།
