བཀྲས་མཐོང་ལྷ་སྒྲོན་ལགས་སུ་རྒྱལ་སྤྱིའི་ཆོས་དད་རང་དབང་གི་གཟེངས་རྟགས་གནང་། 

བོད་དོན་ལས་འགུལ་བསྟི་གནས་ཁང་གི་འགན་འཛིན་བཀྲས་མཐོང་ལྷ་སྒྲོན་ལགས་སུ་ཨ་རིའི་ཕྱི་སྲིད་ལྷན་ཁང་གི་ཕྱི་ལོ་ ༢༠༢༣ ལོའི་རྒྱལ་སྤྱིའི་ཆོས་དད་རང་དབང་གི་གཟེངས་རྟགས་གནང་ཡོད་འདུག

དེ་རིང་ཕྱི་ཚེས་ ༡༩ ཉིན་ཨ་རིའི་ཕྱི་སྲིད་ལྷན་ཁང་གི་ཕྱི་ལོ་ ༢༠༢༣ ལོའི་རྒྱལ་སྤྱིའི་ཆོས་དད་རང་དབང་གི་གཟེངས་རྟགས་ (The Secretary of State’s International Religious Freedom Awards) དེ་བོད་དོན་ལས་འགུལ་བསྟི་གནས་ཁང་གི་འགན་འཛིན་བཀྲས་མཐོང་ལྷ་སྒྲོན་ལགས་སུ་གནང་ཡོད་ཅིང་། ཁོང་མོས་སྣེ་ཁྲིད་ཀྱི་འོག་ནས་འགྲོ་བ་མིའི་ཐོབ་ཐང་ལ་བརྩི་སྲུང་དང་། བོད་མིའི་གཞི་རྩའི་འགྲོ་བ་མིའི་ཐོབ་ཐང་ལ་རྩོད་ལེན་བྱེད་བཞིན་ཡོད་པའི་ངོས་འཛིན་དང་བསྔགས་བརྗོད་གནང་འདུག་ལ། གཟེངས་རྟགས་སྤྲད་པའི་མཛད་སྒོའི་ཐོག ཨ་རིའི་སྐུ་ཚབ་དོན་གཅོད་རྣམ་རྒྱལ་ཆོས་སྒྲུབ་ལགས་དང་། རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་གཞོན་པ་བུ་ཆུང་ཚེ་རིང་ལགས་སོགས་ཕེབས་ཡོད་འདུག

གནད་དོན་དེ་དག་དང་འབྲེལ་ནས་ཨ་རིའི་ཆོས་ལུགས་དད་མོས་རང་དབང་ལས་ཁུངས་(Office of International Religiious Freedom) ཀྱི་ཨེག་སི་(X) དྲ་ལམ་སྟེང་། བཀྲས་མཐོང་ལྷ་སྒྲོན་ལགས་ཀྱིས་མཉམ་ལས་ཐད་རོགས་འདེགས་བྱས་ཡོད་པ་མ་ཟད། འཕྲུལ་རིག་གི་བཙན་གནོན་ལ་མ་ལྟོས་པར་འབྲེལ་ལམ་བཙུགས་ནས། རྒྱ་ནག་གཞུང་གིས་གྲངས་ཉུང་མི་རིགས་ཁག་གི་ཆོས་ལུགས་དད་མོས་རང་དབང་ལ་དྲག་གནོན་ཇི་ལྟར་བྱེད་ཀྱི་ཡོད་པ་འཛམ་གླིང་དུ་གསལ་སྟོན་བྱས་ཡོད། ཅེས་བྲིས་འདུག

ཕྱི་ལོ་ ༢༠༢༣ ལོའི་ཨ་རིའི་ཕྱི་སྲིད་ལྷན་ཁང་གི་རྒྱལ་སྤྱིའི་ཆོས་དད་རང་དབང་གི་གཟེངས་རྟགས་དེ། ནེའུ་ཛི་ལེན་ཌིའི་རྩོམ་པ་པོ་ཧྥ་རིད་ཨཱ་མིད་(Farid Ahmed)དང་། ན་ཇི་རི་ཡའི་ཁྲིམས་རྩོད་པ་ཀོ་ལ་(Kola Alapinni)། ཨི་རག་གི་འགྲོ་བ་མིའི་ཐོབ་ཐང་རྩོད་ལེན་པ་མིར་ཛཱ་(Mirza Dinnayi)། པ་ཀི་སི་ཐན་གྱི་ཆོས་དད་རང་དབང་གི་འཐབ་རྩོད་པ་པི་ཌར་(Peter Jacob)། ནེ་ཁོ་རཱ་གྷ་(Nicaragua) རྒྱལ་ཁབ་ཀྱི་འགྲོ་བ་མིའི་ཐོབ་ཐང་ལྟ་ཞིབ་པ་མར་ཐཱ་ (Martha Patricia Molina Montenegro)། དེ་བཞིན་ལྷོ་ཨ་ཧྥེ་རི་ཁའི་འགྲོ་བ་མིའི་ཐོབ་ཐང་ལྟ་ཞིབ་ཁང་(Johannesburg Holocaust and Genocide Center ) གི་འགན་འཛིན་ཊ་ལི་(Tali Nates) ལའང་སྤྲད་ཡོད་འདུག

བཀྲས་མཐོང་ལྷ་སྒྲོན་ལགས་ཀྱིས་ཕྱི་ལོ ༢༠༠༢ ནས་༢༠༠༩ བར་བོད་རང་བཙན་སློབ་ཕྲུག་ཚོགས་པའི་འགན་འཛིན་གནང་ཡོད་ཅིང་། ཕྱི་ལོ་ ༢༠༠༨ ལོའི་ཨོ་ལིམ་ཕིག་རྩེད་འགྲན་སྐབས་རྒྱ་ནག་པེ་ཅིན་དུ་ཕྱིན་ནས་བོད་དོན་ལས་འགུལ་སྤེལ་བར་བརྟེན་རྒྱ་ནག་གཞུང་གིས་འཛིན་བཟུང་བྱས་ཏེ་ཕྱིར་ལོག་བཏང་ཡོད། ཕྱི་ལོ་ ༢༠༡༡ ལོར་ཁོང་མོར་རྒྱལ་སྤྱིའི་ཞི་བའི་རྩོད་རྙོག་འདུམ་སྒྲིག་ཁང་གི་འཚེ་མེད་ཞི་བའི་ལོ་འཁོར་གཟེངས་རྟགས་ཐོབ་འདུག ཕྱི་ལོ་ ༢༠༠༩ ལོར་བོད་དོན་ལས་འགུལ་བསྟི་གནས་ཁང་གསར་འཛུགས་གནང་སྟེ་བོད་ནང་གི་བོད་མིའི་གཞི་རྩའི་འགྲོ་བ་མིའི་ཐོབ་ཐང་གི་གནས་བབ་ལ་ཞིབ་འཇུག་གནང་བཞིན་ཡོད་པ་རེད།

ཨ་རིའི་ཕྱི་སྲིད་ལྷན་ཁང་གི་རྒྱལ་སྤྱིའི་ཆོས་དད་རང་དབང་གི་གཟེངས་རྟགས་དེ་ནི་ཕྱི་ལོ་ ༡༩༩༨ ལོ་ནས་སྤྲད་མགོ་བཙུགས་ཡོད་ཅིང་། འདས་པའི་མི་ལོ་ཉེར་ལྔ་ལྷག་རིང་འཛམ་གླིང་ནང་གི་ཆོས་དད་རང་དབང་གི་རྩོད་ལེན་པ། འགྲོ་བ་མིའི་ཐོབ་ཐང་རྩོད་ལེན་པ་དང་ལས་འགུལ་བ་རྣམས་ལ་གནང་ཡོད་འདུག

གསར་འགོད་པ། དཔལ་ལྡན།

རྩོམ་སྒྲིག་པ། པདྨ་མཚོ།